ꞌAbi Ibabataina Mamoe ꞌIma Hauna.
10
Iesu eꞌabi etibaha,
“ꞌAbi tohana au wai nahina benimi.
Hau ha mamoe parabuna paꞌabinai aꞌi nikatoto ia ara huanai nirobanai hauna hanona bainao mai kakikaki hauna.
2 Ia paꞌabiai nikatoto hauna hanona mamoe iꞌimana hauna.
Jesus the Good Shepherd (Ioane 10:1-21)
3 Paꞌabi ihaꞌinina hauna hanona paꞌabi nikaikauna hau weiana ꞌeuna ba ena mamoe hanona ia aiana tiona.
Ia ena mamoe ha ha atakia tohakia niaparinakia mai neꞌuai ainakia tikarahi.
4 Ia ena mamoe ikoikiai nibakarahi orenakia raninai,
wairakiai nikaꞌa weiana ena mamoe ia murinai tiꞌau pokina ia aiana teꞌiobina.
5 Maearima haeai ha murinai aꞌi kateꞌau ia katebeau ꞌakaumana,
pokina maearima weiana aiana aꞌi teꞌiobina.”
6 Iesu ꞌabi ibabatai neianai ehina benakia,
ꞌa ia taba eꞌuahina hauna obona aꞌi teobo ꞌapua.
Iesu Hanona Mamoe ꞌIma Hauna Namona.
7 Weiana buonai Iesu eꞌabi mue etibaha,
“ꞌAbi tohana au wai nahina benimi.
Au hauꞌu hanona mamoe ekia paꞌabi.
8 Weiakia ikoikiai temai ꞌuai haukia hanona bainao mai kakikaki haukia ua buonai mamoe ia aiakia aꞌi teona.
9 Au hauꞌu hanona paꞌabi,
hau ha au aoꞌuai nikatoto hauna hanona kemauri.
Ia hanona kekatoto mai kekarahi aniani ketabu ahina.
10 “Bainao hauna emai hanona kebainao,
keahuahu mai kebapururu paunai emai.
Au amai hanona mamoe mauri kateaꞌina mauri namona maikoinai kateaꞌina.
11 Au hanona mamoe ꞌima hauna namoꞌu,
mamoe ꞌima hauna namona hanona ena mauri kebaibeni ena mamoe paukiai.
12 ꞌAra tabu hauna hanona mamoe ꞌima hauna tohana ahaꞌi,
mamoe abomo ia ꞌeuna ahaꞌi,
ua buonai waeha ꞌaki nimai neihana raninai ia mamoe nihabonakia nibeau ꞌakaumana,
ba waeha ꞌaki mamoe neꞌurinakia tibeau otaraina.
13 Hau weiana nibeau ꞌakaumana pokina ia hanona ꞌara tabu hauna mai mamoe robakia aꞌi niahuna.
14 “Au hanona mamoe ꞌima hauna namoꞌu,
au hanona eꞌu mamoe aꞌiobinakia mai eꞌu mamoe abomo teꞌiobinaꞌu.
15 Ihobona mo Hamaꞌu au eꞌiobinaꞌu au Hamaꞌu aꞌiobina,
ba eꞌu mauri kabaibeni eꞌu mamoe paukiai.
16 Au hanona eꞌu mamoe haeai baika,
weiakia hanona parabu neiana aonai ahaꞌi,
weiakia abokiamo kamaiainakia ia abomo aiaꞌu kateona,
weia mamoe toꞌuna kehamomo mai mamoe ꞌima hauna hamona.
17 Hamaꞌu niraonaꞌau ainaꞌu pokina au eꞌu mauri nabaibeni,
haeamona au kahore kaꞌi muena.
18 Hau ha hereꞌuai eꞌu mauri aꞌi keaꞌi boina,
ꞌa au kipoꞌu eꞌu nuataeai eꞌu mauri nabaibeni.
Au mai eꞌu hiabu eꞌu mauri kabaibeni mai eꞌu hiabuai eꞌu mauri haeamona kaꞌi muena.
Hamaꞌu ebenaꞌu ꞌabina hanona weiana.”
19 ꞌAbi neiakia paukiai Iuda haukia baiatakia epaꞌa mue.
20 Maearima boꞌona teꞌabi tetibaha,
“Auba kiꞌa obona ia aonai nemiaho nibeau ꞌari.
Taba buonai ia aiana tuona?”
21 Ia baika teꞌabi tetibaha,
“ꞌAbi ṉa homakia hanona auba kiꞌa obona aonai nemiaho hauna ua aꞌi keꞌabi aiho.
Ba auba kiꞌa obona maha kiꞌa hauna mahana aꞌi kekaikaunakia.”
Iuda Haukia Iesu Tebakiꞌana.
22 Ba Ierusalema ai marea barobe iraonana tatuna ranina etaina,
weiana hanona iaia ranina.
Jesus accused of blasphemy (Ioane 10:22-42)
23 Ba Iesu hanona Marea robe aonai itara ha ahanai ekaꞌa,
weiana hanona Solomona ena itara.
24 Iuda haukia apaꞌuakia temai Iesu tekori kaiarona teꞌabi tetibaha,
“Aomai nubakaiꞌau kaiꞌauna,
aita raninai kohinabe harainamai?
Oi Keriso raninai mohinabe harainamai.”
25 Ba Iesu ekia ꞌabi ebamuena etibaha,
“Au wai aba ahina benimi,
ia wai hanona aꞌi tuaꞌikakauma.
Au Hamaꞌu atanai hiabu akakia ababainakia haukia hanona wairaꞌu tiaꞌi ahina.
26 Ba wai aꞌi tuaꞌikakaumanaꞌu pokina wai hanona au eꞌu mamoe ahaꞌi.
27 Eꞌu mamoe hanona aiaꞌu tiona.
Au aꞌiobinakia,
mai ia hanona muriꞌuai tikaꞌa.
28 Au mauri banaibanai nabenakia,
ia hanona aꞌi kateꞌari abomo hau ha imaꞌuai aꞌi keaꞌi boinakia.
29 Hamaꞌu mamoe weiakia ebenaꞌu hauna hanona taba ikoikiai etara haonakia,
hau ha Hamaꞌu imanai weiakia ha aꞌi keaꞌi boina.
30 Au mai Hamaꞌu tararua hanona hamomomai.”
31 Iuda haukia ꞌabi neiana teona raninai pihara teaꞌi taea ia kateahu ꞌarina.
32 ꞌA Iesu ehina benakia etibaha,
“Aka namokia boꞌokia Hamaꞌu herenai haukia abaihanimi,
aka neiakia aeana hauna paunai piharai katoahunaꞌu?”
33 Ia ena ꞌabi tebamuena tetibaha,
“Ai piharai katahuniꞌo hanona aka namokia nubabai paunai ahaꞌi,
ia Tirama nuꞌabi kiꞌaina paunai,
pokina oi hanona maearima ꞌabaeamu ia mo oi kipomu Tiramai nubaoniꞌo.”
34 Iesu ekia ꞌabi ebamuena etibaha,
“Emi rauhubu aonai aba tererena,
Tirama eꞌabi,
‘Wai hanona tirama.’
35 Tirama ena ꞌabi emai herekiai haukia eaparinakia tirama,
ba Puka robena ꞌabina weiana hanona aꞌi keikabe.
36 Weiana Tirama ebarobenaꞌu mai euhunaꞌu amai hanopakai ba aꞌabi atibaha,
‘Au hanona Tirama Nahuna,’
raninai,
aehoma buonai tuꞌabi au Tirama naꞌabi kiꞌaina?
37 Hamaꞌu ena aka aꞌi pababaina raninai aꞌi pato aꞌikakaumanaꞌu.
38 Ia Hamaꞌu ena aka nababai raninai,
wai aꞌi tuaꞌikakaumanaꞌu reꞌa ia aka weiakia nababai haukia tomo aꞌikakaumanakia.
Weianai wai katoꞌiobina mai obokia katobo Hamaꞌu hanona au aoꞌuai mai au hanona Hamaꞌu aonai.”
39 Weiana Iuda haukia apaꞌuakia taeara tetabu mue Iesu katebirina.
Ia hanona herekiai ekaobo.