3 ꞌEka weiakiai inawa haukia boꞌona ṯenoti,

maha kiꞌa haukia,

ꞌome haukia,

mero haukia,

(tibaiꞌima bei kebure bure.

4 Pokina rani ha ha aneru neriri obu beina nibabure burena,

murinai inawa hauna ha obuai keriri ꞌuai hauna ena inawa taba ia ninamo.)

5 Inawa hauna ha ꞌeka weianai ena inawa ihauna ikoinai harau aihau ꞌababani.

6 Iesu ehore inawa hauna weiana enoti eihana raninai eꞌiobina ia hanona rani homaꞌana ua enoti aiho,

ba Iesu ia ebakaina etibaha,

“Oi nonuatae konamo,

u?”

7 Inawa hauna Iesu ena ꞌabi ebamuena etibaha,

“Hau apaꞌuana e,

bei nebure bure aonai au kebarainaꞌu hauna ha ahaꞌi buonai au nabahobona kariri aonai hau ha aba neꞌuai wairaꞌuai.”

8 Ba Iesu ia ehina bena etibaha,

“Momikiri,

emu ꞌire mouna moaꞌina mokaꞌa.”

9 Beronai hau weiana emauri mauri,

ba emikiri ena ꞌire eouna eaꞌina ekaꞌa.

Weiana hanona beraura robenai hoa neiana erama.

10 Ua buonai Iuda haukia apaꞌuakia hau weiana inawa ai enamo hauna tehina bena tetibaha,

“Bariu hanona beraura robena,

ia oi emu ꞌire obuana hanona eka rauhubu nukabena.”

11 Ia ekia ꞌabi ebamuena etibaha,

“Ebamaurinaꞌu hauna ehina benaꞌu etibaha,

‘Emu ꞌire moaꞌina mokaꞌa.’”

12 Ba ia tebakaina tetibaha,

“Hau tabana oi ehina beniꞌo,

‘Emu ꞌire moaꞌina mokaꞌa.’”

13 Emauri mauri hauna aꞌi eꞌiobina tai ia ebamaurina pokina Iesu abamo mako aokiai ehe toto ekaꞌa ꞌakaumana.

14 Muriai marea robe aonai Iesu hau weiana etabu ahina ehina bena etibaha,

“Aiaꞌu mona,

oi hanona aba omauri mauri,

aꞌi koaka kiꞌa mue,

taba kiꞌa obona ha heremuai aꞌi merama mue marikina.”

15 Ba hau weiana eao Iuda haukia apaꞌuakia herekia ehina benakia ia ebamaurina hauna hanona Iesu.

16 Ua buonai Iuda haukia apaꞌuakia hanona Iesu teꞌoatana pokina ia taba ikoikiai beraura robena aonai nibabainakia paunai.

17 Ia Iesu ehina benakia etibaha,

“Au Hamaꞌu hanona rani ikoinai niaka toꞌona emai mo bariu beraura neiana.

Au aboꞌumo ṉaka.”

18 ꞌAbi neiana paunai Iuda haukia apaꞌuakia hanona tenuatae kiꞌa baha Iesu kateahu ꞌarina.

Beraura robe rauhubuna nikabena paunai mo ahaꞌi ia Tirama niaparina hamana tohana ṉa nihoma abomo ia kipona Tirama ohi nibaihobonakia.

19 Weiana buonai Iesu ekia ꞌabi ṉa ebamue aihona,

“ꞌAbi tohana au wai nahina benimi.

Nahuna kipona ꞌeunai taba ha kebabaina hanona aꞌi ketaina.

Ia hanona Hamana nibabai akakia eihanakia weiakia mo kebabainakia.

Hamana nibabai haukia Nahuna abomo nibabai.

20 Pokina Hamana nihore Nahuna niraonaꞌau aina paunai nibabai haukia ikoinai nibaihana.

ꞌE,

neiakia mo ahaꞌi taba rarikia baika abomo kebaihana,

ba katoihana hanona katotaꞌutaꞌu huri.

21 Weiana Hamana nihore ꞌari haukia nibamikiri muenakia mauri nibenakia ihobonai mo Nahuna nihore nenuatae ainakia haukia mauri nibenakia.

22 Haeamona Hamana kipona tai ha aꞌi nibabakaina,

bakai ena hiabu maikoina aba Nahuna ebena.

23 Hamana timariki aina ihobonai ikoikiai Nahuna katemariki aina,

Nahuna aꞌi nimariki aina hauna hanona Hamana weiana Nahuna euhuna hauna abomo aꞌi nimariki aina.

24 “ꞌAbi tohana au wai nahina benimi,

aiaꞌu niona hauna mai euhunaꞌu Tiramana niaꞌikakaumana hauna hanona mauri banaibanai aba eaꞌina puma aꞌi kehoaina.

Ia hanona ꞌari aba ehabona ba aba mauri aonai etoto.

25 “ꞌAbi tohana au wai nahina benimi,

ꞌari haukia Tirama Nahuna aiana kateona ranina hanona aba nimai,

weiakia aiana tiona haukia ikoikiai hanona katemauri mue,

bariu ranina aba ekaraꞌau.

26 Hamana hanona mauri poki hauna,

ihobonai ia ehore Nahuna mauri pokinai ebaona.

27 Tirama ehore Nahuna bakai apaꞌuana keꞌuai aina hiabuna aba ebena pokina ia hanona Keriso Maearima Nahuna paunai.

28 Eꞌu ꞌabi neiana paunai aꞌi katotaꞌutaꞌu huri.

Ranina aba nimai weiakia ꞌariahakiai ṯemiaho haukia ikoikiai Nahuna aiana kateona,

29 ekia ꞌariahakiai katekarahi.

Weiakia namo tebabai haukia katemikiri mauri banaibanai kateaꞌina,

ba weiakia kiꞌa tebabai haukia katemikiri puma katehoaina.

30 “Au kipoꞌu euꞌuai taba ha kababaina hanona aꞌi ketaina.

Au aia naona hauna mo ihobonai nabakai,

ua buonai eꞌu bakai hanona ebero,

pokina au kipoꞌu eꞌu namo aꞌi natabuna,

ia euhunaꞌu hauna ena nuatae natabuna.

31 “Au kipoꞌu pouꞌu kahinana raninai,

eꞌu pou hina hanona aꞌi katebatohana.

32 Weiana au pauꞌuai pouꞌu nehinana hauna hanona haeai,

ba au aꞌiobina ia nehinana ꞌabina hanona tohana.

33 “Wai aba tobaiuhu Ioane herena ba ia ehore ꞌabi tohana pouna ehinana.

34 Au pouꞌu berona hanona maearima herekiai aꞌi nimai,

ia au Ioane ena batoha ꞌabina naꞌuahina hanona wai bamauri katotabu ahina paunai.

35 Ioane hanona eꞌara ea nibaibeni matoha lamepa ꞌabana,

ia wai hanona rani papana ena ea toaonamo aina.

36 “Au mai ibatohaꞌu hoana ha hanona Ioane ꞌeuna etara haona.

Nababai akakia neiakia Hamaꞌu ebenaꞌu kababai orenakia haukia tihore Hamaꞌu euhunaꞌu pouna ṯehinana.

37 Ba Hamaꞌu euhunaꞌu hauna Ia kipona ehore au pouꞌu ehinana.

Ia wai rani ha aiana aꞌi toꞌo ꞌapuana abomo wairana aꞌi toihana,

38 ꞌao ena ꞌabi abomo aomiai aꞌi nemiaho,

pokina ia euhuna hauna wai aꞌi tuaꞌikakaumana paunai.

39 “Wai Puka robena tumarereai haraina pokina wai turaonana weiana herenai mauri banaibanai katotabu ahina paunai.

Ia Puka robena neiana hanona au mo pouꞌu nehinana.

40 Wai katomai hereꞌu mauri katoaꞌina,

iamo ṯoubo aina.

41 “Au hanona maearima ekia banamo aꞌi ṉaꞌi taeanakia.

42 Au aꞌiobi harainimi,

aomiai Tirama iraonaꞌau aina aꞌi nemiaho.

43 Au aba Hamaꞌu atanai amai,

ia wai au aꞌi tuaꞌi taeanaꞌu.

Ia hau ha kipona atanai pemai raninai wai aba patoaꞌi taeana.

44 Wai kipomi emi banamo ha ha baiatamiai tutabunakia,

iamo Tirama ena banamo weiana ia ikupaiana herenai nimai hauna aꞌi tutabu ahina,

ua homana raninai aea katoaꞌikakauma aihonaꞌu?

45 “Ia aomiai aꞌi katoraonana au Hamaꞌu wairanai kababehonimi.

Ahaꞌi.

Wai kebabehonimi hauna hanona Mose ia ahanai wai emi buabeni ekori.

46 Wai Mose tuaꞌikakauma tohana raninai au abomo kato aꞌikakaumanaꞌu,

pokina ia hanona au pouꞌu ererena.

47 Ia ererena hauna aꞌi mo tuaꞌikakaumana raninai au eꞌu ꞌabi hanona aea katoaꞌikakauma aihona?”