Iesu Samaria Babiꞌena Ohi Teꞌabiꞌabi.
4
Parisea haukia pou teona hanona Iesu maearima boꞌona niaꞌinakia tiꞌabana mai nibaꞌuere robenakia ba Ioane baꞌuere robe hauna hanona bita mo eaꞌinakia.
2 Taba tohana hanona Iesu kipona aꞌi ebaꞌuere robe,
ia iꞌabana haukia tebaꞌuere robe.
Jesus speaks with a Samaritan woman (Ioane 4:1-42)
3 Iesu Parisea haukia pou teona hauna eꞌiobina raninai Iudea ehabona,
emue haeamona keao Galilea.
4 Ia bariu hanona Samaria haukia ekia hano aona kekana keao.
5 Ia emai Samaria aiarana ha atana Sukara,
aiara weiana herenai Iakobo ehore nahuna Iosepa hano ebena hauna herenai ekarahi.
6 Iakobo ena bei ꞌurina hanona weia,
ba Iesu taeara homaꞌana ekana buonai emahe obo bei ꞌurina haianai emiati.
Beraura hanona aba eatiaha.
7 Weiana Samaria babiꞌena ha emai ena bei kerai,
ba Iesu ehore enoina etibaha,
“Bei harua mobenaꞌu mainu.”
8 Ia iꞌabana haukia hanona aiara teao aniani katekawa.
9 Samaria babiꞌena ehore ia ehina bena etibaha,
“Oi hanona Iuda haumu ia au hanona Samaria babiꞌeꞌu,
ba aehoma buonai hereꞌuai bei inu nunoi aina?”
(Pokina Iuda maearimakia mai Samaria maearimakia ekia bahamomo hanona ahaꞌi.)
10 Iesu ehore ehina bena etibaha,
“Tirama ena beruberu poꞌiobina mai tai bei ninoi aina heremuai hauna poꞌiobina raninai,
herenai aba ponoina ba ia mauri beina pebeniꞌo.”
11 Babiꞌe eꞌabi etibaha,
“Hau apaꞌuamu e,
bei irai tabana heremuai ahaꞌi abomo bei ꞌurina neiana hanona eꞌoura.
Mauri beina weiana hanona aeꞌeai koaꞌina?
12 Ai ꞌabaꞌabamai Iakobo hanona bei ꞌurina neiana ebenamai,
ia kipona einu,
nahuna teinu,
ena mamoe mai poromakau abomo teinu,
ba oi Iakobo otara haona?”
13 Iesu ena ꞌabi ebamuena etibaha,
“Bei neiana ṯeinu haukia ikoinai hanona ꞌakokia kateꞌororo mue.
14 Ia au kabaibeni beina hau ha keinu hanona ꞌakona aꞌi keꞌororo ꞌapua.
ꞌAbi tohana,
au kabaibeni beina hanona ia aonai mauri beinai keao kebuti keharu haru mauri kebaibeni keaomo banaibanai.”
15 Babiꞌe ehore Iesu enoina etibaha,
“Hau apaꞌuamu e,
bei weiana mobenaꞌu,
ꞌakoꞌu aꞌi keꞌororo mue abomo bei rai neia aꞌi kamai mue.”
16 Iesu ia ehina bena etibaha,
“Moao atawamu koaparina torarua katomai.”
17 Babiꞌe eꞌabi etibaha,
“Au atawaꞌu ahaꞌi.”
Iesu ia ehina bena etibaha,
“Oi atawamu ahaꞌi ṉa nuhoma hanona obero.
18 Pokina oi atawamu ikoinai ima,
bariu heremuai nemiaho hauna hanona oi atawamu tohana ahaꞌi.
Bariu ohinana hauna hanona ꞌabi tohana.”
19 Babiꞌe eꞌabi etibaha,
“Hau apaꞌuamu e,
bariu aoꞌu aba ea,
oi hanona mahabanai haumu.
20 Ai kupumai hamamai hanona oeo neiana ahanai Tirama tekuti aina,
ia wai Iuda haumi tuꞌabi kuti ꞌekana hanona hamona Ierusalemai mo.”
21 Iesu eꞌabi etibaha,
“Babiꞌe e,
eꞌu ꞌabi moaꞌi taeana,
ranina nimaiaina aonai Hamaka katokuti aina hanona oeo neiana ꞌubinai ꞌao Ierusalemai mo ahaꞌi.
22 Wai Samaria haumi aꞌi toꞌiobina hauna ṯokuti aina,
ai Iuda haumai taꞌiobina hauna ṯakuti aina,
pokina Tirama ena bamauri taearana hanona Iuda haukia herekiai nimai.
23 Ranina aba nimai katekutiai tohana haukia hanona aubai mai aokia maikoinai Hamaka katekuti aina.
Bariu ranina aba ekaraꞌau.
Pokina Hamaka hanona ua ṯekutiai aihona haukia nenuatae ainakia.
24 Tirama hanona Auba,
ua buonai ṯekuti aina haukia hanona aubai mai aokia maikoinai katekuti aina.”
25 Babiꞌe eꞌabi etibaha,
“Au aꞌiobina Mesia bamauri hauna atana Keriso kemai,
ia kemai raninai taba ikoikiai kehina pou harai herekai.”
26 Ba Iesu ia ehina bena etibaha,
“Hauna mo au neiaꞌu bariu nahina beniꞌo.”
27 Rani weianai ia iꞌabana haukia temue temai hanona tetaꞌutaꞌu huri,
pokina Iesu teihana babiꞌe ha ohi tiꞌabiꞌabi.
ꞌA tai ha aꞌi ebakaina,
“Taba nonuatae aina?”
ꞌao “Aehoma buonai torarua tuꞌabiꞌabi?”
28 Ba babiꞌe ena puou ehabona emue noanoa eao aiarai maearima ehina benakia etibaha,
29 “Tomai hamaeao hau ha tomoihana eꞌu babai ꞌuainai ababai haukia ikoikiai ehina pou,
iamo taina Keriso mo paꞌe weiana?”
30 Ba maearima aiarai tekarahi Iesu herena teao.
31 Weiana aonai iꞌabana haukia Iesu tenoina tetibaha,
“Baꞌiobi haumu e,
aniani ha moana.”
32 ꞌA ia ehina benakia etibaha,
“Au mai eꞌu aniani kani weiana hanona wai aꞌi toꞌiobina.”
33 Ba iꞌabana haukia kipokia teꞌabiꞌabi tetibaha,
“Paꞌe maearima ha aniani emaiaina ebena.”
34 Iesu ehina benakia etibaha,
“Eꞌu aniani hanona euhunaꞌu hauna ena nuatae kababaina abomo ia ebenaꞌu akana kabaorena.
35 Wai tuꞌabi ‘nawa bani ṯemiaho ba ariari ranina ketaina.’
Ia au nahina benimi,
mahami tomobanoꞌa uma tomoiha harainakia,
aniani aba teꞌoru katearinakia.
36 Ariari hauna ꞌarana niaꞌina ba uma anianina nibararona mauri banaibanai ꞌekanai,
weiana buonai ibatona hauna mai iarina hauna terarua kateaonamo haeamo.
37 Tehinana ꞌabina hanona ꞌabi tohana,
‘Nibato bato hauna haeai ia niariari hauna abomo haeai.’
38 Au nauhunimi aꞌi toaroꞌari aina umanai aniani katoarina.
Baika uma weianai aroꞌarina aba tebabaina ba wai tuhore ekia aroꞌari anianina tuaꞌina.”
39 Aiara weiana aonai Samaria haukia boꞌona Iesu teaꞌikakaumana pokina babiꞌe ena batoha ꞌabina paunai,
babiꞌe etibaha,
“Ia ehore eꞌu babai ikoikiai ehina pounakia.”
40 Ua buonai Samaria maearimakia temai herena,
ia tenoina kipokia katemiaho,
ba Iesu wapu rua weia emiaho.
41 Weiana ena ꞌabi aiana teona aonai boꞌona haeamona teaꞌikakaumana.
42 Maearima weiakia babiꞌe tehina bena tetibaha,
“Ai bariu ṯaꞌikakaumana hanona oi oꞌabi hauna paunai ahaꞌi,
ia ai bariu kipomai haiamai taona abomo ai ṯaꞌiobina hau neiana ꞌabi tohana hanopaka ibamaurina hauna.”
Iesu Kabamani Hauna Apaꞌuana Nahuna Ebamaurina.
43 Wapu ibaruana eore murinai Iesu emikiri Galilea eao.
Jesus heals an officials son (Ioane 4:43-54)
45 Iesu Galileai ekaraꞌau raninai,
Galilea haukia teaꞌi taeana,
pokina ia abomo teao Ierusalemai weia Kabanai tatuna aonai taba ebabai mahakiai teihanakia paunai.
46 Iesu haeamona emue eao Galilea Kana aiarana uaꞌa bei eaꞌi banaina bine beinai eao.
Weia Kaperanauma aonai obia ꞌarana hauna ena maearima ha nahuna hauna papana einawa.
47 Hau weiana Iesu Iudeai emai Galileai pouna eona raninai,
ia eao Iesu herena enoina keao nahuna kebamaurina pokina ia aba keꞌari.
48 Iesu ehina bena etibaha,
“Wai hoa mai bataꞌu taꞌu huri hoakia aꞌi katoiha hanona aꞌi katoaꞌikakauma ꞌapua.”
49 Obia hauna eꞌabi etibaha,
“Hau apaꞌuana e,
hamariri hamaeao nahaꞌu hanona aba keꞌari.”
50 Iesu ia ehina bena etibaha,
“Moao,
nahumu hanona aba kemauri.”
Obia hauna Iesu ena ꞌabi ebatohana ekaꞌa.
51 Ia taeara weiana niao aonai ena taꞌaraꞌi haukia temai taearai tebaitabu ahi,
nahuna emauri hauna pouna tehinana.
52 Ia ebakai bakai beraura hoana tabanai nahuna emauri mauri,
ba ia tetibaha,
“Warani rabirabi beraura hoana hamona hanona emauri mauri.”
53 Hamana eraona tinana beraura hoana weianai hanona Iesu ia ehina bena etibaha,
“Nahumu hanona aba kemauri.”
Ua buonai ia mai ena itu haukia ikoikiai hanona teaꞌikakauma.
54 Neiana hanona Iesu bataꞌutaꞌu huri hoana ibaruana ebabaina weia Iuda ehabona emai Galilea aonai.