Iesu Nikodemo Ohi Teꞌabiꞌabi.
3
Parisea hauna ha atana Nikodemo ia hanona Iuda haukia ekia hau apaꞌuana ha.
2 Rabi ha ia eao Iesu herena ehina bena etibaha,
“Baꞌiobi haumu e,
ai ṯaꞌiobina oi hanona Tirama herenai omai.
Oi bataꞌutaꞌu huri hoakia nubabai hanona Tirama ia herenai ahaꞌi hauna ha aꞌi kebabaina hoakia oi nubabai.”
Jesus speaks with Nicodemus (Ioane 3:1-21)
3 Iesu ia ena ꞌabi ebamuena etibaha,
“ꞌAbi tohana au oi nahina beniꞌo,
maearima ha aꞌi kerama mue raninai ia hanona Tirama ena obia aiarana aꞌi keiha ꞌapuana.”
4 Weiana Nikodemo ebakai bakai etibaha,
“Maearima aba eapaꞌua raninai ia aea kerama mue aiho?
ꞌAbi tohana rani ibaruana ia hinana nuanai aꞌi ketoto mue haeamona aꞌi kerama.”
5 Iesu ia ena ꞌabi ebamuena etibaha,
“ꞌAbi tohana au oi nahina beniꞌo,
maearima hanona beiai mai Auba Robeai aꞌi kerama mue raninai ia hanona Tirama ena obia aiaranai aꞌi ketoto ꞌapuana.
6 Hauani nihore hauani nibaramana,
ia Auba Robe nihore auba nibaramana.
7 Ahina beniꞌo korama mue ꞌabina hauna aꞌi kobaoao aina.
8 Baura niabu nenuatae aina ꞌekanai niao,
ia oi hanona ꞌuruna mo nuona,
ia aeꞌeai nimai ꞌao aeana niao hanona aꞌi oꞌiobina.
Auba Robe ai terama haukia ikoinai abomo uamo homana.”
9 Nikodemo ehore ia ebakai muena etibaha,
“Taba neiakia aea katerama aiho?”
10 Iesu ia ehina bena etibaha,
“Oi hanona Isaraela ena baꞌiobi haumu apaꞌuana ha,
ia aehoma buonai taba neiakia obokia aꞌi nuobo?
11 ꞌAbi tohana au oi nahina beniꞌo,
ai ṯaꞌiobi haukia ṯahinanakia,
ai ṯaiha haukia ṯahina pounakia,
ia emai ꞌabi ṯahina pou haukia aꞌi tuaꞌi taeanakia.
12 Au nahore hanopaka tabakiai nahina benimi hanona aꞌi tuba tohanakia,
iamo kupa tabakiai kahina benimi raninai aea katobatoha aihonakia.
13 Maearima ha aꞌi ekaraꞌau ꞌapua kupa,
iamo au Maearima Nahuna ikupaiaꞌu mo kupai ariri amai.
14 Hanoꞌakunai Mose ꞌerau aubaubana eihi taeana ihobonai mo au Maearima Nahuna abomo kateihi taeanaꞌu.
15 Weiana tiaꞌikakaumanaꞌu haukia ikoinai hanona mauri banaibanai kateaꞌina.
16 “Pokina Tirama hanopaka eraonaꞌauai kiꞌa bahana paunai Nahuna hamohamona mo ebaibeni,
tiaꞌikakaumana haukia ikoikiai hanona aꞌi kateꞌari,
ia mauri banaibanai kateaꞌina.
17 Tirama nahuna euhuna hanopakai hanona puma kebaibeni paunai ahaꞌi,
ia paunai hanopaka ꞌarana kebamaurina.
18 Tiaꞌikakaumana haukia ikoikiai hanona puma aꞌi katehoaina,
ia aꞌi tiaꞌikakaumana haukia ikoikiai hanona aba puma tihoaina,
pokina Tirama Nahuna hamohamona atana aꞌi tiaꞌikakaumana paunai.
19 Bakai hanona ṉa eaka aiho.
Ea aba emai hanopaka aonai,
ꞌa maearima wapura ꞌarina tiꞌari ia ea tibakiꞌana,
pokina ekia hoahoa hanona tekiꞌa.
20 Weiana kiꞌa tibabai haukia ikoikiai ea tiꞌoatana ba aꞌi timai ea aonai pokina ekia hoahoa kiꞌa obokia aꞌi temewaira tina taꞌuna.
21 Ia aka beronai timauri haukia hanona timai ea aonai pokina ekia hoahoa Tirama aiana tikaꞌaina hauna katebawaira tinana.”
Ioane Ehore Iesu Pouna Ehinana.
22 Neiana murinai Iesu iꞌabana haukia kipokia tekarahi Iudea hanona teao,
ia weia kipokia temiaho beraura baika teao ba ebaꞌuere robe.
John testifies about Jesus (Ioane 3:22-36)
23 Ioane baꞌuere robe hauna abomo Salima abirana Aenona ai ebaꞌuere robe pokina weia hanona bei rarina mai maearima teao ebaꞌuere robenakia.
24 Weiana hanona Ioane wapura ꞌekanai aꞌi tekaiabu bahana aonai.
25 Ba Ioane iꞌabana haukia baika mai Iuda hauna ha kipokia teꞌabi baitaeai ekia hoahoa weiana Tirama wairanai katebamaha mahana hauna paunai.
26 Ua buonai ia temai Ioane herena tehina bena tetibaha,
“Baꞌiobi haumu e,
hau weiana Ioridana atena abiranai kipokia tomiaho pouna ohinana hauna ia bariu nibaꞌuere robe,
ba maearima ikoinai tiao herena.”
27 Ioane ekia ꞌabi ebamuena etibaha,
“Maearima hanona Tirama kebaibeni hauna mo ketabu ahina.
28 Wai kipomi abomo aba tubatohanaꞌu au aba ahina benimi,
‘au hanona Keriso ahaꞌi,
ia au hanona euhu ꞌuainaꞌu ia wairanai.’
29 Hawainibe mahamahana babiꞌena weiana hanona ia niatawana hauna ꞌeunai,
ba hawainibe mahamahana hauna ena hau ia herenai nikoroti hauna hanona aiana niona raninai aonamo niꞌopu abuna.
Aonamona neiana hanona au ꞌeuꞌu,
ba bariu aoꞌuai aba ebonu.
30 Ia hanona keapaꞌua keaoaina,
ia au hanona kaꞌaeraꞌaera kaeaoaina.”
31 “ꞌUbiai emiaho ba emai hauna hanona taba ikoikiai ꞌubikiai,
ia hanopakai erama hauna hanona hanopaka ꞌeuna,
ena ꞌabiꞌabi ai hanopaka mo robana keahuna.
Kupai emai hauna hanona taba ikoikiai ꞌubikiai.
32 Ia eiha mai eoꞌo tabakia poukia nehinanakia,
ia ena ꞌabi hau ha aꞌi niaꞌi taeanakia.
33 Ia ena ꞌabi eaꞌi taeana hauna hanona ebatohana Tirama hanona ꞌabi tohana hauna.
34 Tirama euhuna hauna hanona Tirama ena ꞌabi nehinana,
pokina Tirama ehore ia aonai Auba Robe nibabonu ꞌauna.
35 Hamana ehore nahuna niraonaꞌau aina taba ikoikiai ia imanai eutanakia.
36 Nahuna niaꞌikakaumana hauna hanona mauri banaibanai eaꞌina,
ia nahuna nibaoao aina hauna hanona mauri aꞌi keiha ꞌapuana,
ia Tirama ena opuere ia ahanai nemiaho.”