Kupukia Ekia Baꞌiobi.
7
Parisea mai rauhubu poki haukia baika Ierusalemai temai Iesu herenai tetoꞌu.
Mareko 7.1-23
2 Aonai Iesu iꞌabana haukia baika imakia aꞌi teutu,
mai ꞌopukia teaniani,
weiana hanona Iuda ekia hoahoai aꞌi ebero Parisea haukia wairakiai.
3 Parisea mai Iuda haukia ikoikiai hanona aꞌi tianiani ꞌabaea,
ia ekia babai ihobonai imakia ṯeutu ꞌuai ba tianiani kupukia ꞌabaꞌabakia ekia hoahoa ihobona.
4 Kawakawa ꞌekakiai timai raninai ekia kawakawa tabakia aꞌi tiani baha,
ia ṯeutu ꞌuainakia mai ia abokiamo ṯeꞌuere ba tianiani.
Kupukia ekia rauhubu boꞌona abomo ṯeꞌima harainakia matoha ꞌere,
uro ꞌao puou iutukia ꞌabana.
5 Ua buonai Parisea mai rauhubu poki haukia Iesu tebakaina tetibaha,
“Iꞌabamu haukia kupuka ꞌabaꞌabaka tebabai akakia aꞌi tibabai,
aehoma buonai imakia mai ꞌopukia tianiani?”
6 Iesu ekia ꞌabi ebamuena etibaha,
“Isaia ena mahabanaiai wai bahaorea haumi robami eahuna.
Ṉa erere aihona.
‘Maearima neiakia hanona
pinakiai mo Au tibanamonaꞌu.
ꞌA aokia tohana hanona
atauꞌa ꞌakinai.
7 Ṯekutiai ꞌabaeanaꞌu mo,
pokina rauhubu neiakia
maearima tibaꞌiobinakia hanona
maearima tebabai rauhubukia.’ Isa 29.13
8 Wai hanona Tirama ena rauhubu aba tohabonakia,
ꞌa maearima ekia rauhubu mo tuaꞌi ꞌininakia.”
9 Haeamona ehina benakia etibaha,
“Wai emi aotipai Tirama ena rauhubu ṯobunina,
kipomi emi hoahoa tuaꞌi ꞌininakia.
10 Pokina Mose eꞌabi etibaha,
‘Hamamu hinamu komariki ainakia’,
ꞌa ‘hau ha hamana ꞌao hinana herenai keꞌabi kiꞌa hauna hanona katoahu ꞌarina.’
11 Ia wai tuꞌabi ṯotibaha,
‘Hau ha hamana ꞌao hinana kehina bena,
barai barai tabakia pabenimi ia aba Koban.’
(Koban anina hanona ‘Beruberu tabakia Tirama ꞌeuna’.)
12 Ua buonai maearima turauhubunakia,
hamakia hinakia aꞌi katebarainakia.
13 Hoahoa neiana tubabai hanona wai kipomi emi ꞌiobiai maearima tubaꞌiobinakia,
Tirama ena ꞌabi ṯobunina.
Weiana mo ahaꞌi,
ia uahomakia boꞌokia tubabai.”
Maearima Nibaꞌopuna Tabana.
14 Haeamona Iesu mako eapari muenakia teao herena,
ehina benakia etibaha,
“Ikoimiai katobahu,
katoꞌiobi haraina.
15 Taba weiana atapakai nitoto maearima aonai hauna maearima aꞌi nibaꞌopuna,
ia taba weiana maearima aonai nikarahi hauna maearima nibaꞌopuna.
16 Mai haiana hauna aia keona.”
17 Iesu toꞌu haukia ehabonakia ituai etoto raninai iꞌabana haukia teao herena,
ꞌabi ibabatai weiana anina tebakai bakai aina.
18 Iesu ehina benakia etibaha,
“Wai aomi aꞌi niea,
ꞌu?
Aꞌi ṯoꞌiobina?
Aniani nitoto maearima aonai hauna maearima aꞌi nibaꞌopuna.
19 Pokina weiana hanona aoai aꞌi nitoto,
ia moꞌoru aona niao haeamona kekarahi.”
(Iesu ꞌabi neiana ehinana ena poki hanona aniani ikoinai tenamo kahani,
aꞌi kateba ꞌopunaka.)
20 Eꞌabi mue etibaha,
“Taba aoai kekarahi hauna kehore maearima kebaꞌopunakia.
21 Raona kiꞌa obokia maearima aonai tikarahi tabakia hanona neiakia,
nabau,
bainao,
ahuahu,
22 anikiꞌa,
raonakiꞌa,
baiꞌoi,
rea,
wamuru,
apa,
ꞌuahiꞌuahi,
mai babai ꞌabaea.
23 Taba kiꞌa obokia ikoikiai aoai tikarahi haukia tihore maearima tiba ꞌopunakia.”
Surofenise Babiꞌena Ena Aꞌikakauma.
24 Iesu ꞌeka weianai ekaobo eao Turo hanonai,
ia ena nuatae tai ha aꞌi keꞌiobina ia hanona weia,
ua buonai itu ha aonai eka toto,
iamo ena pihi taearana ahaꞌi.
Mareko 7.24-37
25 Babiꞌe ha nahuna uahona aonai auba kiꞌa obona emiaho,
Iesu pouna eona raninai,
beronai emai aena pokinai ekaipehu.
26 Babiꞌe weiana hanona Iuda babiꞌena ahaꞌi,
ꞌa ia hanona Helene babiꞌena Suro-fenike ai erama.
Iesu enoina auba kiꞌa obona nahuna aonai hauna keuꞌu ahina.
27 ꞌA Iesu ia ehina bena etibaha,
“Miori pateaniani ꞌuai,
pokina miori ekia aniani kahaꞌina kahakapo ahina waeha kateani hanona aꞌi enamo.”
28 ꞌA babiꞌe eꞌabi etibaha,
“Obiapaka e,
ꞌabi tohana,
ia waeha abomo miori tianiani ꞌikaꞌikakia itara baꞌanai haukia tiani.”
29 Iesu ia ehina bena etibaha,
“Ua nuꞌabi aiho buonai,
momue moao emu itu,
auba kiꞌa obona nahumu aonai hauna aba ekarahi.”
30 Babiꞌe emue ena itu eao nahuna aba enamo etabu ahina ena parua ꞌekanai,
auba kiꞌa obona aba ekarahi.
Iesu Haia Poꞌo Mai Maea ꞌOrare Hauna Ebanamona.
31 Haeamona Iesu Turo ehabona Sidono mai Dekapoli hanokiai ekabanai eao Galilea ꞌobunai ekarahi.
32 Maearima baika tehore haiana tepoꞌo abomo maeana eꞌorare hauna ha temaiaina Iesu herena,
tenoina ahanai kehaoꞌau kebanamona.
33 Iesu ehore hau weiana toꞌu baiatakiai ebakaparena,
ba ia imana riuriuna haiana aonai etiu totona,
haeamona imana eꞌatotina hau weiana maeana eaꞌi ꞌapuana.
34 Iesu eaꞌa taea kupa eihana aona ebahi,
ba hau weiana ehina bena etibaha,
“Efata!”
(Anina hanona mokaikau!)
35 Beronai hau weiana haiana teꞌerere abomo maeana ebero eꞌabiꞌabi harai.
36 Iesu ehore eharabunakia pou neiana tai ha haianai aꞌi katehinana.
Eharabu ꞌari iamo aiana aꞌi teona,
ia pouna tehina hina otaraina.
37 Maearima ikoinai tetaꞌu taꞌu huri kiꞌa,
teꞌabi tetibaha,
“Ia taba ikoinai nibabai harai.
Haiakia tepoꞌo haukia aia tiona abomo maea ꞌorare haukia tiꞌabiꞌabi harai.”