Iesu Maearima Ehina benakia Kateraona Kabe.
13
Rani weianai baika Iesu haianai Galilea haukia poukia tehinana,
ekia ibeni tibabaina Tirama herenai raninai Pilato ena huari haukia euhunakia teahu ꞌarinakia aruarukia mahi aruarukia kipokia teutena.
2 Iesu ekia ꞌabi ebamuena etibaha,
“Pokina Galilea haukia weiakia ua teahu aihonakia,
wai turaonana Galilea haukia weiakia teꞌari haukia ekia kiꞌa teapaꞌua kiꞌa baha ba Galilea ṯemiaho haukia ekia kiꞌa?
Luka 13:1-35
3 Au wai nahina benimi.
Ahaꞌi.
Wai aꞌi katoraona kabe raninai,
ikoimiai hanona ua katoꞌari aiho.
4 Wai turaonana weiakia haukia harauhaea ꞌababani Siloama ai itu roꞌena epobu aonai teꞌari haukia ekia kiꞌa teapaꞌua kiꞌa baha ba baika Ierusalema ai ṯemiaho haukia ekia kiꞌa?
5 Au wai nahina benimi.
Ahaꞌi.
Wai aꞌi katoraona kabe raninai ikoimiai hanona ua katoꞌari aiho.”
ꞌAbi Ibabataina, Matiu Kiꞌa Obona Buana Ahaꞌi.
6 Iesu ꞌabi ibabatai ha ehinana etibaha,
“Hau ha suke matiuna ha ebatona ena bine haharuana aonai,
muriai eao buana erarainakia ia ha aꞌi etabu ahina.
7 Weiana ia haharua neꞌimana hauna ehina bena etibaha,
‘Ihau aihau nakai mue matiu neiana buana ararainakia,
ia ha aꞌi natabu ahina.
Moꞌui rabu taina.
Taba buonai hano namona kebaore ꞌabaeana?’
8 Haharua neꞌimana hauna etibaha,
‘Eꞌu poki haumu e.
Mohabo ꞌabaeana ihau neiana hamona memiaho.
Au pokina kaꞌani kakaiarona kabahuna.
9 Ihau wairai buana baika katerama hanona enamo,
ahaꞌi raninai ia hanona iꞌui keaꞌina.’”
Beraura Robenai Iesu Kapena Ebarara Babiꞌena Ebanamona.
10 Beraura robenai Iesu Iuda haukia ekia marea ha aonai ebaꞌiobi,
11 babiꞌe ha weia auba kiꞌa obona ha ehore ebainawana ihauna harauhaea ꞌababani kapena ebarara,
kipona kebaberona hanona aꞌi etaina.
12 Iesu babiꞌe weiana eihana raninai eaparina etibaha,
“Babiꞌe e!
Aba enamo.
Emu inawa aba epua.”
13 Weiana Iesu imana babiꞌe ahanai ehao ꞌau raninai,
beronai kapena ebero,
ba emikiri Tirama ebanamona.
14 Marea poki hauna eopuere,
pokina Iesu beraura robenai ebamauri paunai.
Ia maearima ehina benakia etibaha,
“Wapu ꞌabaihau hanona wai emi aka wapukia.
Beraura weiakiai katomai kebamaurinimi,
ia beraura robenai ahaꞌi.”
15 Obiapaka ia ena ꞌabi ebamuena etibaha,
“Wai bahaorea haumi!
Wai ha Beraura robenai emi poromakau ꞌao emi toniki ꞌekakiai aꞌi ṯorubunakia bei ꞌurina aꞌi tuaoainakia, u?
16 Babiꞌe neiana hanona Aberahamo ena itubu babiꞌena.
Satani ia ebainawana ihauna aba harauhaea ꞌababani.
Ba Beraura robe aonai ia bamauri aꞌi peaꞌina,
u?”
17 Iesu ia ena ꞌabi ua ebamue aihona hanona tiꞌoatana haukia ikoikiai tehaumaea kiꞌa,
ꞌa toꞌu haukia ikoikia teaonamo aka nuabikia weiakia ebabainakia paukiai.
ꞌAbi Ibabataina Tuaba Uhona.
18 Iesu ebakai bakai etibaha,
“Tirama ena obia aiarana ibabataina taba?
Tabai kababataina?
19 Ia hanona ihobona tuaba uhona papana,
weiana hau ha eaꞌina ena umai ebatona eꞌomu matiu rarinai eao renai ꞌubi roborobokia ekia niꞌi terobenakia.”
ꞌAbi Ibabataina Bakupu Muramurana.
(Mt 13.33)
20 Haeamona eꞌabi etibaha,
“Tirama ena obia aiarana tabai kababataina?
21 Ia hanona ihobona bakupu muramurana,
weiana babiꞌe ha eaꞌina parawa boꞌona uro aonai kipokia euta haeamona,
euna eaomo maikoinai ekupu.”
Tirama Ena Obia Aiarana Taearana Eꞌomoꞌomo.
22 Iesu ena kaoao Ierusalema taearanai eao aonai,
aiara apaꞌuakia mai papakia aokiai maearima ebaꞌiobinakia.
23 Hau ha Iesu ebakaina etibaha,
“Obiapaka e!
Maearima tebabita ꞌakimo katemauri,
ꞌao?”
Ia ena ꞌabi ebamuena etibaha,
24 “Katotabura katoao paꞌabi ꞌomoꞌomonai katototo.
Pokina au wai nahina benimi,
maearima boꞌona katenuatae katetoto ia aꞌi ketainakia.
25 Itu poki hauna kemikiri paꞌabi kekaiabuna murinai,
wai atapakai katokoroti ba paꞌabi katohara harana katotibaha,
‘Obiapaka e,
paꞌabi mokaikauna tamatoto.’
ꞌA ia emi ꞌabi kebamuena ketibaha,
‘Wai aeꞌeai tomai,
au aꞌi aꞌiobinimi.’
26 Ba wai katoꞌabi katotibaha,
‘Ai oi kipokia hanona haniani mai hainuinu haeamo,
abomo emai aiarai obaꞌiobi.’
27 ꞌA ia ketibaha,
‘Wai aeꞌeai tomai,
au aꞌi aꞌiobinimi,
kiꞌa ibabaina haumi ikoimiai tomokatuꞌa hereꞌuai.’
28 Weia mahami keao Aberahamo,
Isako,
Iakobo mai mahabanai haukia ikoikiai Tirama ena obia aiaranai katoihanakia,
ia wai aba katetori ahinimi atapakai raninai,
wai hanona katohai ꞌaki ꞌakimi katoaraoꞌi araoꞌi.
29 Maearima hanona taetanai tibo tainai mai toto tainai ahi tainai katemai tatu ꞌekanai katemiati Tirama ena obia aiarana aonai.
30 Ba baika ṯemurihai haukia hanona kateꞌuai,
ia baika ṯeꞌuai haukia hanona katemurihai.”
Iesu Ierusalema Eaokoꞌo aina.
31 Rani weianai Parisea haukia baika temai Iesu herena tehina bena tetibaha,
“ꞌEka neiana kohabona koao ꞌeka haeai,
pokina Heroda nenuatae keahu ꞌariniꞌo.”
32 Iesu ekia ꞌabi ebamuena etibaha,
“Tomoao,
waeha ꞌaki weiana katohina bena.
Au bariu mara hanona auba kiꞌa obokia nauꞌu ahinakia mai inawa haukia nabanamonakia,
ba rani ibaihaunai eꞌu aka maikoinai kabaorena.
33 ꞌA au bariu mara mai erani hanona kakaꞌa kaeao,
pokina mahabanai hauna hanona ꞌeka haeai aꞌi keꞌari,
ia Ierusalemai mo.”
34 “Ierusalema e,
Ierusalema e,
oi ohore mahabanai haukia oahu ꞌarinakia,
abomo Tirama euhunakia haukia piharai oahu ꞌarinakia.
Rani bita au anuatae nahumu ikoinai kaꞌumu abunakia matoha kokoroꞌu hina nahuna neꞌumu abunakia ꞌabana,
ia wai hanona aꞌi ṯonuatae ainaꞌu.
35 Weiana emu itu hanona keꞌaburu.
Au wai nahina benimi,
aꞌi katoiha muenaꞌu keaomo rani ha kemai ba katotibaha,
‘Obiapaka atanai nimai hauna hamabanamona.’”