Rauhubu Poki Haukia Kateꞌimaꞌima Harainakia.
23
Weiana Iesu ehore mako mai ia iꞌabana haukia ehinabenakia etibaha,
2 “Rauhubu poki haukia mai Parisea haukia hanona Mose ena imiaꞌauai ṯemiaꞌau tipoki.
3 Ua buonai aiakia katokaꞌaina,
ṯehina benimi akakia ikoikiai katobabai,
ꞌa tibabai hoahoakia hanona aꞌi katobabai,
pokina ia ṯeiroroai akakia hanona aꞌi tibabainakia.
4 Puma rarikia iebebeai ṯebiri ꞌaunakia maearima ꞌarokiai tihore ꞌaunakia,
ꞌa ia kipokia kateaꞌi taeana hanona imakia riuriuna ituna ha aꞌi niata ꞌapuana.
5 Ekia babai ikoikiai hanona maearima kateihanakia kateba apaꞌuanakia,
puka robena ꞌabikia tererena ṯeutanakia kohukohukia weiakia bahubaꞌari aonai paukiai ṯebiri ꞌaunakia haukia tibapairi pairinakia abomo ekia bahubaꞌari habunikia buibuikia tibawaro waronakia.
6 Tatu ꞌekakiai hanona imiaꞌau namokia ꞌarikia tiꞌari,
marea aokiai imiaꞌau ꞌorukia ṯenuatae ainakia.
7 Ekia nuatae hanona kawakawa ꞌekakiai maearima katehore kateba namonakia mai katemariki ainakia haeamona kateꞌabi ia hanona maearima apaꞌuana ha.
8 Ia maearima aꞌi temeꞌabi wai hanona maearima apaꞌuami,
pokina wai emi apaꞌua hauna hanona hamona abomo wai ikoimiai hanona aꞌa mai hati.
9 Hanopakai hau ha aꞌi katoaparina hamami,
pokina wai hamami hanona hamona kupai nemiaho.
10 Abomo aꞌi kateꞌabi,
wai hanona poki haumi,
pokina wai emi poki hauna hanona hamona Keriso.
11 Baiatamiai ha kebapaꞌua hauna wai emi taꞌara iaꞌina haunai keao.
12 Hau ha kipona nibapaꞌuana hauna Tirama kehore ia kebakoꞌi koꞌina,
ia kipona nibakoꞌi koꞌina hauna Tirama kehore ia kebapaꞌuana.”
Iesu Parisea Ekia Baiꞌoi Hoakia Paukiai Erikenakia.
13 Rauhubu poki haumi mai Parisea haumi bahaorea haumi,
heremiai kekiꞌa wairai,
Tirama ena obia aiarana paꞌabina maearima wairakiai tukaiabuna,
wai kipomi aꞌi tutoto abomo weiakia ṯenuatae katetoto haukia tuehe abunakia.
14 Rauhubu poki haumi mai Parisea haumi,
baiꞌoi haumi,
heremiai kekiꞌa wairai,
wapu ekia itu tuani ꞌaunakia,
maearima tuba haoreanakia emi bahubaꞌari tuba homaꞌanakia.
Ua buonai puma rarina katoaꞌina.
15 Rauhubu poki haumi mai Parisea haumi bahaorea haumi,
heremiai kekiꞌa wairai,
hanopaka maikoina tukakaiarona maearima iꞌabami haukiai katobaonakia,
ba weiana tubabaina hanona ia ena kiꞌa barua tubapaꞌuana ia tuaꞌi kiꞌana keao iruba aꞌi niꞌao ꞌapua ꞌekana wai ꞌabana.
16 Bakaꞌa haumi mahami ṯekiꞌa haumi,
heremiai kekiꞌa wairai,
wai tuꞌabi maearima ha marea robe atana keꞌabiꞌuai hanona robana aꞌi kateahuna,
ꞌa peia gold weiana marea robe aonai hauna atanai keꞌabiꞌuai hanona kebatohana.
17 Wai poꞌo abomo mahami tekiꞌa haumi,
aeana hauna eapaꞌua?
Gold ꞌao marea robe weiana gold nibarobena hauna?
18 Wai haeamona tuꞌabi,
maearima ha itara robena atanai keꞌabiꞌuai hanona robana aꞌi kateahuna,
ꞌa peia beruberu tabana itara robena ahana hauna atanai keꞌabiꞌuai hanona kebatohana.
19 Wai mahami tekiꞌa haumi,
aeana hauna eapaꞌua?
Beruberu tabana itara robena ahanai hauna ꞌao itara robena weiana beruberu tabana nibarobena hauna?
20 Ua buonai itara robena atanai niꞌabiꞌuai hauna hanona itara robena mai ahanai ṯemiaho tabakia ikoinai atakiai niꞌabiꞌuai.
21 Abomo marea robe atanai niꞌabiꞌuai hauna hanona marea robe mai aonai nemiaho hauna atanai niꞌabiꞌuai.
22 Abomo kupa atanai niꞌabiꞌuai hauna hanona Tirama ena imiaꞌau mai nemiaꞌau hauna atanai niꞌabiꞌuai.
23 Rauhubu poki haumi mai Parisea haumi wai bahaorea haumi,
heremiai kekiꞌa wairai,
uma anianikia weiakia aniani tibaꞌorimona haukia hanona tubaharau haeanakia hamohamo tubaibeni obiapaka ena bararoai,
ꞌa rauhubu akakia apaꞌuakia,
bero,
aokoꞌo mai aꞌikakauma tureanakia,
ba neiakia patobabai hanona penamo,
weiakia abomo aꞌi patoreanakia.
24 ꞌUai haumi mahami tekiꞌa,
nene ꞌabiai tuꞌato ahina ia mahi atana kamela hanona tutonona.
25 Rauhubu poki haumi mai Parisea haumi bahaorea haumi,
heremiai kekiꞌa wairai,
ere mai ꞌororo kapekia ṯoutunakia ia aokia hanona bainai mai ripuripu ai toaꞌi tabakiai tebonu ꞌau.
26 Parisea haumi mahami tekiꞌa,
ere mai ꞌororo aokia tomoutu ꞌuainakia ba kapekia abomo aba katemahamaha.
27 Rauhubu poki haumi mai Parisea haumi bahaorea haumi,
heremiai kekiꞌa wairai,
wai hanona ꞌariahakia tebaporenakia ꞌabakia,
kapekia temahamaha ꞌa aokia hanona ꞌari haukia huria mai pari ikoinai tebonuꞌau.
28 Taeara ihobonai mo maearima wai haumi ṯeihanakia bero haumi ꞌabanai,
ꞌa aomi hanona baiꞌoi mai kiꞌa tebonuꞌau.
Iesu Parisea Ekia Puma Ehina ꞌUaina.
29 Rauhubu poki haumi mai Parisea haumi bahaorea haumi,
heremiai kekiꞌa wairai,
mahabanai haukia ekia ꞌariahakia tubabai mai bero haukia ekia ꞌariahakia tubataitai harainakia.
30 Wai tuꞌabi,
‘Kupumai ekia raniai tamarama raninai mahabanai teahuꞌarinakia aonai ai hanona aꞌi pataꞌi turinakia.’
31 Weiana hanona wai kipomi ṯohina pounimi,
wai hanona mahabanai haukia teahu ꞌarinakia haukia ꞌabaꞌabakia.
32 Kupumi hamami ekia kiꞌa teaꞌi ramana hauna wai katobapaꞌua haraina.
33 Wai ꞌerau abomo ꞌerau nahukia haumi,
Tirama ena puma keaoainimi iruba aꞌi niꞌao ꞌapua ꞌekana herenai aea katokapare aiho?
34 Mahabanai haukia aobero haukia mai baꞌiobi haukia kauhunakia heremi katewahi,
baika katoahuꞌari,
baika matiu ibiri ropoai katokoko ꞌaunakia,
baika marea aokiai katoꞌatinakia,
abomo aiara hai katouranakia kateao aiara ha.
35 Ua buonai bero haukia aruarukia ikoinai hanopaka ahanai ekiki oioi pumana hanona wai ahamiai keriri,
aka bero hauna Abela aruarunai keaꞌi ramana keao mo Berekia nahuna Sekaraia aruaruna ia ikaihuri robena mai itara robena baiatakiai toahuꞌarina hauna herenai kepua.
36 ꞌAbi tohana au wai nahinabenimi,
ahuahu neiakia ikoikiai ekia puma hanona uru neiana maearimakia ahakiai keriri.
Iesu Ierusalema Ehaiaina.
37 Ierusalema e,
Ierusalema e,
mahabanai haukia nuahuꞌarinakia abomo Tirama iuhubeau euhunakia heremu tewahi haukia piharai nokuinakia,
rani babita anuatae nahumu kabararonakia ihobona kokoroꞌu ha banina baꞌanai nahuna neꞌumu hao ꞌabana,
ꞌa aꞌi onuatae.
38 Ua buonai emu marea robe hanona kahabo ꞌabaeana abomo keꞌaburu.
39 Au oi nahinabeniꞌo,
aꞌi koiha muenaꞌu keao mo oi koꞌabi kotibaha,
“Tirama kehore Obiapaka atanai nimai hauna kebanamona!”