ꞌAbi Ibabataina Haharua Iꞌimana Haukia.
12
Iesu ehore ꞌabi ibabatainai ehina benakia etibaha “Hau ha bine haharuana ebabaina,
arana eaꞌi abuna,
bine buakia ibahari ꞌitiꞌitikia ꞌurina ehabina,
mai iha ꞌinina ituna ebabaina.
Maearima baika ebenakia kateꞌimana,
ꞌa ia hanona harima eao.
Mareko 12.1-27
2 Bine teꞌaiba raninai hau weiana ena taꞌara iaꞌina hauna ha euhuna eao haharua ṯeꞌimana haukia herekia.
Bine anikia harua herekiai keaꞌinakia.
3 ꞌA haharua iꞌimana haukia tehore taꞌara iaꞌina hauna teaꞌi ꞌinina,
teꞌatina,
teuhuna imana ꞌabaeana emue.
4 Haeamona poki hauna taꞌara iaꞌina hauna ha euhuna eao herekia hanona ꞌarana tebamaniꞌana abomo teba haumaeana.
5 Haeamona ena taꞌara iaꞌina hauna ha euhuna eao hanona teahu ꞌarina.
Boꞌokia euhunakia teao,
baika teahu kiꞌanakia,
ia baika hanona teahu ꞌarinakia.
6 Hamona emiaho keuhuna hauna hanona nahuna niraonaꞌau aina hauna.
Orena ꞌakinai ia euhuna,
eꞌabi etibaha,
‘Nahaꞌu neiana kauhuna keao hanona aba katemariki aina.’
7 Ia haharua iꞌimana haukia teroba ahu,
teꞌabi tetibaha,
‘Tomai,
neiana hanona haharua poki hauna nahuna,
hamahu ꞌarina,
ena haharua neiana hanona aika ꞌeukai keao.’
8 Ua buonai teaꞌi ꞌinina,
teahu ꞌarina,
hauanina tekapo banaina haharua murinai.”
9 Iesu ia ebakainakia etibaha,
“turaonana,
haharua poki hauna hanona taba kebabaina?
Ia kemai haharua iꞌimana haukia keahu ꞌarinakia,
bine haharuana keaꞌina maearima baika kebenakia kateꞌimana.
10 Puka Robenai tererena hauna aꞌi totuabina?
Ṉa eꞌabi aiho,
‘Itu ibabaina haukia tebaoao aina
piharana hanona itu ibua ꞌinina
kupuana piharana namonai eao.
11 Neiana hanona Obiapaka ena
babai,
nahaihana
nahataꞌu taꞌu huri!’” Sal 118.22, 23
12 Iuda haukia apaꞌuakia Iesu iaꞌi ꞌinina teraonana pokina teꞌiobina ꞌabi ibabataina hanona ia ahakiai ehinana.
Ia maearima tetaꞌu ainakia buonai tehabona tekaꞌa.
Takiti Baibeni Bakai bakaina.
13 Muriai ia tehore Parisea haukia mai Heroda titaina haukia baika teuhunakia teao Iesu herena bakai bakai ai katebarewana.
14 Ba teao herena tebakaina tetibaha,
“Baꞌiobi haumu e,
ai ṯaꞌiobina oi hanona ꞌabi tohakia nohina,
maearima ekia raona ꞌabikia aꞌi nutaꞌu ainakia,
ia aea homakia robakia aꞌi nuahu,
ia Tirama ena taeara tohanai mo nubaꞌiobi.
Ba ꞌara kahahore Kaisara herenai hanona ebero ꞌao ahaꞌi?
15 ꞌAra kahahore ꞌao ahaꞌi?”
Iesu ekia baiꞌoi weiana eꞌiobina,
ebakainakia etibaha,
“Taba buonai tuhobonaꞌu!
Moni ha tomaiaina,
maihana.”
16 Moni ha temaiaina tebena hanona ebakainakia etibaha,
“Neiana hanona tai aubaubana?
Mai tai atana?”
Ia teꞌabi,
“Kaisara ꞌeuna.”
17 Iesu ehina benakia etibaha,
“Kaisara ꞌeuna Kaisara katobena,
Tirama ꞌeuna Tirama katobena.”
Weiana teona hanona tetaꞌutaꞌu huri.
Hawainibe Bakai bakaina Weiana ꞌAriai Mikiri Mue Murinai Hauna.
18 Sadukea haukia mikiri mue aꞌi tibatohana haukia baika ekia bakaibakai ha teaoaina Iesu herena.
19 Tebakaina tetibaha,
“Baꞌiobi haumu e,
Mose ṉa erere aihona,
‘Hau ha nahuna ahaꞌi keꞌari wapuna kemiaho,
ꞌari hauna hatina kehore wapu weiana keatawana nahuna kebaramanakia ꞌari hauna ꞌeuna.’
20 Ba bariu aꞌa hati ikoikiai ꞌabaihau hamomo.
Pakana ehawainibe,
nahuna ahaꞌi eꞌari.
21 Hatina ibaruana wapu weiana eatawana,
nahuna ahaꞌi eꞌari.
Hatikia ibaihauna abomo uahomana herenai erama.
22 Teꞌabaihau hamomo babiꞌe weiana hamona teatawana,
ia ha nahuna aꞌi ebaramana.
Muri ꞌakinai babiꞌe abomo eꞌari.
23 Hau ꞌabaihau hamomo ikoikiai teatawana,
ba mikiri mueai hanona tai atawana tohanai keao?”
24 Iesu ehina benakia etibaha,
“Wai hanona tobeho pokina Puka Robena anina aꞌi ṯoꞌiobina abomo Tirama ena hiabu aꞌi ṯoꞌiobina.
25 ꞌAri haukia katemikiri raninai ia hanona aneru kupai haukia ꞌabakia,
aꞌi katehawainibe.
26 ꞌAriai katemikiri mue ꞌabina aꞌi toꞌiobina,
Mose ena Pukai aꞌi totuabina?
Arabu eꞌara ꞌekanai Tirama Mose ehina bena,
‘Bariu Au hanona Aberahamo ena Tirama,
Isako ena Tirama,
Iakobo ena Tirama.’
27 Tirama ua eꞌabi aiho buonai aika kahaꞌiobina,
Ia hanona ꞌari haukia ekia Tirama ahaꞌi,
ia mauri haukia ekia Tirama.
Wai tohaorea kiꞌa baha.”
Rauhubu Apaꞌuana Tohana.
28 Rauhubu poki hauna ha weia ekia baihara tae ꞌuruna ebahu aina,
ebabataina,
Iesu Sadukea haukia ekia bakaibakai ꞌarana ebamue haraina.
Ba ia ehore Iesu ebakaina etibaha,
“Rauhubu ikoikiai,
aeana hauna ikoikiai ꞌarakiai?”
Mareko 12.28-44
29 Iesu ehina bena etibaha,
“Ikoikiai ꞌarakiai hauna neiana.
‘Isaraela haumi e,
aia tomona.
Obiapaka eka Tirama hanona Obiapaka hamomona mo.
30 Obiapaka emu Tirama koraonaꞌau aina,
mai aomu ikoinai,
mai aubamu ikoinai,
mai emu raona ikoinai,
mai taburamu ikoinai.’
31 Ibaruana hanona neiana.
‘Heremuai hauna abomo koraonaꞌau aina,
kipomu nuraonaꞌau ainiꞌo ꞌabana.’
Rauhubu uaꞌa ha aꞌi nemiaho neiakia rua ꞌarakiai.”
32 Hau weiana eꞌabi etibaha,
“Baꞌiobi haumu e,
oi hanona obero.
Oꞌabi harai,
Tirama hanona hamona mo,
ha uaꞌa ahaꞌi.
33 Haeamona Tirama kaharaonaꞌau aina mai aoka ikoinai,
mai eka raona ikoinai,
mai eka tabura ikoinai,
weiana herekai nemiaho hauna kaharaonaꞌau aina hanona eapaꞌua kiꞌa baha ba mahi mai barobe tabakia ikoikiai kahabaibeni Tirama wairanai.”
34 Iesu hau weiana eihana,
eꞌabi harai buonai ehina bena etibaha,
“Oi mai Tirama ena obia aiarana hanona baiatami aꞌi ehomaꞌa.”
Weiana murinai maearima ia katebakaina hanona tetaꞌu.
Keriso Ebakai bakai Ainakia.
35 Iesu Marea Robe aonai ebaꞌiobi raninai maearima ebakainakia etibaha,
“Aehoma buonai Rauhubu poki haukia tiꞌabi,
‘Keriso hanona Davida Nahuna’?
36 Weiana hanona Auba Robe hiabunai Davida pinanai eꞌabi etibaha,
‘Obiapaka hanona eꞌu obia
ehina bena etibaha,
Itipaꞌu tainai momiati
keao mo emu ꞌou haukia ikoikiai
ꞌapumu baꞌanai kahorotinakia.’ Sal 110.1
37 Davida kipona ehore Keriso eaparina Obiapaka raninai,
aea homanai mo ia nahunai keao?”
Mako tebahu haukia mai aonamokia ia aiana teona.
Rauhubu Poki Haukia Kateꞌima ꞌima Harainakia.
38 Haeamona ebaꞌiobi muenakia,
etibaha,
“Rauhubu poki haukia herekiai katoꞌima ꞌima harainimi,
ia hanona habuni homaꞌakia tibatotonakia tikabanai kabanai taearai mai kawakawa ꞌekakiai,
ekia nuatae hanona maearima ia kateihanakia katemariki ainakia.
39 Haeamona marea aokiai ekia nuatae imiaꞌau namokiai katemiaꞌau,
tatu aokiai abomo ꞌeka apaꞌuakia namokiai mo katemiaꞌau.
40 Wapu ekia itu tibaꞌarenakia,
ekia bahubaꞌari tibahomaꞌa kiꞌanakia kateihanakia buonai.
Maearima uahomakia hanona kiꞌa rarina ꞌakina katetabu ahina.”
Wapu Ena Baibeni.
41 Iesu Marea Robe aonai beruberu mauana wairanai emiati,
toꞌu haukia ekia moni mauai ṯeuta eihanakia,
obia haukia boꞌona hanona ekia moni boꞌokia teuta.
42 Ia wapu uraruna ha emai,
ena moni papakia rua emaiainakia eutanakia,
ekia ihobo hanona pene hamona ꞌabana.
43 Iꞌabana haukia eaparinakia teao herena ehina benakia etibaha,
“ꞌAbi tohana au wai nahina benimi,
wapu uraruna weiana eutana hauna hanona eapaꞌua kiꞌa baha ba ia ikoikiai teuta haukia.
44 Pokina obia haukia ekia moni teboꞌo ia papakia mo teuta,
ꞌa wapu uraruna hanona ena tabu ahi tabana keaniani aina hauna maikoina eutana.”