Iesu Maearima Imabui Harau Rua Rua Euhunakia.
10
Neiana murinai Obiapaka ehore haukia imabui haraurua rua etinaꞌanakia,
ikoikiai baiatakiai rua rua euhunakia kateꞌuai kateao ia kipona keao aiarakia mai ꞌekakia ikoikiai.
2 Ehina benakia etibaha,
“Umai aniani aba eboꞌo harai ia aka haukia mo aꞌi eboꞌo,
ua buonai uma poki hauna katonoina,
ia kehore aka haukia keuhunakia ena umai kateaka.
Luka 10:1-42
3 Tomoao!
Au wai nauhu ahinimi ihobona mamoe nahukia ꞌabakia,
waeha ꞌaki baiatakiai.
4 Mahoa ihiua hiua,
pute ꞌao tamaka ha aꞌi katoaꞌi.
Taearai abomo maearima ha kipokia aꞌi katokikipa.
5 Itu tabanai katokaraꞌau,
katohina ꞌuaina ꞌabina hauna neiana,
‘Baibua hanona itu neianai!’
6 Hau weiana aona kebaibua raninai,
wai emi baibua hanona ia ahanai kemiaho.
Ia keahaꞌi raninai emi baibua hanona kemue heremi.
7 Kipokia itu weianai katomiaho oioi,
taba tibaibeni haukia katoani ꞌao katoinu,
pokina aka hauna mai ꞌarana hanona enamo.
Itu ha ha aꞌi katoao.
8 Aiara tabana aonai katokatoto,
kateaꞌi taeanimi raninai wairamiai taba tekaitina hauna katoana,
9 aiara weianai inawa haukia katoba maurinakia,
abomo katohina benakia,
katotibaha,
‘Tirama ena obia aiarana hanona aba nimai heremi.’
10 Ia aiara ha aonai katokatoto,
aꞌi kateaꞌi taeanimi raninai katokarahi taearanai katoꞌabi katotibaha,
11 ‘Emi aiara apurorona weiana etau toꞌona ꞌapumaiai hauna aba ṯatabu tabu obona niwahi heremi.
Weia katoꞌiobina Tirama ena obia aiarana aba herekai.’
12 Au wai nahina benimi,
bakai berauranai Sodoma ena haiara ma kenamo ꞌapua ba aiara weiana ena haiara keapaꞌua.
Aiara Haukia Aꞌi Teraona Kabe.
13 “Korasina e!
Heremuai hanona kekiꞌa wairai.
Betesaida e!
Oi abomo heremuai hanona kekiꞌa wairai.
Ba taꞌu taꞌu huri akakia neiakia heremi ai ababai haukia weia Turo mai Sidono aokiai pababai raninai,
aba waꞌi baha pateraona kabe,
habuni kiꞌa obokia patebatotonakia rabuai pateata patemiati.
14 Bakai berauranai Turo mai Sidono ekia haiara ma kenamo ꞌapua ba wai ꞌeumi keapaꞌua.
15 Kaperanauma e!
Oi abomu mo.
Kipomu pokaraꞌau poao kupa ubinai ṉa nuhoma.
Ia ahaꞌi.
Oi hanona katetori oboniꞌo koriri ꞌari ꞌekana.”a
16 Iesu iꞌabana haukia ehina benakia etibaha,
“Wai aiami niona hauna au aiaꞌu abomo aba niona,
wai nibakiꞌanimi hauna au abomo nibakiꞌanaꞌu,
ia au nibakiꞌanaꞌu hauna euhunaꞌu hauna abomo nibakiꞌana.”
Haukia Imabui Haraurua Rua Temue Iesu Herena.
17 Haukia imabui haraurua rua teao haeamona mai aonamokia temue herena teꞌabi tetibaha,
“Obiapaka e,
oi atamuai auba kiꞌa obokia tauꞌu ahinakia hanona aiamai teona.”
18 Iesu ia ehina benakia etibaha,
“Au Satani kupai eꞌeho hanona aihana matoha ꞌimare ꞌabana.
19 Au hiabu wai aba abenimi,
ꞌerau ꞌao hara katoehe ꞌininakia abomo ꞌou hauna ena hiabu ikoinai katotara haona,
taba ha aꞌi kebamaniꞌanimi.
20 Auba kiꞌa obokia aiami teona paunai aꞌi katoaonamo,
ꞌa atami kupai aba terere hauna katoaonamo aina.”
Iesu Eaonamo.
21 Rani weianai Iesu Auba Robe paunai aona enamo kiꞌa eꞌabi etibaha,
“Hamaꞌu e,
kupa mai hanopaka Obiana nabanamoniꞌo,
pokina taba neiakia aotipa mai aobero haukia herekiai obuninakia haukia miori papakia herekiai obawaira tinana.
ꞌE,
hamaꞌu,
pokina neiana hanona oi emu raona namona.
22 Taba ikoinai hanona Hamaꞌu aba ebaibeni hereꞌuai,
Nahuna hauna tai ha aꞌi eꞌiobina ia Hamana ikupaianamo,
Hamana hauna tai ha aꞌi eꞌiobina Nahuna mai nahuna nenuatae ainakia herekiai kebawaira tinana haukia ikupaiakia mo.”
23 Weiana Iesu eiha kabe iꞌabana haukia ehinabe buninakia etibaha,
“Taba neiakia ṯoihanakia haumi hanona tutai harai ṯoiha tinanakia.
24 Pokina au wai nahina benimi,
mahabanai haukia mai aiara obiakia boꞌokia tenuatae wai ṯoiha haukia pateiha ia aꞌi teiha,
tuoꞌo haukia pateoꞌo ia aꞌi teoꞌo.”
Ori Ibabataina Samaria Hauna Namona.
25 Weia rauhubu poki hauna ha emikiri Iesu ehobona etibaha,
“Baꞌiobi haumu e,
taba kababaina hanona mauri banaibanai kaꞌina?”
26 Iesu ia ena ꞌabi ebamuena etibaha,
“Rauhubu pukana aonai aea terere aihona?
Aea oꞌiobi aihona?”
27 Ia ena ꞌabi ebamuena etibaha,
“Obiapaka emu Tirama koraonaꞌau aina mai aomu ikoinai,
mai aubamu ikoinai,
mai taburamu ikoinai,
mai emu raona ikoinai,
abomo heremu hauna koraonaꞌau aina oi kipomu nuraonaꞌau ainiꞌo ꞌabana.”
28 Iesu ia ena ꞌabi ebamuena etibaha,
“Emu ꞌabi hanona ebero,
ṉa kobabai aiho hanona komauri.”
29 Rauhubu poki hauna kipona eapaina ebakai bakai etibaha,
“Ba hereꞌu hauna hanona tai?”
30 Iesu ia ena ꞌabi ebamuena etibaha,
“Hau ha Ierusalema ai eriri Ieriko eao aonai kakikaki haukia tehe abuna,
ena habuni tebakurinakia teahu kiꞌana herekai mo peꞌari ba tehabona.
31 Rani weianai Robe hauna ha taeara weianai ekaꞌa eao,
eihana raninai taeara haia haianai ekabanai.
32 Ihobonaimo Lebi itubuna hauna ha taeara weianai eao,
eihana raninai taeara haia haianai ekabanai.
33 ꞌA Samaria hauna ha ena kaoao ai hau weiana herenai ekaraꞌau,
eihana raninai eaokoꞌo aina.
34 Eao herena hauna maniꞌakia tehoro mai bine beinai etaronakia eꞌapanakia.
Ba ena doniki ahanai ebamiaꞌauna,
eaoaina ihaꞌini itunai uaꞌa eꞌimana.
35 Erani hau weiana ehore moni rua etara ꞌaunakia itu ihaꞌinina hauna ebena ehina bena etibaha,
‘Koꞌima haraina,
herenai bita koneꞌe hanona eꞌu mueai ꞌarakia kabeniꞌo.’”
36 Iesu ia ebakaina etibaha,
“Oi taba ṉa nuhoma?
Hau weiakia teaihau aonai aeana hauna kakikaki haukia imakiai enouta hauna herena haunai ebaona?”
37 Ia etibaha,
“Weiana eaokoꞌo aina hauna.”
Iesu ia ehina bena etibaha,
“Moao ebabaina ihobona mo kobabaina.”
Iesu Eao Mareta Mai Maria Herekia.
38 Iesu iꞌabana haukia kipokia taearai teao aiara haeai tekaraꞌau,
weia babiꞌe ha atana Mareta ehore eaꞌi taeana ena ituai.
39 Ia hatina atana Maria hanona eao Obiapaka aena pokinai emiati ena baꞌiobi ꞌabikia aiakia nioꞌo.
40 ꞌA Mareta baki iaꞌi taeakia aꞌi aꞌi haraina ebabaina hanona aona earoꞌari,
ba emikiri eao Iesu ehina bena etibaha,
“Obiapaka e,
oi aꞌi nuraonana hatiꞌu naiana ehabonaꞌu kipoꞌu aka ikoinai nababai.
Mohina bena mebarainaꞌu.”
41 Obiapaka ia ena ꞌabi ebamuena etibaha,
“Mareta e,
Mareta e,
oi hanona aomu niaroꞌari taba boꞌokia paukiai nuatetua,
42 ia taba hamona mo nahanuataeai hauna Maria aba enuatae aina,
ia herenai aꞌi kateaꞌi pare ꞌapuana.”