Iesu Bahubaꞌari Ebaꞌiobinakia.
11
Rani ha Iesu ꞌeka ha ai ebahubaꞌari,
ena bahubaꞌari epua murinai iꞌabana haukia ha ehore ehina bena etibaha,
“Obiapaka e,
bahubaꞌari mobaꞌiobinamai Ioane iꞌabana haukia ebaꞌiobinakia ꞌabana.”
2 Ba Iesu ia ehina benakia etibaha,
“Katobahubaꞌari raninai ṉa katoꞌabi aiho.
‘Hamamai e.
Oi atamu hanona katabarobena.
Emu obia aiarana kemai.
Luka 11:1-54
3 Rani ikoinai ṯanuatae aina
anianina kobenamai.
4 Emai kiꞌa kohina haonakia,
pokina ai tibakiꞌanamai haukia
ekia kiꞌa ṯahina haonakia.
Abomo baihobo aonai
aꞌi kobakatotonamai.’”
5 Ia haeamona ehina benakia etibaha,
“Wai haumi ha wapukaꞌa ibuanai peao ena hau ena ituai penoina petibaha,
‘Eꞌu hau e,
parawa aihau mo pobenaꞌu.
6 Pokina eꞌu hau ha ena kaoao aonai emai hereꞌu,
karoꞌona ia aniani mo hereꞌu ahaꞌi.’
7 Aonai uaꞌa keꞌabi ketibaha,
‘Aꞌi kobaroꞌarinaꞌu,
paꞌabi hanona aba ikaiabu abomo au nahaꞌu kipokia hanona ṯaparua.
Aꞌi kamikiri taba ha aꞌi kabeniꞌo.’
8 Au wai nahina benimi,
ena hau paunai ia aꞌi kemikiri taba ha aꞌi kebena,
ꞌa ia ena noi ꞌariai ꞌariai paunai kemikiri,
ia nenuataeai tabakia ikoikiai kebena.
9 Haeamona au wai nahina benimi,
katonoi hanona katoaꞌina,
katotabuna hanona katotabu ahina,
katohara hara hanona paꞌabi ikaikau ꞌeumi.
10 Weiakia tinoiai haukia hanona tiaꞌi,
weiakia tibaitabu haukia hanona titabu ahi,
nihara hara hauna ꞌeunai paꞌabi hanona ikaikau.
11 Wai hama haumi ha nahumu maia penoi raninai ꞌerau pobena, u?
12 ꞌAo ahoi penoi raninai hara pobena, u?
13 Wai kiꞌa haumi reꞌa,
taba namokia nahumi ibenikia ṯoꞌiobi.
Namo babita Hamami kupai nemiaho hauna Auba Robe tinoi noi aina haukia kebenakia.”
Baika Teꞌabi Iesu Belesebulo Hiabunai Niaka.
14 Iesu ehore ꞌaiaunu paipaina hau ha aonai euꞌu ahina,
paipai weiana ekarahi ba eꞌaiaunu hauna eꞌabiꞌabi,
teihana haukia tetaꞌu taꞌu huri.
15 Ia maearima baika teꞌabi tetibaha,
“Belesebulo paipai ekia obia arana ena hiabuai ia paipai neiakia euꞌu ahinakia.”
16 Baika Iesu tehobona ekia nuatae kupa ena hoa ha pebabaina pateihana.
17 Ia Iesu hanona ekia raona eꞌiobina,
ba ehina benakia etibaha,
“Hanopaka kipona niwatena ba nibaiꞌoata hanona kekiꞌa,
abomo itubu kipona niwatena ba nibaiꞌoata hanona keꞌeho.
18 Satani kipona kewatena ba kipona keꞌoatana raninai,
ena hanopaka aea kekori ꞌini aiho?
Neiana nahinana pokina wai tuꞌabi ‘Belesebulo ena hiabuai paipai auꞌu ahinakia.’
19 Au Belesebulo ena hiabuai paipai nauꞌu ahinakia raninai,
tai ena hiabuai wai iꞌabami haukia tihore paipai ṯeuꞌu ahinakia?
Ua buonai ia katehore wai kateba beronimi.
20 Ia au Tirama ena hiabuai paipai auꞌu ahinakia raninai,
Tirama ena obia aiarana aba ekaraꞌau heremi.
21 Tabura hauna mai ena puraꞌa ena itu keꞌimana hanona ena kohu ikoikiai katemiaho harai.
22 ꞌA etabura kiꞌa hauna ha ia pehuari bena ba peahuna raninai,
ena puraꞌa imanai keaꞌi obonakia ena kohu ikoikiai kewate otaraina.
23 Taiꞌu aꞌi nitai hauna hanona au niꞌoatanaꞌu,
au kipokia aꞌi ṯabararo bararo hauna hanona nikapo kapo otarainakia.
Auba Kiꞌa Obona Emue Ena ꞌEka ꞌAiꞌaina.
24 “Auba kiꞌa obona ha hau ha aonai nikarahi raninai,
ꞌeka ꞌororokia ꞌekakiai nikaoao,
ena nuatae kearai ia ꞌeka mo ha ahaꞌi.
Kipona niꞌabi netibaha,
‘Kamue kaeao amiaho ꞌuai ituna.’
25 Ba emue eao itu hanona aba itaro abomo aba eꞌoru harai etabu ahina.
26 Weiana ia eao auba kiꞌa obokia ꞌakikia ꞌabaihau hamomo ebakaꞌanakia,
ba teao tetoto weia temiaho,
hau weiana ena mauri ꞌuainai papana enamo,
ꞌa bariu ena mauri aba ekiꞌa kiꞌa baha.”
27 Iesu ꞌabi neiakia nehinanakia aonai babiꞌe ha mako baiatakiai Iesu eiona etibaha,
“Oi ebaramaniꞌo mai oi ebaꞌaeniꞌo babiꞌena hanona enamo.”
28 ꞌA Iesu ena ꞌabi ebamuena etibaha,
“Ua aꞌi kehoma,
ia Tirama ena ꞌabi tiona abomo ṯeꞌini bena haukia tenamo kiꞌa baha.”
Parisea Haukia Tenuatae Hoa Ha Kateihana.
29 Maearima Iesu tetoꞌu aina aonai,
ena ꞌabi eaꞌi ramana etibaha,
“Uru neiana hanona uru kiꞌa obona,
bataꞌu taꞌu huri hoakia nitabu,
ia ha aꞌi kerama herekiai,
Iona ikupaiana mo bataꞌu taꞌu huri hoanai keao.
30 Iona hanona bataꞌu taꞌu huri hoanai eao Nineba haukia herekiai ihobona mo Maearima Nahuna hanona uru neiana herenai.
31 Bakai ranina aonai obia babiꞌena Seba kemikiri uru neiana haukia behoai kehorotinakia,
pokina ia hanona hanopaka puanai emai Solomona ena aotipa ꞌabikia keoꞌo,
ia bariu ha neia hanona Solomona etara haona.
32 Bakai ranina aonai Nineba haukia hanona katemikiri uru neiana haukia behoai katehorotinakia pokina Iona ena iroroai teraona kabe,
ia bariu ha neia hanona Iona etara haona.
Ramepa Ihaoꞌauna ꞌEkana Tohanai Kohaoꞌauna.
33 “Hau ha ramepa kebaꞌarana raninai itu bunianai ꞌao uro aonai aꞌi kekai tina,
ia ramepa ihao ꞌauna ꞌekana tohanai kehao ꞌauna ba weia titoto haukia hanona ea weiana kateihana.
34 Oi mahamu hanona hauanimu ena ramepa,
ba oi mahamu enamo raninai hauanimu maikoina abomo ea aonai,
ia mahamu kekiꞌa raninai hauanimu maikoina hanona wapura aonai.
35 Ua buonai koꞌima ꞌima harainiꞌo ea aomuai hauna aꞌi mewapura abuna taꞌuna.
36 Oi hauanimu maikoinai niea obo papana ha wapura aonai ahaꞌi raninai,
maikoina hanona kea obo harai matoha ramepa eana maikoina nibeniꞌo nibaeaniꞌo ꞌabana.”
Iesu Rauhubu Poki Haukia Erikenakia.
37 Iesu eꞌabi nonoa raninai,
Parisea hauna ha ia enoina terarua kateaniani haeamo buonai ia etoto eao emiati keaniani.
38 Parisea hauna Iesu eihana hanona etaꞌu taꞌu huri,
pokina aniani raninai imana aꞌi eutu.
39 Weiana Obiapaka ia ehina bena etibaha,
“Bariu wai Parisea haumi hanona ꞌere mai uro kapekia mo ṯoutu harainakia,
ꞌa ia aomi hanona bainao mai kiꞌa ebonu ꞌau.
40 Poꞌo poꞌo haumi,
ia kapena ebabaina hauna,
aona abomo aꞌi ebabaina, u?
41 Ia aonai ṯemiaho tabakia uraru haukia katobenakia.
Ba taba ikoikiai aba terauꞌa wai ꞌeumiai.
42 “Parisea haumi e,
heremiai hanona kekiꞌa wairai!
Pokina emi aniani ibaꞌorimokia mai ibahiabu hiabukia papakia tubahunakia harauhaea aonai hamomona tubaibeni Tirama herenai,
ꞌa Tirama herenai bero mai raonaꞌau pato babaina hauna tohabona.
ꞌA neiana abomo katobabaina,
ia weiana abomo aꞌi katohabona.
43 “Parisea haumi e,
heremiai hanona kekiꞌa wairai!
Pokina emi nuatae hanona marea aonai miati ꞌekakia namokiai katomiati,
abomo kawakawa ꞌekakiai katemariki ainimi katebanamonimi.
44 ‘Heremiai kekiꞌa kiꞌa baha!
Pokina wai hanona ihobona ꞌariahakia ꞌaiꞌaikia ꞌakikia,
maearima aꞌi teꞌiobina ahakiai tiaoaina timaiaina Tirama wairanai aba teꞌopu.’”
45 Rauhubu poki hauna ha ia ehina bena etibaha,
“Baꞌiobi haumu e,
oi ṉa nuꞌabi aiho hanona ai abomo nubahaumaenamai.”
46 ꞌA ia etibaha,
“Rauhubu poki haumi e,
heremiai hanona kekiꞌa kiꞌa baha!
Wai maearima iebebe pumakia tubabuanakia,
ꞌa wai kipomi ha iebebe weiana ena puma aea homana imami kiriꞌu kiriꞌuna hamona aꞌi niꞌata ꞌapuana.
47 “Heremiai kekiꞌa wairai!
Wai hamami mahabanai haukia teahu ꞌarinakia,
ba wai tuhore ekia ꞌariahakia tubabainakia.
48 Ua buonai wai hamami ekia babai tubatoha akakia tubaihanakia,
pokina ia teahu ꞌarinakia,
wai hanona ekia ꞌariahakia tubabainakia.
49 “Ua paunai Tirama ena ꞌiobi ꞌabina etibaha,
ꞌAu mahabanai haukia mai iuhubeau haukia kauhunakia kateao,
baika hanona kateahu ꞌarinakia,
baika katebakiꞌanakia.
50 Weiana paunai hanopaka erama emai mo bariu mahabanai haukia ikoikiai aruarukia tekiki oioi,
pumana hanona uru neiana haukia katehoaina.
51 Abela aruarunai eaꞌi ramana emai mo Sakaria aruarunai,
ia hanona banamo itarana mai marea robena baiatakiai teahu ꞌarina.
ꞌE,
au wai nahina benimi,
pumana hanona uru neiana haukia katehoaina.
52 “Rauhubu poki haumi e,
heremiai hanona kekiꞌa wairai!
Pokina aotipa taearana aba tokaiabuna,
wai kipomi aꞌi katototo,
katetoto haukia ekia taeara abomo toehe abuna.”