Maearima Ibaraikia Hoahoana.
6
“Katoꞌimaꞌima harainimi,
emi bero akakia maearima wairakiai aꞌi katobabai,
aꞌi temeihanimi marikina.
Ua katobabai aihona raninai wai hanona ꞌarami ahaꞌi Hamami kupai hauna herenai.
2 Weiana buonai baraibarai tabana uraru hauna kobena raninai,
maearima wairakiai aꞌi koapa,
ihobona bahaorea haukia marea aokiai mai aiara ibuakiai tibabaina ꞌabana maearima banamo ia katebenakia paunai.
ꞌAbi tohana au wai nahinabenimi,
ia hanona ꞌarakia maikoina aba teaꞌina.
3 Ia wai uraru haukia tubarainakia raninai,
imamu awarina hauna aꞌi keꞌiobina imamu itipana hanona taba nibabaina.
4 Weiana emu baibeni hanona aomuai kobunina.
Ba Hamamu taba bunianai tirama neihanakia hauna oi ꞌaramu kebeniꞌo.
Bahubaꞌari Hoana.
5 Wai katobahubaꞌari raninai bahaorea haukia ꞌabakiai aꞌi katoao.
Ia ekia nuatae apaꞌuana hanona marea aokiai mai aiara ibuakiai katekoroti katebahubaꞌari maearima ia kateihanakia paunai.
ꞌAbi tohana au wai nahinabenimi,
ꞌarakia maikoina aba teaꞌina.
6 Ia kobahubaꞌari raninai,
emu ikaihuri aonai kokatoto ba emu paꞌabi kokaiabuna kobahubaꞌari Hamamu aꞌi noihana hauna herenai.
Hamamu taba bunianai tirama neiha hauna ꞌaramu kebeniꞌo.
7 Tubahubaꞌari aonai ꞌabi anikia haꞌi haukia boꞌona aꞌi katohina matoha rama haeai haukia tibabaina ꞌabana.
Tiraonana ekia bahubaꞌari nihomaꞌa hanona Tirama aiakia aba niona.
8 Ia ꞌabakiai aꞌi katoao.
Wai Hamami aꞌi tunoi bahana aonai aba eꞌiobina wai taba tonuatae aina.
Bahubaꞌari Obiapaka Ebaꞌiobinaka Hauna.
9 Wai hanona ṉa katobahubaꞌari aiho.
‘Hamamai e,
kupai nomiaho.
Oi atamu hanona katabarobena.
10 Emu obia aiarana kemai,
ikoimaiai emu nuatae
katababaina hanopakai,
ihobona kupai tibabaina ꞌabana.
11 Bariu rani neianai aniani
ṯanuatae aina hauna kobenamai.
12 Emai kiꞌa tababai haukia
mohina hao,
ihobona weiakia heremaiai
tebabai kiꞌa haukia ekia kiꞌa
tahina hao ꞌabana.
13 Aꞌi koaoainamai baihobo ꞌekakiai,
ia tiaporo herenai kobamaurinamai.
(Kupa aiarana oi ꞌeumu,
Hiabu oi ꞌeumu,
Nuabi oi ꞌeumu,
keaomo banai banai.
Amen.)’a
14 Maearima weiakia heremiai tebabai kiꞌa haukia ekia kiꞌa katohina haonakia raninai,
Hamami kupai hauna emi kiꞌa abomo kehina haonakia.
15 Ia wai maearima ekia kiꞌa aꞌi katohina haonakia raninai,
Hamami kupai nemiaho hauna abomo emi kiꞌa aꞌi kehina haonakia.
Ani Robe Hoahoana.
16 Wai tuanirobe raninai wairami aꞌi katobabira biranakia matoha bahaorea haukia ꞌabakia.
Ihakia tibamaea maeanakia maearima ikoinai kateihanakia kateꞌiobina ia hanona tianirobe.
ꞌAbi tohana au wai nahina benimi,
ꞌarakia maikoina aba teaꞌina.
17 Ia oi koanirobe raninai,
wairamu koutu mai ꞌaramu tehoroai koutuna.
18 Weiana maearima aꞌi kateꞌiobina oi hanona nuanirobe,
iamo Hamaka aꞌi nahaihana hauna mo keꞌiobina.
Ba Hamamu taba bunianai tirama neihanakia hauna kehore ꞌaramu kebeniꞌo.
Kepu Kupai Katoroꞌanakia.
19 Emi kepu hanopakai aꞌi katoroꞌanakia,
weiana muhi mai ꞌabiꞌabi katehore kateaꞌi kiꞌanakia,
mai bainao haukia katehore itu kateahu paꞌana katebainao ainakia.
20 Ia emi kepu kupai katoroꞌanakia,
weia hanona muhi mai ꞌabiꞌabi aꞌi kateaꞌi kiꞌanakia,
mai bainao haukia itu aꞌi kateahu paꞌana aꞌi katebainao ainakia.
21 Weiana oi emu kepu ꞌeka tabanai hanona aomu abomo weia.
Hauani Ena Ramepa.
22 Maha hanona hauani ena ramepa,
oi mahamu tenamo raninai hauanimu maikoina hanona ea aonai.
23 Ia mahamu katekiꞌa raninai hauanimu maikoina hanona wapura aonai.
Ba oi aomu eana niwapura raninai wapura weiana hanona keapaꞌua wairai.
Poki Haukia Rua Taꞌarakia Aꞌi Koaꞌi.
(Lk 16.13)
24 Hau ha poki haukia rua rani hamonai taꞌarakia aꞌi keaꞌi.
Ia hamona ꞌarina aꞌi keꞌari mai ha keraonaꞌau aina,
ꞌao hamona aiana keona mai ha kebakiꞌana.
Wai Tirama mai kepu terarua rani hamonai taꞌarakia aꞌi katoaꞌi.
Aomi Aꞌi Katearoꞌari.
25 Weiana buonai au wai nahinabenimi.
Aomi aꞌi katearoꞌari,
taba patoana ꞌao taba patoinu emi mauri paunai,
ꞌao hauanimiai taba patobatotona hauna aꞌi katoraonana.
Mauri hanona eapaꞌua kiꞌa baha ba pohama,
mai hauanimu hanona eapaꞌua kiꞌa baha ba habuni.
26 Roborobo tirobo tomoihanakia.
Ia uho aꞌi tibato,
aꞌi tieueu mai rerea aꞌi tihoroti,
ia Hamami kupai hauna neꞌima harainakia.
Ia wai hanona tonamo kiꞌa baha ba roborobo.
27 Oi tai ha emu ao aroꞌari kehore emu mauriai pomiaho homaꞌa ꞌapuana?
28 Mai taba buonai aomi niaroꞌari habuni herenai?
Hoeahoea arabu haianai aea tiꞌomu aiho katoihanakia.
Ia aꞌi tiaroꞌari ꞌao kipokia habunikia aꞌi tibabai.
29 Ia au wai nahinabenimi,
Solomon ena nuabiai habuni namona ebatotona,
iamo taitai neiakia hanona tenamo kiꞌa baha.
30 Weiana arabu tubukia bariu titaitai mara aba kateꞌororo iruba aonai katekapo totonakia kateꞌara haukia habunikia Tirama nihore ṉa nibabatoto aihonakia raninai,
wai emi habuni ua aꞌi kebabatoto aihonimi,
u?
Emi aꞌikakauma tekoꞌikoꞌi haumi.
31 Ua buonai aomi aꞌi katearoꞌari,
aꞌi katoꞌabi,
“Aika taba kahana?”
ꞌao “Aika taba kahainu?”
ꞌao “Aika taba kahabatotona?”
32 Weiana rama haeai haukia taba nahomakia ikoinai titabunakia,
ia wai Hamami kupai aba eꞌiobina taba neiakia tonuatae ainakia.
33 Wai hanona Tirama ena obia aiarana mai ena nuatae akana berona katotabu ꞌuaina,
ba taba nahomakia ikoinai hanona wai kebenimi.
34 Weiana paunai aomu aꞌi kearoꞌari mara ꞌeunai.
Mara hanona kipona ena ao aroꞌari.
Wapu ha ha ekia aroꞌari hanona kipokia ꞌeukia.”