Baiꞌoi Haukia Ekia Hoahoa Taikia Aꞌi Katotai.
12
Rani weianai maearima boꞌona ꞌakina tebaehe aina,
ꞌa Iesu iꞌabana haukia ebaꞌiobi ꞌuainakia etibaha,
“Parisea haukia ekia baiꞌoi akana herenai Katoꞌima ꞌima harainimi weiana hanona bakupu muramurana ꞌabana.
2 ꞌA tebahu abunakia tabakia ikoikiai katekarahi abomo tehore buninakia tabakia ikoikiai kateꞌiobi.
Luka 12:1-59
3 Wapura aonai taba ohinana hauna beraura eanai kateona abomo ikaihuri aonai haianai obatete aina hauna itu kapenai kateiroro aina.
Tirama Ikupaiana Mo Kahataꞌu aina.
4 “Eꞌu hau e,
au wai nahina benimi.
Hauani iahuꞌarina mo teꞌiobina ia murinai taba ha ahanai aꞌi katebabai muena haukia aꞌi katotaꞌu ainakia.
5 Ia katotaꞌu aina hauna au kahore kabaꞌiobinimi.
Ia hanona hauanimi keahu ꞌarina murinai mai ena hiabu niꞌara banai banai irubana aonai kekapo ꞌaunimi hauna Tiramana katotaꞌu aina.
6 Komure ima pahakawanakia ꞌarakia toea rua mo.
ꞌA Tirama hanona weiakia ha aꞌi ereana.
7 ꞌAbi tohana,
bui bita aramiai haukia aba etuabi orenakia.
Aꞌi katotaꞌu,
wai hanona komure boꞌokia aba totara haonakia.
Iesu Pouna Kahahinana, Ia Aꞌi Kahahaumaea.
8 “Au wai nahina benimi.
Hau ha au pouꞌu kehinana maearima wairakiai,
Maearima Nahuna abomo Tirama ena aneru wairakiai ia pouna kehinana.
9 ꞌA maearima wairakiai au kebuniainaꞌu hauna abomo Tirama ena aneru wairakiai au ia kabuniaina.
10 Hau ha Maearima Nahuna herenai keꞌabi kiꞌa hanona aba kehina haona ia hau ha Auba Robe herenai keꞌabi kiꞌa hanona aꞌi kehina haona.
11 “Kateaoainimi marea obiakia rauhubu mai hiabu haukia wairakiai raninai,
aomu aꞌi kearo ꞌari ekia ꞌabi aea kobamue aihona ꞌao oi aea koꞌabi aiho.
12 Pokina rani weianai Auba Robe kehore oi taba koꞌuahina hauna aba kebaꞌiobiniꞌo.”
ꞌAbi Ibabataina Kepu Hauna Aoꞌabaeana.
13 Toꞌu aonai hau ha Iesu ehina bena etibaha,
“Baꞌiobi haumu e.
Aꞌaꞌu mohina bena emai kohu hamamai eꞌari boinakia haukia tararua baiatamai ai mewatenakia.”
14 Iesu ia ena ꞌabi ebamuena etibaha,
“Hau e,
tai au eaꞌi taeanaꞌu emi bakai kababaina abomo emi kohu kawatenakia?”
15 Ba maearima ehina benakia etibaha,
“Katoꞌinibeni harainimi kohu aꞌi katouhoreai kiꞌa baha,
pokina maearima ena mauri tohana hanona ena kohu boꞌonai aꞌi nimai.”
16 Iesu ꞌabi ibabatai ha ehina benakia.
“Herenai kepu eboꞌo hauna ha ena hanoai uma anikia boꞌona etabu ahinakia.
17 Ba kipona aonai eraona raona etibaha,
‘Taba kababaina?
ꞌEka ahaꞌi,
ꞌeka tabanai eꞌu ube kahorotinakia.’
18 Haeamona etibaha,
‘Ṉa kababai aiho,
paraboa ꞌaiꞌaina karubuna apaꞌuana ha mahamahana kababaina,
ba eꞌu biraura aniani ubekia mai eꞌu kohu ikoikiai weia kahorotinakia.
19 Au kipoꞌu kaꞌabi katibaha,
“Au hanona taba namokia hereꞌu aba eboꞌo harai aroꞌanakia ihau boꞌokia ꞌeukia.
Bariu karai kaniani kainuinu kaonamo harai.” ’
20 ꞌA Tirama ehore ehina bena etibaha,
‘Poꞌo haumu e!
Bariu rabi neianai au oi emu mauri kaꞌi obona raninai naiakia oroꞌanakia haukia hanona tai keaꞌinakia?’”
21 Ba Iesu ena ꞌabi orenai etibaha,
“Neiana hanona maearima ha kipona ena taba nibararonakia ia kipona ꞌeuna,
ia Tirama wairai hanona ena ibararo aꞌi eboꞌo.”
Aomi Aꞌi Kearoꞌari.
22 Ba Iesu iꞌabana haukia ehina benakia etibaha,
“Weiana buonai au wai nahina benimi.
Emi mauri paunai taba patoana ꞌao haumiai taba patobatotona hauna aomi aꞌi kebaro ꞌarina.
23 Pokina mauri hanona eapaꞌua ba aniani hauani abomo eapaꞌua ba habuni.
24 ꞌAokakara katoraonanakia.
Aniani aꞌi tibato ꞌao eueu berauranai aniani aꞌi tibararo abomo ekia rerea ꞌekana ahaꞌi ia Tirama akia nibenakia.
Ia wai hanona roborobo totara haonakia.
25 Oi tai ha emu ao aroꞌariai haumu papana pebahomaꞌana hanona petaina,
ꞌao?
26 Weiana taba papakia neiakia ibabaikia aꞌi toꞌiobi raninai aehoma buonai taba haeai haeai aomi tibaro ꞌarinakia.
27 “Bebetu tiꞌomu hanona katoihanakia.
Kipokia habuni akana aꞌi tibabaina.
Ia au wai nahina benimi.
Solomona obia arana ena habuni tenuabi kiꞌa,
iamo bebetu neiana hanona enamo kiꞌa baha ba Solomona ena habuni.
28 Tirama kipona hano tubukia nibataitainakia bariu timauri mara kateꞌororo irubai kahakapo ꞌaunakia kateꞌara.
Tirama ehore ua nibataitai aihonakia,
ia wai habuni aꞌi nibabatotonimi,
u?
Aꞌikakauma papana haumi.
29 Aomi taba patoana mai patoinu hauna aꞌi katotabuna,
weiakia aomi aꞌi katebaro ꞌarina.
30 Hanopaka neiana aonai Tirama aꞌi tiaꞌikakaumana haukia ikoikiai taba neiakia titabunakia,
ia Hamami kupai hauna taba neiakia ṯonuatae ainakia ikoikiai aba eꞌiobinakia.
31 Tirama ena obia aiarana katotabu ꞌuaina hanona neiakia ikoikiai wai kebenimi.”
32 “Toꞌu papana haumi e.
Aꞌi katotaꞌu,
pokina Hamami mai aonamona ena aiara kebenimi.
33 Emi kohu katokawa kawainakia monikia uraru haukia katobenakia,
aꞌi nekiꞌa ꞌapua mahoa ihiua ihiuana katobaꞌoruna ꞌeumi,
kupa kepuna aꞌi niore ꞌapua hauna katoaꞌina.
Bainao ha weia aꞌi niao abomo muhi taba weia ha aꞌi tiaꞌi kiꞌana.
34 Pokina emi kepu nemiaho ꞌekana hanona wai aomi abomo weia.”
Taꞌaraꞌi Hauna Namona Nibaiꞌima.
35 “Emi habuni katohai ꞌininakia abomo emi ramepa hanona katobaꞌaranakia katobaiꞌima.
36 Wai hanona ihobona baiꞌima haukia ꞌabakia,
ekia poki hauna hawainibe mahamaha ꞌekanai kemue kemai ṯeꞌimana.
Ba kemai paꞌabi kehara harana raninai paꞌabi beronai mo katekaikauna.
37 Taꞌara aꞌi haukia tibaiꞌima oho aonai ekia poki hauna kemai ketabu ahinakia hanona enamo.
ꞌAbi tohana au wai nahina benimi.
Poki hauna kipona ena habuni kehai ꞌinina ekia aniani ꞌekanai kebamiatinakia,
keroꞌonakia ekia aka kebabaina.
38 Rabi wapukaꞌa ꞌao kokoroꞌu tiꞌarara aonai taꞌara aꞌi haukia tibaiꞌima oho aonai ekia poki hauna ketabu ahinakia hanona tenamo.
39 Neiana katoꞌiobi haraina.
Itu poki hauna bainao hauna ena mai ranina keꞌiobi ꞌuaina raninai ena itu keꞌimana aꞌi kepaꞌa.
40 Wai abomo katobaꞌoru,
pokina aꞌi toꞌiobina rani tabanai Maearima Nahuna kemai.”
ꞌAbi Ibabataina, Aka Hauna Namona Mai Aka Hauna Kiꞌa Obona.
41 Petero Iesu ebakaina etibaha,
“Obiapaka e,
ꞌabi ibabatai neiana ai ikupaiamai heremai ai nohinana ꞌao maearima ikoikiai abomo?”
42 Obiapaka eꞌabi etibaha,
“Tai aia iona mai ao bero hauna,
ia ena poki hauna hiabu ebena ena itu kohukia keiha ꞌini,
weia taꞌara aꞌi haukia ekia aniani beraurakia tohakiai kebenakia?
43 ꞌImaꞌima hauna weiana ena poki hauna ena mueai ua niaka harai aiho ketabu ahina hanona enamo.
44 ꞌAbi tohana au wai nahina benimi.
Poki hauna kehore ꞌima hauna kebapokina ena kohu ikoikiai keꞌimanakia.
45 Ia ꞌimaꞌima hauna kipona keꞌabi ketibaha,
“Eꞌu poki hauna aꞌi kemai baha,”
ba ia kehore taꞌara aꞌi haukia mai babiꞌekia keꞌatinakia keani ani keinu inu keinu ꞌari.
46 Rani ha ꞌimaꞌima hauna aꞌi eraonana aꞌi ebaꞌoru aonai ena poki hauna kekaraꞌau hanona ia kekabe kabe hurina,
puma kebena matoha aia aꞌi tiona haukia ꞌabana.
47 “ꞌImaꞌima hauna ena poki hauna ena nuatae akana eꞌiobina kebabaina ia aꞌi ebaꞌoru mai aꞌi ebabainakia,
hau weiana hanona iꞌati boꞌona katebena.
48 ꞌA ꞌiobi ahaꞌi hauna ena aka kiꞌa ꞌarana hanona kateꞌatina ia iꞌati ꞌamaꞌamana katebena.
Taba boꞌona tebena hauna herenai taba boꞌona katenuataeai,
taba boꞌona keꞌimanakia hauna herenai taba boꞌona katenoiai.”
Iesu Emai Hanona Baiata Kehorena.
49 “Au hanona iruba amaiaina hanopaka ahanai,
eꞌu nuatae peꞌara biai.
50 Au hanona ꞌuererobe ha kaꞌina weiana kaopuma aina keaomo kabaore haraina.
51 Wai turaonana Au amai hanona baibua amaiaina hanopaka,
ꞌu?
Au wai nahina benimi,
ahaꞌi.
Baibua ahaꞌi ia hoa hore.
52 Bariu wairaka kahaeaoaina,
rama ha aonai haukia ima baiatakiai katehoa hore,
aihau katehore rua kateꞌoatanakia abomo rua katehore aihau kateꞌoatanakia.
53 Ia baiatakiai katehoa hore,
hama kehore nahu hauna keꞌoatana,
nahuna kehore hamana keꞌoatana,
hina kehore nahuna babiꞌena keꞌoatana,
nahu babiꞌena kehore hinana keꞌoatana,
hinana kehore rawana babiꞌena keꞌoatana,
rawa babiꞌena kehore hinana keꞌoatana.”
Maearima Rani Tabana Obo Aꞌi Teobo.
54 Iesu haeamona toꞌu haukia ehina benakia etibaha,
“Tibotaina tainai ꞌauhao ha kemikiri katoihana raninai beronai katoꞌabi katotibaha,
‘Abara ketibo,’
hanona nirama.
55 Ahitai tibo baurana niabu raninai wai tuꞌabi ṯotibaha,
‘Beraura kehiabu,’
hanona nirama.
56 Bahaorea haumi e.
Wai hanopakai mai kupai taba Tirama hanona ꞌabikia toꞌiobi,
ia aehoma buonai bariu rani neianai nirama hauna ꞌabina aꞌi ṯoꞌiobina?
Bakaiai Ehorotiniꞌo Hauna Ohi Emi Atetua Kobaberona.
57 “Aehoma buonai wai kipomi ibaberomi raonana aꞌi tubabaina?
58 Oi behoai ehorotiniꞌo hauna keaoainiꞌo bakai ꞌekana,
aꞌi niaoai bahaniꞌo bakai ꞌekana raninai taeara namona kotabuna torarua emi atetua kobaberona,
keahaꞌi raninai keaoainiꞌo kebabakainiꞌo hauna herenai,
ba ia kehore keaoainiꞌo habuni hauna herena,
ba habuni hauna wapura ꞌekanai kehorotiniꞌo.
59 Au wai nahina benimi,
weia aꞌi katokarahi ꞌapua keaomo ꞌara maikoinai katohore orena.”