Beho ꞌEkanai Aꞌi Katohorotinakia.
(Lk 6.37-38, 41-42)
7
“Baika beho ꞌekanai aꞌi katohorotinakia pokina Tirama wai beho ꞌekanai aꞌi mehorotinimi.
2 Weiana wai baika behoai tuhorotinakia taeara ihobonai Tirama kehore wai behoai kehorotinimi.
Mai wai emi babai baika herekiai ihobokiai Tirama kehore heremiai kebabai.
3 Taba buonai uahoꞌabamu mahana aonai matiu nabunabuna noihana,
iamo oi kipomu mahamu aonai matiu rarina robana aꞌi nuahuna?
4 Aehoma buonai oi uahoꞌabamu nohinabena,
“Mahamu aonai matiu nabunabuna maꞌi ahina”?
Ia oi hanona mahamu aonai matiu rarina nemiaho.
5 Oi bahaorea haumu!
Kipomu mahamu aonai matiu rarina moaꞌi ahi ꞌuaina,
ba koihaiha harai uahoꞌabamu mahana aonai matiu nabunabuna koaꞌi ahina.
6 Robe tabana waeha aꞌi katobenakia,
katekabe aꞌi teme ꞌurinimi marikina.
Emi mairi aꞌi katokapo ahinakia aiporo wairakiai.
Aekiai aꞌi temeꞌehe banai ꞌehe banaina marikina.
Katonoi, Katotabuna, Katoharahara.
7 Katonoi hanona kebenimi,
katotabuna hanona katotabu ahina,
katoharahara hanona paꞌabimi kekaikauna.
8 Weiana maearima ha ha tinoinoi hanona kateaꞌinakia,
tabu tabu haukia hanona katetabu ahina,
mai harahara haukia hanona paꞌabikia kekaikauna.
9 Oi hau tabamu,
nahumu pohama penoi aina raninai pihara pobena, u?
10 ꞌAo maia penoi aina raninai ꞌerau pobena, u?
11 Wai kiꞌa haumi,
iamo nahumi taba namokia katobenakia hanona toꞌiobina.
Babita ꞌabana Hamami kupai hauna kehore tinoi haukia taba namokia tohakia kebenakia, u?
12 Maearima baika heremiai taba tonuatae aina katebabaina hauna wai abomo herekiai ihobona katobabaina.
Neiana hanona Mose ena Rauhubu mai mahabanai haukia ekia baꞌiobi ꞌabina anina tohana.
Paꞌabi ꞌOmoꞌomona Aonai Katokatoto.
(Lk 13.24)
13 Wai hanona paꞌabi ꞌomoꞌomona aonai katokatoto.
Pokina paꞌabi weiana eao ꞌari banaibanai ꞌekana hanona emata mai taearana epanaba,
maearima boꞌona hanona weia tikatoto.
14 Ia paꞌabi weiana eao mauri ꞌekana hanona eꞌomoꞌomo,
mai taearana ikaꞌana hanona epahihi,
maearima bitamo titabu ahina.
Matiu Hanona Buanai Kahaꞌiobina.
15 Mahabanai baiꞌoi haukia katoiha harainakia,
katemai heremi ihakia matoha mamoe ꞌabakia,
ia aokia hanona waeha ꞌaki aibarakia ꞌabakia.
16 Wai hanona maearima weiakia buabuakiai katobaiꞌiobi.
ꞌAmaꞌama ꞌororo buana aꞌi keba ramana,
ꞌao ꞌini boaboa maiha buana aꞌi kebaramana.
17 Ihobona mo matiu namokia ikoikiai hanona buakia namokia tibaramanakia,
ia matiu kiꞌa obokia hanona buakia kiꞌa obokia tibaramanakia.
18 ꞌA matiu namona hanona buabua kiꞌa obona kebaramana aꞌi ketaina mai matiu kiꞌa obona hanona buabua namona kebaramana aꞌi ketaina.
19 Matiu weiakia ikoinai buabua namokia aꞌi tibaramanakia haukia hanona ikabe obo iruba aonai katekapo totonakia.
20 Weiana buabua uahomakiai hanona mahabanai baiꞌoikia aba katoꞌiobinakia.
Au Wai Aꞌi Aꞌiobinimi.
21 Maearima tiaparinaꞌu,
“Obiapaka e,
Obiapaka e,”
weiakia haukia maikoinai mo Tirama ena obia aiarana aonai aꞌi katekatoto,
ia tai Hamaꞌu kupai nemiaho hauna ena nuatae akana kebabaina hauna mo kekatoto.
22 Wapu weianai maearima boꞌona hereꞌu ai kateꞌabi katetibaha,
“Obiapaka e,
Obiapaka e,
ai atamuai tamahabanai,
ai atamuai auba kiꞌa obokia tauꞌu ahinakia,
mai hoa haeai haeai tababainakia!”
23 Ba au hanona wairakiai kahinabe harainakia katibaha,
“Au wai aꞌi aꞌiobinimi.
Hereꞌuai tomokapare,
wai kiꞌa ibabaina haumi!”
Itu Ibakorotikia Taearakia Rua.
24 Weiana paunai hau ha eꞌu ꞌabi neiana ꞌuruna niona mai akakia nibabai hanona matoha ao bero hauna ꞌabana ena itu wairo ahanai ebakori ꞌauna.
25 Abara etibo tou ekarahi mai baura rarina eabu ꞌau itu eabu kiꞌana,
ia aꞌi epobu,
pokina itu hanona wairo ahanai ebakori ꞌauna.
26 Ia hau ha eꞌu ꞌabi neiana ꞌuruna niona,
ia akana aꞌi nibabaina hanona matoha poꞌo hauna ꞌabana ena itu ꞌano ahanai ebakorotina.