Iesu Baꞌuere Robe Hauna Ioane Robana Eahuna.
11
Iesu iꞌabana haukia harau haea rua ꞌabi neiakiai erobenakia murinai,
ꞌeka weiana ehabona eao Galilea aiarakia aokiai weia kebaꞌiobi mai keiroro.
2 Ioane wapura ituna aonai Keriso ena aka poukia eoꞌo raninai iꞌabana haukia euhunakia herena teao,
3 Iesu tebakaina tetibaha,
“Kemai hauna hanona oi?
ꞌAo haeai ha kataꞌimana?”
4 Iesu ekia ꞌabi ebamuena etibaha,
“Tomomue tomoao,
taba toꞌo mai toiha haukia Ioane haianai katohinanakia.
5 Maha kiꞌa haukia aba ṯeihaiha mue,
ome haukia tikaꞌa,
morumoru haukia aba tinamo,
haia poꞌo haukia aia tioꞌo,
ꞌari haukia ṯemikiri timauri,
mai uraru haukia herekiai pou namona ṯeiroro aina.
6 Hau ha hereꞌuai aona aꞌi nikaiꞌau kaiꞌau hauna Tirama nibanamona.”
7 Ioane iꞌabana haukia tekamuri aonai,
Iesu toꞌu haukia herekiai Ioane pouna ehina ramana.
“Wai taba katoihana buonai toao hanoꞌakunai?
Baura kopura nibaibiunakia katoihanakia, u?
8 Ahaꞌi raninai,
toao hanona taba katoihana?
Hau ha habuni taꞌetaꞌekia ebatotonakia hauna,
u?
Weiakia habuni taꞌetaꞌekia tibatoto haukia hanona obia ꞌarana ena ituai ṯemiaho.
9 Ba taba katoihana buonai toao?
Mahabanai hauna ha?
ꞌE,
au wai nahinabenimi,
Ioane hanona mahabanai haukia etara haonakia.
10 Ia pouna Puka robenai ṉa tererena aihona,
‘Au eꞌu iuhubeau hauna
kauhu ꞌuaina wairamuai,
ia kehore emu taeara
keaꞌiaꞌi haraina.’ Mal 3.1
11 ꞌAbi tohana au wai nahinabenimi,
weiakia babiꞌe tebaramanakia haukia baiatakiai hau ha baꞌuere robe hauna Ioane aꞌi etara haona,
iamo weiana Tirama ena obia aiaranai ekoꞌi koꞌi hauna Ioane etara haona.
12 Baꞌuere robe hauna Ioane ena raniai emaimo bariu,
Tirama ena obia aiarana hanona tikakina,
kakikaki haukia hanona tibahobona katepuhu boina.
13 Pokina mahabanai haukia mai Mose ena rauhubu ikoikiai aokiai Tirama ena obia aiarana pouna tehinana emai mo Ioane ena raniai.
14 Wai tuaꞌi taeana raninai katoꞌiobina Ioane hanona Elia weiana kemai hauna.
15 Mai haiana hauna hanona aia keona.
16 Uru neiana haukia tabai kaba batainakia?
Ia hanona matoha miori papakia kawakawa ꞌekanai ṯemiati ꞌabakia tiaparinakia ṯetibaha,
17 ‘Ai irarabu ṯahunakia wai paumiai,
iamo wai aꞌi tuewa.
ꞌAri huikia ṯaꞌi,
iamo wai aꞌi tuhai.’
18 Weiana Ioane emai hanona aꞌi eaniani mai aꞌi einuinu,
ba ia teꞌabi tetibaha,
‘Auba kiꞌa obona ha ia aonai.’
19 Au Maearima nahuna amai aniani mai ainuinu hanona ia teꞌabi tetibaha,
‘Ia hanona aniani kiꞌa mai inuinu kiꞌa,
moni bararo mai aka kiꞌa haukia ekia hau.’
ꞌA aobero hanona ena buabua nihore ena bero nibatohana.”
Aꞌi Teraona Kabe Aiarakia Herekiai Kekiꞌa Wairai.
20 Weiana Iesu aiara weiakia aokiai hiabu hoakia boꞌokia ebabai ꞌekakia maearimakia ebatanakia,
pokina ia ekia kiꞌai aꞌi teraona kabe buonai.
21 “Korasina e,
heremuai kekiꞌa wairai!
Betesaida e,
oi abomo heremuai kekiꞌa wairai!
Hiabu hoakia heremiai ababai haukia Turo mai Sidono haukia herekiai pababai raninai,
ia hanona aba waꞌi baha ꞌakinai pateraona kabe,
habuni kiꞌa obokia patebatoto mai arakiai rabu patehoroti.
22 ꞌA au wai nahina benimi,
Tirama ena bakai apaꞌuana berauranai Turo mai Sidono haukia ekia puma hanona ma keꞌamaꞌama ba wai ꞌeumi.
23 Kaperanauma e,
oi kateaꞌi taeaniꞌo koao kupa ubinai,
u?
Ahaꞌi,
oi hanona katekapo ririniꞌo koao iruba aonai.
Hiabu hoakia weiakia heremuai ababai haukia Sodoma herenai pababai raninai,
ia hanona pemiaho mo pemai bariu rani neianai.
24 ꞌA au wai nahinabenimi,
Tirama ena bakai apaꞌuana berauranai Sodoma ena puma hanona ma keꞌamaꞌama ba wai ꞌeumi.
Tomai Hereꞌuai Katoarai.
25 Rani weianai Iesu ena bahubaꞌariai eꞌabi etibaha,
“Hamaꞌu e,
kupa mai hanopaka Obiana.
Au oi nabanamoniꞌo pokina taba neiakia ohore buninakia aotipa mai ꞌiobi haukia herekiai,
ia miori papakia herekiai obawaira tinanakia.
26 Hamaꞌu e,
ꞌabi tohana,
pokina neiana hanona oi emu aonamo tohana.
27 Hiabu ikoikiai hanona Hamaꞌu aba ebenaꞌu.
Ia Nahuna aꞌi teꞌiobina Hamana mo kipona,
mai hau ha Hamana aꞌi eꞌiobina Nahuna mai Nahuna etinaꞌanakia haukia weiakia herekiai kipona kebawaira tinana haukia mo.”
28 “Tuhau hororo haumi mai puma ṯobuana haumi,
ikoimiai ena hereꞌu tomai,
au wai arai kabenimi.
29 Eꞌu iebebe tomoaꞌina ꞌaromiai tomobuana mai hereꞌuai ꞌiobi katoaꞌina pokina au hanona ao ꞌamari mai ꞌaiaunu hauꞌu.
Weiana wai aubami katearai.
30 Pokina eꞌu iebebe hanona eꞌamaꞌama mai eꞌu buabua hanona aꞌi epuma.”