Iesu Roma Huari Poki Hauna Ena Aka Hauna Ena Inawa Ebanamona.
7
Iesu ena ꞌabi ikoinai ehina orenakia maearima herekiai murinai ekatoto Kaperanauma.
2 Roma huari poki hauna ha weia ena taꞌaraꞌi hauna ꞌarina eꞌari kiꞌa baha hauna hanona einawa kiꞌa aba keꞌari.
Luka 7:1-50
3 Ia Iesu pouna eona raninai Iuda haukia apaꞌuakia baika euhunakia katenoina kemai ena taꞌaraꞌi hauna kebamaurina.
4 Temai Iesu herena raninai tenoi hao noi haona tetibaha,
“Hau neiana pobaraina hanona penamo.
5 Pokina ia eka itubu niraonaꞌau aina,
ia ehore marea ebakorina ꞌeumai.”
6 Weiana Iesu kipokia teao,
bariu Iesu itu ebarina aonai huari poki hauna ena hau euhunakia Iesu tehina bena tetibaha,
“Obiapaka e,
aꞌi koaroꞌari,
pokina au aꞌi anamo komai eꞌu ituai kototo.
7 Ua buonai kawahi heremu abomo aꞌi etaina.
8 Weiana au hanona hau ha ena hiabu baꞌanai,
mai huari haukia abomo au baꞌaꞌuai.
Au hau neiana ha nahina bena moao hanona ia niao,
ꞌabana nahina bena omai hanona ia nimai.
Eꞌu taꞌaraꞌi hauna nahina bena neiana mobabaina hanona ia nibabaina.”
9 Iesu aia weiana eona raninai etaꞌu taꞌu huri,
ekabe toꞌu murinai haukia ehina benakia,
“Au wai nahina benimi,
Isaraela aonai aꞌikakauma nahomana ha aꞌi atabu ahina.”
10 Weiakia euhunakia haukia temue teao itu raninai,
taꞌaraꞌi hauna aba enamo tetabu ahina.
Iesu Wapu Nahuna ꞌAriai Ebamikirina.
11 Rani papana eao murinai Iesu eao aiara ha atana Nain,
iꞌabana haukia mai mako ia kipokia teao.
12 Aiara paꞌabina aba tibarina aonai,
ꞌari hauna ha tebua ahina weiana hanona wapu ha nahuna hamo hamona,
aiara haukia boꞌokia wapu teꞌabana.
13 Obiapaka wapu eihana raninai eaokoꞌo aina,
weiana ehina bena etibaha,
“Aꞌi kohai.”
14 Ia ekaꞌa ha ha eao koꞌo eaꞌi ꞌapuana,
ba koꞌo tebuana haukia tekoroti.
Iesu eꞌabi etibaha,
“Hau aruaruna e,
au nahina beniꞌo,
momikiri.”
15 Eꞌari hauna emikiri emiati eꞌabiꞌabi,
Iesu miori hinana ebeni muena.
16 Ikoikiai tetaꞌu wairai,
weiana Tirama tebanamona tetibaha,
“Mahabanai apaꞌuana ha baiatakai ewaira tina.”
Haeamona tetibaha,
“Tirama aba emai ena maearima herekia.”
17 Iesu pouna neiana Iudea ꞌeka maikoina mai herena hanokia ikoikiai aokiai tehina otaraina.
Ioane Iꞌabana Haukia Rua Euhunakia Iesu Herena Teao.
18 Ioane iꞌabana haukia ꞌabi neiakia ikoikia tehinanakia ia herenai.
19 Iꞌabana haukia rua eaparinakia euhunakia Obiapaka katebakaina katetibaha,
“Kemai hauna hanona oi,
ꞌao haeai ha kataꞌimana?”
20 Temai Iesu herena raninai tehina bena tetibaha,
“Baꞌuere Robe hauna Ioane euhunamai heremu katabakainiꞌo,
‘Kemai hauna hanona oi,
ꞌao haeai ha kataꞌima?’”
21 Rani weianai Iesu hanona maearima boꞌona ꞌakina ekia inawa,
hau haiara mai auba kiꞌa obokia aokiai haukia ebanamonakia,
abomo maha ꞌiau haukia boꞌona mahakia ebanoꞌa.
22 Iesu terarua ekia ꞌabi ebamuena etibaha,
“Tomoao,
taba toiha mai urukia toꞌo haukia Ioane katohina bena.
Maha ꞌiau haukia aba ṯeihaiha,
ꞌomeꞌome haukia aba tikaꞌa,
morumoru haukia aba tetaꞌe taꞌe,
haia poꞌo haukia aia aba tiona,
ꞌari haukia aba ṯemikiri timauri mauri,
abomo uraru haukia herekiai pou namona nairoro aina.”
23 Haeamona eꞌabi etibaha,
“Aona aꞌi nikaiꞌau kaiꞌau hereꞌuai hauna hanona enamo.”
Iesu Ioane Pouna Ehinana.
24 Ioane euhunakia haukia temue murinai,
Iesu haeamona toꞌu haukia herekiai Ioane pouna ehinana etibaha,
“Toao hano ꞌakunai hanona taba katoihana?
Baura kopura eabunakia katoihanakia, u?
25 Ahaꞌi raninai taba katoihana buonai toao weia?
Hau ha habuni ꞌarana rarina ebatotona katoihana,
u?
Weiakia habuni namoabukia tibatotonakia mai ekia obia tabakia teboꞌo haukia hanona obia arana hauna ena ituai katotabu ahinakia.
26 Taba katoihana buonai toao weia?
Mahabanai hauna ha,
u?
ꞌE,
ꞌabi tohana,
au wai nahina benimi,
neiana hauna ehore mahabanai haukia boꞌona etara haonakia.
27 Weiana hauna pouna Puka Robenai tererena,
‘Eꞌu iuhubeau hauna
kauhuna keꞌuai,
emu taeara keaꞌiaꞌi
harai ꞌuaina.’ Mal 3.1
28 Au wai nahina benimi.
Babiꞌe nuakiai terama haukia ikoikiai baiatakiai ha Ioane aꞌi etara haona.
Ia Tirama ena obia aiarana aonai ekoꞌi koꞌi kiꞌa baha hauna mo Ioane etara haona.”
29 Maearima ikoinai abomo moni bararo haukia Iesu ena ꞌabi ꞌuruna teona raninai Tirama ena taeara berona tebatohana,
pokina ia hanona Ioane ebaꞌuere robenakia.
30 ꞌA Parisea haukia mai rauhubu poki haukia Ioane ena baꞌuere robe aꞌi tenuatae aina buonai Tirama ena nuatae ꞌeukiai hauna tebaoao aina.
31 Iesu haeamona eꞌabi etibaha,
“Uru neiana maearimakia hanona tabai kababatainakia?
Ia hanona tabai kabaihobonakia?
32 Ia hanona matoha miori papakia aiara ibuanai ṯemiati ꞌabakia tiaparinakia ṯetibaha,
‘Ai pihi ṯaubainakia,
ia wai aꞌi ṯoewa,
ꞌari huikia ṯaꞌi,
ia wai aꞌi tuhai.’
33 Pokina baꞌuere robe hauna Ioane emai raninai aꞌi eaniani mai bine beina aꞌi einu,
ba wai toꞌabi totibaha,
‘Ia aonai auba kiꞌa obona ha nemiaho.’
34 Maearima Nahuna emai nianiani mai neinuinu hanona wai tuꞌabi ṯotibaha,
‘Aniani kiꞌa mai inuinu kiꞌa hauna abomo moni bararo haukia mai aka kiꞌa haukia ekia hau.’
35 ꞌA Tirama ena aobero hanona kateaꞌi taeana haukia herekiai ena bero kewaira tina.”
Babiꞌe Ha Tehoro Timina ꞌOrimonai Iesu Eheina.
36 Parisea hauna ha Iesu enuatae aina ena ituai kateaniani haeamo,
ba Iesu eao ituai etoto aniani ꞌekanai emiati.
37 Aiara weiana aonai aka kiꞌa babiꞌena ha,
Iesu Parisea hauna ena ituai kateaniani pouna eona raninai,
ia pihara kabapuna aonai muramura timina ꞌorimona hauna emaiaina.
38 Eao Iesu murinai aena pokinai ekoroti ehai ba mahana beikiai aena ebabeinakia,
buinai ebaꞌororonakia abomo epaunakia,
muramura timina ꞌorimona eheina ahakiai.
39 Parisea hauna weiana Iesu eaparina hauna babiꞌe ena babai eihana raninai,
kipona aonai eraonana etibaha,
“Neiana mahabanai hauna tohana raninai,
ia aba peꞌiobina,
babiꞌe tabana ia niaꞌi ꞌapuana,
pokina ia hanona kiꞌa babiꞌena.”
40 Iesu ehore ehina bena etibaha,
“Simona e,
au ꞌabi ha oi heremu ai,
kahinana.”
Ia etibaha,
“Baꞌiobi haumu e,
moꞌabi.”
41 Iesu eꞌabi etibaha,
“Hau rua moni baibeni hauna ha herenai moni teaꞌinakia,
hamona hanona kina hinabu imaa eaꞌina,
ha hanona kina imabui eaꞌina.
42 Ara katehore aꞌi etainakia buonai terarua moni katemue ainakia haukia ekakinakia,
ba aeana hauna ia ꞌarina keꞌari kiꞌa baha?”
43 Simona eꞌabi etibaha,
“Naraonana,
paꞌe weiana ena aꞌi ꞌuai apaꞌuana ekakina hauna.”
Iesu ia ehina bena etibaha,
“Aba oꞌabi harai.”
44 Iesu ekabe babiꞌe eihana,
ba Simona ehina bena,
“Babiꞌe neiana noihana?
Au amai emu ituai atoto hanona aeꞌu beikia aꞌi obaibeni.
ꞌA ia hanona mahana beikiai aeꞌu eutunakia abomo buinai ebaꞌororonakia.
45 Oi aꞌi opaunaꞌu,
ꞌa babiꞌe neiana akatoto ramana raninai aeꞌu ipaukiai aꞌi eꞌoro ꞌapua.
46 Oi araꞌu tehoroai aꞌi oheina,
ꞌa ia tehoro timina ꞌorimonai aeꞌu eheinakia.
47 Ua buonai nahina beniꞌo,
ena kiꞌa boꞌona ꞌakina haukia aba ihina hao,
pokina ena raonaꞌau eapaꞌua paunai,
ia tai ena raonaꞌau papana hauna hanona ena kiꞌa papana ihina hao.”
48 Ba Iesu babiꞌe ehina bena etibaha,
“Emu kiꞌa aba ihina hao.”
49 Aniani ꞌekanai temiati haukia kipokia baiatakiai teꞌabiꞌabi tetibaha,
“Neiana hanona tai,
ba kiꞌa abomo nehina hao.”
50 Iesu babiꞌe ehina bena etibaha,
“Emu aꞌikakauma ehore ebamauriniꞌo,
mai baibuamu moao.”