Babiꞌe Baika Iesu Murinai Tekaꞌa.
8
Neiana murinai rani aꞌi ehomaꞌa Iesu eao aiara apaꞌuakia mai papakia aokiai Tirama ena obia aiarana pouna namona eiroro aina.
Iꞌabana haukia harauhaea rua hanona teꞌabana kipokia teao,
2 mai babiꞌe baika abomo,
auba kiꞌa obokia ꞌeukiai euꞌu ahinakia mai hau haiarai ebanamonakia babiꞌekia,
ha Maria Magadala babiꞌena aonai auba kiꞌaobokia ꞌabaihau hamomo eba karahinakia babiꞌena,
3 ha Ioanna,
atawana Kusa hanona Heroda obia arana ena itu kohukia nipoki ainakia hauna,
mai Susanna,
mai babiꞌe boꞌokia baika.
Babiꞌe neiakia kipokia ekia tabai Iesu mai iꞌabana haukia tebarainakia.
ꞌAbi Ibabataina Biraura Hauna Ena Uho Ebatonakia.
4 Maearima boꞌona aiara ha ha ai temai Iesu herenai toꞌu rarina tebabaina aonai Iesu ꞌabi ibabatai neiana ehinana etibaha,
5 “Biraura hauna ha eao ena uho kebatonakia.
Ekapo kapo otarainakia aonai baika taearai teꞌeho,
ba maearima ahakia teheꞌau haeamona ubi roborobokia teani orenakia.
6 Uho baika bohu ahanai teꞌeho,
teꞌomu ia tepaea pokina hano aꞌi emapu mapu.
7 Uho baika awa ꞌiniꞌinikia aokiai teꞌeho,
awa ꞌiniꞌinikia kipokia teꞌomu haeamo ba tetara tara abunakia.
8 Uho baika hano namonai teꞌeho,
teꞌomu harai tebuaꞌa buakia hinabu ha ha ꞌabana.”
Iesu ena ꞌabi puanai eꞌabi aota etibaha,
“Mai haiana hauna hanona keꞌiobina.”
Luka 8:1-56
ꞌAbi Ibabatai Ena Poki.
9 Iꞌabana haukia Iesu tebakaina ꞌabi ibabatai neiana anina taba.
10 Ia eꞌabi etibaha,
“Tirama ena obia aiarana ꞌiobikia bunikia hanona aba wai ebenimi,
ia baika herekiai hanona ꞌabi ibabataiai nahina benakia,
weiana,
‘kateihana mo ia aꞌi kateiha
tinana aia kateona ia obona
aꞌi kateobo.’ Isa 6.9
Iesu ꞌAbi Ibabataina Anina Ehinana.
11 “ꞌAbi ibabatai anina neiana.
Uho hanona Tirama ena ꞌabi.
12 Uho taearai teꞌeho haukia hanona weiakia,
aia tiona ia tiaporo nimai ꞌabi aokiai niaꞌi parena pokina aꞌi teme aꞌikakauma mai aꞌi tememauri taꞌuna.
13 Uho weiakia bohu ahanai teꞌeho haukia hanona weiakia,
aia tiona raninai ꞌabi tiaꞌina mai aonamokia,
iamo ramukia ahaꞌi rani papana mo tiaꞌikakauma ba baihobo nimai raninai tiꞌeho.
14 Uho weiakia awa ꞌiniꞌinikia aokiai teꞌeho haukia hanona weiakia,
aia tiona ia mauri neiana ena ao aroꞌari ena obia tabakia mai ena aonamo tabakiai aokia nikaiabunakia ba buabuakia ṯepure.
15 ꞌA uho weiakia hano namonai teꞌeho haukia hanona weiakia,
aokia beronai mai namonai ꞌabi uruna tiona tiaꞌi ꞌinina tibakiro niao mo buabuakia tibarama.”
Ramepa ꞌEkana Tohanai Kohaoꞌauna.
16 Iesu haeamona ehina benakia etibaha,
“Hau ha ramepa nibaꞌarana raninai uro aonai aꞌi nibahu abuna ꞌao parua itarana baꞌanai aꞌi nikai tina ꞌa ia ramepa ihaoꞌauna ꞌekanai nihao ꞌauna ba weiakia katetoto haukia hanona ea kateihana.
17 Taba ikoinai tehore buni haukia hanona katekarahi mahanai,
taba ikoinai tebahu abu haukia hanona eai katebawaira tinanakia.
18 Aia aea nuo aihona hanona koꞌima haraina,
pokina mai ꞌeuna hauna hanona ahanai baika Tirama kehore ꞌauna kebena,
ia ꞌeuna ahaꞌi hauna hanona herenai papana nemiaho niraonana ꞌeuna hauna abomo keaꞌi obona.”
Iesu Hinana Mai Uahoꞌabana.
19 Ba Iesu hinana mai hatina temai kateihana iamo aꞌi etainakia pokina toꞌu rarina paunai.
20 Hau ha Iesu ehina bena etibaha,
“Oi hinamu mai hatimu mahanai tekoroti ṯenuatae kateihaniꞌo.”
21 Ba ena ꞌabi ebamuena etibaha,
“Neiakia Tirama ena ꞌabi aiana tiona mai akana tibabaina haukia hanona au hinaꞌu mai hatiꞌu.”
Iesu Rani Mai Roio Ebaꞌomatanakia.
22 Rani ha Iesu iꞌabana haukia kipokia ahi ai teheꞌau ba ehina benakia etibaha,
“Aika hamaeao obu abirana.”
Ba tebeau ahi.
23 Tebeau oho aonai,
Iesu hanona enoti eparua ꞌari.
Ba kou rarina obu aonai eabu ꞌau,
bei ahi aonai teraku uta hereka ꞌakinai pateuhu.
24 Iꞌabana haukia teao Iesu tebaona tetibaha,
“Poki haumu e,
poki haumu e,
aika aba kahatono ꞌari.”
Ba ia emikiri baura mai roio erikenakia,
baura eꞌoro roio eꞌomata.
25 Ba iꞌabana haukia ehina benakia etibaha,
“Emi aꞌikakauma aeꞌe?”
Ia tetaꞌu taꞌu huri abomo tetaꞌu kiꞌa kipokia baiatakiai tebakai bakai tetibaha,
“Neiana hanona hau tabana,
baura mai roio ehina benakia hanona aiana tikaꞌaina.”
Iesu Hau Ha Aonai Auba Kiꞌa Obokia Euꞌu Ahinakia.
26 Iesu iꞌabana haukia kipokia ahiai tebeau banai teao Gerasene hanonai weiana hanona Galilea obu abiranai.
27 Iesu ekaraꞌau poeai raninai,
aiarai hau ha aonai auba kiꞌa obokia temiaho hauna emai tebaitabu ahi.
Aba waꞌi baha ꞌakinai habuni haꞌi ebatotona haeamona ituai aꞌi emiaho,
ia ꞌari ahanai emiaho.
28 Ia Iesu eihana raninai eio kiꞌa haeamona eꞌeho aena pokinai eio aota kiꞌa etibaha,
“Iesu ꞌubi tohanai Tiramana Nahuna e,
taba nonuatae aina hereꞌuai kobabaina.
Nanoiniꞌo puma aꞌi kobenaꞌu.”
29 Pokina Iesu auba kiꞌa obokia aba ehina benakia hau weiana aonai katekarahi.
Rani boꞌokia auba kiꞌa obokia tehaburi abuna,
maearima tehore imana aena tabiriai tebirinakia teꞌima haraina iamo tabiri eba mohunakia haeamona auba kiꞌa obokia tebabeau totona hano ꞌakunai.
30 Iesu ia ebakaina etibaha,
“Atamu tai?”
Ia etibaha,
“Ataꞌu hanona Mako.”
Pokina auba kiꞌa obokia boꞌona ꞌakina aonai temiaho.
31 Ia auba kiꞌa obokia Iesu tenoina aꞌi keuhunakia aꞌi kateao ꞌuri ꞌourana aena ahaꞌi hauna aonai.
32 Aiporo toꞌuna ha weia teba korinakia oeo mekenai teaniani,
ba auba kiꞌa obokia Iesu tenoina keuhunakia kateao aiporo aokiai katetoto buonai euhunakia teao.
33 Ba auba kiꞌa obokia hau weiana aonai tekarahi teao aiporo aokiai tetoto,
aiporo toꞌuna tebeau riri papaꞌai terobo ahi,
ꞌobu aonai tetono ꞌari.
34 Aiporo bakori haukia taba weiana erama teihana raninai tebeau ꞌakauma aiarai mai umai pou neiana tehinana.
35 Maearima teao taba erama hauna kateihana Iesu herenai tekaraꞌau raninai,
hau weiana aonai auba kiꞌa obokia tekarahi hauna Iesu aena pokinai emiati habuni ebatotona abomo aona aba ebero teihana ba ikoikiai tetaꞌu kiꞌa.
36 Weiakia teihana haukia maearima herekiai hau weiana aonai auba kiꞌa obokia tetoto hauna aea enamo aiho hauna pouna tehinana.
37 Gerasene maearimakia ikoikiai Iesu tenoina hano weianai kekapare pokina tetaꞌu kiꞌa.
Weiana ia ahiai eheꞌau kemue.
38 Hau weiana aonai auba kiꞌa obokia tekarahi hauna Iesu enoina peꞌabana,
ia Iesu ehore ebamuena ehina bena etibaha,
39 “Komue emu aiara,
Tirama taba ebabaina heremuai hauna pouna kohinana.”
Ua buonai hau weiana eao aiara maikoinai aokiai Iesu taba ebabaina herenai hauna pouna ehinana.
Iairo Nahuna Mai Babiꞌe Ha Iesu Ena Habuni Eaꞌi ꞌApuana Hauna.
40 Iesu emue raninai,
toꞌu haukia tehore teaꞌi taeana pokina ikoikiai ia teꞌimana.
41 Weiana hau ha atana Iairo marea poki hauna ha emai Iesu aena pokinai ekuti enoina kateao ena itu.
42 Pokina nahuna uahona hamo hamonamo ihauna harauhaea rua hanona aba keꞌari.
Iesu niao oho aonai toꞌu rarina aonai ekaꞌa.
43 Ba babiꞌe ha weia,
ia hanona babiꞌe ekia inawa eaꞌina aba ihau harauhaea rua,
muramura haukia herekiai ena kohu ebaorenakia,
hau ha ia aꞌi ebanamona.
44 Ia Iesu murinai ekataeana eao ena habuni puana eaꞌi ꞌapuana,
beronai mo ena inawa eꞌoro.
45 Iesu ebakai bakai etibaha,
“Tai eaꞌi ꞌapuanaꞌu?”
Ikoikiai tebuniai aonai Petero eꞌabi etibaha,
“Poki haumu e,
maearima tekori abuniꞌo abomo tetuaniꞌo.”
46 ꞌA Iesu eꞌabi etibaha,
“Hau ha eaꞌi ꞌapuanaꞌu pokina aꞌiobina hiabu hauꞌuai hauna aba ekarahi.”
47 Weiana babiꞌe eꞌiobina kepihi taearana ahaꞌi ba eao mai ꞌururu ꞌururuna eꞌeho Iesu aena pokinai,
taba buonai eaꞌi ꞌapuana abomo aea enamo aiho pouna maearima ikoikiai wairakiai ehinana.
48 Ba Iesu babiꞌe weiana ehina bena etibaha,
“Nahaꞌu e,
emu aꞌikakauma ehore aba ebanamoniꞌo mai baibuamu moao.”
49 Iesu niꞌabi ohomo aonai hau ha Iairo ena ituai emai Iairo ehina bena etibaha,
“Nahumu aba eꞌari.
Baꞌiobi hauna aꞌi mobaro ꞌari ꞌabaeana.”
50 Iesu aia weiana eona ba Iairo ehina bena etibaha,
“Aꞌi kotaꞌu,
koaꞌikakaumanaꞌu.
Nahumu hanona kenamo.”
51 Iesu Iairo ena ituai ekaraꞌau raninai maearima ikoikiai ebamuenakia,
ia Petero,
Iakobo,
mai Ioane mai uaho hamana hinana mo teꞌabana tetoto.
52 Weia hanona maearima ikoikiai uaho tihai aina mai tiaokoꞌo aina.
Iesu eꞌabi etibaha,
“Hai tomobapuana,
uaho hanona aꞌi eꞌari,
ia niparua.”
53 Maearima Iesu teiriri aina,
teꞌiobina uaho hanona aba eꞌari toha.
54 Iesu uaho imanai eaꞌi eaparina etibaha,
“Nahaꞌu e,
momikiri.”
55 Uaho aubana emue beronai emikiri,
ba Iesu ehina benakia taba ha katebena keana.
56 Uaho hamana mai hinana tetaꞌu taꞌu huri,
ꞌa Iesu ehara abunakia taba erama hauna hanona tai ha haianai aꞌi kateꞌabi.