Wapu Ena Baibeni.
21
Iesu mahana eao kepu herekia teboꞌo haukia ekia baibeni marea monina iutana mauana aonai teuta eihanakia.
2 Abomo wapu uraruna ha ena toea papakia rua eutanakia eihana.
Luka 21:1-38
3 Iesu eꞌabi etibaha,
“ꞌAbi tohana au wai nahina benimi,
wapu uraruna neiana euta tabana eapaꞌua ba ikoikiai.
4 Maearima neiakia ikoikiai ekia obiai baibeni tabakia papakia tehoroti,
ꞌa wapu neiana ena uraruai kemiaho aina tabana maikoina ehorotina.”
Iesu Marea Robe Kerabu Taina Pouna Ehinana.
5 Iꞌabana haukia baika marea robe terobahu aina ena nuabi piharakia namoabukiai mai baibeni Tirama tebena tabakiai tebabaina.
ꞌA Iesu eꞌabi etibaha,
6 “Bariu ṯoiha tabakia neiakia rani kemai aonai pihara ha pihara ha ahanai aꞌi kemiaho maikoinai kateruru ore.”
Katoꞌima Harainimi, Ia Kateꞌoatanimi.
7 Tebakaina tetibaha,
“Baꞌiobi haumu e,
aita raninai taba neiakia katerama?
Abomo katerama ranina mai hoana hanona taba?”
8 Iesu eꞌabi etibaha,
“Katoꞌima harainimi,
aꞌi temeꞌoinimi,
weiana maearima boꞌona au ataꞌuai katemai kateꞌabi,
‘Hauna neiana Au,’
haeamona ‘Rani aba herekai,’
hanona murikiai aꞌi katoꞌau.
9 Huari mai ꞌau urukia katoꞌo hanona aꞌi katotaꞌu,
taba neiakia hanona katerama ꞌuai,
ꞌa puana hanona wairai.”
10 Haeamona ia ehina benakia etibaha,
“Hanopaka ha kemikiri hanopaka ha kehuarina,
itubu ha kemikiri itubu ha kehuarina.
11 ꞌEka haeai haeai kanokau apaꞌuakia,
arobo,
mai inawa kiꞌa obokia katerama,
abomo taꞌu tabakia mai hoa rarikia kupai katerama.
12 “ꞌA taba neiakia ikoikiai aꞌi katerama baha aonai,
au ataꞌu paunai kateaꞌinimi haeamona katebapoꞌonimi ba kateaoainimi mareai mai wapura ꞌekakiai katehorotinimi,
abomo kateberinimi kateaoainimi obia mai kabamani haukia wairakiai.
13 Ia rani neiana hanona wai Pou Namona katohinana herekiai ranina.
14 Aea katobakai aiho paunai,
aomi aꞌi katearo ꞌari.
15 Pokina Au kahore aobero ꞌabikia kabenimi,
weiana emi ꞌou haukia katebamuenakia ꞌao katebuniai ainakia hanona aꞌi ketaina.
16 “Hamami,
hinami,
uahoꞌabami,
hatiaꞌami,
mai emi hau katehore katehina hinainimi,
abomo wai baika kateahu ꞌarinimi.
17 Maearima ikoikiai kateꞌoatanimi au pauꞌuai.
18 ꞌA aramiai bui ha hamona aꞌi kekiꞌa.
19 Emi bapahihiai wai emi mauri katoaꞌinakia.
Iesu Ierusalema Kateahu ꞌItiꞌitina Pouna Ehinana.
20 “ꞌA huari haukia Ierusalema katekori kaiarona katoihanakia raninai,
aba katoꞌiobina ena pua ranina aba herekai.
21 Ba weiakia Iudea ai ṯemiaho haukia katebeau kobio kateao,
weiakia aiara apaꞌuana aonai haukia katekarahi mahanai,
weiakia mahanai haukia aiara apaꞌuanai aꞌi katekatoto.
22 Pokina rani neiakia hanona haiara ranikia taba ikoikiai Puka Robenai tererenakia haukia ibatohakia.
23 ꞌA rani weiakia aokiai babiꞌe mai nuakia abomo nahukia ꞌoruꞌorukia babiꞌekia herekia hanona kekiꞌa kiꞌa baha,
haiara rarina ꞌakina hano ahanai kerama abomo Tirama ena opuere keriri maearima neiakia ahakiai.
24 Ia baika kareba mahanai kateꞌari,
ba baika kateaꞌi maurinakia kateaoainakia hanopaka haeai haeai aokiai wapura haukiai kateao,
rama haea haukia hanona Ierusalema katebaripu ripuna keaomo ekia rani Tirama eꞌuahina hauna ketaina.
Maearima Nahuna Kemai Ranina.
25 “Beraura,
nawa,
mai bihiu aokiai hoa katerama mai ꞌaku roio mai harapuni urukiai hanopaka haukia ikoikiai aokia kearo ꞌari abomo nuakia ketae.
26 Hanopakai taba kerama hauna kateꞌimana aonai maearima katetaꞌu aokia katerea,
pokina kupai hiabu tabakia kateibiu ibiu.
27 Rani weianai maearima hanona Maearima Nahuna kateihana ꞌauhao ahanai kemai mai hiabuna mai nuabina.
28 ꞌA taba neiakia kateaꞌi ramana raninai katokoroti arami katoaꞌi taeana,
pokina ibamaurimi aba niherekai.”
Kuropou Matiunai ꞌIobi Kahaꞌina.
29 Ba Iesu ꞌabi ibabatai neiana ehina benakia etibaha,
“Kuropou mai matiu ikoikiai katoihanakia.
30 Raukia hubu hubukia katekarahi katoihanakia raninai katoꞌiobina hioro aba herekai.
31 Ba ihobonaimo wai abomimo taba neiakia katerama katoihanakia raninai,
katoꞌiobina Tirama ena obia aiarana hanona aba herekai.
32 “ꞌAbi tohana au wai nahina benimi,
uru neiana maearimakia aꞌi kateꞌari ore baha aonai taba neiakia ikoikiai katerama.
33 Kupa mai hanopaka kateꞌakauma,
ꞌa eꞌu ꞌabi hanona aꞌi keꞌakauma ꞌapua.
Iesu Iꞌabana Haukia Ehina benakia Kateꞌima ꞌima Harainakia.
34 “Kipomi katoꞌima ꞌima harainimi.
Tatuai inuinuai abomo hanopaka ena aoaniai aomi aꞌi mebareana marikina,
rani kemai hanona aba herekai matoha rio ꞌabana,
aꞌi mebataꞌu taꞌu hurinimi.
35 Rani weiana kemai hanona maearima ikoikiai hanopakai ṯemiaho haukia ahakiai.
36 Rani ikoinai katobaiꞌima abomo katobahubaꞌari,
weianai katotabura taba neiakia ikoikiai katerama haukia herekiai katokapare Maearima Nahuna wairanai katokoroti.”