Iesu Tebakaina Hiabu Aeꞌeai Eaꞌina.
20
Rani ha Iesu hanona Marea Robe aonai maearima ebaꞌiobinakia mai pou namona eiroro aina,
robe haukia apaꞌuakia rauhubu poki haukia mai aiara haukia apaꞌuakia kipokia tebahamomo tekaraꞌau teao Iesu herena.
2 Tehina bena tetibaha,
“Mohina benamai,
bero tabanai aka neiakia nubabainakia,
tai bero neiana ebeniꞌo?”
Luka 20:1-47
3 Iesu ekia ꞌabi ebamuena etibaha,
“Au abomo wai kabakainimi,
katohina benaꞌu.
4 Ioane ena baꞌuere robe hanona kupai emai ꞌao maearima herekiai emai?”
5 Kipokia baiatakiai teꞌabiꞌabi aina tetibaha,
“Kahaꞌabi ‘kupai emai,’
raninai ia keꞌabi,
‘Aehoma buonai aꞌi toaꞌikakaumana?’
6 ꞌA kahatibaha,
‘Maearima herekiai emai,’
raninai maearima neiakia piharai kateahunaka,
pokina ia teꞌabi,
‘Ioane hanona mahabanai hauna.’”
7 Iesu ena ꞌabi tebamuena tetibaha,
“Ai aꞌi taꞌiobina aeꞌeai emai.”
8 Iesu ehina benakia etibaha,
“Au abomo wai aꞌi kahina benimi,
taba neiakia tai ena beroai nababainakia.”
ꞌAbi Ibabataina Bine Haharua Iꞌimana Haukia Kiꞌa Obokia.
9 Ba Iesu ꞌabi ibabatai neianai maearima ehina benakia etibaha,
“Hau ha bine haharuana ebatona,
biraura haukia baika eaꞌinakia kateꞌimana,
ꞌa ia hanona ekaobo rani homaꞌana hanopaka haeai emiaho.
10 Bine buana ibararona ranina etaina,
poki hauna ena taꞌaraꞌi hauna ha euhuna eao haharua iꞌimana haukia herekiai bine buakia baika katebena.
ꞌA baiꞌima haukia tehore taꞌaraꞌi hauna teahuna imana ꞌabaeana teuhuna emue.
11 Haeamona ena taꞌaraꞌi hauna haeai ha euhuna,
ia baiꞌima haukia aka hamomona mo tebabaina,
teahuna tebahaumaeana imana ꞌabaeana teuhuna emue.
12 Ibaihauna euhuna,
ꞌa baiꞌima haukia tehore tebamaniꞌana teuꞌu ahina.
13 Weiana haharua poki hauna etibaha,
‘Tabamo kababaina?
Au Nahaꞌu tohana,
eꞌu raonaꞌau kauhuna keao hanona paꞌe ia aba katemariki aina.’
14 ꞌA haharua iꞌimana haukia ia teihana raninai teꞌabiꞌabi aina tetibaha,
‘Neiana hanona haharua poki hauna nahuna,
hamahu ꞌarina,
haharua hanona aika ꞌeukai keao.’
15 Temikiri teberi ahina haharua kapenai teahu ꞌarina.
Ba haharua poki hauna taba kebabaina haharua iꞌimana haukia herekiai?
16 Ia hanona kemai haharua iꞌimana haukia weiakia keahu ꞌarinakia haharua hanona maearima haeai kebenakia.”
Maearima ꞌabi weiana teona raninai tetibaha,
“Neiana ua aꞌi pehoma.”
17 Iesu eiha ꞌini ꞌininakia ba ebakainakia etibaha,
“Puka Robenai tererena ꞌabina anina hanona taba?
‘Itu ibakorina haukia
tebaoao aina piharana hanona
aba itu ibua ꞌinina piharanaia
eao.’ Sal 118.22
18 Hau ha keꞌeho pihara weiana ahanai hanona keahu ahu hurina,
ꞌa pihara weiana keꞌeho hau ha ahanai hanona hau weiana keꞌiti ꞌiti obo matoha apuroro ꞌabana.”
19 Rani weianai rauhubu poki haukia mai robe haukia apaꞌuakia taeara tetabu Iesu katebirina,
pokina ꞌabi ibabatai hanona ia mo ahakiai ehinana,
ia maearima tetaꞌu ainakia buonai aꞌi etainakia.
Takiti Baibeni Bakai bakaina.
20 Iesu teiha ꞌinina,
ꞌabi baiꞌoi haukia baika teuhunakia katebakai baiꞌoina matoha bero haukia ꞌabakia.
Ena ꞌabiai hanona kateaꞌina,
rauhubu mai hiabu haukia imakiai kateutana.
21 Weiana baiꞌoi haukia tebakaina tetibaha,
“Baꞌiobi haumu e,
ai taꞌiobina oi emu baꞌiobi mai emu ꞌabi hanona tebero kiꞌa baha,
maearima ekia hoahoa hanona oi aꞌi nuraonanakia,
ꞌa Tirama ena ꞌabi tohana taearanai nubaꞌiobi harainamai.
22 Ai takiti monina obia arana katabena hanona ebero ꞌao ahaꞌi?”
23 ꞌA Iesu ekia baiꞌoi weiana hanona aba eꞌiobina,
ba ehina benakia etibaha,
24 “Moni ha tomobaihanaꞌu.
Tai aubaubana mai tai atana?”
Ia teꞌabi,
“Obia ꞌarana ꞌeuna.”
25 Iesu ehina benakia etibaha,
“Obia ꞌarana ꞌeuna hanona Obia ꞌarana katobena,
ꞌa Tirama ꞌeuna hanona Tirama katobena.”
26 Maearima wairakiai ena ꞌabiai katebarewana hanona aꞌi etainakia,
ia ena ꞌabiai mo tetaꞌutaꞌu huri,
ꞌabi ha aꞌi tehina ꞌapuana.
ꞌAriai Mikiri Mue Bakai bakaina.
27 Sadukea haukia baika weiakia ꞌariai mikiri mue aꞌi tibatohana haukia temai Iesu herena tebakaina tetibaha,
28 “Baꞌiobi haumu e,
Mose eka rauhubu ṉa erere aihona,
hau ha keꞌari atawana kemiaho nahuna ahaꞌi raninai ia uahoꞌabana kehore wapu keatawana,
miori katebarama eꞌari hauna ꞌeuna.
29 Weiana uahoꞌaba ꞌabaihau hamomo temiaho,
pakana babiꞌe ha eatawana nahuna ahaꞌi aonai eꞌari.
30 Ibaruana wapu weiana eatawana ba eꞌari,
31 ibaihauna abomo wapu weiana eatawana,
ba taeara hamonaimo haukia ꞌabaihau hamomo teatawana nahukia ahaꞌi teꞌari.
32 Muri ꞌakinai babiꞌe weiana abomo eꞌari.
33 Ba mikiri mue raninai babiꞌe weiana hanona tai atawanai keao,
pokina ia haukia ꞌabaihau hamomo ikoikiai teatawana.”
34 Iesu ia ehina benakia etibaha,
“Hanopaka neiana haukia hanona ikoikiai tihawainibe.
35 ꞌA hanopaka weiana haukia ꞌariai katemikiri mue haukia hanona aꞌi katehawainibe.
36 Ia aꞌi kateꞌari mue,
pokina ia hanona aneru ihobokia abomo aba ꞌariai temikiri mue Tirama nahunai kateao.
37 ꞌAriai mikiri mue ꞌabina hanona Mose abomo ebaihana matiu ꞌiniꞌinina arabuna eꞌara orina aonai.
Ia Obiapaka eꞌuahina Aberahamo ena Tirama,
Isako ena Tirama,
Iakobo ena Tirama.
38 Ia hanona ꞌari haukia ekia Tiramana ahaꞌi,
ꞌa mauri haukia ekia Tiramana,
pokina Ia aonai maearima ikoikai nahamauri.”
39 Iesu ena ꞌabi teona raninai rauhubu poki haukia baika teꞌabi tetibaha,
“Baꞌiobi haumu e,
ꞌabi tohana mo naiana.”
40 Weiana murinai ibakaina tebaoao aina.
Keriso Ebakai bakai ainakia.
41 Iesu ehore maearima ebakainakia etibaha,
“Aeahoma buonai maearima tiꞌabi Keriso hanona Davida nahuna?
42 Davida kipona Salamo pukanai eꞌabi,
‘Obiapaka hanona eꞌu Obia
ehina bena etibaha,
Itipaꞌu tainai momiati,
43 keaomo oi emu ꞌou haukia
ikoikiai oi ꞌapumu ieheꞌauna
tabanai kabaonakia.’ Sal 110.1
44 Neiana Davida ehore ia Obiana ehinana ba aea homanai mo Keriso hanona Davida nahuna?”
Rauhubu Poki Haukia Kateꞌima ꞌima Harainakia.
45 Maearima ikoinai tibahu aonai,
Iesu iꞌabana haukia ehina benakia etibaha,
46 “Rauhubu poki haukia herekiai katoꞌima harainimi,
ekia nuatae hanona habuni homaꞌakia katebatoto katekaoao kaoao,
mai kawakawa ꞌekakiai maearima ia kateba namonakia,
haeamona mareai mai tatu ꞌekakiai imiaꞌau ꞌekakia namokiai mo katemiaꞌau.
47 Wapu ekia itu tiani ꞌaunakia,
maearima ia kateihanakia paunai ekia bahubaꞌari Tibahomaꞌanakia.
Maearima uahomakia haukia puma rarina kateaꞌina.”