Ori Ibabataina Hawainibe Mahamaha Tatuna.
22
Iesu haeamona ꞌabi ibabatainai ehinabe muenakia etibaha,
2 “Tirama ena obia aiarana hanona matoha obia hauna ha nahuna ena hawainibe tatuna ebabaina ꞌabana.
3 Ia ena taꞌaraꞌi haukia euhunakia tebeau beau enuatae ainakia haukia tehina benakia,
ia enuatae ainakia haukia teubo aꞌi temai.
4 Ba ia haeamona ena taꞌaraꞌi haukia haeai baika euhunakia etibaha,
‘Abeaunakia haukia katohinabe muenakia katotibaha,
ꞌEꞌu poromakau mai eꞌu mahi namokia aba ahunakia aba teiua ꞌitiꞌitinakia taba ikoikiai aba tebaꞌorunakia,
hawainibe tatuna katomai.’
5 ꞌA maearima weiakia hanona ia robana aꞌi teahuna tekamuri,
ha ena uma eao ha ena aka ꞌekana eao.
6 Harina haukia taꞌaraꞌi haukia teaꞌi ꞌininakia tebatae ainakia ba teahu ꞌarinakia.
7 Weiana obia hauna eopuere wairai,
ba emikiri ena huari haukia euhunakia,
ahuahu haukia weiakia teahu ꞌarinakia ekia aiara abomo tehuhuna.
8 Ba ia ena taꞌaraꞌi haukia ehinabenakia etibaha,
‘Hawainibe anianina aba eꞌoru,
ꞌa abeaunakia haukia aꞌi tenamo aꞌi katemai.
9 Tomoao aiara ibuanai taimo taimo katotabu ahinakia haukia katobeaunakia katemai hawainibe neiana tatunai.’
10 Ua buonai taꞌaraꞌi haukia teao aiara ibuanai tetabu ahi maearimakia namo haukia mai kiꞌa haukia ikoikiai temaiainakia,
baki baki haukia hawainibe ituna tebabonu ꞌauna.
11 ꞌA obia hauna eao baki haukia eihanakia raninai hau ha eiha tinana hawainibe tatuna habunina aꞌi ebatotona.
12 Ebakaina etibaha,
‘Eꞌu hau e!
Hawainibe tatuna habunina ahaꞌi ia aea ohoma ototo?’
Hau weiana keꞌabi ꞌekana ahaꞌi.
13 Obia hauna ena taꞌaraꞌi haukia ehina benakia etibaha,
‘Aena imana katobirinakia atapaka wapuranai katokapo ahina,
uaꞌa kehai mai ꞌakiꞌakina kearaoꞌi araoꞌi.’”
14 Iesu ena ꞌabi orenai etibaha,
“Boꞌona eaparinakia ꞌa bita mo etinaꞌanakia.”
Takiti Bakaibakaina.
15 Parisea haukia tetoꞌu roba teahu aea patehoma Iesu ena ꞌabiai patebarewana.
16 Ekia maearima baika mai Heroda murinai tiꞌau haukia kipokia teuhunakia teao Iesu herena tehinabena tetibaha,
“Baꞌiobi haumu e,
ai ṯaꞌiobina oi hanona ꞌabi tohana haumu,
Tirama ena taeara tohana nubaꞌiobi aina abomo maearima taikia aꞌi nutai pokina ia aea homakia haukia robakia aꞌi nuahuna.
17 Ua buonai emu raona taba hanona mobaꞌiobinamai,
Takiti monina Kaisara katabena hanona ebero ꞌao ahaꞌi?”
18 Ekia raona kiꞌa obona weiana Iesu aba eꞌiobina buonai eꞌabi etibaha,
“Wai bahaorea haumi,
aehoma buonai au tuhobonaꞌu?
19 Takiti tubaibeni monina ha tomobaihanaꞌu.”
Ba silba monina ha temaiaina tebena.
20 Iesu ia ebakainakia etibaha,
“Neiana tai aubaubana abomo tai atana?”
21 Ia teꞌabi,
“Kaisara ꞌeuna.”
Ba Iesu ia ehinabenakia etibaha,
“Kaisara ꞌeuna Kaisara katobena,
ꞌa Tirama ꞌeuna Tirama katobena.”
22 ꞌAbi neiana aiana teona raninai teꞌarara kiꞌa ba tehabona tekaꞌa.
ꞌAriai Mikiri Mue Bakaibakaina.
23 Beraura hamona weianai Sadukea haukia temai Iesu herena,
ia hanona mikiri mue aꞌi tibatohana haukia,
Iesu tebakaina,
24 tetibaha,
“Baꞌiobi haumu e,
Mose ṉa ebaꞌiobi aihonamai.
Hau ha ehawainibe ia nahuna ahaꞌi ebaramana eꞌari raninai uahoꞌabana kehore wapu weiana keatawana miori kebaramana uahoꞌabana eꞌari hauna nahunai keao.
25 Bariu aꞌa hati haukia ikoinai ꞌabaihau hamomo baiatamaiai temiaho.
Pakana ehawainibe,
miori ha aꞌi ebaramana aonai eꞌari wapu uahoꞌabana ibaruana hauna herenai ehabona,
eatawana.
26 Haeamona uahoꞌabana ibaruana abomo nahuna ahaꞌi eꞌari,
taeara ihobonai mo erama uahoꞌabana ibaihauna herenai eao mo ibaꞌabaihau hamomona herenai epua.
27 Puana ꞌakinai babiꞌe abomo eꞌari.
28 Bariu mikiri mue raninai babiꞌe weiana hanona tai atawanai keao,
pokina haukia ꞌabaihau hamomo babiꞌe weiana teatawana?”
29 Iesu ekia ꞌabi ebamuena etibaha,
“Wai aba tuhaorea pokina Puka robenai terere ꞌabikia mai Tirama ena hiabu aꞌi toꞌiobinakia paunai.
30 Mikiri mue ai maearima hanona aꞌi katehawainibe.
Ia haukia hanona kupa anerukia ꞌabakiai kateao.
31 ꞌAri haukia katemikiri mue ꞌabina Tirama ehina benimi hauna aꞌi totuabina,
u?
Ia etibaha,
32 ‘Au hanona Aberahamo ena Tirama,
Isako ena Tirama,
Iakobo ena Tirama’.
Ia hanona ꞌari haukia ekia Tirama ahaꞌi,
ia hanona mauri haukia ekia Tirama.”
33 Mako ꞌabi neiana teona raninai ia ena baꞌiobi ꞌabinai tetaꞌu taꞌu huri.
Rauhubu Apaꞌuana Tohana.
34 Iesu Sadukea haukia ebaunu baihanakia pouna Parisea haukia teona raninai ia abomo tetoꞌu.
35 ꞌAbakia ha rauhubu hauna Iesu ehobona ebakaina etibaha,
36 “Baꞌiobi haumu e,
rauhubu ꞌabina aeana hauna eapaꞌua kiꞌa baha?”
37 Iesu eꞌabi etibaha,
“Obiapaka emu Tirama koraonaꞌau aina mai aomu ikoinai mai aubamu ikoinai mai emu raona ikoinai.
38 Neiana hauna hanona rauhubu ꞌabina apaꞌuana abomo koriꞌuaina.
39 Rauhubu ꞌabina apaꞌuana ibaruana hanona neiana,
heremu ai hauna koraonaꞌau aina kipomu nuraonaꞌau ainiꞌo ꞌabana.
40 Rauhubu ꞌabikia ikoikiai mai mahabanai ꞌabikia ikoikiai hanona rauhubu neiakia rua ahakiai tekori ꞌau.”
Iesu Parisea Haukia Ebakaibakai ainakia.
41 Parisea haukia titoꞌu ohomo aonai Iesu ia ebakainakia etibaha,
42 “Wai hanona Keriso aea turaona aihona?
Abomo ia hanona tai nahuna?”
Ia tehinabena tetibaha,
“Davida nahuna.”
43 Ba Iesu ebakainakia etibaha,
“Aehoma buonai Davida Auba Robeai ebonu hanona ia Keriso eaparina Obiapaka?
Pokina Davida eꞌabi etibaha,
44 ‘Obiapaka hanona eꞌu Obia
ehinabena etibaha,
“Itipaꞌu tainai komiati keaomo
emu ꞌou haukia ꞌapumu baꞌanai
kahorotinakia.” Sal 110.1
45 Davida Keriso eaparina eꞌu Obia raninai,
aea homanai mo Keriso hanona Davida nahunai keao?”
46 Hau ha Iesu ena ꞌabi kebamuena hanona aꞌi etaina,
abomo rani weianai hau ha aꞌi enuakoꞌo,
Iesu aꞌi ebakaina.