Iesu Mero Hauna Ebamikirina.
2
Wapu baika teore murinai Iesu haeamona emue eao Kaperanauma aiarana,
maearima pouna teona ia hanona ituai.
Mareko 2.1-14
2 Maearima boꞌona ꞌakina temai tetoꞌu itu ebonu ꞌauna,
ꞌeka hana ha aꞌi emiaho eao mo paꞌabi ꞌakonai epua,
ba Iesu neiroro aiana tiona.
3 Hau bani hanona mero hauna ha tebuana teaoaina.
4 Maearima eboꞌo kiꞌa baha buonai,
hau weiana kateaoaina Iesu herenai hanona aꞌi etaina.
Ua buonai Iesu ꞌarana paipana kapeheneai ꞌerere ha tebabaina.
Mero hauna mai ꞌirena weia tebaririna eao Iesu wairanai.
5 Iesu ekia aꞌikakauma weiana eapaꞌua kiꞌa baha eihana buonai,
mero hauna ehina bena etibaha,
“Nahaꞌu e!
Emu kiꞌa aba ihina hao.”
6 Rauhubu poki haukia baika weia temiati,
kipokia teraona raona.
7 “Taba buonai hau neiana ṉa niꞌabi aiho?
Ia Tirama herenai niꞌabi kiꞌa.
Tirama mo kipona kiꞌa kehina haonakia.”
8 Iesu abahamo aokia eꞌiobina,
ba wairakiai eꞌabi,
etibaha,
“Taba buonai ꞌabi neiana turaonana?
9 Kiꞌa ihina hao ꞌabina hanona eꞌamaꞌama,
aꞌi tubatohana reꞌa,
bariu hau neiana kahina bena kemikiri kekaꞌa katoihana.
10 Ba katobatohana,
au Maearima nahuna hanona mai hiabuꞌu hanopakai kiꞌa kahina haonakia.”
Ba mero hauna ehina bena etibaha,
11 “Au oi nahina beniꞌo.
Omikiri,
emu ꞌire moaꞌi taeana,
mokaꞌa emu itu!”
12 Maearima wairakiai emikiri,
ena ꞌire eouna eaꞌi taeana ekaꞌa.
Ikoikiai tetaꞌu taꞌu huri,
Tirama tebanamona tetibaha,
“Aika hoa ṉahomana ha aꞌi haiha ꞌapuana.”
Iesu Lebi Eaparina.
13 Iesu haeamona emue eao Galilea ꞌobu poena.
Maearima boꞌona ꞌakina temai herena ba ebaꞌiobinakia.
14 ꞌA ia ekaꞌa eao aonai,
takiti aꞌi hauna Lebi Alepeo ena aka ꞌekanai emiati eihana,
Iesu ia ehina bena etibaha,
“Muriꞌuai omai!”
Lebi beronai mo emikiri murinai eao.
15 Lebi ena ituai aniani ꞌekanai temiati,
takiti aꞌi haukia mai kiꞌa haukia boꞌokia Iesu mai iꞌabana haukia kipokia teaniani,
pokina mako Iesu murinai tekaꞌa.
Mareko 2.15-28
16 Rauhubu poki haukia Parisea itubunai temai Iesu kiꞌa haukia mai takiti aꞌi haukia kipokia teaniani haeamo teihanakia raninai,
iꞌabana haukia tebakainakia tetibaha,
“Taba buonai Iesu maearima uahomakia kipokia tianiani haeamo?”
17 Iesu aiakia eona raninai,
ekia ꞌabi ebamuenakia etibaha,
“Maearima aꞌi ṯeinawa haukia hanona muramura baibeni hauna aꞌi ṯenuatae aina,
ꞌa inawa haukia mo ṯenuatae aina.
Au aka bero haukia paukiai aꞌi amai,
ia au hanona kiꞌa haukia paukiai amai.”
Anirobe Bakai bakaina.
18 Rani ha baꞌuere robe hauna Ioane iꞌabana haukia mai Parisea haukia hanona teani robe.
Ua buonai maearima baika temai Iesu tebakaina tetibaha,
“Baꞌuere robe hauna Ioane iꞌabana haukia mai Parisea haukia iꞌabakia haukia tiani robe,
ꞌa oi iꞌabamu haukia aehoma buonai aꞌi tiani robe?”
19 Iesu ekia ꞌabi ebamuena,
etibaha,
“Tomoraona haraina!
Hawainibe mahamaha hauna ena baki haukia aonamo weiana aonai hanona aea kateani robe aiho?
Ahaꞌi baihana!
Kipokia ṯemiaho oioi hanona aꞌi kateani robe.
20 ꞌA rani kemai aonai hawainibe mahamaha hauna herekiai kateaꞌi parena.
Ua raninai ia abomo kateani robe.
21 Habuni mahamahana puapuana ha habuni ꞌaiꞌaina marana aꞌi kehuri abuna,
pokina habuni mahamahana puapuana keberi oꞌonaina habuni ꞌaiꞌaina ketapana.
Mara rarina kerama.
22 Abomo bine mahamahana beibei ꞌaiꞌainai aꞌi kebaharuna,
pokina bine mahamahana kehore beibei ꞌaiꞌaina kebua ꞌitiꞌitina,
bine mai beibei ohi katekiꞌa haeamo.
Ua buonai bine mahamahana hanona beibei mahamahanai mo katebaharuna.”
Beraura Robe Obiana.
23 Beraura Robenai Iesu Witi umanai ekabanai,
iꞌabana haukia kaꞌakiai Witi buakia terurunakia teani.
24 Parisea haukia hanona Iesu tehina bena tetibaha,
“Moihana!
Taba buonai oi iꞌabamu haukia hanona Beraura Robe rauhubuna tiaꞌi kiꞌana?”
25 Iesu ekia ꞌabi ebamuena etibaha,
“Davida ena maearima kipokia rani weianai mareꞌa teꞌari,
emikiri taba ebabaina hauna pouna aꞌi totuabi ꞌapuana?
26 Abiata Robe hauna ena raniai,
Davida emikiri eao Marea Robeai parawa robe weia robe haukia kateani hauna eani,
baika ena maearima ebenakia teani.”