Iesu Iꞌabana Haukia Aekia Eutunakia.
13
Mara hanona Kabanai tatuna,
weiana Iesu eꞌiobina ena rani aba ekaraꞌau hanopaka kehabona keao Hamana herena.
Ia hanopakai ia ꞌeuna haukia rani ikoinai eraonaꞌau ainakia,
ia bariu ena raonaꞌau maikoinai kebaihanakia keao mo keꞌari.
2 Rabirabi teaniani aonai,
tiaporo aba Simona nahuna Iuda Isakariote hauna aona eana Iesu hinahinana kehinahinaina.
Jesus washes disciples feet (Ioane 13:1-17)
3 Iesu hanona aba eꞌiobina Hamana ehore taba ikoikiai aba ia imanai eutanakia,
weiana ia hanona Tirama herenai emai haeamona kemue Tirama herena.
4 Weiana Iesu aniani ꞌekanai emikiri ena ibatoto habuni ahanai hauna eaꞌi obona ehorotina ba tauera eaꞌina huanai ehaina.
5 Bei ebaharu ahina ritiai ba iꞌabana haukia aekia eutu ramanakia,
tauera huanai ehaina hauna aekia ebaꞌororonakia.
6 Iesu emai Simona Petero herenai ekaraꞌau raninai Petero eꞌabi etibaha,
“Obiapaka e,
oi hanona au aeꞌu koutunakia,
u?”
7 Iesu Petero ena ꞌabi ebamuena etibaha,
“Bariu au taba nababaina hauna oi obona aꞌi nuobo,
ꞌa keao muriai hanona obona aba kobo.”
8 Petero Iesu ehina bena etibaha,
“Oi hanona au aeꞌu aꞌi koutu ꞌapuanakia.”
Iesu Petero ena ꞌabi ebamuena etibaha,
“Aemu aꞌi kautunakia raninai oi hanona au iꞌabaꞌu haumu ahaꞌi.”
9 Simona Petero ia ehina bena etibaha,
“Obiapaka e,
aeꞌu mo ikupaiakia ahaꞌi,
ꞌa imaꞌu mai araꞌu abomo koutunakia.”
10 Iesu ia ehina bena etibaha,
“Hau ha aba eꞌuere hauna hanona hauna maikoina aba emahamaha ba aena mo keutunakia.
Wai hanona aba tomahamaha,
iamo hamona hanona ahaꞌi.”
11 Pokina Iesu eꞌiobina tai hanona ia kehinahinaina,
weiana buonai eꞌabi etibaha,
“Ikoimiai hanona tomahamaha iamo hamona hanona ahaꞌi.”
12 Weiana aekia eutunakia murinai ena ibatoto habuni eaꞌina ebatoto muena.
Emue ꞌekanai emiati.
Ia ehore ebakainakia etibaha,
“Au taba heremiai ababaina hauna anina toꞌiobina?
13 Wai au tuaparinaꞌu emi baꞌiobi hauꞌu mai Obiapaka,
ua tuꞌabi aiho hanona ebero,
pokina au hanona ua homaꞌu.
14 Ba au emi Obiapaka mai emi baꞌiobi hauꞌu iamo aemi autunakia raninai wai abomimo ꞌabami ha ha aekia katoutunakia.
15 Au babai neiana heremiai ababaina toihana hauna ihobonai mo katobabaina.
16 ꞌAbi tohana au wai nahina benimi,
taꞌaraꞌi hauna hanona ena poki hauna aꞌi etara haona,
ihobona mo iuhubeau hauna hanona euhuna hauna aꞌi etara haona.
17 Bariu babai neiakia ababainakia anikia aba toꞌiobinakia,
ba taeara ihobonai katobabainakia hanona wai Tirama kebanamonimi.
Iesu Ehore Ia Kehinahinaina Hauna Ehina Pou ꞌUaina.
18 “Au ikoimiai robami aꞌi nahuna,
ia weiakia atinaꞌanakia haukia hanona aꞌiobinakia.
Ia weiana hanona Puka robenai tererena ꞌabina nibatohana,
‘Tararua parawa ṯani haeamo hauna ehore au niꞌoatanaꞌu.’
Jesus predicts betrayal (Ioane 13:18-38)
19 Bariu taba neiana aꞌi nirama baha aonai nabaꞌiobi baihanimi,
pokina taba weiana kerama raninai wai katoaꞌikakauma au hanona miaho banaibanai hauꞌu.
20 ꞌAbi tohana au wai nahina benimi,
hau ha au auhuna hauna niaꞌi taeana hauna hanona au niaꞌi taeanaꞌu,
mai hau ha au niaꞌi taeanaꞌu hauna hanona euhunaꞌu hauna abomo niaꞌi taeana.”
21 Iesu ꞌabi neiana ehinana murinai ia aona epuma eꞌabi etibaha,
“ꞌAbi tohana mo au wai nahina benimi.
Wai hau ha au kohinahinainaꞌu.”
22 Weiana buonai iꞌabana haukia kipokia tebaiha maiaina aꞌi teꞌiobina ia hanona tai robana niahuna.
23 Ia iꞌabana haukia ha Iesu ena raonaꞌau hauna Iesu herenai emiati.
24 Weiana Simona Petero mahana ebairu ia herenai ba etibaha,
‘Mobakaina ia tai robana niahuna.’
25 Ia Iesu herenai emiati hauna eiru haha Iesu herena ebakaina etibaha,
“Obiapaka e,
oi tai robana nuahuna?”
26 Iesu ia ena ꞌabi ebamuena etibaha,
“Parawa papana ꞌororo aonai kakaihuna kabena hauna iamo weiana.”
Ba Iesu ehore parawa eaꞌina ꞌororo aonai ekaihuna ba Iuda ebena,
ia hanona Simona nahuna Isakariote hauna.
27 Beronai Iuda parawa eaꞌina eana hanona Satani ia aonai etoto.
Weiana Iesu Iuda ehina bena etibaha,
“Taba kobabaina hauna mobabai biaina.”
28 Weiakia aniani ꞌekanai temiati haukia Iesu Iuda ua ehinabe aihona hanona obona aꞌi teobo.
29 Iuda hanona moni puteputena eꞌimana paunai baika teraonana Iesu ia ehina bena taba tatuai tenuatae ainakia haukia kekawanakia,
ꞌao taba baika uraru haukia kebenakia.
30 Iuda parawa puana papana eaꞌina eana murinai,
beronai emikiri ekarahi,
ba weiana hanona aba erabi.
Rauhubu ꞌAbina Mahamahana.
31 Iuda ekamuri aonai,
Iesu eꞌabi etibaha,
“Bariu hanona au Maearima Nahuna eꞌu nuabi kewaira tina mai au hauꞌuai Tirama ena nuabi abomo kewaira tina.
32 Ba au hauꞌuai Tirama ena nuabi kewaira tina raninai Tirama abomo au Maearima Nahuna eꞌu nuabi kebawaira tinana,
ba beronai mo kebabaina.
33 Eꞌu raonaꞌau miorimi e,
au hanona rani papana mo wai kipokia kahamiaho.
Ba wai au katotabunaꞌu.
Iuda haukia aba ahina benakia ihobonai bariu wai nahina benimi,
au kaeao ꞌekana wai katoao hanona aꞌi ketaina.
34 Au rauhubu ꞌabina mahamahana wai nabenimi,
wai ha ha katoraonaꞌau ainimi.
Au wai araonaꞌau ainimi ihobonai wai abomo ha ha katoraonaꞌau ainimi.
35 Wai ha ha katoraonaꞌau ainimi raninai,
maearima ikoikiai kateꞌiobina wai hanona au iꞌabaꞌu haumi.”
Iesu Ehore Petero Ia Kebuniai aina Hauna Ehina Pou ꞌUaina.
36 Simona Petero ia ebakaina etibaha,
“Obiapaka e,
oi hanona aeana nuao?”
Iesu eꞌabi etibaha,
“Au bariu naeao ꞌekana oi muriꞌuai komai hanona aꞌi ketaina,
ꞌa muriai hanona muriꞌuai komai.”
37 Petero eꞌabi etibaha,
“Obiapaka e,
aehoma buonai bariu murimuai kaꞌau hanona aꞌi ketaina?
Au hanona aba abaꞌoru oi paumuai kaꞌari.”
38 Ba Iesu ia ena ꞌabi ebamuena etibaha,
“Oi au pauꞌuai koꞌari,
u?
ꞌAbi tohana au oi nahina beniꞌo,
kokoroꞌu aꞌi kearara baha aonai oi rani aihau au kobuniai ainaꞌu.”