Iesu Hanona Hamana Herena Kateao Haukia Ekia Taeara.
14
Iesu eꞌabi etibaha,
“Aomi aꞌi katearoꞌari.
Tirama kato aꞌikakaumana,
au aboꞌumo kato aꞌikakaumanaꞌu.
2 Hamaꞌu ena itu aonai miaho ꞌekakia hanona eboꞌo,
peahaꞌi raninai au wai aba pahina benimi.
Au kaeao ꞌeka ha kaꞌiaꞌi haraina wai ꞌeumi.
The only way to God (Ioane 14:1-14)
3 Weiana au kaeao ꞌeka ha kaꞌiaꞌi haraina wai ꞌeumi,
murinai kamue kamai kaꞌinimi kahaeao au aeꞌeai kamiaho hanona wai abomimo weia.
4 Au kaeao ꞌeka weiana taearana hanona wai aba toꞌiobina.”
5 Toma Iesu ehina bena etibaha,
“Obiapaka e,
oi koao ꞌekana hanona ai aꞌi ṯaꞌiobina,
ba katawahi taearana hanona aea kataꞌiobi aihona?”
6 Iesu Toma ehina bena etibaha,
“Taearana hanona au,
ꞌabi tohana abomo au,
haeamona mauri abomo au.
Hamaka herena kateao haukia ikoikiai ekia taeara hanona au.
7 Wai au pato ꞌiobinaꞌu raninai,
Hamaꞌu abomo aba patoꞌiobina,
bariu waira keaoaina aonai ia aba toꞌiobina abomo aba toihana.”
8 Pilipo Iesu ehina bena etibaha,
“Obiapaka e,
emai nuatae tohana hanona neiana,
Hamaka mobaihanamai.”
9 Iesu ena ꞌabi ebamuena etibaha,
“Pilipo e,
rani ehomaꞌa aba kipokia hamiaho oioi,
iamo oi hanona au aꞌi oꞌiobinaꞌu,
u?
Hau ha au eihanaꞌu hauna hanona Hamaꞌu aba eihana,
ae homa buonai nuꞌabi,
Hamaka mobaihanamai.
10 Pilipo,
nuaꞌikakaumanaꞌu,
au hanona Hamaꞌu aonai mai Hamaꞌu hanona au aoꞌuai.
ꞌAbi neiakia nahinanakia heremiai hanona au kipoꞌu eꞌu nuataeai aꞌi naꞌabi,
weiana hanona Hamaꞌu au aoꞌuai nemiaho hauna ena aka nibabainakia.
11 Tomo aꞌikakaumana weiana aꞌabi au hanona Hamaꞌu aonai mai Hamaꞌu hanona au aoꞌuai,
ahaꞌi raninai aka ababainakia haukia paukiai tomo aꞌikakaumanaꞌu.
12 “ꞌAbi tohana mo au wai nahina benimi,
hau ha au niaꞌikakaumanaꞌu hauna aka nababainakia haukia ia abomo kebabainakia.
Haeamona aka apaꞌuakia tohakia abomo kebabainakia,
pokina au naeao Hamaꞌu herena.
13 Ba au ataꞌuai taba ikoikiai katonoi ainakia hanona kababainakia.
Weiana Hamaꞌu ena nuabi hanona kewaira tina nahuna paunai.
14 Weiana au ataꞌuai taba ikoikiai katonoi ainakia hanona au kahore kababainakia.
Iesu Eꞌabiꞌuai Auba Robe Keuhuna Kemai.
15 “Wai au katoraonaꞌau ainaꞌu raninai eꞌu rauhubu ꞌabikia hanona katobabua ꞌaunakia.
Jesus talks about the Holy Spirit (Ioane 14:15-31)
16 Au kahore Hamaꞌu kanoina ba Baraibarai hauna kebenimi,
ia hanona ꞌabi tohana Auba Robena wai heremiai kemiaho banaibanai.
17 Ia hanona ꞌabi tohana Auba Robena,
hanopaka haukia hanona aꞌi kateaꞌi taeana pokina aꞌi teihana mai aꞌi teꞌiobina,
ꞌa wai hanona ia toꞌiobina pokina ia hanona wai heremiai nemiaho mai wai aomiai kemiaho.
18 “Au hanona aꞌi kahabo ꞌabaeanimi matoha miori hamana hinana ahaꞌi hauna ꞌabana,
au hanona kamue kamai heremi.
19 Rani papana murinai hanopaka haukia hanona au aꞌi kateiha muenaꞌu,
ia wai hanona au katoihanaꞌu,
pokina au namauri haeamona wai abomimo katomauri paunai.
20 Wapu weiana kemai aonai wai katoꞌiobina au hanona Hamaꞌu aonai,
wai hanona au aoꞌuai,
ihobona mo au hanona wai aomiai.
21 Hau ha au eꞌu rauhubu ꞌabikia niaꞌi taeanakia mai nibabua ꞌaunakia hauna hanona au niraonaꞌau ainaꞌu,
ia au niraonaꞌau ainaꞌu hauna Hamaꞌu kehore ia keraonaꞌau aina.
Ba au abomo ia karaonaꞌau aina,
mai ia herenai kawaira tina.”
22 Iuda Isakariote hauna ahaꞌi ia Iuda haeai ha hauna Iesu ebakaina etibaha,
“Obiapaka e,
aehoma buonai ai mo heremaiai kowaira tina,
ia hanopaka haukia herekiai hanona aꞌi kowaira tina?”
23 Iesu Iuda ena ꞌabi ebamuena etibaha,
“Hau ha au niraonaꞌau ainaꞌu hauna eꞌu baꞌiobi ꞌabikia kebabua ꞌaunakia,
Hamaꞌu kehore ia keraonaꞌau aina,
haeamona au mai Hamaꞌu ohi katamai herenai kipokia katamiaho.
24 Hau ha au aꞌi niraonaꞌau ainaꞌu hauna hanona eꞌu ꞌabi aꞌi nibabua ꞌaunakia.
ꞌAbi neiakia aiakia tuoꞌo haukia hanona au kipoꞌu eꞌu ꞌabi ahaꞌi ia Hamaꞌu euhunaꞌu hauna ena ꞌabi.
25 “Au wai kipokia hamiaho oioi aonai taba neiakia hanona aba ahinanakia heremiai.
26 ꞌA Baraibarai hauna Auba Robe,
au ataꞌuai Hamaꞌu keuhuna hauna kehore taba ikoikiai kebaꞌiobinimi,
mai ꞌabi weiakia ikoikiai ahina haukia kebaraona tinanimi.
27 “Baibua wai heremiai nahabona.
Au eꞌu baibua wai nabenimi,
weiana hanona hanopaka ꞌeuna nibaibeni hauna ꞌabana ahaꞌi.
Aomi aꞌi kearoꞌari mai aꞌi katotaꞌu.
28 Wai aꞌabi au kahabonimi hanona aiaꞌu aba toꞌona,
ia haeamona kamue kamai heremi.
Wai au turaonaꞌau ainaꞌu raninai,
au naeao Hamaꞌu herena hanona aomi kenamo pokina ia hanona etarahi ba au.
29 Au taba neiakia bariu aba nabaꞌiobi ꞌuainimi ba muriai katerama,
ba weiakia katerama aonai wai hanona aba katoaꞌikakauma.