Iesu Hanona Bine Matiuna Tohana.
15
Iesu eꞌabi etibaha,
“Au hanona bine matiuna tohaꞌu,
ia Hamaꞌu hanona haharua poki hauna.
2 Ia nihore au re ikoikiai ahaꞌuai aꞌi tebuaꞌa haukia hanona nikabe obonakia mai re weiakia tebuaꞌa haukia ikoikiai ia nihore nirorinakia katemahamaha weiana buakia boꞌona katehore ahinakia.
The Vine and the branches (Ioane 15:1-17)
3 Wai hanona ꞌabi neiakia ahinabe ainimi haukia paukiai aba tomahamaha.
4 Wai au aoꞌuai katomiaho,
au abomo wai aomiai kamiaho.
Re kipona aꞌi kebuaꞌa ꞌabaea,
ia re hanona bine matiuna ahanai kekomo ꞌau harai hanona kebuaꞌa.
Weiana ihobonai mo wai au hauꞌuai aꞌi katokomo ꞌau harai hanona buami aꞌi katerama.
5 “Au hanona bine matiuna wai hanona rena.
Hau ha au aoꞌuai,
mai au ia aonai namiaho hauna hanona buabua boꞌokia kebaramanakia,
au katohabonaꞌu raninai wai taba ha katobabaina hanona aꞌi ketaina.
6 Hau ha au aoꞌuai aꞌi kemiaho raninai,
ia hanona kateneꞌena re ꞌabana keꞌororo.
Ba re uahomakia hanona katebararonakia iruba aonai katekapo totonakia weia kateꞌara.
7 “Wai au aoꞌuai katomiaho mai eꞌu ꞌabi wai aomiai katemiaho raninai ṯonuataeai tabakia katonoiai haukia ikoikiai Hamaꞌu kehore kebenimi.
8 Wai buabuami kateboꞌo au iꞌabaꞌu haumi ai katoao raninai Hamaꞌu ena nuabi kewaira tina.
9 Hamaꞌu au niraonaꞌau ainaꞌu ihobonai,
au abomo wai ua naraonaꞌau aihonimi.
Bariu hanona eꞌu raonaꞌau aonai katomiaho.
10 Au Hamaꞌu ena rauhubu ꞌabikia ababua ꞌaunakia paunai ena raonaꞌau aonai namiaho,
ihobonai wai eꞌu rauhubu ꞌabikia katobabua ꞌaunakia raninai,
wai abomo au eꞌu raonaꞌau aonai katomiaho.
11 Au ꞌabi neiana aba ahinabe ainimi buonai eꞌu aonamo hanona wai aomiai kemiaho,
weianai emi aonamo hanona keapaꞌua harai.
12 Au eꞌu rauhubu ꞌabina hanona neiana.
ꞌAbami ha ha katoraonaꞌau ainakia ihobona mo au wai araonaꞌau ainimi ꞌabana.
13 Hau ha ena raonaꞌau keapaꞌuana kiꞌa baha ena hau herekiai raninai,
ena mauri kebaibeni ia paukiai.
14 Au taba aꞌuahina hauna katobabaina raninai,
wai hanona au eꞌu hau.
15 Bariu keaoaina aonai au aꞌi kapari muenimi taꞌaraꞌi haumi,
pokina taꞌaraꞌi hauna hanona ena poki hauna taba nibabaina hauna ia aꞌi eꞌiobina.
Ia au wai naparinimi eꞌu hau,
pokina taba Hamaꞌu herenai aꞌiobi haukia aba abaꞌiobinimi.
16 “Wai au aꞌi totinaꞌanaꞌu ꞌa au wai atinaꞌanimi mai aꞌitaeanimi weiana katoao buabuami katobarama,
buabua weiakia katemiaho banaibanai.
Ba taba au ataꞌuai katonoi ainakia haukia Hamaꞌu kehore kebenimi.
17 Eꞌu rauhubu ꞌabina hanona neiana.
ꞌAbami ha ha katoraonaꞌau ainakia.
Hanopaka Haukia kateꞌoatanimi.
18 “Hanopaka haukia kateꞌoatanimi raninai,
katoꞌiobina ia au teꞌoata ꞌuainaꞌu ba wai tiꞌoatanimi.
Jesus warns about persecution (Ioane 15:18–16:4)
19 Wai hanopaka ꞌeunai katoao raninai,
ia kehore keraonaꞌau ainimi ihobona ia ꞌeuna tohana.
Ia wai hanona hanopaka ꞌeuna ahaꞌi.
Ia au hanopakai atinaꞌanimi paunai hanopaka nihore wai niꞌoatanimi.
20 ꞌAbi heremiai ahina haukia katoraona ꞌininakia,
taꞌaraꞌi hauna hanona ena poki hauna aꞌi etara haona.
Au kateba haiaranaꞌu raninai,
wai abomimo kateba haiaranimi.
Au eꞌu ꞌabi katebabua ꞌaunakia raninai wai abomimo emi ꞌabi katebabua ꞌaunakia.
21 Wai hanona au euꞌu paunai hoahoa neiakia heremiai katebabainakia,
pokina euhunaꞌu hauna aꞌi teꞌiobina.
22 “Au aꞌi pamai aꞌi pahina benakia raninai ia hanona ekia kiꞌa behona peahaꞌi.
Ia bariu ekia kiꞌa katebunina taearana hanona aba ahaꞌi.
23 Hau ha au niꞌoatanaꞌu hauna hanona Hamaꞌu abomo niꞌoatana.
24 Au hoa neiakia hau ha aꞌi ebabai haukia aꞌi pababainakia ia baiatakiai raninai ia ekia kiꞌa hanona peahaꞌi.
Ia bariu hanona hoa neiakia aba teihanakia,
iamo au Hamaꞌu ohi tararua tiꞌoatanamai.
25 ꞌA ia neiana tebabaina hanona ꞌabi weiana ekia rauhubu pukana aonai tererena hauna katebatohana paunai,
‘Ia au teꞌoata ꞌabaeanaꞌu hanona
ena poki ahaꞌi.’ Sal 35.19; 69.4