16
Iesu ehina benakia etibaha,
“Au ꞌabi neiakia ikoinai ahinanakia heremiai ena poki hanona emi aꞌikakauma aꞌi meꞌakauma marikina.
2 Wai hanona mareai kateba karahinimi.
ꞌAbi tohana beraura ha kemai aonai maearima katehore kateahu ꞌarinimi,
ia kateraonana babai weiana hanona aba Tirama tibanamona.
3 Taba neiakia katebabainakia heremiai pokina ia hanona Hamaꞌu ꞌao au aꞌi teꞌiobinamai.
4 Ia ꞌabi neiakia heremiai ahinanakia hanona ranina kemai aonai au abaꞌiobinimi ꞌabikia aba katoraona tinanakia.
Auba Robe Ena Aka.
“Ia ꞌuainai hanona aꞌi ahina benimi pokina au wai kipokia hamiaho paunai.
5 ꞌA bariu au hanona aba naeao euhunaꞌu Tiramana herena,
ia wai hau ha aꞌi nubakainaꞌu aꞌi notibaha,
‘Oi hanona aeana nuao?’
More teaching about the Holy Spirit (Ioane 16:5-33)
6 Ia ꞌabi neiakia ahinanakia heremiai paunai aomi aokoꞌo mo ebonu.
7 ꞌAbi tohana mo au wai nahina benimi,
au kaeao hanona wai namo katoaꞌina.
Pokina au aꞌi kaeao raninai baraibarai hauna aꞌi kemai heremi,
iamo au kaeao raninai ia kauhuna kemai heremi.
8 Weiana ia kemai raninai hanopaka haukia kiꞌa,
bero mai Tirama ena bakai taearana aꞌi teꞌiobina hauna kebaꞌiobinakia.
9 Ia kiꞌa robana keahuna pokina maearima au aꞌi tiaꞌikakaumanaꞌu.
10 Bero robana keahuna pokina au naeao Hamaꞌu herena ba wai hanona au aꞌi katoiha muenaꞌu paunai.
11 Bakai robana keahuna pokina hanopaka neiana obiana hauna aba bakai eaꞌina puma nihoaina paunai.
12 “Au hanona ꞌabi boꞌona ṯemiaho wai pahina benimi,
iamo katoaꞌinakia hanona aꞌi ketainimi.
13 Weiana ꞌabi tohana Auba Robena kemai raninai,
ia kehore keꞌuai ainimi ꞌabi tohana taearana ikoikiai aokiai.
Ia kipona ena nuataeai aꞌi keꞌabi,
ia taba niona hauna mo kehinana mai taba kerama hauna wai kebaꞌiobinimi.
14 Ia kehore eꞌu nuabi kebawaira tinana pokina taba au hereꞌuai keaꞌi haukia wai kebaꞌiobinimi.
15 Hamaꞌu ena taba ikoikiai hanona au ꞌeuꞌu.
Weiana buonai aꞌabi atibaha,
Auba Robe taba ꞌeuꞌuai hauna keaꞌina wai keba ꞌiobinimi.
16 Rani papana aonai wai au aꞌi katoihanaꞌu,
ba rani papana murinai hanona wai au katoihanaꞌu.”
Aokoꞌo Mai Aonamo.
17 Ia iꞌabana haukia baika kipokia baiatakiai tebakai bakai tetibaha,
“Niꞌabi netibaha,
‘rani papana aonai aꞌi katoihanaꞌu,
ba rani papana murinai hanona wai au katoihanaꞌu,’
‘pokina au hanona Hamaꞌu herena naeao,’
ꞌabi weiana anina hanona taba?”
18 Ia kipokia teꞌabi ꞌabi tetibaha,
“Rani papana anina hanona taba?
Aika ia taba neꞌuahina hauna obona aꞌi nahaobo.”
19 Iesu eꞌiobina iꞌabana haukia ṯenuatae katebakaina buonai ehina benakia etibaha,
“Eꞌu ꞌabi neiana,
‘rani papana aonai aꞌi katoihanaꞌu ba rani papana murinai wai au katoihanaꞌu’ hauna wai kipomi baiatamiai tubakai bakai aina,
ꞌu?
20 ꞌAbi tohana au wai nahina benimi,
wai hanona katohai mai aomi kehaihai,
iamo hanopaka maearimakia hanona kateaonamo.
Wai hanona aomi keaokoꞌo,
ia emi aokoꞌo hanona kebaebo aonamoai keao.
21 Babiꞌe ha miori kebaramana raninai nihaiara pokina ena mauri ranina aba etaina,
ia miori aba erama raninai ena haiara nirea ꞌitiꞌitina ia aona ninamo pokina miori ha aba erama hanopakai.
22 Ihobona uahomana bariu hanona emi aokoꞌo beraurana,
ia au hanona wai kaiha muenimi weiana wai katoaonamo,
ba hau ha emi aonamo weiana aꞌi keaꞌi parena.
23 Rani weiana kemai aonai wai hanona au hereꞌuai taba ha aꞌi katobakai bakaiaina.
ꞌAbi tohana au wai nahina benimi,
ṯonuatae tabakia au ataꞌuai Hamaꞌu katonoina hanona kebenimi.
24 Ataꞌuai aꞌi tonoi ꞌapua emai mo bariu.
Wai katonoina hanona kebenimi katoaꞌina,
weiana emi aonamo hanona aomiai kebonu ꞌauna.
Iesu Ehore Hanopaka Ehaohaina.
25 “Au ahina benimi ꞌabikia ikoinai hanona ꞌabi ibabatai ai ahinanakia,
ia ranina kemai aonai au wai ꞌabi ibabatai ai aꞌi kahina benimi,
ia Hamaꞌu pouna kahina haraina.
26 Rani weiana aonai au ataꞌuai katonoi,
ia au aꞌi naꞌabi Hamaꞌu kanoina wai kebarainimi,
27 pokina Hamaꞌu kipona wai niraonaꞌau ainimi,
weiana wai au turaonaꞌau ainaꞌu,
abomo au Tirama herenai amai hauna tubatohanaꞌu paunai.
28 Au hanona Hamaꞌu herenai ba amai hanopaka neianai namiaho,
ia bariu hanona hanopaka nahabona namue naeao Hamaꞌu herena.”
29 Weiana iꞌabana haukia tehina bena tetibaha,
“Bariu emu ꞌabi hanona ea harai,
ꞌuaina ꞌabi ibabataiai oꞌabi ꞌabana ahaꞌi.
30 Bariu ai hanona oi aꞌi katabakai mueniꞌo,
ba aba ṯaꞌiobina oi hanona taba ikoikiai oꞌiobinakia,
weiana ai ṉuba aꞌikakaumanamai oi hanona Tirama herenai omai.”
31 Iesu ekia ꞌabi eba muena etibaha,
“Bariu mo muri ꞌakinai tuaꞌikakaumanaꞌu, u?
32 Rani hanona nimai,
ia aba ekaraꞌau,
weiana wai ikoimiai katorama otaraina,
haha emi aiara katoao.
Au katohabonaꞌu kaikupai.
Iamo au hanona aꞌi kaikupai,
pokina Hamaꞌu hanona au hereꞌuai.
33 Au wai ꞌabi neiakiai aba ahina benimi,
au wai kipokia kahabahamomo aonai baibua katoaꞌina.
Hanopaka neiana hanona kebatetuanimi,
ia katonuakoꞌo,
au hanona hanopaka aba ahao haina.”