Iesu Pilato Wairanai.
23
Weiana bakai apaꞌuana haukia maikoina temikiri Iesu teaoaina Pilato herena.
2 Weia ena beho ꞌabikia teaꞌi ramana tetibaha,
“Hau neiana tatabu ahina emai hanopaka maearimakia aokia niana aiara nibaꞌuri ꞌurina mai obia arana herenai takiti katabaibeni hauna nikaiabuna,
abomo kipona niꞌabi ia hanona Keriso,
obia arana.”
Luka 23:1-31
3 Ba Pilato ehore Iesu ebakaina etibaha,
“Oi hanona Iuda haukia ekia obia arana,
u?”
Ia ena ꞌabi ebamuena etibaha,
“ꞌAbimo naiana aba nohinana.”
4 Pilato ehore robe haukia apaꞌuakia mai toꞌu haukia ehina benakia etibaha,
“Au hau neiana herenai beho ha aꞌi atabu ahina.”
5 Ia teꞌabi tabura tetibaha,
“Ena baꞌiobi ꞌabikiai Iuda maearimakia aba ebaꞌuri ꞌurinakia,
weia Galilea ai eaꞌi ramana emai mo aba ꞌeka neianai ekaraꞌau.”
6 Pilato ꞌabi weiana ꞌuruna eona hanona ebakai bakai hau neiana Galilea hauna ꞌao.
7 Pilato eꞌiobina Iesu hanona Heroda ena ihaꞌini baꞌanai buonai euhuna teaoaina Heroda herena,
rani weianai Heroda abomo weia Ierusalema ai.
Iesu Heroda Wairanai.
8 Heroda Iesu eihana raninai aona enamo kiꞌa pokina aba waꞌi baha ꞌakinai Iesu pouna eona,
enuatae ia peihana abomo ena nuatae Iesu hoa baika pebabai peihanakia.
9 Ua buonai ꞌabi boꞌokiai ebakaina,
ꞌa Iesu ia ena ꞌabi ha aꞌi ebamuena.
10 Robe haukia apaꞌuakia mai rauhubu poki haukia weia tekoroti teꞌabi pahihi herenai.
11 Ba Heroda mai ena huari haukia kipokia Iesu tebapoꞌona,
ꞌabi kiꞌa obokia haeai haeai tehina murinai,
obia habunina ha tebabatotona,
haeamona temue aina teaoaina Pilato herena.
12 Rani weianai Heroda mai Pilato hanona tebaihau,
ia ꞌuainai terarua hanona tebaiꞌoata.
Pilato Ehina benakia Iesu Kateahu ꞌarina.
13 Pilato ehore robe haukia apaꞌuakia aiara obiakia mai aiara maearimakia eaparinakia ebatoꞌunakia.
14 Ehina benakia etibaha,
“Hau neiana tomaiaina hereꞌuai toꞌabi,
maearima aokia niani aiara nibaꞌuri ꞌurina,
ia au wairamiai ꞌabi weiakia tohina herenai haukia abakaina hanona ena kiꞌa ha aꞌi atabu ahina.
15 Heroda abomo ua homana buonai euhuna emue emai hereka,
katoihana ia hanona ꞌari akana ha aꞌi ebabaina.
16 Weiana buonai kaꞌatina ba kahabona keao.”
17 Rani ikoinai Kabanai tatuna aonai Pilato ena hoa hoa tainai wapura hauna ha ebakarahina.
18 ꞌA mako teio haeamo tetibaha,
“Hau neiana moahu ꞌarina!
Baraba morubuna mobenamai!”
19 Baraba hanona aba uaꞌa wapura ꞌekanai emiaho pokina aiara apaꞌuana aonai baripuripu mai ahuahu ebaramanakia paunai.
20 Pilato ena nuatae hanona Iesu pebakarahina paunai toꞌu haukia ehinabe muenakia.
21 ꞌA toꞌu haukia teio hao io hao tetibaha,
“Matiu ibiri ropo ꞌubinai meꞌari!
Matiu ibiri ropo ꞌubinai meꞌari!”
22 Pilato rani ibaihauna toꞌu haukia ehinabe muenakia,
“Hau neiana beho tabana ebabaina?
Ia keꞌari hauna behona ha aꞌi atabu ahina.
Ua paunai kaꞌatina ba kahabona keao.”
23 ꞌA toꞌu haukia teio toꞌo baihana aiakia ꞌubi tohanai Iesu matiu ibiri ropo ꞌubinai keꞌari.
Ekia ioai Pilato etara haona.
24 Ua buonai Pilato ehore ekia nuatae ebabaina Iesu behoai ehorotina.
25 Pilato ehore hau weiana baripuripu mai ahuahu ebaramanakia paunai wapura ꞌekanai tehorotina hauna ebakarahina ekia noinoi ihobonai,
ba Iesu ebenakia ekia nuatae akakia katebabai.
Iesu Matiu Ibiriropoai Tekoko ꞌauna.
26 Huari haukia Iesu tebakaꞌana teaoaina aonai Kurene hauna ha atana Simona ia hanona ꞌuniai emai Ierusalema niao tetabu ahina ba teaꞌina matiu ibiri ropo tebabua ahina Iesu murinai ekaꞌa aina.
27 Maearima boꞌona ꞌakina Iesu murina teꞌau baiatakiai babiꞌe baika ia teaokoꞌo aina tehai.
28 Iesu ekabe ehina benakia etibaha,
“Ierusalema nahuna babiꞌemi e,
au aꞌi tomohai ainaꞌu,
ꞌa wai mai nahumi kipokia paumiai tomohai.
29 Pokina rani kemai aonai maearima kateꞌabi katetibaha,
‘Babiꞌe teꞌone ꞌone miori aꞌi tebarama,
mai aꞌi tebaꞌae baꞌae babiꞌekia hanona namo teaꞌina.’
30 Weiana
‘kobio katehina benakia,
“tomoꞌeho ahamai ai”,
mai oeo katehina benakia,
“tomobahu abunamai.” ’ Hos 10.8
31 Au matiu maurina ꞌabana hereꞌuai ṉa tibabai aiho raninai,
wai matiu ꞌororona ꞌabana heremiai aea patebabai aihona?”
32 Beho haukia rua abomo tebakaꞌanakia teaoainakia Iesu kipokia kateahu ꞌarinakia.
33 Temai ꞌeka atana ‘ꞌAra huriana’ ai tekaraꞌau aonai,
Iesu matiu ibiri ropo ahanai tekoko ꞌauna beho haukia rua kipokia hamona itipanai,
ha awarinai.
34 Ba Iesu eꞌabi etibaha,
“Hamaꞌu e,
mohina haonakia pokina ia aꞌi teꞌiobina taba tibabaina.”
Weiana huari haukia puꞌi ai ena habuni tewatena.
35 Maearima tekoroti tebaiaruru,
aiara obiakia tehore Iesu tebapoꞌona teꞌabi tetibaha,
“Ia maearima haeai ebamaurinakia,
ba ia Tirama ena Keriso Tirama etinaꞌana hauna raninai kipona mebamaurina.”
36 Huari haukia abomo tebapoꞌona tekahaha herena bine beina manoina tebena.
37 Ba tehina bena tetibaha,
“Oi Iuda ekia obia ꞌarana raninai kipomu mobamauriniꞌo.”
38 Iesu ꞌarana ubinai marere ha abomo weia ṉa terere aihona,
‘NEIANA HANONA IUDA EKIA OBIA ꞌARANA!’
39 Beho haukia weia tekapaꞌau haukia ha Iesu ebapoꞌona eꞌabi etibaha,
“Oi bamauri haumu ꞌao ahaꞌi?
Kipomu mobamauriniꞌo ai abomo mobamaurinamai.”
40 ꞌA ꞌabana ehore erikena etibaha,
“Oi puma ihobona nuaꞌina mo Tirama aꞌi nutaꞌu aina, u?
41 Aika hararua kahaꞌari hanona ebero,
pokina puma nahaꞌina hauna hanona eka babai ihobonai,
ꞌa hau neiana hanona taba haꞌi ebabai kiꞌana.”
42 Haeamona ia eꞌabi etibaha,
“Iesu e,
emu obia aiarana kokatoto raninai au koraonanaꞌu.”
43 Iesu ia ehina bena etibaha,
“ꞌAbi tohana au oi nahina beniꞌo,
bariu rani neianai oi mai au hararua hanona paradiso aonai kahamiaho.”
Iesu Eꞌari.
44 Ihobona matoha atiaha hororo aonai beraura ewapura,
abomo wapura hanopaka maikoina ekaiabuna eaomo beraura hoana aihau.
45 Abomo marea robe aona iꞌaea hurina habunina etapa boana rua.
46 Iesu eapari aota,
“Hamaꞌu e,
aubaꞌu imamuai nautana.”
Ua eꞌabi aiho murinai eꞌari.
47 Weiana huari poki hauna taba terama haukia eihanakia aonai Tirama ebanamona etibaha,
“ꞌAbi tohana hau neiana hanona bero hauna.”
48 Baiaruru haukia weia tetoꞌuna taba terama teihanakia raninai,
haharakia teahu ahunakia mai aokoꞌokia temue aiara teao.
49 ꞌA Iesu teꞌiobina haukia ikoikiai mai babiꞌe weiakia murinai teꞌau Galileai temai haukia atauꞌai tekoroti taba terama haukia teihanakia.
Iesu Tehorena.
50 Bakai apaꞌuana hauna ha atana Iosepa ia hau namona abomo aka bero hauna,
51 ena aiara hanona Arimatea Iudea aiarana ha,
Tirama ena obia aiarana neꞌimana kemai.
Ia bakai apaꞌuana haukia ekia raona mai babai aꞌi eaꞌi taeanakia.
52 Hau neiana eao Pilato herena Iesu hauanina enoi aina.
53 Weiana ia Iesu hauanina eaꞌi obona habuni imukinai eꞌapana ꞌariahana pihara tekuina ꞌurina aonai ehorotina,
ꞌuri weiana hanona tai ahaꞌi tihore bahana.
54 Rani weiana hanona aꞌiaꞌi harai wapuna abomo beraura robena aba keaꞌi ramana.
55 Babiꞌe weiakia Iesu kipokia Galileai temai babiꞌekia Iosepa murinai teao,
ꞌariahana mai Iesu hauanina aea tebaenoti aihona teiha haraina.
56 Weiana ia temue teao aiara muramura timikia namokia mai hauna katetarona tehorokia tebaꞌorunakia.
Ba beraura robenai tearai rauhubu taina.
Luka 23:32-56