Pilato Eꞌabi Iesu Matiu Ibiriropo ꞌUbinai Kateahu ꞌarina.
19
Weiana Pilato ꞌabi ebaibeni huari haukia Iesu teaꞌina teaoaina teꞌatina.
2 Huari haukia ꞌini boa boa tehao kaiarona ia aranai tebabauꞌuna,
abomo habuni birona ha ia tebabatotona.
Jesus sentenced to death (Ioane 19:1-16)
3 Weiana tekai haha kai haha herenai teꞌabi tetibaha,
“Iuda haukia ekia Obia ꞌarana e,
komauri banai banai!”
Ba wairana teboꞌana.
4 Pilato haeamona ekarahi,
Iuda haukia apaꞌuakia ehina benakia etibaha,
“Tomobahu,
au kahore wairamiai kabakarahina weianai katoꞌiobina herenai beho ha aꞌi atabu ahi ꞌapuana.”
5 Weiana Iesu ekarahi aonai ꞌaranai ꞌini boaboa ihao kaiaro tebabauꞌuna mai habuni birona tebabatotona ia haunai.
Pilato ehina benakia etibaha,
“Tomoihana,
hauna neiana.”
6 Robe haukia apaꞌuakia mai marea ṯeiha ꞌinina haukia Iesu teihana raninai teio tetibaha,
“Matiu ibiri ropo ꞌubinai tomoahu ꞌarina,
matiu ibiri ropo ꞌubinai tomoahu ꞌarina!”
Pilato ia ehina benakia etibaha,
“Wai kipomi tomoaꞌina,
matiu ibiri ropo ꞌubinai tomoahu ꞌarina,
pokina au beho ha ia herenai aꞌi atabu ahina.”
7 Iuda haukia apaꞌuakia ia ena ꞌabi tebamuena tetibaha,
“Ai hanona mai emai rauhubu.
Rauhubu weiana tainai ia hanona keꞌari,
pokina ia kipona Tirama nahunai nibaona.”
8 Pilato aia weiana eona raninai etaꞌu banaina.
9 Pilato ena aka itunai ekatoto mue,
Iesu ebakaina etibaha,
“Oi aeꞌeai omai?”
Ia Iesu ꞌabi ha aꞌi ehinana.
10 Weiana Pilato eꞌabi etibaha,
“Oi noubo aꞌi kohina benaꞌu,
u?
Oi oꞌiobina au hanona mai eꞌu hiabu oi karubuniꞌo,
ꞌao matiu ibiri ropo ꞌubinai kahu ꞌariniꞌo?”
11 Iesu ia ena ꞌabi ebamuena etibaha,
“Tirama hiabu oi aꞌi pebeniꞌo raninai oi au koahu ꞌarinaꞌu hiabuna hanona heremuai ahaꞌi.
Ua buonai hau weiana imamuai eutanaꞌu hauna ena kiꞌa hanona eapaꞌua kiꞌa baha ba oi ꞌeumu.”
12 Rani weianai Pilato taeara etatu Iesu kerubuna.
Ia Iuda haukia apaꞌuakia teio toꞌona tetibaha,
“Hau naiana korubuna raninai oi hanona obia ꞌarana Kaisa ena maearima ahaꞌi.
Hau ha ia kipona obia ꞌaranai nibaona hauna hanona Kaisa niꞌoatana.”
13 Pilato ꞌabi neiana eona raninai Iesu ebakarahina,
ba ia hanona ena bakai ꞌekana imiaꞌaunai emiati,
ꞌeka weiana atana teaparina hanona ‘pihara panabana’,
Heberu maeakiai atana hanona ‘Gabata’.
14 Rani weiana hanona Kabanai tatuna iaꞌiaꞌi haraina ranina,
beraura hanona aba eatiaha,
Pilato Iuda haukia ehina benakia etibaha,
“Emi obia ꞌarana neiana tomoihana.”
15 Weiana ia teio tetibaha,
“Tomoahu ꞌarina,
tomoahu ꞌarina,
matiu ibiri ropo ꞌubinai tomoahu ꞌarina!”
Pilato ebakainakia etibaha,
“Wai au ṯonuataenaꞌu emi obia ꞌarana naiana kahu ꞌarina?”
Robe haukia apaꞌuakia teꞌabi tetibaha,
“Emai obia ꞌarana ha ahaꞌi,
Kaisa mo ikupaiana.”
16 Weiana Pilato ehore Iesu huari haukia imakiai eutana matiu ibiri ropo ꞌubinai kateahu ꞌarina.
Ba huari haukia Iesu tebakaꞌana teaoaina.
Iesu Matiu Ibiriropo ꞌUbinai Tekoko ꞌauna.
17 Kipona ena matiu ibiri ropo ebuana teao ꞌeka ha atana ‘ꞌAra ꞌouꞌouna’,
Heberu maeakiai hanona ‘Golgota’.
The crucifixion (Ioane 19:17-37)
18 Weia Iesu matiu ibiri ropo ꞌubinai tekoko ꞌauna,
hau rua abomo tekoko ꞌaunakia ha abirai ha abirai,
Iesu hanona ibuakiai.
19 Pilato hanona marere ha weia matiu ibiri ropo ꞌubinai tekoko ꞌauna ṉa erere aihona,
‘IESU NASARETA HAUNA,
IUDA HAUKIA EKIA OBIA ꞌARANA.’
20 Iuda haukia boꞌokia marere weiana tetuabina,
pokina Iesu tekoko ꞌauna ꞌekana mai Ierusalema aiarana hanona baiatakiai aꞌi eatauꞌai kiꞌa baha.
Abomo marere weiana hanona Heberu maeakiai,
Roma maeakiai mai Helene maeakiai tererena.
21 Weiana Iuda haukia ekia robe haukia apaꞌuakia Pilato tehina bena tetibaha,
“‘Iuda haukia ekia Obia ꞌarana’ aꞌi porerena.
Ia ṉa porere aihona,
‘Kipona eꞌabi,
Au hanona Iuda haukia ekia Obia ꞌarana.’”
22 Pilato ekia ꞌabi ebamuena etibaha,
“ꞌAbi ṉa ahaꞌi,
aba arere ꞌauna hauna uahomana mo kemiaho.”
23 Huari haukia Iesu tekoko ꞌauna murinai ena habuni teaꞌina tetapa banina haha puakia teaꞌi.
ꞌA ena habuni ibatoto aonai hauna hanona itaiore ahaꞌi,
maikoina hanona ꞌubinai tetaina emai mo baꞌai epua.
24 Huari haukia kipokia teꞌabiꞌabi tetibaha,
“Aꞌi kahatapana ia puꞌiai kahaꞌiobina tai keaꞌina.”
Ṉa erama aiho hanona Puka robenai tererena ꞌabina weiana,
“Ia eꞌu habuni tewatena,
eꞌu ibatoto hanona tepuꞌi aina” Sal 22.18
hauna ketohana.
Ba huari haukia hanona babai neiana tebabaina.
25 Matiu ibiri ropo herenai tekoroti babiꞌekia hanona Iesu hinana mai hinana hatina,
ba Maria Klopa atawana mai Maria Magadala babiꞌena.
26 Iesu hinana mai iꞌabana eraonaꞌau aina hauna weia tekoroti eihanakia,
ba hinana ehina bena etibaha,
“Hinaꞌu e,
nahumu naiana.”
27 Iꞌabana hauna herenai abomo ehina bena etibaha,
“Aiaꞌu mona,
hinamu naiana.”
Rani weianai eaoaina iꞌabana hauna weiana ehore Maria ebakaꞌana ena ituai temiaho.
Iesu Ena ꞌAri.
28 Weiana murinai Iesu eꞌiobina aka ikoinai aba ebaorenakia,
ba Puka robena ꞌabina kebatohana buonai eꞌabi etibaha,
“ꞌAkoꞌu niꞌororo.”
29 Puou ha weia bine beina mabinai tebabonuna,
ba poame ha teaꞌina bine beina mabina aonai tehao uhuna,
ba hiriboai tebiri ꞌauna,
tetiu taeana eao pinana haianai.
30 Iesu bine beina manoina einu murinai eꞌabi etibaha,
“Aba eore.”
Ba ꞌekuna enobo,
eꞌari baihana.
Iesu Robuna Tekairuruna.
31 Bariu hanona aꞌiaꞌi harai wapuna ia mara hanona Kabanai tatuna,
aꞌi kenamo ꞌari haukia weia matiu ꞌubinai katemiaho keao mo mara buonai,
Iuda haukia apaꞌuakia Pilato tenoina,
matiu ꞌubinai tekoko ꞌaunakia haukia aekia huriakia kateahu hurinakia hauanikia kateaꞌi obonakia.
32 Weiana huari haukia teao,
Iesu kipokia tekoko ꞌaunakia haukia herekiai,
ba hau koriꞌuaina aena huriakia teahu hurinakia,
haeamona teao ꞌabana ha herenai aena huriakia teahu hurinakia.
33 Ia teao Iesu herenai teiha ꞌiobiaina aba eꞌari hanona aena huriakia aꞌi teahu hurinakia.
34 Huari hauna ha ehore Iesu robuna arawaiai ekai ruruna,
beronai mo aruaru mai bei tekiki oioi.
35 Mahanai eihana hauna ꞌabina aba ehinana,
ia ena ꞌabi neiana hanona tohana,
ia eꞌiobina ehinana hauna hanona tohana,
ba wai ia ebatohana hauna kato aꞌikakaumana.
36 Aka neiana erama hanona Puka robena ꞌabina “Huriana ha hamona aꞌi tebamohu ꞌapuana.”
hauna ebatohana.
37 Puka robenai ha haeamona eꞌabi etibaha,
“Maearima robuna tekai ruruna hauna kateihana.”
Iesu Hauanina Tehorena.
38 Iosepa Arimatea hauna abomo Iesu iꞌabana hauna ha,
iamo kipona aꞌi ebawaira tinana pokina Iuda haukia apaꞌuakia etaꞌu ainakia.
Taba weiakia murikiai ia eao Pilato herena enoi Iesu hauanina keaꞌi obona.
Ba Pilato ena ꞌabiai Iosepa eao Iesu hauanina eaꞌi obona.
The resurrection (Ioane 19:38–20:18)
39 Nikodemo ꞌuainai rabi ha eao Iesu herena hauna abomo Iosepa eꞌabana wapaea mai toꞌore muramura timikia taburakia rua teꞌutenakia hauna eaꞌina eaoaina,
ena puma hanona kilogram harau aihau ꞌabana.
40 Weiana ia terarua Iesu hauanina teaꞌina muramurai teutuna mai habuni namona ꞌari haukia tiapanakia haunai teapana,
Iuda haukia ekia ꞌari haukia tiaꞌiaꞌi harainakia akana ihobonai tebabaina.