IUHUBEAU EKIA AKA
Iesu Eꞌabiꞌuai Auba Robe Keuhuna Kemai.
1
Teofilo e,
eꞌu puka ꞌuaina aonai Iesu ena aka mai ena baꞌiobi eaꞌi ramanakia haukia,
2 emai mo eaꞌi taea kupa keao ranina pouna ikoikiai arerenakia.
Aꞌi eaꞌi taea baha aonai,
Auba Robe hiabunai ena iuhubeau ia etinaꞌanakia herekiai aka kate babainakia haukia robakia eahunakia.
3 Ena ꞌari murinai,
katebatohana ia hanona emauri toha paunai wapu bariabui aonai ia kipona rani boꞌona ewaira tina maearima wairakiai,
abomo wairakiai Tirama ena obia aiarana pouna ehinana.
4 Rani ha ekia miatoꞌuai Iesu ꞌabi neiana ebenakia etibaha,
“Ierusalema aꞌi katohabona,
ia Hamaꞌu eꞌabiꞌuai aina Auba Robena katoꞌimana,
ꞌabina weiana au wai aba ahina benimi.
Jesus Ascends to Heaven (Iuhubeau 1:4-11)
5 Ioane hanona beiai maearima ebaꞌuere robenakia,
ꞌa wapu aꞌi keboꞌo aonai wai hanona Auba Robe ai katoꞌuere robe.”
Iesu Ekaraꞌau Kupa Eao.
6 Iesu iꞌabana haukia kipokia tetoꞌu raninai ia tebakaina tetibaha,
“Obiapaka e,
bariu rani neianai Isaraela hanopakana ena hiabu kobeni muena,
u?”
7 Iesu ekia ꞌabi ebamuena etibaha,
“Rani mai wapu hanona Hamaꞌu kipona ena hiabuai aba ebaꞌorunakia,
wai emi bero ahaꞌi taba neiana aita kerama hauna katoꞌiobina.
8 ꞌA Auba Robe keriri wai ahamiai raninai hiabu katoaꞌina,
au pouꞌu katohinahina otaraina Ierusalemai,
Iudea mai Samaria aiarakia maikoinai,
abomo keaomo hanopaka puana.”
9 Iesu ꞌabi neiana ehinana murinai,
ia mahakia tohanai eaꞌi taeana ekaraꞌau kupa eao teihana,
ba ꞌauhao ha ia ekaiabuna,
weiana ia aꞌi teiha muena.
10 Ia kupai ekaraꞌau ꞌekana teiha ꞌiniꞌinina aonai,
beronai hau rua habuni porekia tebatotonakia hanona ia tekori turinakia.
11 Ba tehina benakia tetibaha,
“Galilea haumi e.
Taba buonai neia tukoroti tuaꞌa taea kupa ṯoihana?
Iesu bariu heremiai eaꞌi taeana kupa eao hauna haeamona kemue kemai bariu ekaraꞌau toihana ihobonai.”
Iuhubeau Hauna Ha Teaꞌitaeana Iuda ꞌEkanai.
12 Ba iuhubeau haukia Olibe oeonai teriri teao Ierusalema,
ꞌeka weiakia baiatakia ena homaꞌa hanona kilometa hamona ꞌabana.
13 Ierusalema ai tekatoto raninai ṯemiaho aina ituna ikaihuri ꞌubiai weiana hauna teao.
Maearimakia atakia hanona neiakia,
Petero,
Ioane,
Iakobo,
Anderea,
Pilipo,
Toma,
Batolomeo,
Mataio,
Iakobo Alepeo,
Simona Selote hauna,
mai Iuda Iakobo.
14 Ia ikoikiai teaꞌi toꞌu ꞌeka hamonai,
babiꞌe baika abomo ia baiatakiai mai Iesu hinana Maria mai hatina kipokia tebahubaꞌari toꞌona.
15 Rani weiana aꞌikakauma haukia ꞌabaeana haukia ikoinai hinabu hamomo harau rua tetoꞌuna,
aonai wairakiai Petero emikiri ekoroti eiroronakia.
16 Etibaha,
“Uahoꞌabaꞌu e!
Puka Robena ꞌabina kemai ketohana hauna Auba robe ehore Davida pinanai Iuda robana aba hamo eahu ꞌuaina Iesu iaꞌina kateao haukia hanona ia keꞌuai ainakia.
17 Iuda hanona ꞌabamai ha,
pokina ia abomo etinaꞌana kipokia taka haeamo aka neiana aonai.”
18 (Iuda ena aka kiꞌa moninai hano ha tekawana,
ba weia eꞌeho ꞌarana benu eao moꞌoruna epou maikoina ekiki atapakai.
19 Ierusalemai ṯemiaho haukia ikoikiai pou neiana teona,
ua buonai hano weiana atana teaparina ‘Akeledama’,
maeakiai ꞌabi weiana anina hanona ‘Aruaru Hanona’.)
20 “Pokina Salamo pukanai aba irereꞌau etibaha,
‘Ena itu hanona keꞌoko.
Tai ha uaꞌa aꞌi kemiaho.’
Sal 69.25
Haeamona ererena,
‘Ia ꞌekana hanona hau ha kehore
keaꞌina.’ Sal 109.8
21 Ua buonai bariu hanona aika ꞌabaka ha baiatakai kipokia hamiaho Obiapaka Iesu ena kaoao maikoina eihana hauna mai
22 Ioane ena baꞌuere robe eramana raninai emaimo Iesu ekaraꞌau kupa eao hanona ia abomo uaꞌa hauna kahaꞌi taeana.
Ai kipokia kataka haeamo Iesu ena mikiri mue pouna ihinanai.”
23 Weiana hau rua tenuatae ainakia ha kateaꞌi taeana,
ha atana Iosepa baika tiaparina Barasaba haeamona tiaparina Iusto,
mai ha hanona atana Matia.
24 Weiana ia tebahubaꞌari tetibaha,
“Obiapaka e!
Oi hanona maearima ikoinai aokia oꞌiobina,
hau neiakia terarua baiatakiai hanona aeana otinaꞌana hauna bariu kobaihanamai.
25 Ia hanona baraibarai mai iuhubeau akana neiana Iuda ehabona hauna kebabaina,
pokina Iuda hanona aba ekaobo ena ꞌeka tohana eao.”
26 Ba tepuꞌi,
aonai ata ewaira tina hanona Matia,
ba iuhubeau haukia harau haea hamomo hanona ebaharau haea ruanakia.