Auba Robe Emai Pentekoste Raninai.
2
Pentekoste berauranai aꞌikakauma haukia ikoikiai ꞌeka hamomonai tetoꞌuna.
2 Weia kupai ꞌuru rarina ha biaimo emai taꞌuainakia,
matoha rani rarina ha eabu ꞌuruna ꞌabana,
ia temia toꞌu ituna ebabonu ꞌauna.
3 Mai abonamo taba ha teihana ihana matoha iruba upana maeana ꞌabana eao ha ha kaipakia ꞌubinai.
4 Ia ikoikiai Auba Robe ai aba tebonu,
ba Auba Robe ebenakia ihobonai aiara haeai haeai maeakiai teꞌabi.
5 Ua raninai Iuda haukia Tirama marikina temariki haukia hanopaka haeai haeai ṯemiaho haukia temai Ierusalemai.
6 ꞌUru weiana teona raninai,
ꞌeka hamomonai tetoꞌuna abomo toꞌu hanona rarina ꞌakina,
toꞌu haukia tehaorea,
pokina ha ha maeakia tohanai aꞌikakauma haukia pou weiana tehinana hauna teona.
7 Ikoikia tetaꞌu taꞌu huri mai aokia tearo ꞌari tetibaha,
“ꞌAi,
neiakia tiꞌabi haukia hanona Galilea haukia, u?
8 Aehoma buonai aika ikoikai hanona haha maeaka tohanai tiꞌabi aiakia nahaona?
9 Aika hanona hanopaka haeai haeai ai hamai,
Patia,
Media,
Elama ai,
Mesopotamia,
Iudea,
Kapadokia ai,
Ponto,
Asia ai,
10 Furugia,
Pamfulia ai,
Aigupito ai abomo Kurene ai,
ia hanona Libia ekia ꞌeka ha.
Roma ai tamai haumai,
baika hana Iuda haumai baika hana Iuda haukia ahaꞌi ia kuti taearanai Iuda haukiai tibaonakia haumai,
11 ai baika hanona Krete mai Arabia ai tamai.
Hau weiakia maeaka tohanai Tirama hoa apaꞌuana ebabaina hauna tehinana ꞌuruna haona.”
12 Ikoikiai teraona raona mai aokia aꞌi etaina,
ia ha ha kipokia tebakai bakai tetibaha,
“Neiana hanona taba?”
13 ꞌA baika hanona aꞌikakauma haukia teiriri ainakia tetibaha,
“Aba bia teinu ꞌari.”
Petero Pentekoste Raninai Eiroro.
14 Weiana Petero mai ꞌabana harauhaea hamomo kipokia temikiri,
ia aiana ebapaꞌuana eiroro benakia etibaha,
“Iuda haumi mai Ierusalemai ṯomiaho haumi e.
Aiaꞌu tomobahu bahu aina.
Taba neiana aea erama aiho hauna pouna kabaꞌiobinimi.
15 Ai neiamai hanona aꞌi ṯainu ꞌari,
wai turaonana ꞌabana ahaꞌi,
abomo bariu hanona raurani beraura hoana ꞌababani hamomo.
16 Ia mahabanai hauna Ioel ṉa eꞌabi aiho etibaha,
17 ‘Tirama etibaha,
Hanopaka ena pua raninai,
Au Aubaꞌu hanona maearima
ikoikiai ahakiai kabakiki oioina.
Nahumi hau haukia mai babiꞌekia
kateaobero,
emi hau ꞌaruꞌarukia hanona
katemahabanai,
abomo emi anepaka katenibi.
18 Haeamona rani weianai
au eꞌu taꞌara iaꞌina haukia
mai babiꞌekia ahakiai au Aubaꞌu
kabakikina weiana kateaobero.
19 Taꞌu tabakia baika kupa ꞌubinai
kabawaira tinanakia,
hanopaka ahanai abomo taba
baika katerama,
weiana aruaru,
iruba abomo hiabu imukina.
20 Obiapaka ena beraura apaꞌuana
mai nuabina kekaibari raninai,
beraura hanona kewapura abuna,
nawa hanona kebiro
matoha aruaru ꞌabana.
21 ꞌA Obiapaka atana kateaparina
haukia katemauri.’ Iol 2.28-32
22 “Isaraela haumi e,
tomobahu aiaꞌu tomona.
Iesu Nasareta hauna hiabu akakia haeai haeai mai hoa akakia haeai haeai ebabainakia hanona Tirama ia aonai eaka,
hoahoakia wai baiatamiai ua tewaira tina aiho haukia aba toꞌiobi harainakia.
23 Iesu neiana Tirama ena nuatae abomo ena ꞌiobi uaꞌi baha aba ebaꞌoruna taearana wai ebenimi.
Wai tohore maearima kiꞌa obokia imakiai toutana weiana matiu ibiri ropo ꞌubinai tokoko ꞌauna toahu ꞌarina.
24 ꞌA Tirama ehore ebamikiri muena ꞌari ena haiara ikoinai ebapuanakia,
pokina ꞌari ia keaꞌi ꞌinina uaꞌa wapura ꞌekanai hanona aꞌi etaina.
25 Davida abomo ia pouna ehinana etibaha,
‘Obiapaka hanona rani ikoinai
wairaꞌuai aihana.
Pokina ia hanona au itipaꞌu
tainai,
aꞌi kaibiu ꞌapua.
26 Ua buonai aoꞌu ena aonamo
hanona eapaꞌua kiꞌa baha.
Maeaꞌu hanona aonamo
ꞌabikia ehinanakia,
hauꞌu hanona buabeni aonai
kemiaho.
27 Pokina aubaꞌu hanona ꞌari haukia
ekia ꞌekai aꞌi kohabona,
abomo emu Robe hauna uaꞌa aꞌi
kohabona aꞌi kepari.
28 Oi ohore mauri taearana
obaihanaꞌu,
emu waira tina hanona eꞌu
aonamo kebapaꞌuana.’ Sal 16.8-11
29 “Uahoꞌabaꞌu e!
ꞌAbaꞌabaka Davida ena pou mahina haraina.
Tomoꞌiobina ia hanona aba eꞌari tehorena,
ena ꞌariahana hanona bariu neia aika hereherekai.
30 ꞌA Davida hanona mahabanai hauna eꞌiobina Tirama ena ꞌabiꞌuai pahihina ebena,
ia ꞌabaꞌabana ha hanona ia ena imiaꞌau ꞌekanai uaꞌa kemiaꞌau.
31 Davida ehore Tirama taba kebabaina hauna eiha ꞌuaina Kerisoa ena mikiri mue ꞌabina ehinana etibaha,
‘Ia hauna hanona ꞌariahana aonai
uaꞌa aꞌi kehabona,
ia hauna aꞌi kepari.’ Sal 16.10
32 Iesu neiana hauna Tirama ehore ꞌariai ebamikiri muena.
Ai ikoimaiai taihana abomo taꞌiobina.
33 Ia hana Tirama ehore eaꞌi taeana imana itipanai nemiaho.
Auba Robe weiana Hamana eꞌabi ꞌuai aina hauna eaꞌina.
Weiana hana aba euhu ririna,
bariu ena hiabu mahamiai aba ṯoihana,
haiamiai aba tuona.
34 Pokina Davida hanona kupai aꞌi ekaraꞌau aonai eꞌabi etibaha,
‘Obiapaka hanona eꞌu Obia
ehina bena etibaha,
Au itipaꞌu tainai momiati,
35 keaomo oi emu ꞌou haukia
kaehe rabu tainakia aemu baꞌanai
kahorotinakia.’ Sal 110.1
36 “Ua buonai,
Isaraela haumi ikoimiai katoꞌiobi haraina,
Iesu wai matiu ibiri ropo ꞌubinai tokoko ꞌauna hauna Tirama ehore aba Obiapaka mai Kerisoai ebaona.”
Maearima Boꞌona Teraona kabe Baꞌuere Robe Hoana Teaꞌina.
37 Weiana ꞌabi neiakia teoꞌo raninai nuakia tetae,
ia Petero mai iuhubeau haukia tebakainakia tetibaha,
“Uahoꞌabamai e!
Ai aea katababai aiho?”
38 Petero ia ehina benakia etibaha,
“Katoraona kabe,
ha ha Iesu Keriso atanai katoꞌuere robe emi kiꞌa ihina hao hoana.
Weiana Auba Robe ena beruberu aba katoaꞌina.
39 Pokina ꞌabiꞌuai neiana hanona wai ꞌeumi,
nahumi ꞌeukia,
abomo atauꞌai ṯemiaho haukia weiakia Obiapaka eka Tirama keaparinakia haukia ikoikiai ꞌeukia.”
40 Petero ꞌabi boꞌokia maearima ehinabe harainakia abomo eba taburanakia etibaha,
“Uru kiꞌa obona neiana aonai katokaobo hanona katomauri.”
41 Petero ena ꞌabi teaꞌi taeana haukia ikoikiai ꞌuere robe hoana teaꞌina,
rani weianai maearima hanona ikoinai taha aihau (3,000) aꞌikakauma haukia ekia toꞌu aonai tetoto.
Aꞌikakauma Haukia Ikoikiai Aokia Hamonai ꞌEka Hamonai Temiaho.
42 Ia hanona rani ikoinai iuhubeau haukia herekiai ꞌiobi tetabuna,
ekia miatoꞌu mai ꞌabiꞌabi aokiai ia abokia mo weia,
kipokia teaniani haeamo,
ꞌeka hamonai tebahubaꞌari.
43 Iuhubeau haukia hoa haeaihaeai mai babai haeaihaeai tebabainakia hanona maearima ikoikiai Tirama tetaꞌu aina.
44 Weiana aꞌikakauma haukia ikoikiai ꞌeka hamonai tetoꞌu,
ekia taba ikoikiai ꞌeka hamonai tewate harainakia.
45 Ekia kepu mai hano tekawakawa ainakia monikia hanona tewate wate nuatae ihobonai ha ha tebenakia.
46 Rani ikoinai wapu ha ha mai aokia hamonai marea robe aonai tetoꞌu,
abonamo ekia ituai mai aonamokia mai aokia hamonai teaniani haeamo,
47 Tirama teba namona,
maearima ikoikiai ia teaonamo ainakia.
Obiapaka ehore ebamaurinakia haukia rani ikoikiai aꞌikakauma haukia kipokia eba hamomonakia.