Petero ꞌOme Hauna Ha Ebanamona.
3
Rani ha rabirabi beraura hoana aihau ꞌabana bahubaꞌari ranina,
Petero mai Ioane ohi Marea robe teao.
2 Weia ꞌome hauna ha rani ikoinai temaiaina uaꞌa marea robe paꞌabina atana ‘Nuabi paꞌabina’ ꞌakonai tebamiatina.
Ia hinana nuanai uahomanai erama.
Maearima marea robe teao haukia ikoikiai herekia moni enoi.
3 Petero mai Ioane ohi marea robe ai katekatoto raninai eihanakia ba enoinakia taba ha katebena.
4 ꞌA Petero mai Ioane ohi teiha ꞌiniꞌinina,
weiana Petero ehinabena etibaha,
“Ai tararua moihanamai!”
5 Ua buonai ꞌome hauna ia eihanakia ena raona hanona taba ha katebena.
6 Petero ia ehina bena etibaha,
“Au hanona moni hereꞌuai ahaꞌi.
Ia hereꞌuai nemiaho hauna neiana.
Iesu Keriso Nasareta hauna atanai momikiri mokaꞌa!”
7 Ba Petero ia imana itipanai eaꞌi ebaraina eberi taeana,
beronai aena mai aena ꞌekuꞌekukia tetabura.
8 Ia erobo tae ekoroti,
ekaꞌa hobo.
Ia kipokia marea robe aonai tekatoto,
ekaꞌa abomo erobo taea erobo taea Tirama ebanamona.
9 Toꞌu haukia ikoikiai wairakiai ekaꞌa Tirama ebanamona teihana.
10 Weiana teꞌiobina ia hanona rani ikoinai marea robe paꞌabina atana ‘Nuabi paꞌabina’ ꞌakonai emiati enoi baꞌame hauna,
tetaꞌutaꞌu huri hoa haeai tohana herenai erama paunai.
Petero Marea Robe Aona Solomona Ena Itarai Eiroro.
11 Aena enamo hauna ehore Petero mai Ioane eꞌaberenakia aonai,
maearima boꞌona ꞌakina tebeau teao itara ha atana Solomona ena itarai weia teihana tetaꞌu kiꞌa.
12 Petero ia eihanakia etibaha,
“Isaraela haumi e,
taba buonai taba neiana nibataꞌu taꞌu hurinimi?
Abomo taba buonai ai tuarurunamai?
Turaonana ai kipomai emai hiabuai ꞌao emai auba hiabukiai hau neiana tabamikirina nikaꞌa, u?
13 Aberahamo,
Isako mai Iakobo ekia Tirama abomo aika ꞌabaꞌabaka ekia Tirama ena banamo nuabina ena taꞌaraꞌi hauna Iesu ebena.
ꞌA wai tohore Pilato tobena,
abomo Pilato enuatae kerubuna raonana ebabaina hanona wai aꞌi tonuatae.
14 Robe mai aka bero hauna aꞌi tonuatae aina,
ꞌa tonoina ahuahu hauna erubuna wai ꞌeumi.
15 Wai tohore mauri pokina hauna toahu ꞌarina,
ia Tirama ehore ꞌari ai ebamikiri muena,
ai taihana haumai neiamai.
16 Iesu atana hiabunai ꞌome hauna neiana etabura mue,
hau neiana aba ṯoihana abomo ṯoꞌiobina.
ꞌAbi tohana Iesu taꞌikakaumana buonai hau neiana ebanamona wai ikoimiai wairamiai.
17 “Uahoꞌabaꞌu e,
aꞌiobina wai emi obia kipokia Iesu herenai ua tobabai aiho hanona aꞌi toꞌiobina buonai.
18 ꞌA Tirama hanona mahabanai haukia ikoikiai pinakiai Keriso ena haiara pouna aba tehinana.
Taeara weianai ꞌabi weiana aba etohana.
19 “Ua buonai tomoraona kabe,
Tirama herena katomai,
weiana emi kiꞌa keaꞌi obo.
Obiapaka mauri mahamahana kebenimi.
20 Tirama kehore Iesu haeamona keuhuna kemai wai heremi,
ꞌuainai etinaꞌana Keriso wai ꞌeumi.
21 Iesu kupa ꞌubinai kemiaho keaomo Tirama taba ikoinai kebamaha mahanakia.
Aba waꞌi baha ia ena mahabanai haukia robekia pinakiai aba teꞌabi ihobona.
22 “Mose eꞌabi etibaha,
‘Obiapaka emi Tirama hanona mahabanai hauna ha keaꞌi taeana au ihoboꞌu wai hatiaꞌami kipokia baiatamiai,
ia kehina ꞌabikia ikoikiai hanona aiana katona.
23 ꞌA mahabanai hauna weiana aiana aꞌi kateona haukia ikoikiai hanona Tirama ena maearima baiatakia kateꞌari ore.’
24 ꞌAbi tohana,
mahabanai haukia ikoikiai weiakia Samuela ena rani ai emai mo bariu aba teꞌabi ꞌuai aina beraurana hanona neiana.
25 “Wai hanona mahabanai haukia ꞌabaꞌabakia.
Tirama ena ꞌabiꞌuai ia herekiai hanona wai ꞌeumi,
Tirama ꞌabaꞌabami banamo ebenakia hauna wai katoaꞌina.
Ia Aberahamo ehina bena etibaha,
‘Oi ꞌabaꞌabamu paukiai hanopaka maearima ikoinai katenamo.’
26 Tirama ehore ena Taꞌaraꞌi hauna etinaꞌana euhuna emai ꞌuai wai heremi,
wai ikoimiai kebanamonimi mauri kiꞌa obokia taearakia katohabonakia paunai.”