Petero Mai Ioane Hau Apaꞌuakia Ekia Toꞌu Wairanai Tekoroti.
4
Petero mai Ioane maearima ṯehina benakia aonai,
robe haukia mai marea robe iꞌimana hauna abomo Sadukea haukia hanona terarua herekia temai.
2 Iesu ena mikiri mue paunai ꞌari haukia katemikiri mue pouna maearima wairakiai tebaꞌiobi aina buonai ia terarua teopuere ainakia.
3 Weiana ia terarua teaꞌinakia tebirinakia wapura itunai tekaiabunakia keaomo mara,
pokina aberabirabi buonai.
4 ꞌA ekia ꞌabi weiana teona mai teaꞌi taeana haukia hanona ikoinai taha ima (5,000) ꞌabana.
5 Erani hanona aiara obiakia mai aiara hau apaꞌuakia mai rauhubu poki haukia ikoikiai Ierusalemai tetoꞌuna.
6 Robe haukia ꞌarakiai hauna Ana weia,
Kaiafa mai Ioane mai Alesanda abomo weia,
robe haukia ꞌarakiai hauna ena itubu haukia ikoikiai abomo weia.
7 Weiana wairakiai terarua teba korotinakia tebakainakia tetibaha.
“Hiabu tabanai mai tai atanai aka neiakia tubabai?”
8 Petero hanona Auba Robe ai ebonu ꞌauna,
weiana ekia ꞌabi eba muena etibaha,
“Aiara ṯoiha ꞌinina mai ṯoꞌuai aina haumi e.
9 Wai ai tubakainamai ꞌome hauna aea enamo aiho hanona robana katahuna wairamiai raninai,
10 wai katoꞌiobina abomo Isaraela haukia ikoikiai kateꞌiobina,
Iesu Keriso Nasareta hauna,
wai toahu ꞌarina ba Tirama ehore ꞌariai ebamikiri muena hauna atanai ꞌome hauna neiana abenamo wairamiai ekoroti ṯoihana.
11 Iesu hanona
‘itu ibabaina haumi tobakiꞌana
piharana,
itu kupuana piharanai
eao.’ Sal 118.22
12 Bamauri hanona ia kipona mo aonai nemiaho,
pokina hanopaka ikoinai aonai Tirama ata haeai ha aꞌi ebaibeni aika kebamaurinaka.”
13 Iuda obiakia teraonana Petero mai Ioane ohi marere ꞌekana apaꞌuana ha aꞌi teao ꞌapua ekia ꞌiobi ahaꞌi haukia,
iamo aꞌi tetaꞌu ꞌabi tehina haraina teihanakia hanona tetaꞌutaꞌu huri.
Abomo teꞌiobina terarua hanona Iesu teꞌabana.
14 Ia terarua mai ꞌome hauna abenamo hauna kipokia wairakiai tekoroti haeamo buonai katebakai muenakia taearana ha ahaꞌi.
15 Ia Petero Ioane mai ꞌome hauna tehina benakia bakai ꞌekanai katekarahi,
ba tekarahi murinai weiakia ikupaiakia teꞌabiꞌabi.
16 Tetibaha,
“Ia terarua herekiai taba kahababaina?
Pokina Ierusalemai ṯemiaho haukia ikoikiai aba teꞌiobina ia hanona bataꞌutaꞌu huri akakia tebabai,
aika kahabuni ainakia ꞌekana ahaꞌi.
17 Pou neiana aꞌi memata maearima ikoikiai aꞌi temeꞌiobina marikina,
terarua kahaba taꞌunakia abomo kaharauhubu ainakia Iesu atana hanona aꞌi katehinana hau ha herenai.”
18 Epua terarua teapari muenakia tetoto,
terauhubunakia Iesu atana aꞌi kateiroro aina abomo aꞌi katebaꞌiobi aina ahaꞌi ꞌakina.
19 ꞌA Petero mai Ioane ohi ekia ꞌabi tebamuena tetibaha,
“Wai kipomi tomobabataina.
Wai aiami kataꞌi taeana ꞌao Tirama aiana kataꞌi taeana.
Tirama wairanai aeana hanona ebero?
20 Ai taiha mai taoꞌo tabakia katabuninakia hanona aꞌi ketaina.”
21 Ia terarua tehinabe pahihinakia ba teba karahinakia,
kateba wapuranakia hanona taearana ha aꞌi tetabu ahina pokina maearima ikoikiai Tirama tebanamona hoa weiakia terama buokiai.
22 Hau neiana herenai hoa apaꞌuana erama enamo hauna ihauna hanona bariabui mai reana.
Aꞌikakauma Haukia Ekia Bahubaꞌari.
23 Teba karahinakia murinai,
terarua teao ꞌabakia herekiai,
robe haukia apaꞌuakia mai obia apaꞌuakia taba ṉa tehoma ꞌabikia ikoinai tehinabenakia.
24 Aiakia teona murinai,
ikoikia aiakia tebahamomona Tirama tebahubaꞌari bena tetibaha,
“ꞌUbi tohana Obiana e,
kupa hanopaka ꞌakupaka mai aokiai ṯemiaho tabakia hanona oi mo obabainakia.
25 Emu ꞌabi Auba Robe ena hiabuai emu taꞌaraꞌi hauna ꞌabaꞌabamai Davida pinanai eꞌabi etibaha,
‘Rama haeai haukia
taba buonai tiopuere,
abomo taba buonai maearima
taba tohakia ahaꞌi haukia
tiraona apaꞌuanakia?
26 Hanopaka obiakia temikiri
abomo aiara obiakia kipokia
tibahamomo Obiapaka ena Keriso
ohi tiꞌoatanakia.’ Sal 2.1, 2
27 “ꞌAbi tohana,
Heroda mai Pontio Pilato hanona rama haeai haukia mai Isaraela haukia kipokia aiara neiana aonai aba tetoꞌuna.
Emu taꞌaraꞌi hauna robena Iesu oi tehoroai ꞌaranai oheinaa Kerisoai eao hauna kateꞌoatana.
28 Ia hanona Oi emu hiabu mai nuatae aba obaꞌoruna akana kerama hauna tebabaina.
29 Ua buonai,
Obiapaka e,
ekia bataꞌu ꞌabikia moraonanakia,
ai emu taꞌaraꞌi haumai tabura mobenamai,
aꞌi katataꞌu ainakia emu ꞌabi katahinana.
30 Imamu motiu ahina emu hiabu mobawaira tinana inawa haukia mobamaurinakia,
haeamona hoa akakia mai bataꞌutaꞌu huri hoakia kobabai oi emu taꞌaraꞌi hauna robena Iesu atanai.”
31 Ia tebahubaꞌari murinai temia toꞌu ituna eibiuibiu,
ia hanona Auba robe ai tebonu,
mai nuakoꞌokia Tirama ena ꞌabi tehinana.
Aꞌikakauma Haukia Kipokia Tebaraibarai.
32 Aꞌikakauma haukia ikoikiai hanona aoꞌaokoikia mai aokia hamona,
ha kipona ena taba aꞌi euhore aina ꞌa ekia taba ikoikiai hanona tebinaꞌanakia ha ha baiatakiai.
33 Iuhubeau haukia mai hiabukia rarina Obiapaka Iesu ena mikirimue mahakiai teihana hauna pouna teiroro aina.
Ba Tirama ena banamo hanona ia ikoikiai ahakiai.
34 Ia baiatakiai hanona tai haꞌi ekapu,
pokina weiakia mai ekia hano ꞌao itu haukia hanona tekawakawa ainakia monikia weiakia teaoainakia,
35 iuhubeau haukia imakiai teutanakia,
weiana tewate harainakia ha ha ena uraru ihobonai.