Anania Mai Sapira Ekia Baiꞌoi.
5
Weiana hau ha atana Anania atawana Sapira ohi ekia hano ha tekawakawaina.
2 Ia hano weiana monina abirana eaꞌi ꞌinina hanona atawana ohi teꞌiobina,
abirana mo eaoaina iuhubeau haukia imakiai eutana.
3 Weiana Petero ia ehina bena etibaha,
“Anania e!
Aehoma buonai Satani aomu eana,
Auba Robe oꞌoina hano monina abirana oaꞌi ꞌinina?
4 Aꞌi okawakawaina raninai hano hanona oi ꞌeumu,
okawakawaina raninai monina abomo oi ꞌeumu.
Bariu rani neianai hanona aea oraona aiho?
Pinamuai moni maikoina ṉa nuhoma,
oi hanona maearima aꞌi oꞌoinakia,
ia Tirama oꞌoina.”
5 Anania aia weiana eona raninai eꞌeho eꞌari baihana,
uru weiana teona haukia ikoikiai tetaꞌu kiꞌa.
6 Hau ꞌaruꞌarukia baika temikiri temai habuniai hauanina teapana teaꞌi ahina teaoaina tehorena.
7 Beraura hoana aihau murinai babiꞌe ekatoto,
atawana herenai taba erama hauna aꞌi eꞌiobina.
8 Petero babiꞌe ebakaina etibaha,
“Mohina benaꞌu,
torarua emi hano tokawa kawaina hanona ꞌarana mo weiana,
u?”
Ia eꞌabi etibaha,
“ꞌE,
ꞌarana mo naiana.”
9 Weiana Petero ia ehina bena etibaha,
“Taba buonai atawamu ohi aomi tobahamona Obiapaka Aubana tuhobona?
Aiaꞌu nuona,
atawamu tehorena miorikia paꞌabi ꞌakonai tekoroti,
oi abomo katebuaniꞌo kateaoainiꞌo.”
10 Ia beronai eꞌeho Petero aena pokinai eꞌari baihana.
Hau ꞌaruꞌarukia tetoto temai teihana abeꞌari toha,
ba tebuana atawana herenai tehorena.
11 Rani weianai aꞌikakauma haukia ikoikiai mai pouna teona haukia ikoikiai tetaꞌu wairai.
Iuhubeau Haukia Hoa Haeai Haeai Tebabainakia.
12 Hoa mai babai haeai haeai iuhubeau haukia maearima wairakiai tebabainakia,
ikoikiai mai aokia hamonai Solomona ena itarai tetoꞌu.
13 ꞌA maearima baika hanona tetaꞌu ainakia herekia aꞌi teao,
ia aokiai hanona ia temariki ainakia.
14 Iamo hau mai babiꞌe boꞌokia Obiapaka teaꞌikakaumana haukia teao hanona ia haukia tebaboꞌo hao boꞌo haona.
15 Inawa haukia teaoainakia airabuanai tehorotinakia mai ienoꞌaukia mai ꞌirekia tebaenotinakia taearai.
Weiana Petero herekiai kekabanai raninai aiaiana keao ahakiai.
16 Ierusalema herena aiarakia haukia boꞌokia abomo temai tetoꞌu,
inawa haukia mai auba kiꞌa obokia aokiai tetoto haukia temaiainakia weia,
ba ikoikiai temauri.
Iuhubeau Haukia Teꞌoatanakia.
17 Robe haukia arakiai hauna mai ꞌabana weiakia Sadukea itubuna haukia kipokia hanona iuhubeau haukia tewamuru ainakia.
18 Ba iuhubeau haukia tebirinakia teaoainakia wapura ituna aonai tekaiabunakia.
19 ꞌA rabi weianai Obiapaka ena aneru ha ehore wapura ituna paꞌabina ekaikauna eba karahinakia,
20 etibaha,
“Tomoao,
Marea Robe aonai mauri maha mahana pouna neiana maikoina katohinana maearima wairakiai.”
21 Aia weiana teona ihobona tebabaina,
raurani amarinai Marea Robeai tekatoto maearima teba ꞌiobinakia.
Rani weianai robe haukia arakiai hauna mai ꞌabana kipokia teao bakai apaꞌuana haukia abomo Isaraela hau apaꞌuakia kipokia tetoꞌu,
ꞌabi teuhuna eao iuhubeau haukia wapura itunai katemaiainakia.
22 Teuhunakia teao wapura itunai hanona wairakia ahaꞌi,
haeamona temue teao bakai apaꞌuana haukia haiakiai teꞌabi tetibaha,
23 “Taeao raninai paꞌabi hanona ikaiabu,
paꞌabi iꞌimana haukia abomo weia tekoroti,
ia paꞌabi takaikauna takatoto hanona tai uaꞌa ahaꞌi ꞌakina.”
24 ꞌAbi weiana teona raninai,
Marea Robe poki hauna mai robe haukia apaꞌuakia teraona raona ꞌari kiꞌa baha,
hoa weiana anina hanona taba.
25 Weiana hau ha eao herekia ehina benakia etibaha,
“Wapura itunai tokaiabunakia haukia hanona aba Marea Robe aonai tekoroti maearima tibaꞌiobinakia.”
26 Marea Robe poki hauna mai ena miori kipokia teao iuhubeau haukia tebakaꞌanakia,
ia aꞌi teaiahu benakia pokina maearima katehore piharai aꞌi temeahunakia marikina.
Iuhubeau Haukia Hau Apaꞌuakia Aꞌi Tetaꞌu ainakia.
27 Teaoainakia bakai apaꞌuana wairanai teba korotinakia,
ba robe haukia arakiai hauna ehore ebakainakia.
28 Etibaha,
“Ai wai taharabunimi,
hau neiana atanai aꞌi katobaꞌiobi.
Ia bariu emi baꞌiobi ꞌabikiai Ierusalemai pou neiana hanona abeapaꞌua,
abomo ena ꞌari hanona ai tukaiahinamai.”
29 Petero mai iuhubeau haukia teꞌabi tetibaha,
“Tirama aiana kahaona hanona enamo,
ꞌa maearima aiana kahaona hanona aꞌi enamo.
30 Iesu wai tohore matiu ꞌubinai tokokona toahu ꞌarina hauna,
aika ꞌabaꞌabaka ekia Tirama ehore ꞌariai aba ebamikiri muena.
31 Tirama ia eaꞌi taeana imana itipana tainai eba miatina iꞌuaiaika mai ibamaurika haunai ebaona Isaraela haukia ibaraona kabekia mai ekia kiꞌa ihina haokia paunai.
32 Ai hanona taba neiakia taihanakia haumai,
Auba Robe weiana Tirama aiana tiona haukia ebenakia hauna abomo ihobona.”
Gamaliel Eiroro Iuhubeau Haukia Katehabonakia.
33 ꞌAbi weiana teona raninai,
teopuere wairai ekia nuatae hanona iuhubeau haukia pateahu ꞌarinakia.
34 ꞌA Parisea hauna ha atana Gamaliel,
rauhubu poki hauna ia bakai apaꞌuana hauna ha maearima ikoikiai abomo timariki aina hauna,
emikiri iuhubeau haukia ehina benakia katekarahi atapakai katebaiꞌima rani papana.
35 Weiana ia ehina benakia etibaha,
“Isaraela haumi e,
katoiha haraina hau neiakia aea katohomanakia.
36 ꞌUaina raninai Teuda emikiri eꞌabi ia abomo hau mo ha,
weiana maearima ikoinai hinabu bani ꞌabana murinai tekaꞌa.
Ia teahu ꞌarina raninai ena maearima ikoikiai tebeau otaraina,
ha aꞌi emiaho ꞌapua.
37 Ia murinai Galilea hauna ha atana Iuda,
maearima atakia irerena raninai emikiri,
maearima boꞌokia aokia eana ia murinai tekaꞌa,
ꞌa ia abomo teahu ꞌarina,
weiana murinai tekaꞌa haukia ikoinai terama otaraina.
38 Ua buonai nahina benimi,
hau neiakia hanona katohabonakia kateao,
pokina ꞌabi hoahoa mai aka neiakia hanona maearima ꞌeukiai katemai raninai anikia aꞌi katerama.
39 Ia Tirama ꞌeunai kemai raninai,
wai hanona aꞌi katobaꞌoro ꞌapuana.
Katoꞌima ꞌima harainimi,
Tirama aꞌi tomohuarina.”
40 Ia Gamaliel aiana teaꞌi taeana,
weiana iuhubeau haukia teaparinakia tetoto,
teꞌatinakia murinai terauhubunakia Iesu atanai aꞌi katebaꞌiobi muena,
teba karahinakia.
41 Iuhubeau haukia bakai ꞌekana tehabona mai aonamokia,
pokina Tirama ena banamo aonai ia hanona Iesu atanai tehaiara.
42 Rani ikoinai Marea Robe aonai mai itu aokiai,
pou namona tebaꞌiobi aina mai teiroro aina Iesu hanona Keriso.a