Hau ꞌAbaihau Hamomo Teaꞌitaeanakia Katebaraibarai.
6
Rani baika teao murikiai aꞌikakauma haukia ekia boꞌo hanona ekaraꞌau raninai Iuda maearimakia Helene maeanai tiꞌabi haukia mai Heberu maeanai tiꞌabi haukia baiatakiai atetua erama,
pokina aniani iwatekia raninai ekia wapuwapu hanona aꞌi tiraonanakia.
2 Weiana iuhubeau harauhaea rua tehore Iesu tiaꞌikakaumana haukia ikoikiai tebatoꞌunakia tetibaha,
“Aꞌi enamo Tirama ena ꞌabi iroro akana kaha habona aniani ꞌao kohu iwatekia paunai.
3 Ua buonai uahoꞌabamai e,
wai baiatamiai hau ꞌabaihau hamomo poukia tenamo haukia Auba Robe mai aotipai tebonu haukia katoaꞌi taeanakia aka neiana katobenakia kateꞌuai aina.
4 ꞌA ai hanona rani ikoinai bahubaꞌari mai iroro akakia mo katababainakia.”
5 Iuhubeau ekia raona ꞌabina tebatohana,
ba hau neiakia teaꞌi taeanakia,
Stefano aꞌikakauma mai Auba Robeai ebonu hauna,
Pilipo,
Porokoro,
Nikanoro,
Timona,
Pamena,
mai Nikolao ia hanona rama haeai hauna Antiokai emai Iuda haunai tebaona hauna.
6 Haukia ꞌabaihau hamomo teaoainakia iuhubeau haukia wairakiai teba korotinakia,
ba iuhubeau haukia tehore imakia ꞌarakiai tehaoꞌau tebahubaꞌari tebanamonakia.
7 Weiana Tirama ena ꞌabi hanona tehina otaraina,
Iesu tiaꞌikakaumana haukia teboꞌo hao boꞌo hao Ierusalema aonai,
robe haukia boꞌokia abomo Iesu teaꞌikakaumana.
Stefano Teaꞌina Tebakaina.
8 Stefano hanona Tirama ena aokoꞌo hoana mai hiabunai ebonu,
ia ehore hoa mai bataꞌutaꞌu huri akakia maearima wairakiai ebabainakia.
9 ꞌA hau baika hanona ia teꞌoatana,
maearima weiakia hanona ‘Karahi ꞌabaea Mareana’ haukia,
ia hanona Iuda maearimakia Kurene,
Alesandereai temai,
abomo Kilikia,
Asiai temai haukia,
baika tehore Stefano kipokia teꞌabi baitaeai.
10 Ia Stefano aꞌi teꞌabi haona pokina aotipai mai Auba Robe hiabunai ehina benakia.
11 Ua buonai ia tehore baika aokia teani kateꞌabi katetibaha,
“Ai hanona ia ena ꞌabi kiꞌa obokia ehina Mose mai Tirama ohi ahakiai hauna taona.”
12 Uahomanai aiara haukia mai aiara haukia apaꞌuakia abomo rauhubu poki haukia teba opuerenakia,
ia temikiri teao Stefano teaꞌina teaoaina bakai apaꞌuana haukia herekia.
13 Ba ia temaiainakia hinau baiꞌoi haukia baika tehore tehina benakia tetibaha,
“Hau neiana hanona Robe ꞌekana mai Mose ena rauhubu iaꞌikiꞌakia ꞌabina aꞌi nibapua ꞌapuana.
14 Ai aiana taona etibaha,
Iesu Nasareta hauna kehore Marea Robe neiana kerubuna abomo Mose ena rauhubu ebenaka haukia ikoinai kebahaeainakia.”
15 Bakai ꞌekanai temiati haukia ikoikiai Stefano teiha ꞌiniꞌinina wairana ihana hanona matoha aneru ha wairana ꞌabana.