Stefano Eiroro Bakai Apaꞌuana Wairanai.
7
Robe haukia arakiai hauna Stefano ebakaina etibaha,
“Ekia ꞌabi hanona tohana,
u?”
2 Stefano ena ꞌabi ebamuena etibaha,
“Uahoꞌabaꞌu mai hamaꞌu ikoimiai,
aiaꞌu tomona.
Aika ꞌabaꞌabaka Aberahamo Harana aꞌi eao baha Mesopotamiai emiaho raninai,
nuabi Tiramana ia herenai ewaira tina,
3 ehina bena etibaha,
‘Emu hano mai hatiaꞌamu kohabonakia,
au kaꞌuahina hanona aeana hanomo weiana koao.’
4 “Ua buonai Aberahamo ehore Kaldea haukia ekia hano ehabona,
emikiri eao Haranai emiaho.
Weia emiaho eaomo hamana eꞌari,
ba Tirama ehore ebakaꞌana emaiaina bariu ṯomiaho aina hano neianai ebakarahina.
5 Tirama Aberahamo ena hano tohana ha aꞌi ebena,
ꞌapuna ihobona abomo ha aꞌi eꞌuahina.
ꞌA Tirama hanona eꞌabiꞌuai hano weiana ia kipona mai ꞌabaꞌabana kebenakia.
Rani weianai hanona Aberahamo nahuna ahaꞌi.
6 Tirama haeamona ehina bena etibaha,
‘Oi kupumu ꞌabaꞌabamu hanona hano neiana katehabona hano haeai haukia ekia hanoai katemiaho,
hano weiana haukia taꞌarakia kateaꞌi ihau hinabu bani aonai ia hanona katehau haiara.’
7 Tirama eꞌabi mue etibaha,
‘Ekia taꞌara iaꞌinai katebaonakia haukia au kahore kabakainakia,
murinai ia hanona katekarahi neia au katekuti ainaꞌu.’
8 Ba Tirama Aberahamo ehina bena itare katebabaina weiana hanona Tirama ena ꞌabiꞌuai apaꞌuana ibatohana hoana.
Ua buonai Isako erama wapuna ꞌababani aonai itare hoana ebabaina.
Isako nahuna Iakobo ebaramana,
abomo Iakobo nahuna harauhaea rua Isaraela itubu arakia terama.
9 “Itubu arana haukia tehore hatikia Iosepa tewamuru aina,
Aigupito haukia herekiai tekawa kawaina taꞌaraꞌi haunai eao.
ꞌA Tirama hanona Iosepa eꞌabana,
10 abomo ena hau haiara ikoikiai aokiai ebamaurina.
Hoahoa namona mai aotipa ebena Parao Aigupito obia ꞌarana wairanai,
weiana Parao ehore Iosepa hiabu ebena Aigupito hanopakana mai ena itu haukia ikoikiai kepoki ainakia.
11 “ꞌA arobo rarina erama Aigupito mai Kanana hanokia maikoinai haiara rarina ꞌakina.
Aika ꞌabaꞌabaka aniani aeꞌe kateaꞌina ꞌekana ahaꞌi.
12 Iakobo ꞌuru eona Aigupito hanonai mai ekia aniani,
ba nahuna aika ꞌabaꞌabaka euhunakia ekia rani koriꞌuaina.
13 Ekia rani ibaruanai Iosepa kipona ebawaira tinana uahoꞌabana wairakiai,
Parao abomo eꞌiobina Iosepa hatiaꞌana.
14 Ba Iosepa ꞌabi euhuna hamana Iakobo mai hatiaꞌana ikoikiai katemai Aigupito,
haukia imabui haraurua ima.
15 Ua buonai Iakobo emikiri eao Aigupito,
weia eꞌari murinai aika ꞌabaꞌabaka abomo weia teꞌari.
16 ꞌA ekia ꞌari haukia hanona teaoainakia Sekem ꞌariahanai tehorenakia.
ꞌAriahana weiana hanona Aberahamo ehore Hamoro nahuna imakiai moniai ekawana.
17 “Tirama ena ꞌabiꞌuai Aberahamo herenai ibatohana ranina ekaibari aonai,
aika ꞌabaꞌabaka Aigupitoai terama ahi rama ahi abomo teboꞌo kiꞌa baha.
18 Eaomo puanai obia haeai ha Aigupito eobia aina,
ia hanona Iosepa aꞌi eꞌiobina.
19 Obia weiana ꞌabaꞌabaka ebapoꞌonakia,
ebahaiaranakia abomo ebahi ahinakia kipokia nahukia ꞌoruꞌorukia kateneꞌenakia kateꞌari.
20 Rani weianai Mose erama,
miori papana namona Tirama wairanai,
hamana ena ituai teꞌimana nawa aihau.
21 Weiana atapakai tehabona murinai Parao nahuna uahona eaꞌina ebapaꞌuana nahunai eao.
22 Ua buonai Aigupito haukia ekia ꞌiobi ikoinai Mose tebaꞌiobina,
ba Mose ena ꞌabi abomo ena aka hanona mai hiabukia.
23 “Mose ihauna bariabui eaꞌina aonai eraonana hatiaꞌana Isaraela haukia keihanakia.
24 Ia ꞌabana ha eihana Aigupito hauna ehore niaꞌi kiꞌana,
buonai eao hau weiana ebaraina Aigupito hauna eahu ꞌarina.
25 Mose ena raona hanona hatiaꞌana kateꞌiobi haraina Tirama kehore Mose imanai ia arakia kebamaurinakia,
ia aꞌi teꞌiobi ꞌapuana.
26 Erani Isaraela haukia rua teꞌau,
Mose eao herekia ebairarao etibaha,
‘Wai torarua hanona hatiaꞌa,
taba buonai kipomi tuba haiaranimi?’
27 Etabura hauna ehore Mose etori parena ebakaina etibaha,
‘Tai oi eaꞌi taeaniꞌo,
ai kopoki ainamai abomo kobakainamai?
28 Nonuatae au koahu ꞌarinaꞌu,
warani Aigupito hauna oahu ꞌarina ꞌabana?’
29 Mose ꞌabi weiana eona raninai,
beronai eꞌuru eao Midian hanonai emiaho hano haeai hauna ꞌabana,
weia nahuna hau rua terama.
30 “Ihau bariabui teore murinai,
hanoꞌakunai Sinai oeo herenai matiu ꞌiniꞌininai iruba eupa aonai aneru ha ewaira tina Mose wairanai.
31 Mose eihana raninai etaꞌutaꞌu huri,
ekaꞌa haha eao herena keiha haraina aonai,
Obiapaka aiana eona.
32 Etibaha,
‘Au hanona ꞌabaꞌabamu Aberahamo,
Isako mai Iakobo ekia Tirama.’
Mose etaꞌu kiꞌa eꞌururu ꞌururu,
aꞌi enuatae keihana.
33 Obiapaka ehore ehina bena etibaha,
‘Emu tamaka moaꞌi obonakia,
pokina okoroti ꞌekana hanona Tirama nemiaho hanona erobe.
34 Au eꞌu maearima Aigupitoai tihau haiara aihanakia abomo tiꞌarara aiakia aona,
ua buonai ariri amai kabamaurinakia,
bariu ꞌomikiri kauhuniꞌo koao Aigupito.’
35 “Mose mo neiana tebakiꞌana teꞌabi,
‘Tai oi eaꞌi taeaniꞌo ai kopoki ainamai abomo kobakainamai?’
hauna Tirama ehore euhuna ekia poki abomo ibamaurikia haunai keao,
matiu ꞌiniꞌinina eꞌara aonai ewaira tina aneruna ena baraibarai ai.
36 Mose weiana hauna Isaraela haukia Aigupitoai ebakarahinakia,
bataꞌutaꞌu huri akakia abomo hoa akakia haeaihaeai ebabainakia Aigupitoai,
ꞌAku Bironai abomo ihau bariabui hanoꞌakunai.
37 Mose mo weiana ehore Isaraela haukia ehina benakia etibaha,
‘Tirama kehore mahabanai hauna ha kebamikirina wai baiatamiai,
matoha au ꞌabana.’
38 Hau weiana hanona Isaraela haukia hanoꞌakunai temia toꞌu raninai Sinai Oeo ꞌubinai eꞌabi aneruna mai ꞌabaꞌabaka baiatakiai,
mauri ꞌabina eaꞌina ebakabanaina aika ꞌeuka.
39 “Ia aika ꞌabaꞌabaka hanona Mose aiana iona ꞌarina aꞌi teꞌari teubo,
ekia nuatae patemue Aigupito.
40 Weiana ia tehore Arona tehina bena,
‘Tirama baika mobabainakia aika ꞌeuka kateꞌuai ainaka,
pokina aꞌi taꞌiobina Mose Aigupitoai ebakaꞌanaka hamai hauna bariu aehoma?’
41 Rani weianai ia tehore poromakau nahu aubaubana ha tebabaina,
banamo tabakia temaiainakia kaibaꞌuku weiana wairanai tehorotinakia,
imakiai tebabaina tabana wairanai teaonamo.
42 Weiana Tirama ia herekiai ekaobo ehabonakia kipokia kupa tabakia katekuti ainakia.
Mahabanai hauna ena pukai tererena ꞌabana etibaha,
‘Isaraela haumi e,
ihau bariabui hanoꞌakunai
beruberu mai banamo mahikia
hanona au aꞌi tobanamo ainaꞌu.
43 Wai hanona tirama atana Molok
ena roꞌe ituna abomo emi bihiu
tiramana atana Refan aubaubana
tobuanakia,
weiakia tobabainakia
katokuti ainakia.
Ua buonai Au kahore
wai kabaibiunimi Babulono puana
ꞌakinai.’ Amo 5.25-27
44 “Aika ꞌabaꞌabaka herekiai Tirama ibawaira tinana roꞌe itunaa ha hanoꞌakunai,
roꞌe weiana hanona Mose ebabaina Tirama ebaihana ihobonai.
45 Muriai ꞌabaꞌabaka hamakia imakiai roꞌe ituna weiana teaꞌina tebuana Iosua kipokia teao rama haeai haukia ekia hanoai tekaraꞌau,
Tirama ehore wairakiai hano haukia euꞌu parenakia,
ia temiaho aina emai mo Davida ena raniai.
46 Tirama ena banamo hanona Davida ebena,
ba ia Tirama enoina Iakobo ena Tirama ena itu ha kebabaina.
47 Ia itu hanona Solomona ehore ebakorina.
48 “ꞌA ꞌubi toha tohanai Tiramana hanona maearima imakiai tebabaina ituna aonai aꞌi nemiaho.
Mahabanai hauna ena ꞌabi ihobona etibaha,
49 ‘Obiapaka ṉa eꞌabi aiho,
Kupa hanona eꞌu miaꞌau ꞌekana,
hanopaka hanona aeꞌu ihorotina
ꞌekana.
Itu aehomana katobabaina Au euꞌu?
Eꞌu arai ꞌekana hanona aeana?
50 Taba neiakia ikoikiai hanona
Au imaꞌuai aꞌi ababai,
u?’ Isa 66.1, 2
51 “ꞌAra pahihi haumi,
aomi mai haiami tokaiabu harai matoha Tirama aꞌi teꞌiobina haukia ꞌabakia.
Rani ikoinai wai tuhore Auba Robe tuhao abuna.
ꞌAbaꞌabami ekia aka aꞌi torea ꞌapuana toaꞌi ꞌini baihana.
52 Wai ꞌabaꞌabami mahabanai hauna ha aꞌi teꞌoatana,
u?
Aka bero hauna kemai ꞌabina tehinana haukia teahu ꞌarinakia,
bariu wai tohore tohina hinaina bero hauna toahu ꞌarina.
53 Wai rauhubu weiana Tirama ena aneru ebaibeni hauna aba toaꞌina iamo kipomi aꞌi toaꞌi taeana.”
Piharai Stefano Teahu ꞌarina.
54 Iuda ekia obia haukia Stefano aiana teona raninai teopuere wairai ꞌakiꞌakikia teara ꞌiniꞌini.
55 Ia Stefano hanona Auba Robeai ebonu,
weiana eaꞌa taea kupa eihana,
Tirama nuabina abomo Iesu Tirama itipana tainai ekoroti eihana.
56 Ia etibaha,
“Tomoihana!
Kupa aba ekaikau naihana abomo Maearima Nahuna Iesu Tirama itipana tainai ekoroti.”
57 Weiana ia teio aota imakiai haiakia tekaiabunakia ikoikiai tebeau teao Stefano herena,
58 teaꞌina aiara aonai teberi ahina atapakai ba piharai teahu ramana,
hinau baiꞌoi haukia weiakia hanona ekia habuni teroꞌa ahinakia haukia tebakuri ahinakia hau ꞌaruꞌaruna ha atana Saulo aena pokinai tehoroti.
59 Piharai teahuna aonai Stefano ebahubaꞌari etibaha,
“Obiapaka Iesu e,
au aubaꞌu moaꞌi taeana.”
60 Weiana ekaipehu eio etibaha,
“Obiapaka e!
Kiꞌa neiana ꞌarana aꞌi kobenakia.”
Ua eꞌabi aiho murinai eꞌari.