8
Saulo ehore Stefano teahu ꞌarina hanona ebatohana.
Saulo Tirama Ena Marea Haukia Eꞌoata Ramanakia.
Rani weianai baiꞌoata ranina erama,
aꞌikakauma haukia Ierusalemai temiaho haukia ikoikiai tebeau otaraina teao Iudea,
Samaria hanokiai temiaho,
ꞌa iuhubeau haukia kipokia mo Ierusalemai temiaho.
2 Tirama timariki aina haukia baika Stefano teaꞌina tehaiaina ba teaoaina ꞌariahanai tehorena.
3 ꞌA Saulo enuatae aꞌikakauma haukia keaꞌi kiꞌanakia,
itu ha ha aokiai etoto,
hau mai babiꞌe eberi beri ahinakia,
eaoainakia wapura ituna aonai ekaiabunakia.
Pou Namona Samariai Teiroro aina.
4 Aꞌikakauma haukia tebeau otaraina haukia hanona pou namona teiroro aina eka ha ha aokiai.
5 Pilipo eao Samaria aiara apaꞌuanai ekarahi,
weia Keriso pouna eiroro aina maearima herekiai.
6 Maearima ikoikiai Pilipo aiana teona abomo hoa haeaihaeai akakia ebabai haukia teihana raninai mai aokia ikoinai teaꞌi taeana.
7 Maearima aokiai auba kiꞌa obokia ṯemiaho haukia euꞌu ahinakia tekarahi mai ioiokia,
abomo mero mai ꞌome haukia ebamaurinakia.
8 Ua buonai aonamo rarina ꞌakina erama aiara weiana aonai.
9 ꞌEka weianai hau ha atana Simona ꞌuaina raninai nepu akakia ebabai Samaria haukia ebataꞌunakia.
Ia kipona ebapaꞌuana,
10 abomo maearima ikoikiai apaꞌuana eao mo papanai epua iamo aiana teona tetibaha,
“Hau neiana hanona Tirama ena hiabuai niaka.”
11 Rani homaꞌana ena mea hoakia terama buonai aiana teona.
12 ꞌA Pilipo Tirama ena obia aiarana pouna namona mai Iesu Keriso atana eiroro aina,
weiana maearima hanona ia aiana teaꞌi taeana,
ba hau mai babiꞌe ebaꞌuere robenakia.
13 Simona abomo eaꞌikakauma ꞌuere robe eaꞌina murinai,
Pilipo eꞌabana tekaoao aonai hoa haeaihaeai mai babai haeaihaeai akakia ebabainakia eihanakia hanona nuana etae.
14 Iuhubeau Ierusalemai ṯemiaho haukia pou teona Samaria haukia abomo Tirama ena ꞌabi tiaꞌi taeana,
ua buonai Petero mai Ioane teuhunakia teao Samaria.
15 Terarua Samariai tekatoto raninai,
aꞌikakauma haukia ahakiai tebahubaꞌari Auba Robe kateaꞌina paunai,
16 pokina rani weianai Auba Robe hanona ia ahakiai aꞌi eriri baha,
ia ꞌuere robe ꞌabaeana mo teaꞌina Obiapaka Iesu atanai.
17 Ua buonai Petero mai Ioane ohi imakia ia ahakiai tehaoꞌau tebahubaꞌari raninai Auba Robe teaꞌina.
18 Ba Simona Iuhubeau haukia eihanakia imakia aꞌikakauma haukia ahakiai tehaoꞌau tebahubaꞌari Auba Robe teaꞌina raninai,
ia ehore moni baika emaiainakia iuhubeau haukia nibenakia netibaha,
19 “Hiabu naiana au aboꞌumo patobenaꞌu,
ba weiakia ikoikiai imaꞌu ahakiai pahaoꞌau pabahubaꞌari raninai ia abokiamo Auba Robe pateaꞌina.”
20 ꞌA Petero ia ehina bena etibaha,
“Oi emu moni ohi katoꞌari haeamo pokina oraonana Tirama ena beruberu tabana hanona moniai kokawana.
21 Aka neiana aonai oi ꞌekamu ꞌao itaumu hanona ahaꞌi pokina aomu aꞌi ebero Tirama wairanai.
22 Emu kiꞌai moraona kabe,
Obiapaka monoina,
paꞌe emu raona kiꞌa obona kehina haona.
23 Pokina naihaniꞌo,
oi aomuai hanona wamuru ebonu ꞌauna abomo aka kiꞌa aba ebiri harainiꞌo.”
24 Simona nepu hauna iuhubeau haukia enoinakia etibaha,
“Obiapaka tomobahubaꞌari bena au pauꞌuai taba tohinana hauna hereꞌuai aꞌi merama.”
25 Petero mai Ioane Obiapaka ena ꞌabi tehina waira tinana abomo teiroro aina murinai,
haeamona temue Ierusalema.
Ekia mueai hanona Samaria aiarakia boꞌokia aokiai pou namona teiroro aina.
Pilipo Etiopia Hauna Apaꞌuana Ha Ebaꞌuere Robena.
26 Obiapaka ena aneru ha Pilipo ehina bena etibaha,
“Omikiri ahi taina moao,
taeara weiana Ierusalemai eao Gasa taeara weiana hanona hanoꞌakuna.”
27 Pilipo emikiri taearai eao aonai Etiopia hauna ha eihana.
Ia hanona hau apaꞌuana ha Etiopia obia ꞌarana babiꞌena Kandake ena kohu iꞌimana hauna.
Aba eao Ierusalemai ebahubaꞌari,
28 ba ena mueai ena rerueai emiaꞌau Isaia mahabanai hauna ena puka ekaikauna netuabina.
29 Weiana Auba Robe ehore Pilipo ehina bena etibaha,
“Moao rerue weiana hauna herenai.”
30 Pilipo ebeau eao aonai Isaia mahabanai hauna ena puka netuabina aiana eona.
Ba ebakaina etibaha,
“Notuabina hauna anina nubabataina,
u?”
31 Hau apaꞌuana weiana etibaha,
“ꞌA aea kaꞌiobi aihona?
Ibaꞌiobiꞌu hauna ahaꞌi.”
Ba ia ehore Pilipo enoina kekaraꞌau herenai kemiati.
32 Puka Robena etuabina aonai ꞌabina hanona ṉa terere aihona.
“Ia hanona matoha mamoe ꞌabana
katebakaꞌana kateaoaina kateahu
ꞌarina pinana aꞌi ekaikauna,
ꞌao matoha mamoe nahu
buirana katekabena hauna
ꞌuruꞌuruna ahaꞌi ꞌabana,
pinana aꞌi ekaikauna
ꞌabi ha aꞌi ehina ꞌapuana.
33 Ena ꞌaiaunu buonai bakai
aonai ena bero teaꞌi obona.
Tai ha ena itubu robana
aꞌi keahuna
pokina ena mauri hanona
huanai epua hanopakai
aba eaꞌi obona.” Isa 53.7, 8
34 Hau apaꞌuana weiana Pilipo ebakaina etibaha,
“Mobaꞌiobinaꞌu,
mahabanai hauna hanona tai robana eahuna?
Ia kipona pouna ehinana ꞌao hau ha pouna ehinana?”
35 Weiana Pilipo ehore puka etuabina hauna ꞌekanai eaꞌi ramana,
Iesu pouna namona ebaꞌiobina.
36 Terarua taearai teao aonai bei ꞌekanai ha tekaraꞌau,
ba hau apaꞌuana weiana etibaha,
“Moihana,
bei weiana,
au kaꞌuere robe aꞌi ketaina pokina hana taba?”
37 (Pilipo etibaha,
“Koaꞌikakauma mai aomu ikoinai raninai,
ꞌuere robe koaꞌina hanona enamo.”
Ba hau apaꞌuana weiana etibaha,
“Mai aoꞌu ikoinai naꞌikakauma Iesu Keriso hanona Tirama Nahuna.”)
38 Ba ehina bena rerue ebakorotina,
Pilipo mai hau apaꞌuana terarua teriri teao bei aonai,
Pilipo ehore hau weiana ebaꞌuere robena.
39 Terarua beiai tekaraꞌau raninai,
Obiapaka Aubana ehore Pilipo eaꞌi parena.
Ba hau apaꞌuana weiana Pilipo aꞌi eiha muena,
ia taearai eao mai aonamona.
40 ꞌA Pilipo hanona Asoto aiaranai ewaira tina,
ba ekatoto aiarakia ikoikiai aokiai pou namona eiroro aina eaomo Kaisarea aiaranai ekaraꞌau.