Saulo Eraona Kabe.
9
Rani weianai weia Ierusalema aonai Saulo ena ao haiara ikoinai hanona Obiapaka teꞌabana haukia kebataꞌunakia ꞌao keahu ꞌarinakia,
buonai eao robe haukia ꞌarakiai hauna herena.
2 Enoina marere ha kererena kebena keao Damaseko marea herekiai.
Weia Iesu tiaꞌikakauma taearana neianai tekaꞌaina haukia hau mai babiꞌe kebirinakia keaoainakia Ierusalema wapura ꞌekana.
Conversion of Saul (Iuhubeau 9:1-19)
3 Saulo taearai eao Damaseko aiara aba ebarina aonai mawaꞌeai mo ea ha kupai eriri ia ebarara ahina.
4 Saulo eꞌeho ꞌanoai,
aia ha eona etibaha,
“Saulo e!
Saulo e!
Taba buonai au nuꞌoatanaꞌu?”
5 Saulo ebakai bakai etibaha,
“Obiapaka e,
oi tai?”
Ena ꞌabi ebamuena etibaha,
“Au Iesu nuꞌoatanaꞌu hauꞌu.
6 Bariu momikiri koao aiara aonai,
weia hau ha kehore oi kobabainakia haukia akakia kebaꞌiobiniꞌo.”
7 Teꞌabana haukia ikoikiai tekoroti aꞌi ꞌuriꞌurikia,
pokina aia mo teona ia tai ha aꞌi teihana.
8 Saulo ꞌanoai emikiri mahana ebanoꞌanakia,
ia taba ha aꞌi eiha ꞌapuana.
Ua buonai imanai teꞌebe tebakaꞌana teaoaina Damaseko.
9 Weia wapu aihau emiaho taba ha aꞌi eihana,
aniani ha aꞌi eana,
bei abomo aꞌi einu.
10 Ba aꞌikakauma hauna ha Damasekoai atana Anania,
ena mahabanaiai Obiapaka ia eaparina etibaha,
“Anania e!”
Anania eoꞌo eꞌabi etibaha,
“ꞌE!
Obiapaka.
Au neiaꞌu.”
11 Ba Obiapaka Anania ehina bena etibaha,
“Momikiri koao airabuana atana ‘Bero’ weia Iuda ena ituai Taso hauna atana Saulo kobakai bakai aina.
Pokina ia hanona nibahubaꞌari nemiaho.
12 Ia emahabanai hanona hau ha atana Anania eihana nimai ia ahanai kehaoꞌau kebahubaꞌari hanona mahana katenamo.”
13 Ia Anania Obiapaka ena ꞌabi ebamuena etibaha,
“Hau neiana pouna rani boꞌona aona,
Ierusalemai emu maearima robekia boꞌokia ebahaiara kiꞌanakia.
14 Ba bariu robe haukia apaꞌuakia hiabu tebena,
kemai neia abomo oi atamu tiaparina haukia ikoikiai kebirinakia.”
15 Obiapaka ia ehina bena etibaha,
“Moao.
Pokina au aba ia atinaꞌana taꞌaraꞌu iaꞌinai keao,
rama haeaihaeai haukia,
aiara obiakia abomo Isaraela haukia wairakiai au ataꞌu keiroro aina.
16 Haeamona au kahore kabaihana ia kehaiara kiꞌa baha au ataꞌu paunai.”
17 Ua buonai Anania emikiri eao,
itu ai etoto,
imana rua Saulo ahanai ehaoꞌau etibaha,
“Uahoꞌabaꞌu Saulo e!
Obiapaka Iesu taearai omai heremuai ewaira tina hauna euhunaꞌu amai,
oi mahamu katenoꞌa koiha mue abomo Auba Robeai kebabonuniꞌo paunai.”
18 Beronai matoha maia unakia ꞌabana Saulo mahanai teꞌeho,
ba mahana tenamo,
ena ihaiha enamo mue.
Emikiri eao tebaꞌuere robena.
19 Ba eaniani murinai hanona hauanina etabura mue.
Saulo Damaseko ai Eiroro.
Wapu baika Damaseko ai emiaho aꞌikakauma haukia herekiai.
20 Rani aꞌi ehomaꞌa aonai,
Saulo emikiri Iuda haukia ekia marea ha ha aokiai eiroro ramana Iesu hanona Tirama Nahuna.
21 Aiana teona haukia ikoikiai tetaꞌu taꞌu huri tetibaha,
“Neiana hanona Ierusalemai Iesu tekuti aina haukia eaꞌi kiꞌa kiꞌa bahanakia hauna.
Ba emai neia baika abomo kebirinakia keaoainakia robe haukia apaꞌuakia herekia,
ꞌu?”
22 ꞌA Saulo ena iroro hanona ehiabu eꞌariai ꞌariai,
ia ebatohana Iesu hanona Keriso.a
Ua buonai Iuda haukia Damasekoai ṯemiaho haukia ena ꞌabi katebamuena taearana ahaꞌi.
Saulo Epihi.
23 Wapu baika teao murinai,
Iuda haukia tetoꞌu Saulo iahu ꞌarina robana teahuna,
24 ia Saulo hanona ekia robahu aba eꞌiobina.
Ia hanona aiara parabuna paꞌabina ṯeꞌima rabina ṯeꞌima ranina Saulo kateahu ꞌarina paunai.
25 Ia murinai tikaꞌa haukia rabi aonai Saulo areha aonai teutana parabu ꞌubinai waroai tebaririna.
Saulo Eao Ierusalema.
26 Ba Saulo eao Ierusalemai ekaraꞌau raninai ena nuatae hanona aꞌikakauma haukia kipokia katetoꞌu,
ia ikoikiai tetaꞌu aina pokina aꞌi teꞌiobina ia hanona aba Iesu niaꞌikakaumana.
27 Ia Banaba ehore ebaraina ebakaꞌana eaoaina iuhubeau haukia herekia.
Saulo taearai Obiapaka aea eiha aihona,
mai Obiapaka ehore ia ehina bena hauna,
haeamona Damaseko ai Iesu pouna aea eiroroai aihona mai taburana hauna poukia ehinanakia.
28 Weiana buonai Saulo weia kipokia Ierusalemai temiaho,
ena kaoaoai Iesu atana eiroro aina mai taburana.
29 Iuda maearimakia Helene maeanai ṯehinana haukia Saulo kipokia teꞌabi ꞌabi hanona tebaiara,
buonai taearana tetabu kateahu ꞌarina.
30 Uahoꞌabana baika pou weiana teꞌiobina aonai,
Saulo tebakaꞌana teaoaina Kaisarea weia teuhuna eao Taso.
31 Weiana Iudea,
Galilea mai Samaria hanokia ikoikiai Tirama ena marea haukia aokiai baibua erama Obiapaka temariki aina mai Auba Robe baraibarai ebenakia ihobonai ekia tabura eapaꞌua haeamona Tirama ena marea haukia ekia boꞌo hanona ekaraꞌau.
Petero Mero Hauna Aenea Ebanamona.
32 Petero hanona aiara ha ha aokiai ekabanai eaomo Rudai Tirama ena maearima herekiai ekaraꞌau.
33 Eka weianai mero hauna ha etabu ahina atana Aenea.
Ia hanona uahomana enoti ihau aba ꞌababani.
34 Ba Petero eꞌabi etibaha,
“Aenea e!
Iesu Keriso bariu oi nibamauri mauriniꞌo.
Momikiri,
emu taba moaꞌi aꞌi harainakia.”
Beronai mo Aenea emikiri.
35 Ruda mai Saronai ṯemiaho haukia ikoikiai hoa weiana teihana raninai,
teraona kabe Obiapaka herena teao.
Petero Tabita Ebamauri Maurina.
36 Iopa aiaranai aꞌikakauma babiꞌena ha emiaho,
atana hanona Tabita.
(Helene maeakiai hanona Doreka.)b
Rani ikoikiai aka namokia ebabai uraru haukia ebarainakia.
37 Rani weianai ia hanona einawa ba eꞌari.
Epua tebaꞌuere haraina ba itu aonai ikaihuri ha ꞌubiai hauna aonai tebaenotina.
38 Ruda mai Iopa baiatakia hanona aꞌi ehomaꞌa.
Ua buonai Iopa ai aꞌikakauma haukia baika teꞌiobina Petero hanona weia Ruda ai,
ba temikiri hau rua teuhunakia teao Petero herena,
tenoina keao biai herekia.
39 Ua buonai Petero emikiri kipokia teao,
ba tekaraꞌau raninai teaoaina itu aonai ikaihuri ha ꞌubiai hauna aonai tebakaraꞌauna.
Wapu baika abomo weia tekoroti tihai,
Doreka maurinai habuni ibatoto mai iroꞌabu etainakia haukia Petero tebaihana.
40 Petero ehore euhunakia tekarahi ba ekaipehu ebahubaꞌari.
Murinai ꞌari babiꞌena ewairana eꞌabi etibaha,
“Tabita e!
ꞌOmikiri.”
Weiana ia mahana eba noꞌanakia Petero eihana ba emikiri emiati.
41 Petero ehore imanai eaꞌi ebaraina,
emikiri ekoroti.
Aꞌikakauma haukia mai wapu eaparinakia temai herena,
babiꞌe ebamauri maurina hauna ebaihanakia.
42 Pou neiana hanona Iopa aiarana ikoinai tehina otaraina,
ba maearima boꞌona Obiapaka teaꞌikakaumana.
43 Petero weia Iopai Simona poromakau paruakia nitainakia hauna herenai rani homaꞌana emiaho.