22
“Uahoꞌabaꞌu mai hamaꞌu ikoimiai,
tomobahu eꞌu pou mahinana aiaꞌu tomona.”
2 Heberu maeanai ehina benakia hanona ikoikiai tebahu harai ia eꞌabi hanona aiana teona.
3 Eꞌabi mue etibaha,
“Au hanona Paulo,
Iuda hauꞌu eꞌu rama aiarana hanona Taso Kilikiai,
ia aiara neiana Ierusalemai tebapaꞌuanaꞌu.
Au hanona Gamaliel ebamarerenaꞌu,
ꞌabaꞌabaka ekia rauhubu aea homakia ikoikiai ebaꞌiobinaꞌu abomo Tirama ena aka ataburaina matoha bariu wai tutabura ꞌabana.
4 Au Iesu teaꞌikakaumana haukia mai babiꞌekia aꞌoatanakia,
taeara neiana tekaꞌaina haukia baika kateahu ꞌarinakia,
baika abirinakia wapura itunai akapo totonakia.
5 Eꞌu ꞌabi hanona robe haukia arakiai hauna mai bakai apaꞌuana haukia katebatohana.
Ia tehore marere tebenaꞌu aeao uahoꞌabaka Damaseko ai haukia herekia,
weia aꞌikakauma haukia kamaiainakia Ierusalemai katewapura.
Paulo Eraona kabe Pouna Ehinana.
6 “Atiaha ꞌabana taearai aeao Damaseko aba hereꞌuai hanona ea rarina ꞌakina ha kupai eriri ebarara kakaiaronaꞌu.
7 Beronai aꞌeho ꞌanoai,
aia ha aona etibaha,
‘Saulo e,
Saulo e,
taba buonai au nuꞌoatanaꞌu?’
8 Au abakai bakai atibaha,
‘Obiapaka e,
oi tai?’
Ia etibaha,
‘Au Iesu,
Nasareta hauꞌu,
nuꞌoatanaꞌu.’
9 Teꞌabanaꞌu haukia ea weiana teihana,
ia aia weiana au ehina benaꞌu hauna aꞌi teona.
10 “Au abakaina,
‘Obiapaka e,
au taba kababaina?’
Ia etibaha,
‘Momikiri,
koao Damaseko,
weia hau ha uaꞌa taba keꞌuahina hanona akakia ikoikiai kobabainakia.’
11 Teꞌabaꞌu haukia imaꞌuai teꞌebe tebakaꞌanaꞌu taeao Damaseko,
pokina ea weiana ꞌimare ꞌabana mahaꞌu ebaꞌiaunakia.
12 “Hau ha atana Anania emai eihanaꞌu.
Ia hanona rauhubu ꞌabikia neꞌima harainakia hauna,
Iuda haukia weia ṯemiaho haukia ikoikiai hanona ia timariki aina.
13 Ia emai hereꞌuai ekoroti ehina benaꞌu etibaha,
‘Uahoꞌabaꞌu Saulo e,
emu ihaiha moaꞌi muena.’
Rani weianai beronai mahaꞌu enamo au ia aihana.
14 Ba ia etibaha,
‘Aika ꞌabaꞌabaka ekia Tirama etinaꞌaniꞌo ena nuatae koꞌiobina abomo aka bero hauna Iesu koihana,
ia pinanai keꞌabi hanona aiana kona.
15 Weiana oi hanona ia pouna ihinanai koao,
taba ona ꞌao oihana hauna maearima ikoikiai kohina benakia.
16 Bariu taba nahaꞌimana?
Momikiri Obiapaka koaparina atanai koꞌuere robe,
emu kiꞌa keuhu obonakia.’
Obiapaka Paulo Euhuna Rama Haeai Haukia Herekia.
17 “Muriai au amue aeao Ierusalema,
marea robe aonai abahubaꞌari hanona amahabanai.
18 Obiapaka aihana ba ehina benaꞌu etibaha,
‘Monoanoa.
Bariu bariu mo Ierusalema kohabona,
pokina eꞌu pou kohinana hanona maearima neiakia emu ꞌabi aꞌi kateaꞌi taeana.’
19 Au atibaha,
‘Obiapaka e,
ia aiaꞌu kateona,
pokina maearima neiakia hanona teꞌiobinaꞌu au aeao marea ha ha aokiai tiaꞌikakaumaniꞌo haukia ahunakia,
abirinakia wapura itunai aneꞌetinakia.
20 Oi poumu ihinana hauna Stefano aruaruna ekiki oioi raninai au abomo weia kipokia takoroti haeamo teahu ꞌarina haukia abatohanakia abomo ekia habuni aiha ꞌininakia.’
21 Weiana Obiapaka ehina benaꞌu etibaha,
‘Ahaꞌi,
oi hana moao,
au oi nauhuniꞌo rama haeai haukia atauꞌai ṯemiaho haukia herekia.’”
Paulo Hanona Roma Hauna Erama.
22 Maearima hanona Paulo aiana tebahu aina eaomo ꞌabi neiana ehinana raninai aiakia tebakara ꞌaunakia teio tetibaha,
“Hau neiana kahahu ꞌarina!
Neia hanopakai kemiaho hanona ena namo ahaꞌi.”
23 Ia tebakoko ekia habuni tekapo abomo ꞌano teꞌiti tekapo ꞌubi teao.
24 Weiana huari poki hauna ena huari haukia ehina benakia Paulo teaoaina aka ꞌekana,
weia kateꞌatina ba katebakaina taba buonai teioaina.
25 Temikiri tebirina kateꞌatina aonai,
Paulo huari haukia hinabu nipoki aina hauna ia herenai ekoroti hauna ehina bena etibaha,
“Roma hauna bakai aꞌi niaꞌi bahana,
ia kateꞌatina hanona mai ena bero,
ꞌu?”
26 Huari hauna weiana aia eona raninai eao ia ena poki hauna ehina bena etibaha,
“Hau weiana hanona Roma hauna ṉa niho.
Aea kobabai aiho?”
27 Weiana huari poki hauna eao Paulo ebakaina etibaha,
“Oi Roma haumu?”
Paulo eꞌabi,
“ꞌE.”
28 Huari poki hauna eꞌabi etibaha,
“Au Roma hauꞌuai aeao hanona moni rarina ꞌakina ꞌara ahore.”
Ia Paulo eꞌabi etibaha,
“Au hanona Roma hauꞌu arama.”
29 Weia tekoroti katebakaina haukia beronai tehe mue,
huari poki hauna eꞌiobina hanona etaꞌu,
pokina Paulo hanona Roma hauna,
iamo tabiriai ebirina paunai.
Paulo Bakai Apaꞌuana Wairanai Ekoroti.
30 Erani huari poki hauna ena nuatae keꞌiobi haraina Iuda haukia taba buonai Paulo tekaiahina.
Weiana robe haukia apaꞌuakia mai bakai apaꞌuana haukia ebatoꞌunakia,
ba Paulo erubuna eaoaina wairakiai ebakorotina.