23
Paulo bakai apaꞌuana haukia eiha ꞌiniꞌininakia eꞌabi etibaha,
“Uahoꞌabaꞌu e,
aoꞌu tohana beho ha aꞌi ababaina Tirama wairanai amiaho emai mo bariu.”
2 Weiana Anania robe haukia ꞌarakiai hauna ꞌabi neiana eona hanona Paulo herenai tekoroti haukia ehina benakia pinana kateahu ꞌitiꞌitina.
3 Ba Paulo ia ehina bena etibaha,
“Kaitaꞌataꞌa haumu,
Tirama keahuniꞌo,
rauhubuai naia omiati,
au kobabakainaꞌu,
ia oi haeamomu mo rauhubu obakai hurina,
oꞌabi kateahunaꞌu.”
4 Paulo herenai tekoroti haukia tehore tehina bena tetibaha,
“Oi hama Tirama ena robe haukia ꞌarakiai hauna herenai nuꞌabi kiꞌa?”
5 Paulo etibaha,
“Uahoꞌabaꞌu,
aꞌi aꞌiobina ia hanona robe haukia ꞌarakiai hauna.
Weiana puka robenai ṉa erere aiho,
‘Emu obia hauna herenai aꞌi koꞌabi kiꞌa.’”
6 Paulo bakai apaꞌuana haukia eiha ꞌiobi ainakia baika Parisea haukia baika Sadukea haukia hanona wairakia eio ꞌaota etibaha,
“Uahoꞌabaꞌu e!
Au hanona Parisea hauꞌu,
Parisea nahukia,
eꞌu raona raona ꞌari haukia katemikiri mue paunai bariu bakai ꞌekanai nakoroti.”
7 ꞌAbi neiana ehinana raninai baiara rarina ꞌakina erama,
ia tehe boana Parisea haukia ꞌabaeana mo mai Sadukea haukia ꞌabaeana mo.
8 Pokina Sadukea haukia hanona ꞌari haukia ekia mikiri mue aꞌi tibatohana,
aneru ꞌao auba abomo ahaꞌi,
ia Parisea haukia hanona ikoikiai tibatohanakia.
9 Atetua rarina erama,
Parisea haukia aokiai rauhubu poki haukia baika temikiri teio ꞌaota tetibaha,
“Hau neiana ena beho ha aꞌi tatabu ahina.
Paꞌe aneru ꞌao auba mo hau neiana ehina bena.”
10 Baiara erarina ꞌakina.
Huari poki hauna Paulo aꞌi temetapa ꞌitiꞌitina taꞌuna,
huari haukia euhunakia teriri teao Paulo herekiai tepuhu boinakia,
teaoaina huari haukia ekia ꞌeka.
11 Rabi weiana Obiapaka Paulo herenai ekoroti eꞌabi etibaha,
“Kotabura!
Ierusalemai pouꞌu ohinana ꞌabana Roma ai abomo pouꞌu kohinana.”
Iuda Haukia Paulo Kateahu ꞌarina.
12 Erani raurani Iuda haukia tetoꞌu terobahu teꞌabiꞌuai Tirama wairanai,
aniani ha aꞌi kateana abomo bei ha aꞌi kateinu keao mo Paulo kateahu ꞌarina.
13 Haukia ikoinai bariabui reana hanona ua teꞌabi aiho.
14 Teao robe haukia apaꞌuakia mai aiara maearima apaꞌuakia herekiai teꞌabi tetibaha,
“Ai aba taꞌabiꞌuai Tirama wairanai,
aniani ha aꞌi katana keao mo Paulo katahu ꞌarina.
15 Bariu wai mai bakai apaꞌuana haukia ꞌabi tomouhuna meao huari poki hauna herena katobaiꞌoi katoꞌabi,
Paulo kemai ṉaꞌa heremi ꞌabi berona katoaꞌina ṉa katohoma.
Ia ṉa kemai aꞌi kekarahi baha aonai ai aba taꞌoru katahu ꞌarina.”
16 ꞌA Paulo uana Paulo hinahina tehinahina ꞌuruna eona,
ua buonai eao huari haukia ekia ꞌekai,
Paulo haianai eꞌabi.
17 Ba Paulo huari haukia hinabu nipoki ainakia hauna ha eaparina ehina bena etibaha,
“Hau ꞌaruꞌaruna neiana kobakaꞌana koaoaina huari poki hauna herena,
ia mai ena ꞌabi ha uaꞌa kehinana herenai.”
18 Ua buonai huari hauna weiana Paulo uana eaoaina huari poki hauna herena eꞌabi etibaha,
“Paulo wapura hauna ebaiuhu aeao herena,
enoinaꞌu hau ꞌaruꞌaruna neiana kamaiaina heremu ia mai ena ꞌabi ha haiamuai kehinana.”
19 Huari poki hauna Paulo uana imanai eꞌebe teao haiahaiai ba ebakaina,
“Emu nuatae ꞌabina taba haiaꞌuai kohinana?”
20 Ia eꞌabi etibaha,
“Iuda haukia aba tehina haeamona katenoiniꞌo,
‘Mara Paulo koaoaina bakai apaꞌuana haukia herekia,
katebakai haraina herenai ꞌabi berona kateaꞌina.’
ṉa katehoma.
21 Ia aiakia aꞌi kona pokina maearima haukia ikoinai bariabui reana hanona katebaiꞌima Paulo katehe abuna.
Teꞌabiꞌuai Tirama wairanai aꞌi kateani ꞌao bei aꞌi kateinu keao mo Paulo kateahu ꞌarina.
Bariu maearima weiakia hanona aba teꞌoru kate babaina,
ekia noi mo koaꞌi taeana hanona tibahubahu aina.”
22 Huari poki hauna hau ꞌaruꞌaruna weiana eharabuna etibaha,
“Ohina benaꞌu ꞌabina neiana pouna hanona hau ha haianai aꞌi kohinana.”
Ba euhuna ekaꞌa.
Paulo Teaoaina Kaisarea Kabana Hauna Feliki Herenai.
23 Weiana huari poki hauna ehore huari haukia hinabu tipoki ainakia haukia rua eaparinakia ehina benakia etibaha,
“Huari haukia hinabu rua,
hoti ai ṯehuari haukia ikoinai imabui harau rua mai ꞌarawai haukia ikoinai hinabu rua katobaꞌorunakia.
Bariu rabi beraura hoana ꞌababani hamomo hanona katoao Kaisarea.
24 Hoti baika abomo katobaꞌorunakia Paulo kemiaꞌau,
katoꞌima haraina katoaoaina Kabana hauna Feliki herena.”
25 Ba huari poki hauna marere ha ererena keao Kabana hauna herena,
ṉa erere aihona.
26 “Au Klaudio Lusia,
aoꞌu namonai oi Feliki Kabana
haumu namomu banamo nabeniꞌo.
27 Iuda haukia hau neiana teaꞌina teahuna aba kateahu ꞌarina aonai,
eꞌu huari haukia kipokia taeao ꞌarana tabamaurina.
Pokina aꞌiobina ia hanona Roma hauna.
28 Au anuatae kaꞌiobina taba buonai tikai ahina buonai aeaoaina Iuda haukia ekia bakai apaꞌuana aonai.
29 Weia aꞌiobina hau neiana taba uaꞌa ha aꞌi ebabaina weiana keꞌari ꞌao kewapuraina,
ia kipokia ekia rauhubu aonai bakaibakai baika buokiai teaꞌina.
30 Haeamona Iuda haukia baika terobahu kateahu ꞌarina ṉa teho,
pouna aona raninai beronai mo auhuna heremu.
Tehinau aina haukia abomo ahina benakia ekia hinau ꞌabikia katewahi ainakia heremu.”
31 Ua buonai huari haukia ekia poki hauna aiana tekaꞌaina ihobonai rabi weiana aonai Paulo teaoaina Antipatri ai tekarahi.
32 Erani hanona aekiai tekaꞌa haukia temue ekia aka ꞌekana teao,
ia hotiai haukia Paulo teaoaina.
33 Hotiai teao haukia Kaisareai tekaraꞌau raninai,
marere weiana Kabana hauna atana Feliki tebena,
ba Paulo abonamo Feliki ena ihaꞌini baꞌanai tehabona.
34 Kabana hauna marere weiana etuabina murinai,
ia Paulo ebakaina ia hanona ꞌeka tabana hauna.
Ia eꞌiobina Paulo hanona Kilikia hauna raninai,
35 eꞌabi etibaha,
“Oi beho ꞌekanai tihorotiniꞌo haukia katemai raninai,
oi emu pou kohina aiamu kaona.”
Epua ia ena huari haukia ehina benakia Paulo weia Heroda obia hauna ena itu aonai kateiha ꞌinina.