Paulo Tehinau aina.
24
Wapu ima teore murinai Anania robe haukia arakiai hauna,
aiara haukia apaꞌuakia mai Roma ekia rauhubu eꞌiobi haraina hauna atana Teretulo kipokia teriri teao Kaisarea,
Kabana hauna Feliki wairanai Paulo katehinau aina.
2 Ba Feliki ꞌabi euhuna eao Paulo temaiaina,
weiana Teretulo emikiri ena hinau ꞌabina eaꞌi ramana etibaha,
“Feliki,
Kabana haumu namomu e,
ihau rarina oꞌuaiai harainamai baibua aonai ṯamiaho.
Emu aotipai emai hano neiana aonai taba namokia boꞌokia terama.
3 Ua buonai ꞌeka maikoinai mai taeara ikoikiai ai hanona oi ṯaꞌi taeaniꞌo.
Feliki Kabana haumu namomu,
ai mai aomai ikoikiai oi ṯabanamoniꞌo.
4 Bariu aꞌi kabaroꞌariniꞌo,
ia nanoiniꞌo koaokoꞌo ainamai,
emai ꞌabi papana uruna kona.
5 ꞌAbina hanona neiana.
Hau neiana tatabu ahina ia hanona ripuripu hauna.
Hanopaka maikoina aonai Iuda maearimakia ikoikiai herekiai atetua nibarama barama bena hauna,
abomo Nasareta maearimakia kiꞌa obokia neꞌuai ainakia ekia aꞌi toꞌu aokiai.
6 Ia nihore Marea Robe nibaꞌopuna buonai taꞌina.
(Emai rauhubu tainai katababakaina.
7 Ia Lusia huari poki hauna apaꞌuana emai ebatabura kiꞌa heremaiai epuhu boina.
8 Ba tehinau aina haukia ehina benakia katewahi heremu.)
Ba oi kipomu hau naiana kobakaina,
ai ia ṯahinau aina hauna aiana kona hanona koꞌiobina.”
9 Weiana Iuda haukia abomo Teretulo tebaruana teꞌabi ena ꞌabi ikoikiai hanona tohakia.
Paulo Feliki Kabana Hauna Wairanai Kipona Pouna Ehinana.
10 Kabana hauna ꞌekuna ekaina Paulo keꞌabi,
ba Paulo eꞌabi etibaha,
“Ihau rarina eka hanopaka aonai bakai boꞌona obabainakia buonai au aoꞌu namonai kipoꞌu pouꞌu kahinana oi wairamuai.
11 Oi kipomu ꞌuriꞌuri neiana pokina kotabuna raninai aba koꞌiobina,
weiana wapu harau haea rua aba teao aonai au akaraꞌau Ierusalema aeao kabahubaꞌari.
12 Aonai Iuda haukia hereꞌuai beho ha aꞌi tetabu ahina,
marea robe aonai hau ha ohi aꞌi tabaiara ꞌao marea aokiai ꞌao aiara weiana aonai aꞌi abatetua.
13 Hau neiakia bariu ṯehinau ainaꞌu ꞌabikia hanona aꞌi mo kateba tohanakia oi wairamuai.
14 “Iamo au wairamuai kahina pouna hanona neiana,
hau neiakia tiꞌabi kuti baiꞌoina taearanai au hanona ꞌabaꞌabamai ekia Tirama nakuti aina,
taba ikoikiai Mose ena rauhubuai mai mahabanai haukia ekia pukai tererenakia ikoikiai ṉaꞌi taeanakia.
15 Eꞌu buabeni Tirama herenai hanona ihobonamo maearima neiakia.
Emai buabeni hanona bero haukia mai kiꞌa haukia ikoikiai ꞌariai katemikiri mue.
16 Ua buonai rani ikoinai nabatabura aoꞌu beronai kamiaho Tirama mai maearima wairakiai.
17 “Ihau baika atauꞌai amiaho murinai amue aeao Ierusalema eꞌu maearima herekia beruberu kaeao ainakia uraru haukia kabenakia haeamona kiꞌa ihina haona banamona kababaina paunai.
18 Au hanona robe hoahoana ababaina abamaha mahanaꞌu aonai marea robe ai teihanaꞌu,
mako uaꞌa ahaꞌi,
abomo ꞌuriꞌuri uaꞌa ha aꞌi ababaina.
19 Ia Iuda haukia baika Asiai temai haukia abomo weia,
eꞌu beho ha teihana raninai bariu wairamuai patewaira tina patehina pouna.
20 Ahaꞌi raninai Iuda haukia neiakia aba temai haukia temeꞌabi,
bakai apaꞌuana haukia wairakiai tebabakainaꞌu aonai eꞌu beho tabana tetabu ahina.
21 Ia wairakiai akoroti raninai aio ꞌabi ha neiana ahinana atibaha,
‘ꞌAri haukia katemikiri mue mo paunai bariu toaꞌinaꞌu bakai ꞌekanai tohorotinaꞌu.’”
22 Ba Feliki aꞌikakauma taearana eꞌiobi haraina paunai bakai ekaiabuna ba eꞌabi etibaha,
“Huari poki hauna Lusia kemai raninai emi bakai karaonana.”
23 Ia ehore huari haukia hinabu nipoki ainakia hauna ehina bena Paulo keiha ꞌini haraina,
ia aꞌi kekaiabu kiꞌa bahana,
ena hau katemai katetoana haeamona ena nuatae tabakia reꞌa katebabai.
Paulo Wapura Itunai Tekaiabuna Ihau Rua.
24 Rani baika teao murinai Feliki atawana Drusila ohi temai,
Drusila hanona Iuda babiꞌena Feliki ebaiuhu eao Paulo emai,
ba Paulo aꞌikakauma Keriso Iesu aonai hauna pouna ehinana aiana teona.
25 Ia Paulo ehore aka bero,
bakiro mai bakaibakai rarina kemai hauna robakia eahuna,
weiana Feliki hanona etaꞌu eꞌabi etibaha,
“Abetaina naia,
bariu hanona komue koao,
rani ha namona kehaea ꞌeuꞌuai raninai kapari mueniꞌo.”
26 Rani weianai Feliki eraonana Paulo moni baika ia kebena ba keba karahina,
weiana buonai rani boꞌona ebaiuhu Paulo eao terarua teꞌabiꞌabi.
27 Weiana ihau rua teao murinai Porokio Festo ehore Feliki ꞌekana eaꞌina.
Ia Feliki Iuda haukia aokia keana paunai Paulo wapura itunai ehabona.