Paulo Enuatae Kaisa Wairanai Kekoroti Kebakai.
25
Festo keꞌimana hanonai ekaraꞌau ena aka eaꞌi ramana wapu aihau murinai Kaisareai eao Ierusalema.
2 Robe haukia apaꞌuakia mai Iuda haukia apaꞌuakia teao herenai uaꞌa Paulo tehinau aina.
3 Festo tebaꞌamena ṯenuatae bariu Paulo keuhuna kemai Ierusalema.
Pokina Paulo kekaraꞌau hanona katebaꞌoru,
taearai katehe abuna kateahu ꞌarina teraonana.
4 Ia Festo eꞌabi etibaha,
“Paulo hanona Kaisarea wapura itunai tekai abuna,
rani papana haeamona aba kamue kaeao.
5 Namona hanona ṯeuai ainimi haukia katemai kipokia kataeao Kaisareai hau weiana mai ena beho reꞌa katehinau aina.”
6 Wapu ꞌababani ꞌao harau haea ꞌabana kipokia temiaho murinai Festo eao Kaisarea.
Erani eao bakai ꞌekanai emiati ꞌabi euhuna eao Paulo kate maiaina.
7 Ba Paulo emai raninai,
Iuda haukia Ierusalemai temai haukia teao Paulo tekori kaiarona ꞌabi boꞌokia pumakia ꞌakikia tehina herenai,
ikoikiai aꞌi mo katebatoha ꞌabikia ꞌabaeana.
8 Paulo ekia ꞌabi arana ebamuena etibaha,
“Au taba ha aꞌi ababaina,
Iuda haukia ekia rauhubu aꞌi mo abakai hurina,
marea robe abomo aꞌi aꞌikiꞌana,
ꞌao Roma ekia obia ꞌarana Kaisa herenai beho mo ha aꞌi ababaina.”
9 Ia Festo Iuda haukia ketainakia aokia kebanamona ṉa ehoma Paulo ebakaina,
“Nonuatae kokaraꞌau koao Ierusalema hinau ꞌabikia neiakia paukiai uaꞌa wairaꞌuai kobakai?”
10 Paulo eꞌabi etibaha,
“Au bariu Kaisa ena bakai ꞌekanai nakoroti,
au bariu mo neianai mebakainaꞌu.
Pokina oi oꞌiobi kiꞌa bahana,
Iuda haukia herekiai taba ha aꞌi aꞌikiꞌana.
11 Ia pabeho mo ba beho ꞌarana ꞌari pateꞌuahina,
aꞌi naubo paꞌari.
Ia Iuda haukia ekia hinau ꞌabikia ahaꞌuai teneꞌeti ikoikiai aꞌi tetoha,
hau ha ena bero ahaꞌi keaꞌinaꞌu ia imakiai keutana.
Nanoi Kaisa wairanai kakoroti kabakai.”
12 Festo bakai haukia kipokia terobahu epua hanona Paulo ehina bena etibaha,
“Oi onoi Kaisa herenai buonai koao Kaisa herena kobakai.”
Festo Paulo Eaoaina Agripa Wairanai.
13 Wapu baika teao murinai obia ꞌarana hauna Agripa haibuna Berenike ohi Festo itoana ibanamona paunai teao Kaisarea.
14 Rani homaꞌana temiaho aonai Festo ehore Paulo robana eahuna obia ꞌarana Agripa herenai,
“Feliki wapura hauna ha ṉaꞌa ehabona wapura itunai.
15 Aeao Ierusalema raninai,
robe haukia apaꞌuakia mai Iuda haukia apaꞌuakia kipokia temai hereꞌu tehinau tenoinaꞌu kabawapurana.
16 Ahina benakia atibaha,
‘Roma haukia ekia hoahoa hanona nahomana ahaꞌi,
maearima hanona aꞌi ṯakaiabu ꞌabaeana keao mo ehinau aina hauna ohi bakai ꞌekanai katekoroti ia mai ena bero kipona pouna kehinana.’
17 Kipokia tamai neia raninai,
aꞌi abahomaꞌana erani aeao bakai ꞌekanai,
abaiuhu eao hau weiana kemai,
ba emai.
18 Tehinau haukia temikiri teꞌabi raninai beho araonanakia haukia aꞌi tehina.
19 Ia aeꞌemo ekia bahubaꞌari taearana teꞌuriꞌuri aina mai ꞌari hauna ha atana Iesu eꞌari weiana Paulo eꞌabi emauri hauna buonai kipokia tebaiara hauna robana teahuna.
20 Taba neiana itabuna ababataina hereꞌuai aꞌi etaina buonai,
Paulo abakaina,
kenuatae reꞌa keao Ierusalema uaꞌa kebakai.
21 ꞌA enoi ena bakai Kaisa keihana,
ua buonai aꞌabi katekaiabuna wapura itunai kemiaho keaomo kauhuna keao Kaisa herena.”
22 Ba Agripa ehore Festo ehina bena etibaha,
“Au abomo nanuatae hau weiana aiana kipoꞌu haiaꞌuai kaona.”
Festo ia ena ꞌabi ebamuena etibaha,
“Mara ia aiana aba kona.”
23 Erani Agripa mai Berenike ekia habuni namokia mai nuabikia ekia apaꞌua hoana ibawaira tinana haukia tebatotonakia,
huari poki haukia mai aiara haukia apaꞌuakia kipokia tetoto teao toꞌu ituna.
Festo ena ꞌabiai Paulo temaiaina.
24 Festo emikiri eꞌabi,
“Obia arana haumu Agripa mai towaira tina haumi ikoimiai!
Hau neiana ṯoihana.
Iuda haukia Ierusalemai uaꞌa mai neia Kaisareai ṯemiaho haukia maikoina hau neiana hereꞌuai tehinau aina teioaina tetibaha,
‘Ia kemiaho hanona ena namo ahaꞌi,
ia keꞌari.’
25 Ia beho tabai keꞌari hanona au aꞌi atabu ahina,
haeamona kipona enoinaꞌu ena bakai Kaisa keihana buonai,
naraonana kauhuna keao Roma.
26 Ia aꞌi naꞌiobina ahanai ꞌabi tabana mo karere keao Kaisa herena.
Ua buonai amaiaina ikoimiai wairamiai,
tohana hana obia ꞌarana hauna Agripa wairamuai,
kahabakai haraina ia ꞌabina namona kahatabu ahina karerena.
27 Naraonana aꞌi ebero wapura hauna kauhu ꞌabaeana ia ena beho aꞌi karere pouna.”