Paulo Agripa Wairanai Kipona Pouna Ehinana.
26
Agripa ehore Paulo ehina bena etibaha,
“Aba bero nabeniꞌo kipomu poumu mohinana.”
Ba Paulo imana eaꞌi taeanakia eꞌabi etibaha,
2 “Obia ꞌarana hauna Agripa e,
au kipoꞌu nababataina bariu rani neianai oi wairamuai akoroti hanona enamo,
pokina Iuda haukia ekia hinau ꞌabikia hereꞌuai hauna kipoꞌu pouna kahinana.
3 Neiana hanona taba tohana,
oi oꞌiobina Iuda haukia ekia hoahoa mai ekia atetua,
ua buonai nanoiniꞌo kobaiꞌima au kaꞌabi.
4 “Iuda haukia ikoikiai teꞌiobinaꞌu koꞌikoꞌiꞌuai aꞌiramana emai mo bariu,
eꞌu miaho maurina kipoꞌu eꞌu aiarai abomo Ierusalema ai.
5 Aba waꞌi baha teꞌiobinaꞌu abomo au hanona Parisea haunai tebaonaꞌu,
ekia kuti rauhubukia pahihikia katebabai aokiai au abomo baiatakiai,
ia katenuatae hanona katehina pouna.
6 Bariu bakai ꞌekanai akoroti,
pokina Tirama eꞌabi ꞌuai ꞌabaꞌabaka herekiai hauna nabuabena paunai.
7 Itubu harauhaea rua rabi mai mararani Tirama nahakuti aina mai ꞌabiꞌuai neiana nahabuabena kerama.
Hau apaꞌuana e,
buabeni weiana paunai Iuda haukia au ṯehinau ainaꞌu.
8 Taba buonai wai tuꞌabi Tirama nihore maearima ꞌariai nibamikiri muenakia aꞌi katoaꞌi taeana ṉa tuho?
9 “Au abomo aoꞌuai araonana Iesu Nasareta hauna atana aꞌoatana iaꞌi kiꞌana akakia boꞌona pababai hanona penamo.
10 Au Ierusalemai ua ababai aiho,
robe haukia apaꞌuakia hiabu tebenaꞌu,
aeao Tirama ena maearima aꞌinakia abawapuranakia,
abomo kateahu ꞌarinakia ꞌabina tehinana au imaꞌu aꞌitaeana.
11 Rani boꞌona aeao marea ha ha aokiai ahunakia abahaiaranakia,
abahobona ahina benakia ekia aꞌikakauma kate buniaina,
au aopuereai kiꞌa bahanakia,
weiana hanopaka haeai abomo aeao ahunakia.
Paulo Eraona kabe Pouna Ehinana.
12 “Raona neiana paunai au rani ha robe haukia apaꞌuakia hiabu tebenaꞌu teuhunaꞌu kaeao Damaseko.
13 Obiamu,
taearai atiaha tohanai ea ha aihana kupa ꞌubinai,
ea kiꞌa baha ba beraura,
teꞌabanaꞌu haukia kipokia ebaea obonamai.
14 Ikoimaiai taꞌeho ꞌanoai aia ha aona Heberu maeakia ehina benaꞌu etibaha,
‘Saulo e,
Saulo e,
taba buonai au nuꞌoatanaꞌu?
Au nubakiꞌanaꞌu hanona kipomu kobahaiaraniꞌo akana nubabaina.’
15 Abakaina atibaha,
‘Obiapaka e,
oi tai?’
Obiapaka eꞌabi,
‘Au Iesu oi nuꞌoatanaꞌu hauꞌu.
16 Momikiri aemu tohanai mokoroti,
au heremuai awaira tina hanona kaꞌitaeainiꞌo eꞌu taꞌaraꞌi haunai koao,
bariu oi aea oiha aihonaꞌu abomo wairai kabaihaniꞌo haukia poukia maearima kohina benakia.
17 Au Iuda mai rama haeai haukia imakiai oi kabamauriniꞌo,
haeamona kauhuniꞌo rama haeai haukia herekiai.
18 Mahakia kobanoꞌanakia wapurai koba kabanainakia katemai ea,
ba Satani ena hiabuai katekabanai katemai Tirama herena,
weiana kate aꞌikakaumanaꞌu ekia kiꞌa ihina hao mai ekia ꞌeka kateaꞌina Tirama ena maearima robekia baiatakiai.’
Paulo Ena Aka Robana Eahuna.
19 “Obia ꞌarana haumu Agripa e,
kupai aia weiana aona hauna akaꞌai tohana.
20 Koriꞌuaina hanona weia Damasekoai,
haeamona Ierusalemai mai Iudea aiarakia ikoinai eaomo rama haeai haukia herekiai airoro aina kateraona kabe katemue Tirama herenai,
aka namokia katebabainakia weiana ia aba teraona kabe haukia katebatohanakia.
21 Weiana buonai Iudea haukia marea robe aonai teaꞌinaꞌu,
ekia nuatae hanona kateahu ꞌarinaꞌu.
22 Au hanona Tirama ebarai toꞌonaꞌu emai mo bariu au wairamiai akoroti nabatohana,
maearima papakia ꞌao apaꞌuakia ikoikiai herekiai teihobo.
Au nahinana hauna hanona taba hamona mo mahabanai haukia mai Mose ia robana teahuna kerama hauna.
23 Keriso hanona kehaiara ba ꞌariai kemikiri ꞌuai,
Isaraela haukia mai rama haeai haukia ikoikiai herekiai ena bamauri eana kemaiaina.”
Paulo Agripa Ehina bena Keaꞌikakauma.
24 Paulo kipona pouna nehinana aonai Festo eio etibaha,
“Paulo e,
oi hanona aba nubeau ꞌari,
emu aotipa apaꞌuana ehore aba ebabeau ꞌariniꞌo.”
Paulo ia ehina bena etibaha,
25 “Festo Apaꞌuamu e,
au hanona aꞌi nabeauꞌari,
au nahina haukia hanona ꞌabi tohakia abomo mai anikia.
26 Au ahina ꞌabikia hanona obia ꞌarana hauna abomo neiakia eꞌiobi buonai au mai aoꞌu ikoinai naꞌabi.
Au aꞌiobina ia neiakia ikoikiai aba eaꞌi harainakia,
pokina taba neiakia hanona euaꞌa haiahaiai aꞌi terama.
27 Agripa Obia haumu e,
oi mahabanai haukia nubatohanakia?
Au aꞌiobina oi ia nubatohanakia.”
28 Agripa Paulo ehina bena etibaha,
“Rani papana neiana aonai oi nuraonana au Keriso ena maearima ai aba kobaonaꞌu,
ꞌu?”
29 Paulo eꞌabi etibaha,
“Rani ekoꞌo koꞌo ꞌao rani ehomaꞌa,
ia au Tirama nanoina,
oi ikupaiamu ahaꞌi,
ia aiaꞌu tuona haumi ikoimiai bariu beraura neianai hanona patomai au ꞌabanai patoao,
iamo heremiai tabiri hamona ṉahomana aꞌi nanuatae aina.”
30 Ba Obia ꞌarana hauna,
Kabana hauna,
Berenike mai weia temiati haukia ikoikiai temikiri,
31 ikaihuri weiana tehabona tekarahi,
ha ha teꞌabiꞌabi tetibaha,
“Hau neiana taba ha aꞌi ebabai kiꞌana weiana ia keꞌari ꞌao kewapura hauna aꞌi ebabaina.”
32 Agripa ehore Festo ehina bena etibaha,
“Hau neiana hanona pahabakarahina,
ia Kaisa mo atana ehinana uaꞌa kebakai.”