Paulo Aunohiai Tebaeheꞌauna Kateao Roma.
27
Weiakia ekia raona tebatohana ai hanona aunohi ai kataeao Italia,
ba Paulo mai wapura haukia baika hanona huari haukia hinabu ha neꞌimanakia hauna ha atana Iulio imanai teutanakia,
ia hanona obia ꞌarana Augusto ena huari hauna ha.
2 Ai Adramutio aunohina ha ai taeheꞌau ba Asia ꞌabirakia poekia katabeauna tabeau ahi,
Aristako Makedonia hauna weia Tesalonika ai emai hauna abomo ai baiatamai ai.
The Shipwreck (Iuhubeau 27:1–28:10)
3 Erani hanona Sidono ai tabeauꞌau,
ba weia hanona Iulio ena namo hoana Paulo herenai ebabaina ehabona keao ena hau herekia keihanakia ena nuatae tabakia reꞌa katebena.
4 ꞌEka weiana tahabona tabeau ahi mue ꞌakupakanai taeao Kupuro kereibua murinai tabeauna pokina baura wairamaiai emai paunai.
5 ꞌAkupaka ꞌabaeanai tabeauna Kilikia mai Pamfulia poekia tahabonakia taeao Lukia hanonai ꞌeka atana Mura ai tabeau ꞌau.
6 Weia hanona huari poki hauna weiana Alesanderea aunohina ha Italia niao hauna etabu ahina,
ba weia ebaehe banainamai.
7 Wapu boꞌona maharimahari tabeau ba mai aroꞌarimai taeao Kenido ai tabeau ꞌau.
Emai nuatae ꞌekana ṯabeau bena aonai baura wairamaiai emai paunai Salmone pauna tabeau banai tabeau taeao Krete kereibua bunianai.
8 Mai aroꞌarimai poe haiana tabeauna tamai ꞌeka ha atana ‘Ihoahoa Namoabuna’,
ꞌeka weiana mai Lasea aiarana baiatakia hanona aꞌi ehomaꞌa.
9 Wapu boꞌona hanona uaꞌa eore ba rani ena kiꞌai ꞌakuai beau hanona aba kekiꞌa kiꞌa baha pokina bariu Iuda haukia ekia ani robe ranina hanona aba ekabanai.
Ua buonai Paulo ebaꞌiobi baihanakia etibaha,
10 “Hau ikoimiai e,
au eka harima naihana bariu neia keao hanona aba kekiꞌa kiꞌa baha eka taba rarina hanona kate ꞌakauma aunohi keꞌitiꞌiti mai eka mauri abomo kahaneꞌenakia.”
11 Iamo huari poki hauna Paulo eꞌabi hanona aiana aꞌi ebatohana ia aunohi pokina hauna mai aunohi kapena hauna mo aiakia ekaꞌaina.
12 ꞌAmari rarina ꞌakina aunohi weia ketaiꞌau hanona emai miaho aꞌi kenamo,
ua buonai hau boꞌokia hanona tenuatae patabeau ahi mue ba petaina raninai Foenikia ai patabeau ꞌau ba ꞌamari rarina ranina hanona weia mo patamiaho.
Krete aonai ihoahoa weiana mo enamo pokina ahitaina tibotaina ohi baiatakia mai tototaina tibotaina ohi baiatakia taina ewairana.
Kou Eabuꞌau Emai.
13 Tibo baurana namona eabu raninai,
ia teraonana ekia nuatae baurana aba eabu ꞌau,
buonai toꞌo teberi ꞌauna ba Krete poena haiahaiana tabeauna taeao.
14 Iamo tabeau ahi homaꞌana ahaꞌi hanona baura taburana ꞌakina atana Kou hanona kereibua tainai eabu ꞌau emai.
15 Kou weiana aunohi etabu ahina raninai,
aunohi Kou ketarina hanona aꞌi etai ꞌapuana,
ua buonai taꞌi ꞌororo ia baura mo eabunamai taeao.
16 Kereibua papana ha atana Kauda abirana ahitainai taru banai raninai,
taiꞌoro papana tatabu ahina,
emai ꞌepi tabiri ꞌauna aonai aroꞌari takaiai haraina.
17 Ba ia weiakia ꞌepi teberi ꞌauna raninai ꞌanaua baika aunohi baꞌanai teberi banainakia tebiri ꞌininakia,
weiana Libia poenai bauru ai aꞌi metoto taꞌuna parae teba ririnakia mai toꞌo taneꞌena,
ba aunohi earu eao.
18 Kou kiꞌa obona hanona ekai ꞌinina eao wapu ibaruanai hanona maearima ekia taba baika tekapo uhunakia.
19 Haeamona eao wapu ibaihaunai hanona aunohi tabana tohakia tekapokapo uhunakia.
20 Wapu boꞌona aokiai beraura mai bihiu ha aꞌi taihana mai Kou pahihina eabu aꞌi epua ꞌapua,
emai raona eore taraonana aꞌi katamauri.
21 Hau ikoikiai aꞌi teaniani ꞌapua rani ehomaꞌa kiꞌa murinai Paulo wairakiai ekoroti eꞌabi etibaha,
“Hau ikoimiai e,
wai au aiaꞌu patona Krete ai aꞌi pahabeau ahi raninai,
kiꞌa neiana aꞌi pahatabu ahina taba ha aꞌi pekiꞌa mai taba ha aꞌi pahaba ꞌakaumana.
22 Ia bariu au wai nanoinimi,
aomi katoba taburanakia,
pokina neia hau ha ena mauri aꞌi keꞌakauma,
ia aunohi kiponamo keꞌakauma.
23 Pokina warani rabi eꞌu Tirama nakuti aina hauna ena aneru euhuna emai hereꞌuai ekoroti,
24 ba eꞌabi etibaha,
‘Paulo e,
aꞌi kotaꞌu.
Oi hanona Kaisa wairanai kokoroti kobakai,
Tirama ena banamo oi heremuai paunai maearima naiakia aunohiai toeheꞌau haukia ikoikiai katemauri.’
25 Ua buonai hau ikoimiai aomi katoba taburanakia,
au hanona Tirama nabatohana ia ehina benaꞌu ihobonai kebabaina.
26 Iamo aika hanona kaharu kahaeao kereibua ha ai kahabure ꞌau.”
27 Wapu ibaharau haea banina rabinai ai hanona Adria ꞌakupakai tabure ohomo.
Wapukaꞌa ibuanai aunohi haukia weiana tebabataina hanopaka aba tabarina.
28 Buonai ꞌanaua tebaririna roio ena ꞌoura tehobona hanona roba harau rua,
tamiaho ꞌapua homaꞌana ahaꞌi haeamona ꞌoura tehobo muena hanona aba emue roba harau haea ima.
29 Weia aunohi haukia tetaꞌu emai aunohi piharai aꞌi meahu ꞌauna paunai toꞌo bani tebaririnakia,
ba tenuatae perani biai.
30 Aunohi ai tiaka haukia tenuatae katebeau ꞌakauma,
ꞌepi ha tebaririna ba tebaiꞌoi matoha aunohi paunai toꞌo baika katebaririnakia.
31 Aonai Paulo huari haukia mai ekia poki hauna ehina benakia etibaha,
“Hau neiakia aunohi ahanai aꞌi katemiaho raninai wai hanona aꞌi katomauri.”
32 Ua buonai huari haukia ꞌepi warona tekabe hurina ba tehabona eꞌeho roioai earu ahina.
33 Aba kerani aonai,
Paulo ikoikiai enoinakia aniani ha kateana ba eꞌabi etibaha,
“Bariu wapu harau haea bani aba teao wai hanona tobaiꞌima tomiaho mo taba ha aꞌi toana.
34 Bariu hana nanoinimi aniani baika katoani,
katoaniani hanona mauri katoaꞌina.
ꞌAramiai bui ha hamona aꞌi keꞌakauma.”
35 Neiana ehinana murinai,
Paulo parawa baika eaꞌinakia ia ikoikiai wairakiai banamo ꞌabina Tirama herenai ehinana murinai ehobina eani ramana.
36 Ikoikiai aokia ebataburanakia kipokia abomo aniani teani.
37 Aunohiai taeheꞌau haumai ikoinai hanona hinabu rua imabui harau rua ꞌabaihau (276).
38 Ikoikiai teaniani eao teani ꞌari harai raninai aunohi katebaꞌama ꞌamana hanona aniani tekapo kapo uhunakia ꞌakuai.
Aunohi Epaꞌa.
39 Rani ererena aonai,
hano teihana ia ꞌeka tabana aꞌi teꞌiobina,
iamo aopaka ha poe namona teihana,
ba aokia teaꞌiaꞌi haraina aunohi hanona poe weianai patebahaha ꞌauna.
40 Toꞌo warokia tekabe hurinakia,
toꞌo tehabonakia ꞌakuai hari warona tebatataenakia ba parae teberi taeana baura kehao uta kateao poeai katebahaha ꞌau.
41 Ia aunohi hanona rema ai ebamiaꞌauna wairana hanona eahu toꞌona aꞌi eibiuibiu ꞌapua,
aonai roio apaꞌuakia tehore aunohi murina teahu ꞌitiꞌitina.
42 Huari haukia ekia raona hanona wapura haukia kateahu ꞌarinakia pokina aꞌi temenaꞌu ꞌau aꞌi temebeau ꞌakaumana paunai.
43 Ia huari haukia ekia poki hauna enuatae Paulo kebamaurina paunai huari haukia ekia raona akana katebabaina hauna ekaiabuna.
Ba ehina benakia naꞌu teꞌiobina haukia katerobo uhu ꞌuai katenaꞌu kateao poe.
44 Ia harina maikoina hanona aunohi bahana puapuakia teaꞌi baika aunohi tabana papakia teaꞌi tenaꞌu.
Eṉa tebabai aiho hanona ikoikiai poeai tekaraꞌau mai namokia.