Paulo Melita Kereibuanai Ekaraꞌau.
28
Ikoimaiai namomai poeai takoroti raninai taꞌiobina kereibua weiana atana hanona Melita.
2 Kereibua weiana haukia terabo harai heremaiai.
Abara etibo mai ꞌama rarina buonai ia iruba tebaꞌarana ikoimai haumai ehiabu teaꞌi taeanamai.
3 Paulo matiu mai iꞌakena eaꞌina iruba ahanai ehore ꞌauna,
ꞌerau iruba hiabuna eonobaina hanona erobo ahi Paulo imanai eꞌuri toꞌo ekapa oreore.
4 Kereibua weiana haukia ꞌerau Paulo imanai teihana raninai ha ha teꞌabi tetibaha,
“Paꞌe hau neiana hanona ahuahu hauna,
ꞌakuai aꞌi eꞌari maurinai ekaraꞌau,
bariu neiana erama hanona ena beho ꞌarana.”
5 ꞌA Paulo ehore imanai ꞌerau weiana ebaure obona eao iruba aonai eꞌeho,
ia haiara ha aꞌi eonobaina.
6 Maearima weia haukia teraonana imana kebua ꞌao kebataꞌu keꞌeho keꞌari,
ia tebaiꞌima rani ehomaꞌa ia herenai taba ha aꞌi erama,
ba aokia tebahaeaina tetibaha,
“Ia tirama mo ha.”
7 Ia temiaho herena tainai uaꞌa hanona kereibua obiana hauna atana Pubilio ena ꞌeka,
mai aonamona ebakaraꞌaunamai ena ituai,
ba wapu aihau ai hanona ia ena baki haumai eꞌima harainamai.
8 Weiana Pubilio hamana hanona enoti itu aonai,
ena inawa hanona hau hiabu mai meꞌimeꞌi,
Paulo eao ena ikaihuri aonai etoto ahanai ebahubaꞌari,
imana ia ahanai ehao ꞌau ena inawa enamo.
9 Hoa weiana erama murinai inawa maearimakia kereibua weiana aonai haukia ikoikiai temai ba eba namonakia.
10 Temariki ainamai taeara haeaihaeai ai tebanamonamai,
abomo katabeau ahi raninai taearai tanuatae ainakia tabakia ikoikiai hanona teuta ꞌaunakia.
Paulo Romai Ekaraꞌau.
11 Nawa aihau murikiai ai hanona Alesanderea aunohinai taehe ꞌau tabeau ahi ꞌakupakai.
Aunohi atana hanona ‘Baiꞌapaea’,
weiana hanona ꞌama rarinai kereibuai weia etaiꞌau emiaho.
12 Surakuse ai takaraꞌau,
weia tamiaho wapu aihau.
13 Weia emai parae takaina tabeau ahi taeao Regio ai tabahaha ꞌau,
erani hanona baruru eabu,
ba tabeau ahi wapu ibaruanai hanona ai Puteoli ai tabeau ꞌau.
14 Weia uahoꞌabaka baika tatabu ahinakia,
tebakaꞌanamai taeao herekiai tamiaho hui hamomo,
weia tamikiri hanona taeao Roma.
15 Uahoꞌabaka baika weia poumai teona hanona temai mo aiara baika wairai atakia ‘Apio kawakawa ꞌekana’ mai ‘Pariki aihau’ hanona weia kipokia tabaitabu ahi.
Paulo hau neiakia eihanakia raninai Tirama ebanamona abomo aona ekiro.
16 Roma ai takaraꞌau raninai Paulo hanona ikupaiana ena ꞌeka teba haeaina,
huari hauna ha ia keꞌimana.
Paulo Romai Pou Namona Eiroro aina.
17 Wapu aihau teore murikiai Paulo ehore Iuda teꞌuai aina haukia eaparinakia tetoꞌu aonai,
Paulo emikiri eꞌabi etibaha,
“Uahoꞌabaꞌu ikoimiai,
au eka maearima aꞌi mo abareana ꞌao ꞌabaꞌabaka ekia hoahoa aꞌi mo abakai hurina,
ia au hanona weia Ierusalema ai ia tebirinaꞌu Roma haukia imakiai teutanaꞌu.
18 Roma haukia tebakainaꞌu ekia nuatae kateba karahinaꞌu pokina kiꞌa ha aꞌi tetabu ahina weia au kaꞌari.
19 Ia Iuda haukia bakai ena ꞌabi tebakiꞌa,
au hanona tebahi ahinaꞌu mo Kaisa atana ahinana,
wairanai kakoroti kabakai ṉaho.
ꞌA au eꞌu maearima kahinahina ainakia hanona ahaꞌi.
20 Neiana paunai au aparinimi kaihanimi mai kipokia kahaꞌabiꞌabi.
Isaraela maearimakia ia ṯebuabena hauna buonai tabiri neiana au ahaꞌuai.”
21 Ia ena ꞌabi tebamuena tetibaha,
“Oi ꞌabimu marerena weia Iudea ai ha aꞌi emai aꞌi tatabu ahina,
ꞌao uahoꞌabaka abomo uaꞌa ha ꞌabi aꞌi emaiaina ꞌao oi emu babai kiꞌa obona ha pouna aꞌi ehinana.
22 Bariu ai hanona ṯanuatae oi emu raona ꞌabina kohinana aiamu kataona,
pokina ai taꞌiobina oi aꞌitoꞌu naiana nubabaina hauna eka maikoina maearima aꞌi ṯenuatae aina.”
23 Ba Paulo mai toꞌu haukia kipokia wapu ha tebaꞌoruna,
wapu weiana etaina hanona maearima boꞌona teraꞌa temai Paulo nemiaho ꞌekanai tetoꞌu mo raurani eaomo erabi.
Paulo ehore Tirama ena obia aiarana hauna robana eahuna maearima herekiai mai Iesu pouna Puka robenai tererena hauna ebaꞌiobi aina Mose ena rauhubu pukakia aokiai mai mahabanai haukia ekia pukakiai.
24 Maearima baika ena ꞌabi teona hanona aokia eaoaina,
ꞌa baika hanona ena ꞌabi aꞌi teaꞌi taeana.
25 Aokia aꞌi ehamona kateraꞌa,
ekia raꞌai Paulo ꞌabi hamona neiana ehinana eꞌabi etibaha,
“Auba Robe Isaia mahabanai hauna pinana hama ehina harai kiꞌa bahana ꞌabaꞌabami herekiai etibaha,
26 ‘Moao maearima neiakia
herekiai kotibaha,
Aia neiana katoꞌo oꞌo bena
ia obona aꞌi katobo,
katoihaiha bena
ia aꞌi katoiha tinana.
27 Pokina uru neiana haukia aokia
hanona tetubu abu haiakia
hanona tepoꞌo,
mahakia teꞌiau.
Ua aꞌi katehoma raninai,
mahakiai kateihana,
haiakiai kateona,
aokia kateꞌiobi,
kateraona kabe
katekabe katemai hereꞌu
au mauri kabenakia.’ Isa 6.9, 10
28 Ua buonai katoꞌiobi haraina,
Tirama ena bamauri ꞌabina hanona aba euhuna rama haeai haukia herekia,
ia kateona.”
29 (Paulo ua eꞌabi aiho murinai Iuda haukia terama otaraina,
ꞌa ikoikiai ꞌabi weiana kipokia tebaiara aina.)
30 Paulo ihau maikoikia rua weia emiaho,
itu emiaho aina hauna kipona ꞌarana ehorena,
herena temai kateihana haukia eaꞌi taeanakia.
31 Ia Tirama ena obia aiarana ꞌabina eiroro aina mai Obiapaka Iesu Keriso pouna ebaꞌiobi aina mai taburana,
hau ha aꞌi ekaiabuna.