Paulo Ebeau Ahi Keao Ierusalema.
21
Ia herekiai haparua tahinana murinai,
aunohi ai tabeau ahi beromaiai taeao Koso,
rani ibaruanai takabanai taeao Rodo ba taeao Patara ai takaraꞌau.
2 Weia aunohi ha Foenikia keao hauna tatabu ahina ba taeheꞌau tabeau ahi.
3 Ba Kupuro kereibuana ahitainai tabeau banai kataeao Suria aonai,
Turo ai tabahahaꞌau weia aunohi kohuna katetaranakia.
4 Aꞌikakauma haukia baika weia tatabu ahinakia kipokia hui hamona tamiaho.
Ia Auba Robe ena hiabuai Paulo tehina bena Ierusalema aꞌi keao.
5 Ia emai miaho beraurana eore aonai,
tahabonakia takaꞌa.
Aꞌikakauma haukia ikoinai atawakia mai nahukia kipokia teꞌabanamai takarahi aiara murinai,
weia poeai takaipehu tabahubaꞌari.
6 Ha ha kipokia haparua tahinana murinai takaraꞌau aunohiai taeheꞌau,
ba ia temue ekia aiara teao.
Mahabanai Hauna Agabo Emahabanai Paulo ꞌEuna.
7 Turo ai beromaiai tabeau taeao Tolemaia ai takaraꞌau,
aꞌikakauma haukia kipokia tabaitabu ahi ba wapu hamona weia kipokia tamiaho.
8 Erani weia tahabona taeao Kaisarea ai takaraꞌau.
Ebaneria hauna Pilipo ena itu ai tamiaho,
ia hanona diakono haukia ꞌabaihau hamomo ꞌabakia ha.
9 Ia nahuna uahokia bani hanona mahabanai uahokia.
10 Weia tamiaho wapu baika teore murinai mahabanai hauna ha atana Agabo Iudea ai emai.
11 Ia emai heremaiai hanona Paulo huana ihaina eaꞌina kipona imana mai aena ebirinakia eꞌabi etibaha,
“Auba Robe eꞌabi,
Ierusalemai Iuda haukia katehore ihai neiana pokina hauna ṉa katebiri aihona rama haeai haukia katebenakia.”
12 ꞌUru neiana taona raninai,
ai mai maearima weia haukia kipokia Paulo tanoina aꞌi keao Ierusalema.
13 Ba Paulo ai emai ꞌabi ebamuena etibaha,
“Taba buonai tuhai aoꞌu tubaꞌabeꞌabena?
Au hana aba abaꞌoru,
ia Ierusalemai katebirinaꞌu ꞌao kateahu ꞌarinaꞌu reꞌa Obiapaka Iesu atanai.”
14 Ia aiamai aꞌi eaꞌi taeana paunai tahabona ba tatibaha,
“Obiapaka ena nuatae hanona merama.”
Paulo Ekaraꞌau Ierusalema.
15 Neiana murinai,
wapu baika teore ba tabaꞌoru ba takarahi kataeao Ierusalema.
16 Aꞌikakauma haukia baika Kaisareai teꞌabanamai taeao Nasona ena itu ai weia katamiaho.
Ia hanona Kupuro hauna abomo aꞌikakauma hauna ha ꞌaiꞌaina.
17 Ierusalemai takaraꞌau raninai,
uahoꞌabaka teba katotonamai mai aonamokia.
18 Erani hanona Paulo kipokia taeao Iesu hatina Iakobo kataihana,
weia marea ena kiro haukia ikoinai abomo tewaira tina.
19 Paulo ia imakia eaꞌinakia murinai,
ia ena aka aonai Tirama taba ebabai rama haeai haukia herekiai haukia ikoikiai poukia ehinanakia.
Hau Apaꞌuakia Paulo Tehina bena Keao Marea Robe.
20 ꞌAbi neiana teona raninai Tirama tebanamona.
Weiana ia Paulo haianai teꞌabi tetibaha,
“Uahoꞌabamai e,
aba oꞌiobina Iuda haukia boꞌokia tiaꞌikakauma,
ia haukia ikoikiai Mose ena rauhubu iaꞌitaeana hanona tiraona apaꞌuana.
21 Ia Iuda haukia neiakia hanona pou baiꞌoina ṉahomana teona,
Iuda haukia rama haeai haukia baiatakiai ṯemiaho haukia ohina benakia Mose ena rauhubu herenai katekapare,
miorikia aꞌi katetarenakia,
haeamona Iuda haukia ekia hoa hoa aꞌi katekaꞌaina.
22 Ia aba poumu kateona oi hanona omai.
Bariu aea kahababai aiho?
23 Ua buonai katahina beniꞌo akana kobabaina.
Emai maearima bani hanona Tirama wairanai ekia ꞌabiꞌuai aba tehorotina.
24 Maearima neiakia koaoainakia ekia ꞌopu iaꞌiobona toꞌuna aonai,
ekia toꞌu ꞌarakia kohorenakia buikia katekabe obonakia.
Weiana maearima ikoinai kateꞌiobina ꞌabi weiakia oi ahamuai tehina haukia hanona tohakia ahaꞌi,
ia oi hanona Mose ena rauhubu tainai nomiaho.
25 Rama haeai haukia weiakia bariu tiaꞌikakauma haukia herekiai hanona emai raona taraonana hauna marere ai aba tarerena tatiu ahina taba ꞌiobinakia,
weiana aniani tibaibeni tirama baiꞌoikia herekiai haukia aꞌi kateani,
haeamona mahi tiaruaru haukia aꞌi kateani,
mahi ꞌakokiai tetoꞌo ꞌari haukia aꞌi kateani,
mai aꞌi katenabau ꞌabaea nabau ꞌabaea.”
26 Erani Paulo maearima neiakia bani ebakaꞌanakia kipokia teao ꞌopu iaꞌiobona toꞌuna aonai tetoto,
ba eao marea robe aonai etoto ebaꞌiobinakia rani tabanai hanona ꞌopu iaꞌiobona akana ranina keore,
haeamona wapu ha ha kipokia ekia baibeni katebabai.
Iuda Haukia Marea Robeai Paulo Teaꞌi ꞌInina.
27 Wapu ꞌabaihau hamomo aka weiana aba keore aonai,
Iuda haukia baika Asia hanonai temai haukia Paulo marea robe aonai teihana raninai,
ia mako tebahi ahinakia Paulo teaꞌina,
28 teio tetibaha,
“Isaraela haumi e,
tomobarainamai!
Hau neiana hanona ꞌeka ikoikiai aokiai ena baꞌiobi maearima ikoinai herekiai eka maearima mai Mose ena rauhubu mai marea robe neiana niꞌoatanakia,
abomo bariu hanona rama haeai haukia nimaiainakia marea robe ai ꞌeka robena neiana tibaꞌopuna.”
29 Ua teꞌabi aiho pokina ꞌuainai Paulo Trofimo Epeso hauna ohi Ierusalema aiarana aonai temiaho teihanakia,
ba teraonana ebakaꞌana eaoaina marea robe aonai.
30 ꞌAbi neianai aiara maikoina ꞌuriꞌuri rarina ebaramana maearima taeara haeai haeaiai tebeau temai Paulo teaꞌina teberi karakarana marea robe ai tekarahiaina,
murinai marea robe paꞌabina tekaiabuna.
Roma Huari Haukia Paulo Teaꞌina.
31 Paulo iahuꞌarina akana tibabaina aonai pouna eao Roma ekia huari poki hauna eona Ierusalema maearimakia atetua rarina tibabaina.
32 Beronai huari ṯeꞌuai aina haukia mai huari haukia eaoainakia tebeau toꞌu tekokina.
Maearima weiakia huari poki hauna mai ena huari haukia teihanakia raninai Paulo iahunai teꞌoro ꞌabaea.
33 Huari poki hauna ekaꞌa eao Paulo eaꞌina,
ba ena ꞌabiai tabiri rua ai tebirina.
Weiana ebakainakia ia hanona tai haeamona taba ebabaina.
34 Toꞌu ranina aonai maearima baika teio ꞌabi haeai tehina haeamona baika ꞌabi haeai mo tehina,
weiana ꞌuriꞌuri rarina ꞌakina tebabuana buonai,
huari poki hauna ꞌabi tohana haꞌi eona hanona eꞌabi Paulo katebakaꞌana kateaoaina huari haukia ekia miaho ꞌekana.
35 Paulo tebakaꞌana itataea ai eheꞌau raninai toꞌu haukia teaibara kiꞌa baha buonai,
huari haukia tehore Paulo tebuana teao.
36 Mako ia murinai teao haukia mai ioiokia teꞌabi tetibaha,
“Tomoahu ꞌarina!”
Paulo Toꞌu Wairanai Ena Pou Ehinana.
37 Huari haukia Paulo aba ekia parabuai katebakatotona aonai Paulo huari poki hauna enoina etibaha,
“Penamo haiamuai eꞌu ꞌabi ha pahinana.”
Ba huari poki hauna ebakai bakai etibaha,
“Oi Helene maeana ona, u?
38 Oi Aigupito haumu weiamu atetua obaramana ahuahu haukia ikoinai taha bani (4,000) obatoꞌunakia obakaꞌanakia toao hanoꞌakunai,
ꞌu?”
39 Paulo ia ena ꞌabi ebamuena etibaha,
“Ahaꞌi.
Au hanona Iuda hauꞌu,
Kilikia hanona Taso ai arama,
aiara apaꞌuana weiana maearimaꞌu.
Nanoiniꞌo,
maearima neiakia pahina benakia.”
40 Huari poki hauna Paulo bero ebena keꞌabi,
ba Paulo itataeai eheꞌau imana eaꞌi taea maearima kateunu.
Toꞌu ꞌuriꞌuri tebapuana raninai,
Paulo Heberu maeanai ehina benakia.