Paulo Eao Makedonia Mai Helene.
20
Atetua eore murinai,
Paulo ebaiuhu aꞌikakauma haukia temai herena,
aokia ebataburanakia ba haparua ehinana ehabonakia eao Makedonia.
2 ꞌEka weiakia haeai haeai aokiai ꞌabi boꞌokiai aꞌikakauma haukia ebataburanakia ba Helene ai ekaraꞌau.
3 Nawa aihau weia Helene ai emiaho,
ebaꞌoru aunohiai keheꞌau Suria keao aonai Iuda haukia baika terobahu kateahu ꞌarina pouna eona,
buonai Paulo haeamona eraonana Makedonia kekabanai keao Suria.
4 Maearima kateꞌabana haukia hanona neiakia.
Puro nahuna Sopatere ia hanona Berea hauna,
Aristako mai Sekundo ia hanona Tesalonika haukia,
Gaio Derebe hauna,
Tukiko mai Trofimo ia hanona Asia haukia,
mai Timoteo.
5 Maearima neiakia teꞌuai teao Toroa ai tebaiꞌima.
6 Parawa ꞌabaeana tatuna murinai Pilipo ai aunohiai tabeau ahi wapu ima murinai weia Toroa ai tabaitabu ahi.
Weia hui hamona tamiaho.
Toroai Paulo Eutuko Ebamauri maurina.
7 Hui weianai wapu koriꞌuaina aonai ikoimaiai tamiatoꞌu parawa robena katana.
Paulo toꞌu haukia ebaꞌabi ꞌabinakia eaomo wapukaꞌa,
pokina kerani hanona ia kehabonakia.
8 Ai ikoimaiai hanona ikaihuri ha ꞌubiai hauna aonai taꞌabiꞌabi,
ikaihuri weiana aonai hanona lamepa boꞌona teꞌara.
9 Hau ꞌaruꞌaruna ha atana Eutuko hanona weia riba ahi ꞌekanai emiati.
Paulo eꞌabiꞌabi homaꞌana aonai,
Eutuko hanona eparua rea itu weiana itarana ibaihauna ꞌubiai haunai eꞌeho eao ꞌano.
Teaꞌitaeana hanona aba eꞌari.
10 Paulo eriri eao Eutuko ahanai enoꞌau imana huanai eraꞌu huri,
eꞌabi etibaha,
“Aomi aꞌi kearoꞌari ia hanona mauri maurina nemiaho.”
11 Ba Paulo ekaraꞌau mue eao itu ꞌubinai Parawa ehobina teani.
Eꞌabiꞌabi homaꞌa herekiai eaomo raurani ꞌamari ꞌamarinai,
ba ekaꞌa.
12 Hau ꞌaruꞌaruna mai mauri maurina teaoaina aiara buonai aokia etabura kiꞌa.
Toroa Tehabona Tebeau Ahi Teao Mileto.
13 Paulo eꞌabi ia hanona aenai keao Aso paunai,
ena ꞌabi taꞌi taeana ai aunohi ai taeheꞌau tabeau taꞌuai taeao,
weia taꞌimana keheꞌau.
14 Ba Aso ai tabaitabu ahi aonai kipokia aunohiai taehe ꞌau taeao Mitulene.
15 Erani tabeau taeao Kioso kereibua haianai takaraꞌau ba wapu ibaruanai takabanai taeao Samo ba wapu ibaihaunai hanona Mileto ai takaraꞌau.
16 Paulo ena raona hanona Epeso katabeau banai,
aꞌi enuatae weia Asia hanonai aꞌi tamamiaho ꞌabaea,
pokina kenoanoa Pentekoste berauranai hanona Ierusalemai kekaraꞌau biai.
Paulo Baparua Irorona Ehinana Epeso Ena Marea Kiro Haukia Herekiai.
17 Weia Mileto ai Paulo ebaiuhu Epeso marea ena kiro haukia herekia katemai herena.
18 Ia tekaraꞌau aonai ehina benakia etibaha,
“Au wapu koriꞌuaina Asia hanonai akaraꞌau emai mo bariu beraura maikoina wai baiatamiai aea amiaho aiho hanona toꞌiobi haraina.
19 Iuda haukia baika ekia aibara tehobonakia hereꞌuai ranikiai,
mai ꞌaiaunuꞌu mahaꞌu mai beina Obiapaka ena aka ababaina.
20 Wai aba toꞌiobina ibaraimi ꞌekakiai hanona eꞌu iroro ai mai eꞌu baꞌiobi ai toꞌu wairakiai mai itu ha ha aokiai,
ha aꞌi ahore bunina.
21 Au Iuda haukia mai Helene haukia herekiai ahina karahi haraina ia kateraona kabe kateao Tirama herena eka Obiapaka Iesu kate aꞌikakaumana.
22 Bariu hanona Auba Robe aiana ikaꞌainai kaeao Ierusalema,
ia aꞌi naꞌiobina weia taba hereꞌuai kerama.
23 Au aꞌiobina hana aiara ha ha aokiai Auba Robe ehina benaꞌu atetua pahihina mai wapura hanona wairaꞌuai nimai.
24 Iamo kipoꞌu eꞌu mauri ena namo aꞌi natabuna,
ia au nanuatae eꞌu mauri orenai hanona Obiapaka Iesu aka ebenaꞌu hauna kabaore haraina,
aka weiana hanona Tirama ena aokoꞌo hoana pouna namona kahina karahina.
25 “Ikoimiai baiatamiai akabanai kabanai Tirama ena obia aiarana airoro aina,
bariu aꞌiobina wai hanona au aꞌi katoiha muenaꞌu.
26 Ua buonai bariu wairamiai nahina karahina hau ha keꞌari kiꞌa ꞌekana keao hanona behona aꞌi kaꞌarana.
27 Pokina Tirama ena nuatae maikoina aba airoro aina heremi taba ha aꞌi abunina.
28 Kipomi katoiha ꞌini harainimi mai aꞌikakauma haukia katoꞌima harainakia matoha mamoe iꞌimana hauna mamoe neꞌima harainakia ꞌabana.
Auba Robe aka weiana ebenimi Tirama ena marea haukia ibakaꞌa haraikia haumiai ebaonimi,
weiakia hanona Tirama Nahuna ena ꞌariai aba ekawanakia.
29 Aꞌiobina kahabonimi murinai,
baꞌiobi haukia baiꞌoikia baika waeha ꞌaki aiahukia ꞌabakia katemai baiatamiai aꞌikakauma haukia weiakia mamoe ꞌabakia kateaꞌi kiꞌanakia.
30 Abomo maearima baika kipokia tuaka haeamo haukia katemikiri baiꞌoi ꞌabikiai aꞌikakauma haukia baika katebahureanakia kateba kaparenakia ia murikiai katekaꞌa.
31 Ua buonai katoꞌima harainimi,
rani ikoinai katoraona ꞌinina ihau aihau aonai mahaꞌu mai beina rabi mai mararani wai ikoimiai ha ha abaꞌiobinimi aꞌi aꞌoro ꞌapua.
32 “Bariu wai Tirama imanai mai ena aokoꞌo hoana ꞌabinai nahorotinimi,
ꞌabi weiana hanona ikoimiai kebakori ꞌininimi mai hiabuna Tirama ena banamo kebenimi ena maearima robekia ikoikiai ha ha ꞌeukia kebenakia ihobonai.
33 Au baiatamiai aonai hau ha ena moni ꞌao habuni ha aꞌi anuataeai ꞌabaeana.
34 Wai kipomi aba toꞌiobina au iꞌabaꞌu haukia mai au eꞌu nuatae tabakia ikoikiai hanona imaꞌu neiakiai mo ababainakia.
35 Au taba maikoina aba abaihanimi taeara neianai wai abomo katoaka tabura haukia teꞌabeꞌabe haukia katobarainakia,
Obiapaka Iesu ꞌabi ehinana hauna katoraona ꞌinina ṉa eꞌabi aiho,
‘Baibeni hanona ena namo eapaꞌua ba iaꞌina hanona ena namo ekoꞌikoꞌi.’”