Paulo, Epesoai Eiroro.
19
Apolo Korintoai emiaho oho aonai,
Paulo hanona Asia hanona oeokia ibuakiai ekabanai eao Epeso.
Weia aꞌikakauma haukia baika kipokia tebaitabu ahi.
2 Paulo ebakainakia etibaha,
“Toaꞌikakauma aonai Auba Robe emai heremi,
ꞌao?”
Ia teꞌabi,
“Ahaꞌi.
Ai hanona Auba Robe ꞌabina uruna ha aꞌi tao ꞌapuana.”
3 Ba ia ebakai muenakia etibaha,
“Baꞌuere robe tabanai tebaꞌuere robenimi?”
Ia teꞌabi tetibaha,
“Baꞌuere robe weiana Ioane eꞌuahina haunai tebaꞌuere robenamai.”
4 Paulo eꞌabi etibaha,
“Ioane ena baꞌuere robe hanona raona kabe hoana.
Ioane maearima ehina benakia ia murinai nimai hauna kate aꞌikakaumana,
weiana hanona Iesu.”
5 ꞌAbi weiana teona raninai Obiapaka Iesu atanai tebaꞌuere robenakia.
6 Paulo imana ahakiai ehaoꞌau aonai Auba Robe eriri ahakiai,
ba temikiri maea haeai haeaiai teꞌabiꞌabi haeamona temahabanai Tirama pouna tehinana.
7 Maearima weia haukia ikoinai hanona harau haea rua ꞌabana.
8 Nawa aihau aonai Paulo eao Iuda haukia ekia mareai maearima herekiai mai taburana eꞌabi ꞌabi Tirama ena obia aiarana pouna ebaꞌiobinakia aokiai kebakabanaina paunai.
9 Ia maearima baika hanona aokia teba pahihinakia aꞌi teaꞌikakauma haeamona toꞌu wairakiai ꞌabi kiꞌa obokia tehina baꞌiobi neiana Iesu kateaꞌikakauma taearana herenai.
Ua buonai Paulo maearima weiakia ehabonakia,
ia aꞌikakauma haukia mo ebakaꞌanakia teao Turano ena marere ituna aonai uaꞌa rani ikoinai eba marerenakia.
10 Ihau rua hanona weia ebamarere,
weiana Iuda haukia mai Helene haukia Asia hanonai ṯemiaho haukia maikoinai Obiapaka ena ꞌabi pouna teona.
Skeba Nahuna Auba Kiꞌa Obona Tebahobona.
11 Tirama ehore Paulo hiabu ebena hoa haeai ꞌakikia ebabai.
12 Maearima Paulo ena muko mai ena habuni ihai hauaninai temiaho haukia teaoainakia inawa haukia ahakiai tehore ꞌau hanona ekia inawa tenamo abomo aokiai auba kiꞌa obokia tekarahi.
13 Iuda haukia baika ekia aka hanona mea,
ia aiara aokiai tekabanai kabanai Obiapaka Iesu atana tehinana tebahobona auba kiꞌa obokia kateba karahinakia.
Ṉa tehinabe aihonakia,
“Iesu weiana pouna Paulo neiroro aina hauna atanai nahinabe pahihiniꞌo.
Mokarahi!”
14 Iuda haukia ekia robe hauna apaꞌuana Skeba nahuna ꞌabaihau hamomo hanona aka neiana tebabaina.
15 Rani ha auba kiꞌa obona ekia ꞌabi ebamuena etibaha,
“Au Iesu aꞌiobina,
Paulo abomo aꞌiobina.
Ia wai hanona tai?”
16 Ba hau weiana aonai auba kiꞌa obona nemiaho hauna erobo taea hau weiakia ebaꞌehonakia,
ia etabura kiꞌa baha buonai,
eahu kiꞌanakia,
ena ituai tebeau ahi mai haukia abomo mai maniꞌakia.
17 Iuda mai Helene maearimakia Epesoai ṯemiaho haukia pou neiana teona raninai ikoinai tetaꞌu kiꞌa,
ba Iesu Obiapaka atana tebanamona ꞌubi tohanai.
18 Tirama teaꞌikakaumana haukia boꞌona temai ekia kiꞌa tebabai haukia tehina pounakia.
19 Weia nepu haukia boꞌona ekia mea pukakia temaiainakia,
maearima wairakiai tehuhunakia.
Puka weiakia ꞌarakia tebahuna hanona taha imabui (50,000) Kinaa ꞌabana.
20 Taeara neianai hanona Obiapaka ena ꞌabi erama otaraina haeamona etabura hao tabura hao.
Paulo Aona Eaꞌiaꞌi Haraina Keao Ierusalema.
21 Taba neiakia ikoikiai terama murinai Paulo aona eaꞌiaꞌi haraina enuatae Makedonia mai Akaia hanokiai kekabanai keao Ierusalema.
Ia kipona eꞌabi etibaha,
“Kaeao ꞌuai weia,
ba muriai hanona kaeao Roma abomo kaihana.”
22 Paulo ena baraibarai haukia rua Timoteo mai Erasto euhunakia teꞌuai teao Makedonia,
ia Paulo hanona rani papana weia Asiai emiaho ꞌapua.
Epesoai Atetua Rarina Erama.
23 Rani weianai Obiapaka ena taeara paunai atetua rarina Epesoai erama.
24 Hau ha weia atana Demeterio ia hanona silba akana ebabaina,
ena aka haukia tehore tirama babiꞌena Atemi ena itu silbai temakanakia,
aka weianai moni boꞌona teaꞌinakia.
25 Rani ha Demeterio ehore ena aka haukia mai maearima baika aka ihobona tibabaina haukia eaparinakia temai ia herena,
ba ehina benakia etibaha,
“Eꞌu hau e,
wai toꞌiobina aika hanona aka neianai eka moni namokia nahatabu ahi.
26 ꞌA hau neiana Paulo hanona neia Epesoai mai Asia hanona maikoina aonai maearima boꞌona aokia nibakabanaina mai niba kaparenakia hanona aba toihana mai uruna tona,
ia niꞌabi tirama weiakia maearima imakia tibabainakia haukia hanona tirama tohakia ahaꞌi.
27 Wairai kiꞌa ha kerama eka aka neiana atana namona hauna keaꞌi kiꞌana,
ia tirama babiꞌena apaꞌuana Atemi ena marea mai ia kipona atana abomo keaꞌi kiꞌanakia.
Ia hanona Asia hanona maikoina aonai mai hanopaka maikoina aonai ṯekuti aina hauna ena apaꞌua aba keꞌakauma ꞌabaea.”
28 Maearima toꞌuna ꞌabi weiana teona raninai teopuere kiꞌa teio tetibaha,
“Epeso haumai emai tirama babiꞌena Atemi e,
oi hanona oapaꞌua kiꞌa baha!”
29 Aiara apaꞌuana aonai maearima maikoina teio raina temikiri Gaio mai Aristako teaꞌinakia.
Maearima neiakia terarua hanona Makedonia haukia Paulo kipokia tekaoao kaoao haukia,
maearima ikoinai ia teberinakia teaoainakia toꞌu ituna aonai.
30 Paulo ena nuatae kekarahi keao toꞌu haukia wairakiai,
ia aꞌikakauma haukia ia tekaiabuna.
31 Abonamo ꞌeka weianai poki haukia baika hanona Paulo ena ꞌiobi haukia,
ia ꞌabi teuhuna eao Paulo herena tebaꞌamena toꞌu ituna weiana aonai aꞌi kekatoto.
32 ꞌA toꞌu haukia taba katebabaina hanona aꞌi teꞌiobina,
maearima baika taba ha teioaina,
baika hanona taba haeai mo ha teioaina.
Iamo maearima boꞌona hanona aꞌi teꞌiobina taba buonai teao weia.
33 Iuda haukia baika hau atana Alesanda teaoaina maearima wairakiai tebakorotina.
Alesanda imana eaꞌi taeana toꞌu haukia ekia io tebapuana,
ba ia Iuda haukia beho aꞌi patehoaina maearima wairakiai kehinana.
34 Ia teꞌiobina Alesanda hanona Iuda hauna raninai,
teio mue ꞌabi hamonamo tehina toꞌona beraura hoana rua ꞌabana teio tetibaha,
“Epeso haumai emai Tirama babiꞌena Atemi e,
oi hanona oapaꞌua kiꞌa baha!”
35 Murinai aiara ena ꞌabi irerena hauna toꞌu haukia ehina benakia ꞌuriꞌuri katebapuana ba eꞌabi etibaha,
“Epeso haumi e,
hanopakai maearima ikoinai aba teꞌiobina Epeso hauka hanona tirama babiꞌena Atemi ena Marea mai ia aubaubana weiana kupai emai hauna nahaꞌimanakia.
36 Taba neiana hanona aꞌi kahabuniai aina hauna,
ua buonai ꞌuriꞌurimi mepua.
Haeamona noanoai taba ha aꞌi katobabai kiꞌana.
37 Maearima neiakia tomaiainakia haukia hanona marea tabakia ha aꞌi tebainaoaina,
haeamona eka tirama babiꞌena herenai ꞌabi kiꞌa obona ha aꞌi tehinana.
38 ꞌA Demeterio mai ena aka haukia kipokia ṯenuatae maearima ha beho ꞌekanai kate horotina reꞌa,
bakai ranikia hanona ṯemiaho mai bakai poki haukia abomo ṯemiaho,
ia katehore beho weiana katetabuna.
39 Taba ha nemiaho robana katoahuna raninai,
uaꞌa aiara haukia ekia toꞌu taearana tohanai katebaberona.
40 Poki haukia ꞌuriꞌuri neiana bariu nirama hauna paunai aika aꞌi temeba atetuanaka.
Ua kehoma raninai ekia ꞌabi kahaba muena taearana ahaꞌi,
pokina toꞌu neiana hanona ena bero ahaꞌi.”
41 Ia ꞌabi neiana ehinana murinai,
toꞌu haukia maikoina euhunakia terama otaraina.