Paulo Korintoai Eiroro.
18
Weiana murinai Paulo Atene aiarana ehabona eao Korinto aiarana.
2 Weia Iuda hauna ha atana Akula ohi tebaitabu ahi,
ia hanona Pontoai erama,
bariu tainai mo atawana Priskila ohi Italiai temai,
pokina rani weianai obia ꞌarana hauna atana Klaudio ꞌabi ebaibeni Iuda haukia ikoikiai Roma katehabona.
Paulo eao ia keihanakia,
3 weia kipokia temiaho mai teaka,
pokina ia hanona parae itukia etai hauna ia terarua ꞌabakia.
4 Paulo hanona beraura robe ikoikiai Iuda haukia ekia marea aonai pou namona ꞌabina terobahu aina pokina ena nuatae hana Iuda mai Helene haukia aokia keba kabanainakia kateaꞌikakauma.
5 Sila mai Timoteo Makedoniai temai murinai,
Paulo hanona rani ikoinai ꞌabi weiakia eiroro ainakia Iuda haukia wairakiai ehina pouna weiana Iesu hanona bamauri hauna Keriso.
6 Weiana ena ꞌabi teahu taeanakia mai herenai ꞌabi kiꞌa obokia tehina raninai eopuere ena habuni apurorokia eahu ahunakia,
ehina benakia etibaha,
“Wai katoꞌari raninai weiana hanona wai kipomi emi beho,
ꞌa au hanona behona aꞌi kaꞌarana.
Bariu rani neianai keaoaina aonai au hanona rama haeai haukia herekia kaeao.”
7 Ba marea ehabona eao rama haeai hauna ha atana Tito Iusto ena ituai uaꞌa kemiaho,
ia hana Tirama nekuti aina hauna,
mai ena itu hana marea herenai.
8 Marea poki hauna Kerisopo mai ena itu haukia kipokia Obiapaka teaꞌikakaumana haeamona Korinto haukia boꞌokia abomo Paulo ena iroro aiana teona raninai teaꞌikakauma mai tebaꞌuere robenakia.
9 Rabi ha aonai Obiapaka mahabanai ai Paulo ehina bena etibaha,
“Aꞌi kotaꞌu,
ia koꞌabi toꞌo baihana aꞌi kounu.
10 Pokina Au hana oi heremuai.
Tai ha oi aꞌi keaꞌi kiꞌaniꞌo.
Aiara apaꞌuana neiana aonai au eꞌu maearima hanona eboꞌo.”
11 Weiana buonai Paulo ihau hamona mai nawa ꞌabaihau weia emiaho Tirama ena ꞌabi maearima ebaꞌiobinakia.
12 Kabana hauna Galio Akaia hanona eiha ꞌinina aonai,
Iuda haukia temikiri haeamo Paulo teaꞌina teaoaina bakai ꞌekanai tehorotina.
13 Teꞌabi tetibaha,
“Hau neiana hana maearima aokia niani taeara haeaiai Tirama katekuti aina Iuda haumai emai rauhubu kateꞌoatana.”
14 Paulo aba keꞌabi aonai Galio ehore Iuda haukia ehina benakia etibaha,
“Wai Iuda haumi,
hau neiana beho ebabainakia ꞌao hoahoa kiꞌa obokia ebabainakia raninai wai aiami kaꞌi taeana ketaina.
15 Ia neiana hana ꞌabi mai ata mai wai kipomi emi rauhubu atetuakia raninai,
wai kipomi tomoba berona.
Taba ṉahomakia hana au robakia aꞌi kahu.”
16 Weiana ia ena ꞌabiai Iuda haukia bakai ꞌekanai teuꞌu ahinakia.
17 Ia ikoinai temikiri marea poki hauna Sostene teaꞌi ꞌinina bakai ꞌekana wairanai teahuahu banaina.
Iamo Galio hanona aka weiana robana aꞌi eahuna.
Paulo Emue Eao Suria Hanona Antioka.
18 Paulo wapu baika Korintoai emiaho murinai,
uahoꞌabana ehabonakia Priskila mai Akula hanona ia teꞌabana kipokia aunohiai tebeau banai Suria teao.
Aunohiai aꞌi tebeau ahi aonai Kenkrea aiaranai buina maikoina terehe obona pokina ꞌabiꞌuai ha Tirama wairanai ebabaina hauna ebaorena paunai.
19 Epesoai tekaraꞌau aonai Paulo ehore Priskila mai Akula weia ehaobonakia.
Ia ikupaiana eao Iuda haukia ekia mareai ekatoto weia Iuda haukia kipokia teroba ahu.
20 Weiana Iuda haukia Paulo tenoina herekiai rani homaꞌana kemiaho,
ia eubo.
21 Ia aba kekaꞌa aonai ehina benakia etibaha,
“Tirama kenuatae raninai kamue kamai heremi.”
Epua aunohiai eheꞌau Epeso ehabona.
22 Paulo Kaisareai ekaraꞌau ba eao Ierusalemai uaꞌa Tirama ena marea haukia etoanakia epua eriri Antioka eao.
23 Weia Antiokai rani baika emiaho murinai eao Galatia mai Furugia hanokia maikoina aonai ekaꞌa ꞌeka ha ha aokiai aꞌikakauma haukia ikoinai ebataburanakia.
Apolo, Epesoai Eiroro.
24 Weiana Iuda hauna ha atana Apolo ia hanona Alesandereai erama hauna emai Epeso.
Ia hanona ꞌabiꞌabi harai hauna abomo Puka robena ꞌabikia eꞌiobi harainakia hauna.
25 Ia hana Obiapaka ena baꞌiobi taearanai ꞌiobi eaꞌina mai Iesu pouna namokia berokia ebaꞌiobiai mai aona tohanai eiroroai,
iamo ia ena ꞌiobi hana Ioane ena baꞌuere robeaimo epua.
26 Ia hanona mai nuakoꞌona Iuda haukia ekia marea aonai eiroro,
Priskila mai Akula ia aiana teona raninai tebakaꞌana teaoaina ekia ituai Tirama ena ꞌabi taearana tohana ia herenai tehinahina haraina.
27 Apolo enuatae keao Akaia aiarana raninai Epesoai ṯemiaho aꞌikakauma haukia temikiri ia tebataburana,
epua marere ha tererena eao Akaiai ṯemiaho aꞌikakauma haukia herekiai,
weiana ia keao weia raninai aonamoai kateaꞌi taeana.
Ia weia ekaraꞌau raninai Tirama ena aokoꞌo hoanai teaꞌikakauma haukia herekiai barai barai hauna tohanai eao.
28 Ia ena ꞌabi taburai hanona Iuda haukia mako wairakiai ꞌabi baihara taeai eba ꞌehonakia,
ia Puka robena ꞌabinai ebatoha tohana Iesu hanona bamauri hauna Keriso.