Tesalonikai Iripu Rarina Erama.
17
Paulo mai Sila ohi teao Amfipoli mai Apolonia hanokiai tekabanai teao Tesalonika weia hanona Iuda haukia ekia marea ha.
2 Paulo ena hoa hoa tainai eao marea aonai etoto.
Weia beraura robe aihau aokiai maearima kipokia teroba ahu Puka Robenai terere ꞌabikia tohakiai eꞌabiꞌabi,
3 ehina hina harainakia,
ꞌabikia ebawaira tina harainakia Keriso hanona kehau haiara mai ꞌariai kemikiri mue,
etibaha,
“Iesu neiana au pouna nahinana wai heremiai hauna hanona Keriso.”a
4 Iuda haukia baika aokia teba kabanainakia Paulo mai Sila kipokia tebahamomo,
Helene maearimakia Tirama timariki aina haukia boꞌokia abomo kipokia tebahamomo baiatakiai hanona obia babiꞌekia boꞌokia.
5 Ia Iuda haukia baika tewamuru buonai aru ꞌabaea haukia ekia hoa tekiꞌa haukia kawakawa ꞌekanai tebararonakia tebatoꞌunakia iripu rarina aiara apaꞌuana aonai teba ramana.
Hau ha atana Iason ena itu teao Paulo mai Sila katetabunakia kateba karahinakia maearima wairakiai.
6 Ia aꞌi tetabu ahinakia buonai Iason mai aꞌikakauma haukia baika itu weianai teberi ahinakia temaiainakia aiara apaꞌuana tipoki aina haukia wairakia teio tetibaha,
“Hau baika hanopaka maikoinai ripuripu tibabai haukia bariu temai eka aiara apaꞌuana aonai.
7 Ba Iason hanona eaꞌi taeanakia ena ituai ebatotonakia.
Hau weiakia hanona Kaisa ena rauhubu tikabenakia,
teꞌabi tetibaha,
Obia ꞌarana haeai ha nemiaho.
Ia atana hanona Iesu.”
8 ꞌAbi neiana teona raninai maearima toꞌuna mai aiara apaꞌuana tipoki aina haukia kipokia ꞌuru rarina tebabuana.
9 Aiara apaꞌuana tipoki aina haukia tehore Iason mai ꞌabana kipokia tehina benakia moniai bakai arana tehorena ba tehabonakia katekaꞌa.
Iuhubeau Haukia Teao Berea.
10 Rabi weiana aonai aꞌikakauma haukia tehore Paulo mai Sila teuhunakia Berea teao.
Weia tekaraꞌau raninai berokiai Iuda haukia ekia marea teao.
11 Iuda haukia weiakia Bereai ṯemiaho haukia hanona mai ekia aia oꞌo ba Tesalonika maearimakia,
aokia tohanai pou namona teona ba rani ikoinai Puka Robena ꞌabikia temarere ainakia kateꞌiobina Paulo ehina haukia hanona tohakia.
12 Ua buonai boꞌokia teaꞌikakauma,
Helene obia babiꞌekia boꞌokia mai Helene haukia boꞌokia abomo teaꞌikakauma.
13 Ia Iuda haukia Tesalonikai ṯemiaho haukia Paulo Tirama ena ꞌabi Berea aonai neiroro aina pouna teona raninai temai weia mako tebahi ahinakia tebaripu ripu.
14 Beronai mo aꞌikakauma haukia tehore Paulo teuhuna poe taina eao.
Ia Sila mai Timoteo ohi hanona Bereai temiaho.
15 Maearima baika Paulo tebakaꞌana haukia Paulo kipokia teaomo Atene,
ba ia hanona temue teao Berea,
Paulo ena ꞌabi teaoaina Sila mai Timoteo herekia kateao biai Paulo herena.
Paulo Ateneai Eiroro.
16 Paulo Ateneai Sila mai Timoteo neꞌimanakia aonai aiara apaꞌuana aonai kaibaꞌuku eboꞌo kiꞌa eihanakia hanona aona ehaiara kiꞌa.
17 Ua buonai Paulo hanona marea aonai Iuda haukia mai Helene haukia Tirama ṯekuti aina haukia kipokia teroba ahu,
haeamona rani ikoikiai hanona kawakawa ꞌekanai tikaoao kaoao maearimakia mo ꞌakina kipokia terobahu.
18 Epikuro haukia mai Stoiko ꞌiobi haukia baika Paulo kipokia teꞌabi baitaeai.
Baika tebakai bakai tetibaha,
“ꞌAbi ꞌabaea ꞌabi ꞌabaea hauna neiana taba neꞌuahina?”
Baika teꞌabi,
“Ia hanona hanopaka haeai tiramakia robakia niahuna.”
ꞌAbi neiana tehinana pokina Paulo hanona Iesu mai ena mikiri mue pouna namona eiroro aina.
19 Ua buonai Paulo teaꞌina teaoaina toꞌu ꞌekana ha atana Areopago ai weia tehina bena tetibaha,
“Ai ṯanuatae kataꞌiobina oi baꞌiobi mahamahana tabana neiana robana nuahuna?
20 Taba baika nohina ꞌurukia taoꞌo hanona heremaiai tehaeai kiꞌa baha,
ua buonai ai ṯanuatae anikia taba hanona kata ꞌiobinakia.”
21 (Atene haukia mai atauꞌai temai haukia ꞌeka weianai ṯemiaho haukia hanona taba haeai haeai robakia aꞌi tiahu,
ia rani ikoinai taba mahamahakia poukia tioꞌo mai robakia tiahu.)
22 Paulo ꞌeka weiana Areopago toꞌu haukia wairakiai ekoroti eꞌabi etibaha,
“Wai Atene haumi e,
au naihanimi hanona wai taeara ikoinai kuti akakiai tutabura.
23 Eꞌu kaoao kaoao emi aiara apaꞌuana aonai emi kuti ꞌekakia aihanakia aonai emi itara robena ha ahana ṉa terere aihona ‘Aꞌi haꞌiobina Tiramana herena’ hauna atabu ahina.
Weiana wai aꞌi toꞌiobina hauna tokuti aina,
iamo bariu wai heremiai kairoro aina.
24 “Tirama weiana hauna hanopaka mai aona tabakia ikoikia ebabainakia,
ia hanona kupa mai hanopaka Obiapakana ba maearima imakiai tebabai mareakia aokiai aꞌi nemiaho.
25 Abomo ia taba ha aꞌi nikapu aika taba imakai pahabena hauna aꞌi niraonana,
pokina ikupaiana mauri maeabu mai taba haeai haeai ikoinai maearima nibenakia.
26 Hau hamona herenai itubu haeai haeai maearimakia ikoikiai ebabainakia hanopaka maikoina aonai katemiaho.
Ia kipona ehore ekia miaho ranikia tohakia mai ekia hano hoakia ebaꞌoru ꞌuainakia.
27 Tirama aka neiakia ebabainakia hanona maearima ikoinai katemai herena ia katetabu ahina,
ꞌabi tohana Tirama hanona ataꞌuai ahaꞌi ia aika herekai.
28 Maearima baika ṉa tiꞌabi aiho,
‘Ia aonai nahamauri
nahaibiu ibiu mai nahamiaho.’
Matoha emi ori kikipa haukia teꞌabi ꞌabana,
‘Aika hanona ia nahuna.’
29 Ba aika Tirama nahuna raninai Tirama hanona weiakia gold ꞌao silba ꞌao pihara maearima aotipakia imakiai tebabainakia ꞌabakiai aꞌi kahabaona.
30 “Tirama hanona maearima ia aꞌi teꞌiobina raninai ekia poꞌo aba eiha haonakia,
ia bariu hanona ꞌeka ikoinai maearima ikoikiai nehinabe pahihinakia kateraona kabe.
31 Weiana ia bakai ranina ha aba ebaꞌoruna,
ena maearima ha eaꞌi taeana,
hauna kehore hanopaka maikoina taeara beronai kebabakaina.
Tirama ehore hau weiana ꞌariai ebamikiri muena hanona maearima ikoikiai wairakiai aka neiana ebatohana.”
32 ꞌAriai emikiri mue ꞌabina Paulo ehinana aiana teona raninai,
baika ia teiriri aina,
ia baika hanona teꞌabi,
“Ai ṯanuatae ꞌabiꞌabi neiana kohina muena aiamu kataona.”
33 Weiana murinai Paulo ꞌeka weianai ekapare.
34 Maearima baika Paulo kipokia tebahaeamo abomo teaꞌikakauma.
Baiatakiai hanona bakai hauna ha atana Dionusio,
ia bakai ꞌekana Areopago tipoki aina haukia ha,
haeamona babiꞌe ha atana Damari mai maearima haeai baika abomo teaꞌikakauma.