Timoteo, Paulo Mai Sila Ohi Eꞌabanakia.
16
Paulo eao Derebe ba haeamona eao Lustera ai ekaraꞌau,
aꞌikakauma hauna ha weia nemiaho ia atana hanona Timoteo,
hinana hanona Iuda babiꞌena Iesu niaꞌikakaumana,
ia hamana hanona Helene hauna.
2 Aꞌikakauma haukia weia Lustera mai Ikonio ai ṯemiaho haukia Timoteo ena namo pouna tehinana.
3 Paulo enuatae Timoteo ia kebakaꞌana kipokia kateao,
ba etarena pokina Iuda haukia weia ṯemiaho haeamona teꞌiobina ia hamana hanona Helene hauna.
4 Aiara ha ha aokiai tekabanai aonai iuhubeau haukia mai ꞌuai haukia Ierusalemai ṯemiaho haukia rauhubu weiakia tebatohanakia haukia ia terarua tehore tehinanakia maearima katekaꞌaina.
5 Ua buonai Tirama ena marea haukia ekia aꞌikakauma hanona etabura abomo maearima ekia boꞌo eapaꞌua hao apaꞌua hao beraura ha ha aokiai.
Paulo Mahabanaiai Makedonia Hauna Eihana.
6 Paulo mai ꞌabana kipokia teao Furugia mai Galatia hanokia aokiai tekabanai pokina Auba Robe ehore ekaiabunakia Asia hanonai Tirama ena ꞌabi aꞌi kateiroro aina.
7 Teao Musia hano hoanai tekaraꞌau aonai teraonana Batunia hanona kateao,
ia Iesu Aubana ebamuenakia.
8 Weiana buonai Musia aiaranai tekabanai teriri teao Toroa aiarana.
9 Rabi weianai Paulo emahabanai,
ena mahabanai aonai Makedonia hauna ha eihana ia wairanai ekoroti enoina etibaha,
“Komai Makedoniai ai kobarainamai.”
10 Paulo ena mahabanai weiana murinai ai tanoanoa taeara tatabu kataeao Makedonia,
pokina ai taꞌiobina Tirama hanona eaparinamai pou namona weia katairoro aina.
Ludia Keriso Ena Maearimai Eao.
11 Weia Toroai hanona aunohiai taeheꞌau tabeau berona taeao Samotrake.
Haeamona erani hanona tabeau taeao Neapoliai takaraꞌau.
12 ꞌEka weiana tahabona takaꞌa taeao aiara apaꞌuana Pilipo,
weiana hanona aiara koriꞌuaina Makedonia hanona aonai Roma ena ihaꞌini baꞌanai emiaho.
Ba wapu baika weia tamiaho.
13 Beraura Robenai aiara paꞌabinai takarahi taeao ate haianai taraonana bahubaꞌari ꞌekana ha weia.
ꞌEka weianai tamiati babiꞌe baika weia tetoꞌu haukia kipokia taꞌabiꞌabi.
14 Weiakia aiamai teona babiꞌekia baiatakiai ha atana Ludia ena aiara hanona Tuatira.
Ia hanona habuni birokia nikawa kawainakia.
Ia abomo Tirama nekuti aina babiꞌena ha.
Obiapaka ehore aona ebaeana ba Paulo ena ꞌabi eaꞌi taeana.
15 Weia ia mai ena itu haukia ikoikiai tabaꞌuere robenakia murinai enoinamai kataeao ena itu ba eꞌabi etibaha,
“Aomiai tuaꞌi taeanaꞌu au Obiapaka iaꞌikakaumana babiꞌeꞌu ha raninai patomai eꞌu ituai weia patomiaho.”
Ena bahiahi ꞌabina eaoainamai ena itu.
Pilipoai Paulo Mai Sila Tebawapuranakia.
16 Rani ha bahubaꞌari ꞌekana taeao aonai taꞌaraꞌi uahona ha aonai auba kiꞌa obona nemiaho uahona kipokia tabaitabu ahi.
Uaho weiana hanona taba wairai katerama haukia ihina poukiai ena poki hauna ena kepu boꞌokia ebabainakia.
The Conversion of the Jailer (Iuhubeau 16:16-40)
17 Uaho neiana Paulo mai ai murimaiai ekaꞌa eio etibaha.
“Hau neiakia hanona ꞌubi ꞌakiꞌakinai nemiaho Tiramana ena iuhubeau haukia,
bamauri taearana ṯeiroro aina heremiai.”
18 Rani boꞌokia aokiai ia ua ebabai aiho.
Ba Paulo haiana ebapoꞌona buonai ekori kabe auba kiꞌa obona ebatana etibaha,
“Iesu Keriso atanai nahina beniꞌo,
uaho naiana aonai mokarahi!”
Beronai auba kiꞌa obona uaho ehabona ekarahi.
19 Uaho ena poki hauna eꞌiobina ena kepu tabu ahi taearana aba epua,
weiana Paulo mai Sila teaꞌinakia teberinakia teaoainakia maearima ekia toꞌu ꞌekana Roma haukia apaꞌuakia herekiai.
20 Hau apaꞌuakia wairakiai teba korotinakia ba teꞌabi tetibaha,
“Maearima rua neiakia hanona Iuda haukia,
eka aiara aonai ripuripu tibabaina.
21 Abomo hoahoa tibaꞌiobinaka haukia hanona aika Roma hauka eka rauhubu tainai aꞌi kahaꞌi taeanakia mai aꞌi kahakaꞌa ainakia haukia.”
22 Toꞌu haukia temikiri Paulo mai Sila herekiai ꞌabi kiꞌa obokia tehinanakia,
ba bakai teꞌuai aina haukia ꞌabi tebaibeni terarua ekia habuni katetapanakia mai kateꞌatinakia.
23 Teꞌati kiꞌanakia epua murinai teaoainakia wapura itunai tetori totonakia,
wapura neꞌimanakia hauna tehina bena kekaiabu ꞌini harainakia.
24 Ua tehinabe aihona buonai wapura ꞌima hauna terarua eaoainakia ikaihuri aona ꞌakinai hauna aonai ehorotinakia,
aekia matiu baiatakiai ebahutanakia ebiri ꞌini harainakia.
25 Rabi wapukaꞌa oreꞌakuai Paulo mai Sila tebahubaꞌari mai ekia huiai Tirama tebanamona,
wapura haukia hanona ia aiakia tebahuaina.
26 Beronai kanokau rarina ekaꞌa wapura ituna maikoina ebaibiuna,
paꞌabi ikoikiai tekaikau mai wapura haukia imakia aekia tabirikia ikoinai tetaꞌi.
27 Wapura ituna neꞌimana hauna paruana enoꞌa,
paꞌabi ikoikiai tekaikau eihanakia raninai emikiri ena kareba eberi ꞌauna kipona keahu ꞌarina pokina ia eraonana wapura haukia hanona aba tebeau ꞌakauma.
28 ꞌA Paulo eio aota etibaha,
“Kipomu aꞌi moahu ꞌariniꞌo,
ai ikoimaiai neiamai ṯamiaho.”
29 Wapura ituna neꞌimana hauna eapari ramepa katemaiaina,
ebeau toto eao etaꞌu buonai mai ꞌururu ꞌururuna Paulo mai Sila wairakiai ekaipehu.
30 Ba eba karahinakia eaoainakia mahanai ebakainakia etibaha,
“Hau apaꞌuami e,
taba kababaina hanona bamauri katabu ahina?”
31 Terarua tehina bena tetibaha,
“Obiapaka Iesu Keriso koaꞌikakaumana hanona bamauri koaꞌina oi mai emu itu haukia ikoikiai.”
32 Ba terarua Obiapaka ena ꞌabi teiroro aina ia mai ena itu haukia ikoikiai wairakiai.
33 Rabi weiana aonai terarua eaoainakia,
haukia tebamaniꞌanakia ꞌekakia eututu harainakia,
ba beronai Paulo mai Sila tehore ia mai ena itu haukia ikoikia tebaꞌuere robenakia.
34 Wapura iꞌima hauna terarua eaoainakia ena ituai eroꞌonakia,
ba ia mai ena itu haukia ikoikiai teaonamo pokina Tirama tiaꞌikakaumana paunai.
35 Erani raurani aonai bakai teꞌuai aina haukia ekia ꞌabi tebaibeni habuni haukia teuhunakia teao wapura ꞌima hauna herena tetibaha,
“Hau neiakia kobakarahinakia katekaꞌa.”
36 Wapura iꞌima hauna Paulo ehina bena etibaha,
“Bakai ṯeꞌuai aina haukia ꞌabi tebaibeni,
oi mai Sila ohi kaba karahinimi katokaꞌa,
ua buonai tomokarahi mai baibuami tomoao.”
37 Ia Paulo bakai ṯeꞌuai aina haukia ekia habuni haukia ehina benakia etibaha,
“Ai hanona Roma maearimamai,
emai beho ahaꞌi bakai ꞌekanai aꞌi teba korotinamai ia maearima wairakiai teahunamai haeamona wapura itunai tekaiabu ꞌabaeanamai.
Ba bariu hanona bunianai kateba karahinamai,
u?
Aꞌi ketai ꞌapuana,
ia kipokia katemai kateba karahinamai.”
38 Habuni haukia temue teao bakai ṯeꞌuai aina haukia haiakiai teꞌabi ia terarua hanona Roma maearimakia,
ꞌabi neiana teona raninai bakai ṯeꞌuai aina haukia tetaꞌu wairai.
39 Bakai ṯeꞌuai aina haukia temikiri teao terarua haiakiai teꞌabi ꞌabi harai aꞌi temeꞌopuere,
ba teba karahinakia,
tenoinakia aiara weiana katehabona.
40 Paulo mai Sila wapura itunai tekarahi teao Ludia ena itu weia aꞌikakauma haukia baika kipokia tebaitabu ahi,
batabura ꞌabikiai tehina benakia ba tekaꞌa.