Ierusalemai Tirama Ena Marea Haukia Tetoꞌuna.
15
Iuda haukia tiaꞌikakauma haukia baika Iudeai temai Antiokai aꞌikakauma haukia tebaꞌiobinakia tetibaha,
“Mose ena rauhubu ihobonai aꞌi katetarenimi raninai wai hanona bamauri aꞌi katoaꞌina.”
2 ꞌAbi weiana paunai Paulo mai Banaba ohi maearima weiakia kipokia tebaihara tae eaomo tebaiara kiꞌa,
ua buonai Tirama ena marea haukia tehore Paulo mai Banaba ohi teaꞌi taeanakia aꞌikakauma haukia baika kipokia kateao Ierusalema,
weia iuhubeau haukia mai ꞌuai haukia herekiai ꞌabi weiana katebakai bakaiaina.
3 Tirama ena marea haukia tehore ia teuhunakia,
weiana Foenikia mai Samaria hanokiai tekabanai aonai,
rama haeai haukia ekia mauri aea tebaibeni aiho hauna pouna tekikipana.
Pou neiana teona hanona aꞌikakauma haukia ikoikiai teaonamo kiꞌa.
4 Ia Ierusalemai tekaraꞌau raninai Tirama ena marea haukia,
iuhubeau haukia,
mai ꞌuai haukia tehore ia teaꞌi taeanakia,
ba Paulo mai Banaba ohi Tirama taba ebabaina ia imakiai hauna ikoikiai wairakiai pouna tehinana.
5 Aꞌikakauma haukia baika weiakia Parisea itubunai tekarahi haukia temikiri teꞌabi tetibaha,
“Rama haeai haukia kahatarenakia abomo kahahina benakia Mose ena rauhubu hanona kateꞌima haraina hanona mauri banaibanai kateaꞌina.”
6 Weiana iuhubeau haukia mai ꞌuai haukia kipokia tetoꞌu atetua ꞌabina weiana teroba ahuaina.
7 Rani homaꞌana tebaihara tae murinai Pereto emikiri eꞌabi etibaha,
“Uahoꞌabaꞌu e,
aba toꞌiobina Tirama ehore wai baiatamiai au etinaꞌanaꞌu pinaꞌuai pou namona kahinana rama haeai haukia kateona kateaꞌikakauma.
8 Maearima aokia eꞌiobinakia Tiramana ehore aika herekai ebabaina ihobonai rama haeai haukia abomo Auba Robe ebenakia,
hoa weianai Tirama ia eaꞌi taeanakia hauna ebatohana.
9 Ia mai aika kipokia baiataka aꞌi ebahaeaina,
Tirama ehore ekia aꞌikakauma paunai aokia ebamaha mahanakia ia wairanai.
10 Ia aehoma buonai Tirama tuhobona ꞌabaꞌabaka ꞌao aika Mose ena rauhubu ikaꞌaina pumana habuana aꞌi etainaka hauna aꞌikakauma haukia ahakiai tuhore ꞌauna?
11 Aika nahaꞌikakauma,
ia bamauri tiaꞌina ihobonai,
Obiapaka Iesu ena aokoꞌo hoana paunai bamauri kahaꞌina.”
12 Toꞌu haukia ikoikiai ꞌuruꞌurukia ahaꞌi,
ia Banaba mai Paulo ohi imakiai Tirama hoa mai bataꞌutaꞌu huri akakia rama haeai haukia herekiai ebabainakia haukia poukia tehinanakia hanona aiakia tiona.
Iakobo Ena Iroro.
13 Ia ekia ꞌabi eore murinai Obiapaka hatina Iakobo emikiri eꞌabi etibaha,
“Uahoꞌabaꞌu e,
aiaꞌu tomona.
14 Simonaa aba ehinabe harainaka Tirama ehore rama haeai haukia eraonanakia,
koriꞌuaina ia baiatakiai maearima aea eaꞌi taea aihonakia ia ꞌeuna.
15 Babai neiana hanona mahabanai haukia ekia ꞌabi kipokia teihobo,
ṉa terere aihona,
16 ‘Neiana murinai au kamue kamai,
Davida ena obia aiarana eꞌeho
hauna kabakori muena.
Teꞌitiꞌiti haukia kabamahamaha
muenakia.
17 Weiana maearima harina
temauri haukia ikoinai
mai rama haeai haukia weiakia
ataꞌuai aparinakia au ꞌeuꞌu ai
kateao haukia ikoikiai hanona
au Obiapaka katetabunaꞌu.
18 Obiapaka ua eꞌabi aiho,
ꞌabi neiana hanona aba uaꞌi baha
ebaꞌiobi aina.’ Amo 9.11, 12
19 Ua buonai eꞌu raona hanona rama haeai haukia weiakia Tirama herena timai haukia ekia taeara aꞌi kahabapahihi kiꞌa bahana.
20 Namona hanona marereai kahahina benakia,
kaibaꞌuku teberuberu benakia tabakia Tirama wairanai teꞌopu haukia aꞌi kateani,
aꞌi katenabau kiꞌa,
mai mahi ꞌakokia tebatoꞌo ꞌarinakia haukia aꞌi kateani,
abomo aruarukia aꞌi kateinu.
21 Pokina ꞌuaina raninai emai mo bariu Mose ena rauhubu weiakia hanona beraura robe ikoikiai aokiai tetuabina marea ha ha aokiai abomo pouna teiroro aina aiara ikoikiai aokiai.”
Toꞌu Haukia Rama Haeai Haukia Herekiai Marere Tetiu ahina.
22 Ba iuhubeau haukia mai ꞌuai haukia Tirama ena marea haukia ikoikiai kipokia teraonana weia baiatakiai maearima baika kateaꞌi taeanakia Paulo mai Banaba kate ꞌabanakia Antioka kateao,
ba teaꞌi taeanakia haukia neiakia,
Iuda atana teaparina Barasaba mai Sila,
terarua hanona maearima iꞌuaiaikia haukia uahoꞌabakia baiatakiai.
23 Marere ṉa terere aihona kaꞌa haukia tebenakia,
“Ai iuhubeau mai ꞌuai haumai,
ai uahoꞌabami,
emai banamo ꞌabina niwahi
wai uahoꞌabamai rama haeai ai torama Antiokai Suriai mai Kilikiai ṯomiaho haumi heremi.
24 Ai poumi aba taona ꞌabamai baika neia tewahi,
ekia ꞌabiai aomi tiba haiaranakia abomo aomi tibaroꞌarinakia,
ia ai hanona ꞌabi uahomana aꞌi tabenakia.
25 Ua buonai ai tatoꞌuna emai raona tabahamona hau baika kataꞌi taeanakia katauhunakia eka raonaꞌau haukia Banaba mai Paulo kipokia katewahi.
26 Neiakia Banaba mai Paulo terarua hanona ekia mauri aꞌi tiraonanakia aika eka Obiapaka Iesu Keriso atanai.
27 Iuda mai Sila ṯauhunakia marere tarerena hauna ia pinakiai katehinana abomo katebatohana.
28 Auba Robe mai ai kipokia ṉa taraona aihona,
ai puma haeai aꞌi katabenimi rauhubu neiakia ahakiai.
29 Kaibaꞌuku wairanai tehoroti anianikia aꞌi katoani,
mahi mai aruarukia aꞌi katoani,
mahi ꞌakokia tebatoꞌo ꞌarinakia haukia aꞌi katoani,
abomo nabau akakia aꞌi katobabai.
Wai taba neiakia aꞌi katobabai hanona emi aka kebero.
Tarere nonoa.
Haparua.”
30 Marea haukia tehore hau naiakia teuhunakia,
ia teriri teao Antiokai,
aꞌikakauma haukia tebatoꞌunakia ba marere tebenakia.
31 Marere tetuabi aonai batabura ꞌabikia aiakia teoꞌo hanona aokia enamo wairai.
32 Iuda mai Sila hanona mahabanai haukia terarua ꞌabi namokia tehina aꞌikakauma haukia aokia tebakironakia mai teba taburanakia.
33 Ia rani baika weia temiaho murinai,
aꞌikakauma haukia ia tebaparuanakia temue teao Ierusalema ia teuhunakia haukia herekia.
34 (Ia Sila enuatae buonai emiaho.)
35 Paulo mai Banaba hanona Antiokai temiaho,
ia mai maearima boꞌokia kipokia Obiapaka ena ꞌabi tebaꞌiobi aina abomo pou namona teiroro aina.
Paulo Mai Banaba Baiatakia Epaꞌa.
36 Wapu baika teore murikiai Paulo Banaba ehina bena etibaha,
“Aika hamamue hamaeao aiara weiakia Obiapaka pouna hairoro aina haukia aokiai uahoꞌabaka weia aea tibabai aiho hanona kahaihanakia.”
37 Ba Banaba ena nuatae hanona Ioane weiana tiaparina Mareko hauna kipokia kateao haeamo.
38 Ia Paulo ena raona,
ia kipokia kateao hanona aꞌi enamo pokina ia Pamfuliai weia hanona eubo ekia akai aꞌi eꞌabanakia.
39 Weiana buonai terarua tebaiara baiatakia epaꞌa.
Banaba ehore Mareko eaꞌina aunohiai teheꞌau Kupuro teao.
40 Ia Paulo ehore Sila enuatae aina katekaꞌa aonai uahoꞌabakia tehore Obiapaka ena aokoꞌo hoanai tebanamonakia.
41 Ia terarua teao Suria mai Kilikia hanokiai tekabanai,
Tirama ena marea maearimakia weia haukia teba taburanakia.