Aneru Korenelio Herenai Ewaira Tina.
10
Kaisarea aiaranai Roma huari hauna ha atana Korenelio,
Italia huari haukia ikoinai hinabu hamomo ekia poki hauna.
2 Ia mai ena itu haukia kipokia hanona Tirama timariki aina mai ena nuatae tikaꞌi haraina,
ia ena taba boꞌokia Iuda haukia uraru haukia eberuberu benakia,
abomo rani ikoinai ebahubaꞌari Tirama herenai.
3 Rani ha atiaha abiranai beraura hoana aihau ꞌabana,
ia emahabanai hanona Tirama ena aneru ha eiha haraina emai ia ena ituai etoto ehina bena etibaha,
“Korenelio e.”
4 Ia mai taꞌuna aneru eiha ꞌiniꞌinina eꞌabi etibaha,
“Obiapaka e,
omai hanona taba?”
Aneru ia ehina bena etibaha,
“Emu bahubaꞌari mai emu beruberu uraru obarainakia haukia Tirama aba eaꞌi taeanakia ba ia hanona oi aꞌi nireaniꞌo.
5 Bariu emu miori baika mouhunakia temeao Iopa,
hau ha atana Simona atana ibaruana Petero katehina bena kipokia katemai.
6 Ia hanona Simona ha poromakau paruakiai taba haeaihaeai nitainakia hauna ena ꞌekai nemiaho,
ena itu hanona poe haianai.”
7 Aneru ꞌabi weiana ebaibeni ba ekaꞌa,
murinai Korenelio ehore ena ituai taꞌaraꞌi miorikia rua mai huari hauna ha Obiapaka ena nuatae nikaꞌaina hauna kipokia eaparinakia.
8 Weiana Korenelio herenai terama haukia maikoinai hau weiakia teaihau ehina benakia,
epua euhunakia Iopa teao.
Petero Mahabanai Tabana Ha Eihana.
9 Wapu ibaruana atiahanai maearima weiakia Iopa aba tebarina hana Petero ekaraꞌau eao itu kapena arai ꞌekanai uaꞌa kebahubaꞌari.
10 Mareꞌa eꞌari,
enuatae taba ha pehaea peana,
aniani tibaꞌoru ohonamo aonai ia taba ha eihana matoha nenibi ꞌabana.
11 Kupa ikaikau eihana mai taba ha habuni panabana rarina ꞌabana puana bani banikiai iaꞌi toꞌo ibariri nimai hanopaka.
12 Habuni weiana aonai mahi aekia bani bani haukia ikoikiai,
hanopakai tikara haukia ikoikiai mai ꞌubiai tirobo roborobokia ikoikiai weia aonai iutaꞌau.
13 Ba aia ha ia ehina bena etibaha,
“Petero e,
omikiri moahu moani.”
14 ꞌA Petero aia weiana ena ꞌabi ebamuena etibaha,
“Obiapaka e,
ahaꞌi ꞌakina,
au mahi Tirama wairanai teꞌopu haukia ꞌao aꞌi terobe haukia ha aꞌi ṉani ꞌapuana.”
15 Aia weiana haeamona Petero ehina bena etibaha,
“Tirama aba ebamaha mahanakia haukia oi ꞌopukia aꞌi kohinana.”
16 Hoa neiana rani aihau ewaira tina ba beronai habuni weiana hanona iberiꞌau emue eao kupa.
17 Petero mahabanai weiana anina niraonana aonai,
Korenelio euhunakia haukia Simona ena itu tetabu ahina ba temai ena ara paꞌabina ꞌakonai tekoroti.
18 Weiana teapari tebakai bakai Simona atana ha Petero hanona weia nemiaho ꞌao.
19 Petero mahabanai weiana niraona ohona aonai Auba Robe ehore ia ehina bena etibaha,
“Petero e,
maearima aihau hanona oi titabuniꞌo.
20 Momikiri,
moriri moao herekia,
aomu aꞌi kearoꞌari kipokia katoao,
pokina ia haukia au auhunakia.”
21 Petero eriri eao hau weiakia ehina benakia etibaha,
“tutabuna hauna hanona au neiaꞌu.
Emi raona ha buonai tomai,
ꞌu?”
22 Ba ia ena ꞌabi tebamuena tetibaha,
“Ai hanona Korenelio huari haukia hinabu hamomo nipokinakia hauna euhunamai tamai.
Ia hanona bero hauna mai Tirama nimariki aina hauna Iuda haukia ikoikiai hanona ia timariki aina.
Tirama ena aneru ha ia ehina bena kebaiuhu koao ena itu,
weiana oi taba koꞌuahina hanona aiamu keona.”
23 Petero ehore hau weiakia ebatotonakia ituai kipokia teparua.
Erani rauraninai Petero ebaꞌoru ba temikiri tekaꞌa,
aꞌikakauma haukia baika Iopai ṯemiaho haukia abomo ia teꞌabanakia kipokia teao.
Petero Eao Korenelio Ena Itu.
24 Erani ba rani haeai hanona ia Kaisarea aiaranai tekaraꞌau.
Korenelio hanona hatiaꞌana mai ena hau tohakia baika ebeaunakia ia kipokia Petero kateꞌimana.
25 Petero ituai ekaraꞌau ba Korenelio ohi tebaitabu ahi aonai Petero aena pokinai eꞌumuti ekuti aina.
26 Ia Petero Korenelio eberi taeana ehina bena etibaha,
“ꞌOmikiri,
au hanona maearima ꞌabaeaꞌu oi ꞌabana.”
27 Weiana terarua mai ꞌabiꞌabikia ituai tekatoto aonai maearima boꞌona tetoꞌuna eihanakia.
28 Ba Petero ehina benakia etibaha,
“Wai toꞌiobi kiꞌa bahana Iuda hauna hanona rama haeai hauna ohi aꞌi katemiaho haeamo,
abomo aꞌi keao herena mai rauhubuna.
Ia Tirama ebaihanaꞌu hau ha ꞌopuna ꞌao aꞌi erobe hauna aꞌi kahina ꞌapuana.
29 Weiana buonai emi beaubeau eao hanona beronai amai aꞌi aubo.
Eꞌu bakai bakai hanona neiana,
taba buonai tobaiuhu au amai?”
30 Korenelio ia ena ꞌabi ebamuena etibaha,
“Wapu bani aba teao aonai,
atiaha abiranai beraura hoana aihau ꞌabana bariu ihobona ṉahomanai eꞌu ituai abahubaꞌari aonai beronai mo hau ha ena habuni ꞌimareꞌimarena wairaꞌuai ekoroti.
31 Ba ehina benaꞌu etibaha,
‘Korenelio e,
Tirama hanona emu bahubaꞌari aiana abeona abomo emu beruberu akakia uraru herekiai haukia niraona ꞌiniꞌininakia.
32 Ua buonai ꞌabi kouhuna keao Iopa,
Simona atana ha Petero kemai,
ia hanona hau ha poromakau paruakia nitai hauna atana Simona ena ituai nemiaho weia poe haianai.’
33 Weiana buonai ꞌabi auhu noanoana ewahi,
ba omai hanona enamo.
Ai ikoimaiai neia Tirama wairanai aba tatoꞌuna,
Obiapaka oi ebahi ahiniꞌo ꞌabikia ikoikiai kohinanakia aiamu kataona.”
Petero Korenelio Ena Ituai Eiroro.
34 Petero ena ꞌabi eaꞌi ramana etibaha,
“ꞌAbi tohana,
bariu aꞌiobi haraina Tirama hanona maearima ha aꞌi nitaina ia ikoikiai ihoboai niba kaꞌanakia.
35 ꞌAbina ahaꞌi itubu tabana hauna ia Tirama nimariki aina abomo bero akakia nibabai hauna Tirama nihore niaꞌi taeana.
36 Tirama ꞌabi euhuna eao Isaraela maearimakia herekiai hanona neiana,
baibua pouna namona hana Iesu Keriso aonai nimai,
ia hanona maearima ikoikiai ekia Obiapaka.
37 Wai aba toꞌiobina hoa neiana hanona Galilea ai eaꞌi ramana,
Ioane maearima wairakiai baꞌuere robe eiroro aina murinai Isaraela hanona maikoina aonai erama.
38 Wai Iesu Nasareta hauna toꞌiobina,
Tirama ehore Auba Robe mai hiabu ia ahanai ebakikina,
Iesu eao ꞌekakia ikoikiai namo ebabai,
mai Satani eaꞌi kiꞌanakia haukia ikoikiai ebamaurinakia,
pokina Tirama hanona ia eꞌabana.
39 Iuda aiarakia maikoina aonai mai Ierusalemai ebabai tabakia ikoikiai mahamaiai taihanakia.
Iuda haukia tehore matiu ibiri ropo ꞌarunai tekoko ꞌauna eꞌari.
40 Ia wapu ibaihaunai Tirama ehore Iesu ꞌariai ebamikirina mai ebawaira tinana,
41 maearima ikoikiai wairakiai ahaꞌi,
ai Tirama aba etinaꞌanamai haumai wairamaiai mo.
Ia ꞌariai emikiri murinai kipokia taniani haeamo abomo bei tainu haumai neiamai hanona ia pouna ṯahinana.
42 Ia ai ehina benamai maearima herekiai pou namona katairoro aina haeamona katahina pou haraina weiana Tirama ehore ia eaꞌi taeana mauri haukia mai ꞌari haukia kebabakainakia haunai ebaona.
43 Mahabanai haukia ikoikiai ia pouna aba tehina haraina,
weiakia ikoikiai Iesu kate aꞌikakaumana haukia hanona ia atanai ekia kiꞌa kehina hao.”
Rama Haeai Haukia Auba Robe Teaꞌina.
44 Petero ꞌabi neiakia nehina ohonakia aonai,
weiakia tibahu haukia ikoikiai ahakiai Auba Robe eriri.
45 Iuda haukia weiakia Iesu tiaꞌikakaumana mai Petero tiꞌabana haukia tetaꞌutaꞌu huri,
pokina Auba Robe ena beruberu hanona rama haeai haukia ahakiai abomo eba ririna,
46 haeamona ia aiakia teona maea haeaihaeai tiꞌabiꞌabi mai Tirama tibanamona.
Weiana Petero eꞌabi etibaha,
47 “Maearima neiakia hanona Auba Robe aba teaꞌina aika haꞌina ihobonai.
Ba tai ia kebamuenakia beiai aꞌi kateꞌuere robe?”
48 Weiana Petero ia ehina benakia Iesu Keriso atanai kateꞌuere robe.
Ba teꞌuere robe murinai Petero tenoina wapu baika weia herekiai kemiaho.